Colosenses 4

1Seajta mú'een, mɨ sej tihuá'aijte'e, setá'aj tíhua'utapuaíjve'en tɨ́j na'a ɨ́ tɨ ruxe'eve'e, tɨ́j na'a tɨ ayén tiraavíjte'e tɨ tihuá'acɨ'ɨti. Ayee xu huárɨni a'iné xu'uri ramua'aree tɨ seɨ́j ajta tejá'amua'aijte'e mú'ejmi. Júte'e pu é'eseijre'e a'ɨ́jna. 2Setá'aj seuj rahuaviira ɨ́ Dios jemi. Caxu a'ij ruaaca. Seajta mú'een, seúche'e tí'ijteujtzi'ire'e ɨ́ Dios. 3Seajta, setá'aj siyen seuj rahuaviira ɨ́ Dios jemi itejmi jɨme'e tɨ ij Dios ayén taataseíjrate'en a'ij tɨ ye'í ti'itɨ́ huáruuren tej ti tiyen tihua'utá'ixaate'en ɨ́ niuucari, tej ti te'ɨ́jna hua'utaseíjrate'en ɨ́ Cɨríistu'u, a'ɨ́jna tɨ rú'avaata ɨ́ Dios jemi. A'ɨ́j pu jɨ́n, nu'uri aiteánami'i. 4Seuche'e xu seajta rahuaviira ɨ́ Dios jemi neetzi jɨme'e nej ni e'ehuauritɨéecan jɨ́n tihuá'a'ixaate'en a'ij tɨ tiraavíjte'e nej niyen rɨcɨ. 5Ayee xu rɨjca mú'een, caxu ché'e sena'a á'ujujhua'ane'en huá'a jamuan ɨ́ mej caí té'atzaahuate'e, sino ayée xu'u rɨjca matɨ́j teɨte ɨ́ mej rɨ́'ɨ metíteumuámua'aree. Ja'anáj tɨ na'a tɨ í'irɨ'ɨri sej siyen huárɨni ɨ́ tɨ i'i xɨ́'epɨ'ɨn, ayée xu'u rɨjca. 6Setá'aj rɨ́'ɨ hua'atá'acare'en se'ɨ́jna jɨme'e sej siyen tí'ixaxa'a, mej mi me'ɨ́jna jɨ́n ráamua'aree ɨ́ sej caí rucɨɨnive'e. Seajta siyen tihuá'a'ixaate'en mej mi huajɨ́jxɨn, mej mi rɨ'éene'e muá'ara'ani. 7Ajta a'ɨ́ɨn ɨ́ Tíquico a'ɨ́jna ɨ́ ta'ihuaara'a ɨ́ Cɨríistu'u jemi, a'ɨ́ɨ pu tejámuaatá'ixaate'esin nain a'ij tɨ tí'inevaɨre'e ineetzi. Jéihua nu raxɨ́'eve'e nemɨ́jna. A'ii pu ari rɨ́'ɨ tináavaɨ ara'axcáacan jɨme'e. Capu ja'anáj á'ɨtzee. Ajta, naíjmi'i tu tí'ivaɨre'e ɨ́ tavástara'a jemi. 8A'ɨ́ɨ j nu jɨ́n neraata'íiti mú'ejmi jemi tɨ ij ayén tejámuaatá'ixaate'en a'ij tɨ tí'itavaɨre'e, tɨ ij rɨ́'ɨ jamuaatá'an. 9Neajta nu jamuan raata'íti ne'ɨ́jna ɨ́ Onésimo, ɨ́ tɨ mú'ejmi jetze ajtéme'ecan. Jé'ecan tu teajta raxɨ́'eve'e te'ɨ́jna ɨ́ ta'ihuaara'a. Capu ajta ja'anáj á'ɨtzee. A'ɨ́ɨ mú nain jɨ́n tejámuaatá'ixaate'esin a'ij tɨ tí'iruure iiyecuí. 