Colosenses 1

1- 2Inee, i nej i'i Pablo, nee nu neajta huá'a jetze ajtéme'ecan a'ɨ́mej ɨ́ tɨ tíhua'uta'aíj a'ɨ́jna ɨ́ Jesús, ɨ́ tɨ ajta i'i Cɨríistu'u. Ayee nu tí'ivaɨre'e ɨ́ Cɨríistu'u jemi, a'iné ayée pu tí'ijxe'eve'e ɨ́ Dios. Jamuan ne'íjna i ne'ihuaara'a, a'íjna i Timoteo, ayée nu tejá'amuayu'use'e mɨ sej Colosas é'eche, mú'een mɨ sej a'uté'uu ɨ́ Dios jemi. Ayee tu tejá'amuateujte'e mú'een, mɨ sej seúche'e té'eviicua'i, se'ɨ́jna jɨme'e sej rá'atzaahuate'e se'ɨ́jna ɨ́ Cɨríistu'u. Ché'e a'ɨ́ɨn ɨ́ tɨ tá'iya'upua ɨ́ tɨ i'i Dios, ché'e amɨ́n rɨ́'ɨ tejá'amuacha'ɨ́ɨ á'ara'ani, ché'e ajta amua'anpuá'ajte'en ɨ́ á'amuaxɨejniu'uca tzajta'a. 3Ja'anáj tɨ na'a tej tí'ijhuavii te'ɨ́jna ɨ́ Dios, ɨ́ tɨ rájya'upua a'ɨ́jna ɨ́ tavástara'a, a'ɨ́jna ɨ́ Jesús tɨ ajta i'i Cɨríistu'u, ja'anáj tɨ na'a tej tí'ijhuavii mú'ejmi jɨme'e, jé'ecan tu tátemua'ave'e ɨ́ Dios jemi. 4Ayee tu rɨcɨ te'ɨ́jna jɨme'e tej teri yá'umua'areeri'i sej nu'u rá'atzaahuate'e se'ɨ́jna ɨ́ Cɨríistu'u tɨ i'i Jesús, seajta nu'u jeíhua huá'ixe'eve'e naíjmi'ica ɨ́ mej a'uté'uu ɨ́ Dios jemi. 5Ayee xu rɨjca, a'iné seúche'e rajchú'eve'e se'ɨ́jna ɨ́ tɨ Dios á'amua'ɨne'e ɨ́ ta japua. Tetɨ́'ɨj caí xɨ tejamuaatayú'use, mú'een xu seri sejmí'i ráanamuajri'i se'ɨ́jna ɨ́ niuucari tɨ jɨ́me'en raxa ɨ́ Dios a'atzáahuati'ire'e jɨme'e. 6A'íjna i niuucari ayén che'atá na'a huataseíjre mú'ejmi jemi tɨ́j ajta huataseíjre nainjapua ɨ́ chaanaca. Ayee pu seijre'e teɨte tzajta'a tɨ́j cɨyej tɨ ájvaujse'esin, tɨ ajta antatáca'a. Ayee pu che'atá na'a tí'iruure mú'ejmi jemi. Tɨ́j aúche'e na'a setɨ́'ɨj amuacaícan ráamua'areeri'i iye'ehuaritɨéecan jɨme'e tɨ Dios tzɨ́te'e rɨ́'ɨ á'amuacha'ɨɨ tɨ́j na'a a'ɨ́ɨn niuucari te'utéjche tɨ rɨ́'ɨ amuáaruuren. 7Naíjmi'i tɨ́j na'a a'íjna, a'ɨ́ɨ pu tejamuaamuá'ate a'ɨ́jna ɨ́ Epafras tɨ ta jamuan tí'ivaɨre'e. Jé'ecan tu raxɨ́'eve'e te'ɨ́jna. Ajta a'ɨ́ɨn, huápɨ'ɨ pu ta jetze me'ecan tí'ivaɨre'e ɨ́ Cɨríistu'u jemi. Capu ti'itɨ́j jɨ́n ateáturaaveca. 