Colosenses 2

1A'ɨ́j nu jɨ́n niyen raxɨ́'eve'e sej si ráamua'aree nej a'amua japua tí'itese'esin jeíhua. Ayee nu che'atá nena'a huá'a japua tí'itese'e a'ɨ́mej ɨ́ mej Laodicea é'eche, neajta a'ɨ́mej ɨ́ mej caí ja'anáj naaseíj neneerime jetze. 2Ayee nu een jɨ́n rɨcɨ mej mi huateújca'ane ɨ́ ru tzajta'a, mej mi majta naíjmi'i ru'ihuaamua'a muá'ara'ani temua'a naa me'ɨ́jna jɨme'e ɨ́ mej huaújxe'eve'e rujɨ́ɨmua'a. Ayee nu raxɨ́'eve'e tɨ tihuá'acɨ'ɨti ti'itɨ́ tɨ jé'ecan tihua'utéva'ɨrihua'an mej mi yaú'itɨée muá'ara'ani nain jɨme'e, mej mi majta ráamua'aree tɨ ayén ti'ayajna a'ɨ́jna tɨ rú'avaata ɨ́ Dios jemi. A'ii pu a'ɨ́ɨn pú'een a'ɨ́jna tɨ i'i Cɨríistu'u. 3Naíjmi'i ɨ́ tɨ ruxe'eve'e tej ti rɨ́'ɨ mé titeumuámua'aree, jaítze'e pu titaatéva'ɨrihua'an caí tumin tɨ rú'avaata teásta'a. Ajta a'ɨ́ɨn ɨ́ Cɨríistu'u, a'ɨ́ɨ pu taatá'asin tej ti yaú'itɨée tá'ara'ani nain jɨme'e, tej ti ráamua'aree tzáahuati'ira'a jɨme'e. 4Ayee nu tejá'amua'ixaate'e tɨ ij caí ja'atɨ́ amuaacuanamuan a'ɨ́jna jɨme'e ɨ́ niuucari ɨ́ tɨ caí jé'iyecan jɨ́n namuajre'e. 5Canu xaa ye'eche a'amua jamuan, sino ayée nu ye'ɨmuá yé huaca. Capu amɨ́n a'ij. Jéihua nu amua'atamuá'areeri yú ne tzajta'a, cu xɨee nej cu vejli'i a'utéjvee mú'ejmi jemi. Jé'ecan nu huatántemua'ave'e ne'ɨ́jna jɨme'e nej neri ramua'aree ɨ́ sej rɨ́'ɨ ru'ihuaamua'a temua'a naa, Seajta te'utáviicua'i se'ɨ́jna jɨme'e ɨ́ sej rá'atzaahuate'e se'ɨ́jna ɨ́ Cɨríistu'u. 6A'iné xu'uri autéjhuii sej rá'antzaahuate'en se'ɨ́jna tɨ a'ɨ́ɨn pú'een ɨ́ tɨ i'i tavástara'a, a'ɨ́jna Jesús tɨ ajta i'i Cɨríistu'u, setá'aj siyen rɨ́'ɨ titeeté'uuca a'ij tɨ tiraavíjte'e a'ɨ́jna jemi. 7Setá'aj siyen se'íjna jetze ucarute ɨ́ sej rájteuni ɨ́ Cɨríistu'u jemi sej si siyen che'atá sena'a te'utáviicua'i tɨ́j cɨyej tɨ ajtanáana'ajme téte'ɨmua chuaata'a. Xu'uri cɨ́j caj yaú'itɨe ɨ́ Cɨríistu'u jemi. Setá'aj siyen tihuaújmua'aten sej si yaú'itɨée xá'ara'ani nain jɨme'e, sej si jaítze'e te'utáviicua'i se'ɨ́jna jɨme'e ɨ́ sej rá'atzaahuate'e a'ij mej meri tejamuaamuá'ate. Setá'aj seajta huápɨ'ɨ tiraatateújtzi'ire'en ɨ́ Dios. 8Rɨ́'ɨ xu'u mú'een, caxu hua'atá'acare'en mej amuaatémua'itɨn seica jɨme'e niuucari ɨ́ mej jɨ́n tí'ihua'itaca. Ayee mú tí'ijxe'eve'e mej mi miyen tejamuá'ari'i ɨ́ sej jɨ́n té'atzaahuate'e me'ɨ́jna jɨme'e a'ij mej tirájteu rujɨ́ɨmua'a, ɨ́ niuucari tɨ caí ti'itɨ́j vaɨre'e. A'ɨ́jna, ɨ́ mej tí'ixaxa'a, camu a'ij tirájteu ɨ́ Cɨríistu'u jemi, sino ayée mu'u tejá'amua'ixaate'e me'ɨ́jna jɨme'e ɨ́ mej rujɨ́ɨmua'a mena'a tirájteu, na'ari ɨ́ mej jɨ́n tí'imua'ata me'ɨ́jna jɨme'e ɨ́ mej rájye'irajca'a ɨ́ jéjcua. 