10Majta me'ɨ́n ɨ́ ta'ihuaamua'a, a'ɨ́ɨ mú á'amuateujte'e, amuacaícan a'ɨ́jna ɨ́ Aristarco tɨ ajta ayajna aiteánami'i nee jamuan, ajta a'ɨ́jna ɨ́ Marcos, tɨ i'i neuseájra'an pɨ́rɨcɨ a'ɨ́jna ɨ́ Bernabé. Xu'uri ramua'aree a'ij sej ye'í huárɨni a'ɨ́jna jɨme'e, tɨ jɨ́me'en yee tɨ pua'a a'ɨ́ɨn a'uré'enen mú'ejmi jemi a'ɨ́jna ɨ́ Marcos, setá'aj ra'ancuré'evi'itɨn temua'a naa. 11Ajta a'ɨ́ɨn ɨ́ Jesús, ɨ́ tɨ ajta ayén ántehuaa tɨjɨ́n Justo, a'ɨ́ɨ pu ajta á'amuateujte'e. A'íime ɨ́ mej huaíca, a'ii mu'u a'ɨ́ɨn pú'een ɨ́ mej Israél jetze ajtéme'ecan, ɨ́ mej miyen neetzi jetze té'ejtévaɨre'e tej ti tiyen tihua'utá'ixaate'en ɨ́ teɨte jɨ́me'en ɨ́ Dios tɨ tí'aijta íiyen chaanaca japua. Jé'ecan mú rɨ́'ɨ naatá'a ineetzi. 12Ajtahua'a seɨ́j pu á'amuateujte'e, a'ɨ́jna ɨ́ Epafras. A'ɨ́ɨ pu ajtéme'ecan mú'ejmi jetze, ajta pu ravaɨre'e a'ɨ́jna ɨ́ Jesús tɨ i'i Cɨríistu'u. Ja'anáj tɨ na'a pu tí'itese'e a'ɨ́jna jɨme'e tɨ rahuavii ɨ́ Dios jemi mú'ejmi jɨme'e, sej si te'utáviicua'i, sej si caí ti'itɨ́j jɨ́n auteáturan, sej si seajta ra'ará'astijre'en nain jɨme'e a'ij tɨ tí'ijxe'eve'e ɨ́ Dios. 13Ayee nu tejá'amua'ixaate'e tɨ ayén ti'ayajna. A'ɨ́ɨjna ɨ́ Epafras, jé'ecan pu tí'itese'e mú'ejmi jɨme'e, ajta a'ɨ́mej jɨme'e ɨ́ mej me'uun a'uchéjme, a'ájna já'ahua'a Laodicea, majta ɨ́ mej seɨ́j jetze é'eche ɨ́ chajta'a a'ájna Hierápolis. 14A'ɨ́ɨ mú majta á'amuateujte'e, a'ɨ́jna ɨ́ Lucas, ɨ́ tɨ tihuá'ahua'ate, ɨ́ tej raxɨ́'eve'e, ajta a'ɨ́jna ɨ́ Demas. 15Setá'aj siyen hua'utateújte'en neetzi jetze me'ecan a'ɨ́mej ɨ́ ta'ihuaamua'a Laodicea mej a'uchéjme, seajta se'ɨ́jna ɨ́ Ninfas. Setá'aj seajta hua'utateújte'en a'ɨ́mej ɨ́ mej e'etiújse'ɨri a'u tɨ é'eche ɨ́ Ninfas. 16Setɨ́'ɨj seri ra'ujíjve se'íjna i yu'uxari sej si naíjmi'i ráanamua, setá'aj siyen tiu'uta'íte mej mi hua'utánamuajriste'en a'ɨ́ɨme Laodicea mej é'eche. Ajta ɨ́ seɨ́j ɨ́ yu'uxari, Laodicea tɨ é'eme'ecan, setá'aj seajta ra'ujíjve'en sej si seajta naíjmi'i ráanamua. 17Seajta, setá'aj siyen tiraata'ixaate'en se'ɨ́jna ɨ́ Arquipo yee: “Rɨ́'ɨ pepu'u mú'ee, pej pi nain jɨ́n ra'ará'asten ɨ́ tavástara'a tɨ tímuaa'íjcate.” 18Inee, i nej i'i Pablo, a'ij nu jetze já'amuateujte'e a'íjna i nej ra'uyú'uxaca'a nemuajca'a jɨme'e. Caxu yá'uhua'anan ɨ́ nej aiteánami'i. Ché'e a'ij tejá'amuavaɨre'e. Ayee pu icu.

will be added

X\