8A'ɨ́ɨ pu ajta ari titaatá'ixaa ɨ́ sej rɨ́'ɨ huápɨ'ɨ ru'ihuaamua'a seijre'e se'ɨ́jna jɨme'e sej jetzen araújca'ane ɨ́ xɨéjniu'ucare'ara'an ɨ́ Dios. 9A'ɨ́j tu jɨ́n, catu ja'anáj raatapuá'ajtaca'a tej Dios tí'ijhuavii mú'ejmi jɨme'e. Nain xɨcaj tzajta'a tɨ yú e'iré'ene tɨ́'ɨj amɨ́n titaatá'ixaa, ayée tu rɨcɨ. Dios tu tí'ijhuavii tɨ i a'ɨ́ɨn tejamuáamua'aten nain jɨme'e sej si ráamua'aree a'ij tɨ tí'ijxe'eve'e ɨ́ Dios, sej si temua'a mé titeumuámua'aree, tɨ ij a'ɨ́ɨn xɨéjniu'ucare'ara'an ɨ́ Dios amuaatá'an sej si ráamua'aree a'ij sej ye'í huárɨni e'ehuauritɨéecan jɨme'e temua'a naa. 10Ayee tu een jɨ́n tí'ijhuavii sej si siyen huárɨni a'ij tɨ tihua'uvíjte'e a'ɨ́mej ɨ́ mej ramua'ate a'ɨ́jna ɨ́ tavástara'a. Teajta sej si siyen rɨ́'ɨ raatá'an se'ɨ́jna jɨme'e ɨ́ sej jɨ́n tí'imɨjhuacare'e. Setá'aj siyen éene'en tɨ́j cɨyej tɨ ájvaujse'esin, tɨ ajta antatáca'a. Ajta sej si jaítze'e raayɨ́'ɨtɨhua'an a'ij tɨ een ɨ́ Dios. 11Ché'e Dios amuaatá'an nain ɨ́ ca'aníjra'a ɨ́ á'amuatzajta'a a'ɨ́jna jɨme'e ɨ́ muárɨ'eri'ire'ara'an ɨ́ tej jɨ́n rɨ́'ɨ tira'utaseíjra. Aj xu si jetzen araújca'anejsin sej si te'utáviicua'i, sej si seajta seuj raachú'eve'en a'ij tɨ ti'itɨ́ á'amuaruuren, sej si seajta huaújtemua'ave'en. 12Ayee xu een jɨ́n tí'ijteujtzi'ire'e xá'ara'ani ɨ́ tɨ tá'iya'upua, a'iné a'ɨ́ɨ pu amuaatá'a sej si ra'ancuré'an se'ɨ́jna ɨ́ tɨ tejamuáacɨ'ɨti sexu'ijmé'en a'ájna a'utɨ́ ja'anáj tɨ na'a huáneeri'i. Ayee pu che'atá na'a tejá'amuacɨ'ɨti seɨ́j ajta mɨ seɨj tɨ́j ayén tihuá'acɨ'ɨti ɨ́ seica ɨ́ mej huaté'uu ɨ́ Dios jemi. 13Ayee pu té'eme, a'iné a'ɨ́ɨ pu tu'irájtuaa a'ujna a'u tɨ a'utɨ́ca'a ja'anáj tɨ na'a tɨ́'ij caí ché'e títa'aíjte'en a'ɨ́jna tɨ a'uun antiújmua'aree. Dios pu taja'aráavi'itɨ a'ujna a'u tɨ tejé'aijta a'ɨ́jna ɨ́ yaujra'an tɨ huápɨ'ɨ raxɨ́'eve'e. 14Ayee pu tiu'utanájchitaca'a ɨ́ tej jɨ́n té'echa'ɨɨca'a ɨ́ Dios jemi a'ɨ́jna jɨme'e tɨ a'ɨ́ɨn yaujra'an ta jetze me'ecan huamɨ́'ɨ, ajta titaatá'uuni'iri'i ɨ́ tej jɨ́n auteájturaa ɨ́ jemin. 