9Ayee pu'u, a'iné nain tɨ́j na'a tɨ Dios een, a'ɨ́ɨ pu huateájturaa ɨ́ Cɨríistu'u jemi ɨ́ ru jetze. 10Ajta Dios pu ayén amuaanaíjmire ɨ́ Cɨríistu'u jemi sej si ruuri xá'ara'ani jemin. Ajta a'ɨ́ɨn ɨ́ Cɨríistu'u, a'ii pu a'ɨ́ɨn pú'een ɨ́ ta'anájca huá'a jemi matɨ́j mena'a pua'amé é'eseijre'e ɨ́ xɨéjniu'ucari ɨ́ mej te'áijta, majta a'ɨ́ɨme ɨ́ mej títeté'u'upu'u u ta japua. 11Seajta mú'een, xu'uri ra'ará'aste se'ɨ́jna jɨme'e ɨ́ mej ra'antisí'icheca ɨ́ runavij. Mɨ seajta, caxu ra'ará'aste se'ɨ́jna jɨme'e ɨ́ mej teteca miyen amuáaruu ɨ́ rumuájca'a jɨme'e sino Cɨríistu'u pu'u ayén ra'ará'aste mú'ejmi jetze me'ecan tɨ́'ɨj huamɨ́'ɨ ɨ́ cúruu jetze. A'ɨ́ɨ ɨ pu nain amuá'ari'iri'i ɨ́ sej jɨ́n a'ij pua'a rɨjca tɨ ij caí ché'e tejámuaata'aíjte'en ɨ́ a'amua jetze. 12Ayee pu tirá'amitɨejte'e ɨ́ Dios tɨ ayén tejamuáaruu setɨ́'ɨj huámuaɨ'ɨvijhuaca'a. Xɨee sej cu mú'een ava'ujnáa ɨ́ Cɨríistu'u jamuan. Ayen che'atá na'a tɨ́j sej mú'een a'itácɨɨne ɨ́ mɨ'ɨchite tzajta'a jamuan ɨ́ Cɨríistu'u. Ayee pu een a'ɨ́jna jɨme'e sej mú'een rá'atzaahuate'e se'ɨ́jna jɨme'e ɨ́ muárɨ'eri'ira'a Dios tɨ jɨ́n ra'ajjáj a'ɨ́jna ɨ́ Cɨríistu'u huá'a tzajta'a ɨ́ mɨ'ɨchite. 13A'ájná'ɨmua, ayée xu éene'e ɨ́ ru tzajta'a, seúche'e xu mɨ'ɨchite pu'éene'e ɨ́ Dios jemi, se'ɨ́jna jɨme'e ɨ́ sej auteájturaa u Dios jemi, seajta se'ɨ́jna jɨme'e ɨ́ mej caí miyen amua'antisíjchixɨ ɨ́ á'amuanavi jetze. Mɨ ajta íjii, Dios pu ajtahua'a amuaatatɨ́ste ɨ́ á'amuaxɨejniu'uca sej si a'uté'uu xá'ara'ani ɨ́ Cɨríistu'u jamuan. Nain pu ari tejámuaatá'uuni'iri'i ɨ́ sej jɨ́n auteájturaa ɨ́ jemin. 14A'ɨ́ɨ pu xaa ra'uré'uu a'ɨ́jna tɨ té'eyu'usi'ihuaca'a, ɨ́ tɨ jetzen rá'axajtaca'a ɨ́ niuucari tɨ jɨ́me'en téjmi jetze ti'itɨ́j jɨ́n te'ujpuá'ajte, ɨ́ tej jɨ́me'en té'echa'ɨɨca'a. A'ɨ́ɨ pu antipuá'ari'ira'a a'ɨ́jna jɨme'e tɨ rá'utatai ɨ́ cúruu jetze jamuan a'ɨ́jna ɨ́ Cɨríistu'u. 15Majta me'ɨ́n ɨ́ xɨéjniu'ucari ɨ́ mej tí'aijta, majta ɨ́ mej títetateí ɨ́ ta japua, Cɨríistu'u pu huajá'uriiri'i ɨ́ mej jɨ́n antiújmua'areereca'a. A'ɨ́ɨ pu ajta hua'utatévi'iraste mé jéjre'e. Hua'ave'ejáapuajmé'e, pu a'iteájraa. Hua'utéemua'itɨ a'ɨ́jna jɨme'e tɨ huamɨ́'ɨ ɨ́ cúruu jetze. 