15Ajta a'ɨ́ɨn ɨ́ yaujra'an, a'ii pu a'ɨ́ɨn pú'een ɨ́ tej jetzen ráamua'aree a'ij tɨ een ɨ́ Dios ɨ́ tej caí rasise'i. A'ii pu ajta a'ɨ́ɨn pú'een ɨ́ tɨ amuacaí seijre'eca'a tɨ́'ɨj caí xɨ mé'e jé'e ti'itɨjca'a. 16A'ɨ́j pu jamuan Dios nain tiú'utaahuaca'a, tɨ́j na'a ti'ipua'amé ɨ́ ta japua tɨ tejé'eseijre'e, ajta tɨ́j na'a pua'amé tɨ tejé'eseijre'e íiyen chaanaca japua, nain ɨ́ tej rasise'i, ajta nain ɨ́ tej caí rasise'i. Majta me'ɨ́n ɨ́ xɨéjniu'ucari ɨ́ mej tejé'aijta u ta japua, Dios pu nain huá'utaahuaca'a a'achú mej pua'amé. Aj pu i hua'antíhuau mej mi miyen che'atá mana'a tiu'utévaɨre'en ɨ́ ta japua matɨ́j tajtúhuaani, a'ajhuáase, muayajtúumua'a tɨ ve'ée, pixcaa muayúu, ajta tenáantzi. Nain pu tiú'utaahuaca'a jamuan ɨ́ Cɨríistu'u, ajta Cɨríistu'u pu hua'ancuré'evi'itɨ. 17Cɨríistu'u pu ayén seijre'eca'a tɨ́'ɨj caí xɨ mé'e é'e tí'itɨɨtaca'a. Ajta nain pu Cɨríistu'u jetze araújca'ane tɨ ij te'utáviicua'iran. 18A'ii pu a'ɨ́ɨn pú'een ɨ́ tɨ ve'ecán jɨ́n antiújmua'aree ruteɨ́testemua'a jɨme'e, a'ɨ́mej ɨ́ mej té'atzaahuate'e. A'ii pu a'ɨ́ɨn pú'een ɨ́ tɨ jetzen tiu'unéj nain tɨ tí'iseijre'e, ajta a'ii pu a'ɨ́ɨn pú'een ɨ́ tɨ amuacaí a'itáraa huá'a tzajta'a ɨ́ mɨ'ɨchite. A'ɨ́j pu jɨ́n ayée pu éene'e á'ara'ani tɨ jaítze'e ve'etɨ́ a'ame nain jɨme'e. 19Ayee pu'u, ra'aránajcheca'a ɨ́ Dios tɨ Cɨríistu'u ayén che'atá na'a éene'e á'ara'ani ɨ́ ruxɨ́'ej Dios nain jɨme'e. 20Ajta, ra'aránajcheca'a tɨ Cɨríistu'u jamuan hua'utéjpua'ajte'en ɨ́ mej rájcha'ɨɨre'e mej mi rɨ́'ɨ titeeteáturan ɨ́ Dios jemi. Naíjmi'ica a'ɨ́mej ɨ́ mej ta japua tejé'eseijre'e, majta a'ɨ́mej ɨ́ mej yen seijre'e íiyen chaanaca japua, a'ɨ́ɨ pu hua'utépua'ajtaca'a a'ɨ́jna jɨme'e tɨ Cɨríistu'u ra'iráaxɨre ɨ́ ruxuure'e ɨ́ cúruu jetze, tɨ́'ɨj huamɨ́'ɨ ta jetze me'ecan. 21Seajta mú'een, amuacaí, caxu xɨ́'epɨ'ɨn éene'e ɨ́ Dios jemi, seajta rájcha'ɨɨre'eca'a ɨ́ a'amua tzajta'a se'ɨ́jna jɨme'e a'ij sej ye'í tí'ijrɨ'ɨrejca'a. 22Mɨ́ ajta Dios pu ari amua'anpuá'ajte a'ɨ́jna jɨme'e tɨ Cɨríistu'u huamɨ́'ɨ jetzen ɨ́ cúruu. Cɨríistu'u pu a'amua japua huaniú a'ɨ́jna jɨme'e tɨ tirajpuaíjtzica'a ɨ́ ru jetze. Aj pu i amuá'avi'itɨn ɨ́ Dios jemi, mú'een mɨ sej a'uté'uu xá'aju'un jemin. Caxu ché'e ja'anáj ti'itɨ́j jɨ́n auteáturan ɨ́ Dios jemi. Capu ajta ja'atɨ́ mú'ejmi jetze ti'itɨ́j jɨ́n te'upuá'ajte'esin. 23Ayee pu té'eme tɨ pua'a seuj te'utáviicua'i sej té'atzaahuate'e, ajta tɨ pua'a secaí yá'uhua'anan ɨ́ sej seuj rachú'eve'en a'ij tɨ tí'ixaxa'a ɨ́ niuucari tɨ jɨ́n Dios amua'irájtuaani. A'ii pu a'ɨ́ɨn pú'een ɨ́ niuucari ɨ́ mej meri tihua'utá'ixaa nainjapua. Mɨ́ neajta inee, Dios pu ajta ayén tinaa'íjca nej ni ne'ɨ́jna jɨ́n tiu'utévaɨre'en. 24Ajta íjii, nee nu huatántemua'ave'e ne'ɨ́jna jɨme'e tɨ ayén tejámuaatéva'ɨrihua'an ɨ́ nej jɨ́n tirajpuaíjtzi na'araa. Neajta niyen raanaíjmire'en ɨ́ ne jetze jɨme'e ɨ́ tɨ te'á'atura mej mi ráamua'aree a'ij tɨ tirajpuaíjtzica'a a'ɨ́jna ɨ́ Cɨríistu'u. A'ɨ́j nu jɨ́n nehuá'avaɨre'e a'ɨ́mej, ɨ́ tɨ jɨ́n Cɨríistu'u antiújmua'aree, a'ɨ́ɨme ɨ́ mej i'i teɨtestemua'ame'en. 25Nee nu xaa te'enteájrupi ne'ɨ́jna jɨme'e tɨ jɨ́n Dios ayén tinaa'íjca nej ni niyen huárɨni a'ij tɨ Dios ayén tiraaxɨ́'epɨ'ɨntare. A'ɨ́j nu jɨ́n tejámuaatá'ixaate'esin nain jɨme'e ɨ́ niuucari tɨ jetzen raxa ɨ́ Dios. 26A'íjna i niuucari, a'ii pu a'ɨ́ɨn pú'een ɨ́ tɨ rú'avaa tɨ Dios ramua'areereca'a avíitzi jɨme'e, ajca'ihuá'ɨmua, nain xɨcaj tzajta'a tɨ yú e'iré'ene. A'ɨ́ɨ ɨ́ mej amuacaícan é'echejca'a, camu a'atzu ramua'areereca'a a'ij tɨ Dios rɨníiche'en. Aru íjii, pu'uri tihua'utá'ixaa mé jéjre'e huá'a jemi ɨ́ mej a'uté'uu ɨ́ Dios jemi. 27Ayee pu raaxɨ́'epɨ'ɨntare ɨ́ Dios tɨ tihua'utá'ixaate'en mé jéjre'e mej mi ráamua'aree tɨ jé'ecan pu naa seijre'e a'íjna ɨ́ tɨ rú'avaa huá'a tzajta'a ɨ́ teɨte ɨ́ mej miyen a'uchéjme nainjapua, íiyen ɨ́ chaanaca japua. A'ii pu a'ɨ́ɨn pú'een ɨ́ Cɨríistu'u tɨ a'amua tzajta'a é'eseijre'e. A'ɨ́ɨ pu ajta amuaatá'asin sej si raseijran tɨ jé'ecan pu naa seijre'e ɨ́ Dios jemi. 28Teajta iteen, ayée tu tihuá'ixaate'e ɨ́ teɨte a'ij tɨ ti'itɨ́j huáruu a'ɨ́jna ɨ́ Cɨríistu'u. Naíjmi'ica tu rɨ́'ɨ ti'ixáate'e, teajta iye'ehuaritɨéecan jɨ́n tu tihuá'amua'aten mej mi ráamua'aree tzáahuati'ira'a jɨme'e tɨ tiu'utátuiire'en pua'a ayén ti'ayajna nusu caí. Ayee tu een jɨ́n rɨcɨ tej ti urarɨ́'ene'acan jɨ́n tiu'utátuiire'en ɨ́ Dios jemi a'ájna xɨcájra'a jetze tetɨ́'ɨj huá'anvi'itɨn naíjmi'ica ɨ́ Cɨríistu'u jemi. 29A'ɨ́j nu jɨ́n niyen ca'anín jɨ́n tí'imɨjhuaca, neajta niyen tí'itese'e nain jɨme'e a'achú tɨ caj tínetá'aca ɨ́ ca'aníjra'a, neajta nain jɨ́n ɨ́ nej jɨ́n á'anca'ane.

will be added

X\