16A'ɨ́j pu jɨ́n, miché'e mi caí á'amuamuaire'e me'ɨ́jna jɨme'e a'ij sej tiú'ucua'ani, a'ij sej ye'í titeeyé'en, nusu a'ɨ́jna xɨcájra'a tɨ jetzen ayén nu'u ruxe'eve'e sej tiú'uyesten tɨ te'ute'itɨén ɨ́ máxcɨra'i, na'ari tɨ te'ará'asti ja'anáj mej ruse'upi. 17Naíjmi'i tɨ́j na'a tɨ ayén tí'een, cu xɨee tɨ ja'atɨ́ huácɨen jetze á'uche'ecan. Ayee pu tí'ivaɨre'e tej ti tiyen ráamua'aree a'ij tɨ teja'uré'enejsin. Mɨ́ ajta, ɨ́ tɨ xɨ́'epɨ'ɨn tɨ́n, a'ii pu a'ɨ́ɨn pú'een, a'ɨ́jna ɨ́ Cɨríistu'u. 18Majta me'ɨ́n ɨ́ mej hua'aráanajche mej rucɨɨnive'e jéjre'ecɨtze'e, a'ɨ́ɨme ɨ́ teteca mú nu'u tíhua'utateújtzi'ire'e a'ɨ́mej ɨ́ mej títetateí ɨ́ ta japua. Mɨ́ seajta mú'een, caxu hua'atá'acare'en miyen tejamuá'ari'iran me'ɨ́jna jɨme'e ɨ́ sej seri raamuá'itɨ ɨ́ Dios jemi. A'ɨ́ɨ mú xaa rucɨɨnive'e me'ɨ́jna jɨme'e mej mi nain tiu'utaxáj a'ij mej nu'u tiu'useíj a'ij tɨ tí'een u ta japua. Majta jeíhua ahuaújtzaahuate'en me'ɨ́jna jɨme'e ɨ́ huá'amua'atziira'a ɨ́ mej rujɨ́ɨmua'a mana'a tirájteu. 19Mu'uri mé rúurɨe me'ɨ́jna ɨ́ ta'anájca ɨ́ tej jetzen airáneajxɨ'ɨn, ɨ́ tej jetzen arátaca'ane tej ti tiyen che'atá tena'a naími'i huavaújse'en a'ij tɨ Dios titatá'aca tɨ́j ajta tiújvi'iraxɨ'ɨn ɨ́ cari táata'a jamuan. 20Casi'i mú'een, Cɨríistu'u pu a'amua japua huaniú tɨ́'ɨj huamɨ́'ɨ, ajta camu ché'e tejá'amua'aijte'e me'ɨ́jna jɨme'e ɨ́ huá'amua'atziira'a ɨ́ seica ɨ́ teteca. Tɨ́ pua'a ayén, a'iné een jɨ́n siyen che'atá sena'a tí'ijrɨ'ɨre matɨ́j ɨ́ seica ɨ́ mej miyen tí'ijxe'eve'e mej tejámuaata'aíjte'en me'ɨ́jna jɨme'e a'ij mej meri tí'ijrɨ'ɨrejca'a. 21Ayee mú tejá'amua'ixaate'e tɨjɨ́n: “Caxu ra'ajtamuá'amuate'en. Caxu ra'ajtácua'an. Caxu ra'ajtémɨjhua'an.” 22Naíjmi'i tɨ́j na'a ɨ́ niuucari tɨ ayén een, naími'i pu jɨ́me'en raxa ti'itɨ́ tɨ antipuá'ari a'ɨ́jna jɨme'e ɨ́ mej raaxɨ́n. 23Ayej xaa ne'u, ayée pu tihuá'amitɨejte'e tɨ i'i xɨ́'epɨ'ɨn tɨ pua'a ja'atɨ́ ra'ará'astijre'en a'ɨ́jna jɨme'e ɨ́ niuucari tɨ ayén een. Cɨ xɨee rɨ́'ɨ mú mé titeumuámua'aree, cu xɨee tɨ ti'itiá'a ɨ́ tɨ jɨ́n ti'itéveeca'a ruxɨ́'evi'ira'a jɨme'e, cu xɨee puaíjtzi pu raatá'an ɨ́ ru jetze. Mɨ́ ajta, capu ti'itɨ́j vaɨre'e sino ayée pu'u mej mi huataúra'an rujɨ́ɨmua'a mana'a micu.

will be added

X\