Los Hechos 6

1Majta, mu'uri jaítze'e mu'iicáa a'ɨ́ɨme ɨ́ mej té'atzaahuate'eca'a. Majta seica ɨ́ mej raayɨ́'ɨtɨhua'a ɨ́ hua'aniuuca a'ɨ́ɨme ɨ́ griego, a'ɨ́ɨ mú autéjhuii mej tiníniu'ucacun. Mehuá'ajaaxɨejvi'iraca'a a'ɨ́mej ɨ́ mej raayɨ́'ɨtɨhua'a ɨ́ hua'aniuuca ɨ́ mej Israél jetze ajtéme'ecan. Miyen tɨjɨ́n: ―Matɨ́'ɨj tiu'urá'ura'asin ɨ́ tɨ tí'icua'iri'i tɨ́j na'a nain xɨcaj tzajta'a, camu hui tihua'uré'a'aca ɨ́ ucarijse mej ruséxu'ijmé'e á'ujujhua'an, ɨ́ mej raayɨ́'ɨtɨ ɨ́ hua'aniuuca a'ɨ́ɨme ɨ́ griego. ―Ayee mú tiu'utaxájtaca'a. 2Aj mú mi huá'ajseɨj a'ɨ́ɨme ɨ́ mej té'atzaahuate'e. Matɨ́'ɨj mi miyen tihua'utá'ixaa a'ɨ́mej ɨ́ mej tamuáamuata'a japuan hua'apua ará'ase tɨjɨ́n: ―Capu hui raavíjte'e tej tiyen tiyá'uhua'anan tej tihua'utá'ixaate'en ɨ́ teɨte Jesús jetze me'ecan tej ti tihua'umín ɨ́ meesa japua. 3’Casi'i ta'ihuaamua'a, setá'aj hui arahua'apuáca avé'ehuauni ɨ́ teteca mú'ejmi mej jetze ajtéme'ecan. Setá'aj hua'avé'ejajpuaxɨ'ɨn ɨ́ mej rɨ́'ɨ mé tite'umuámua'aree ɨ́ teɨte. Ayee pu hui tiú'ujxe'eve'e tɨ a'ɨ́ɨn xɨéjniu'ucare'ara'an ɨ́ Dios huateáturan a'ɨ́mej jemi seɨj ajta seɨj temua'a naa. Ajta ayén tiú'ujxe'eve'e mej rú'umua'areere. Ten tu tiyen tihuá'ijcate'en te'ɨ́jna jɨme'e. 4’Teajta iteen, teuche'e tu tiyen rɨ́'ɨ titeejú'u tá'aju'un te'ɨ́jna jɨme'e tej raatáhuavii ɨ́ Dios, teajta tihua'utá'ixaate'esin ɨ́ teɨte ɨ́ niuucari jɨme'e. ―Ayee mú tihua'utá'ixaa. 5A'ii pu hua'aránajcheca'a naíjmi'ica ɨ́ teɨte. Matɨ́'ɨj mi hua'avé'ehuau a'ɨ́mej ɨ́ Esteban, a'ɨ́jna tɨ jeíhua rá'atzaahuate'eca'a ɨ́ Dios. Ajta a'ɨ́ɨn xɨéjniu'ucare'ara'an huateájturaa jemin huápɨ'ɨ. Majta mú me'ɨ́jna avé'ehuau me'ɨ́jna ɨ́ Felipe, majta me'ɨ́jna ɨ́ Prócoro, majta me'ɨ́jna ɨ́ Nicanor. Seica mú majta avé'ehuau. Ayee mú ánte'arua tɨjɨ́n Timón, ajta a'ɨ́jna ɨ́ Parmenas, ajta a'ɨ́jna ɨ́ Nicolás. A'ii pu a'ɨ́ɨn pú'een ɨ́ tɨ Antioquía é'eme'ecan. Ajta, a'ɨ́ɨ pu amuacaí rá'antzaahua ɨ́ hua'aye'ira a'ɨ́ɨme ɨ́ mej Israél jetze ajtéme'ecan. 6Matɨ́'ɨj mi huaja'uví'itɨ a'u mej a'uté'uuca'a a'ɨ́ɨme ɨ́ mej tamuáamuata'a japuan hua'apua ará'ase. Aj mú mi me'ɨ́n raatáhuaviiri'i ɨ́ Dios. Matɨ́'ɨj mi antiújmua'aréere muá'araa me'ɨ́jna jɨme'e mej nu'u hua'utévaɨre'en a'ɨ́mej ɨ́ mej tamuáamuata'a japuan hua'apua ará'ase. 7Jéihua mú ráanamuajri'i ɨ́ niuucari a'ɨ́ɨme áa mej vejli'i antachéejmee, majta ajca'ihuá'ɨmua mej antachéejmee, majta a'ɨmuá mej a'uchéjme, naími'i mú ráanamuajri'i. Majta ɨ́ teɨte ɨ́ mej huá'a jamuan á'ujujhua'ane'e a'ánna Jerusalén, jeíhua mú huatámu'iireca'a. Majta me'ɨ́n ɨ́ mej títetaté'eca'a u teyujta'a, mu'iitɨ́ mú rá'antzaahua ɨ́ niuucari. 8Ajta a'ɨ́jna ɨ́ Esteban, jeíhua pu rá'atzaahuate'eca'a ɨ́ Dios, ajta jeíhua pu Dios jetze aráujca'anejca'a. A'ɨ́j pu jɨ́n hua'utaseíjra ɨ́ teɨte a'ij mej ye'í rɨ́'ɨ tiraatá'an ɨ́ Dios. 9Majta mú seica á e'iré'ene mej mi raataxáj ti'itɨ́j tɨ caí xɨ́'epɨ'ɨn. A'ii mú a'ɨ́ɨn pú'een ɨ́ mej seɨ́j jetze é'eme'ecan u teyujta'a, mej miyen ratamuá'amua tɨjɨ́n hua'ateyuu ɨ́ mej huatétuiihuaca'a. A'ɨ́ɨ mú a'ɨ́ɨn pú'een ɨ́ mej Israél jetze huanéj. A'uu mú é'eme'ecan a'ujna já'ahua'a Cirene, majta seica a'ujna já'ahua'a chajta'a tɨ ayén téja'arájtehuaa tɨjɨ́n Alejandria. Seica mú majta me'uun é'eme'ecan a'ujna já'ahua'a Cilicia, majta seica u Asia. Matɨ́'ɨj mi autéjhuii mej tirá'ixaate'en me'ɨ́jna ɨ́ Esteban. 10Aru camu a'atzu raatéemua'itɨ a'iné a'ɨ́j pu jetze aráujca'anejca'a ɨ́ xɨéjniu'ucare'ara'an ɨ́ Dios. Ajta jaítze'e pu rú'umua'areereca'a a'ɨ́jna ɨ́ Esteban mecaí a'ɨ́ɨme. 11Matɨ́'ɨj mi miyen huarɨ́j avíitzi'i jɨme'e. Seica mú huatajé. Aj mú mi hua'uta'aíj mej tiraaxájtzi'i tɨjɨ́n: “Tu'uri ráanamuajri'i tɨ a'ɨ́ɨn a'ij pua'a tiraataxájtaca'a a'ɨ́jna ɨ́ Moisés, ajta ɨ́ Dios.” 12Ayee mú huá'uruu mej huá'aniniu'ucaste ɨ́ teɨte, majta ɨ́ hua'avaujsi, majta ɨ́ mej tihuá'amua'atehua'a ɨ́ yu'uxari jetze. Matɨ́'ɨj mi raatéevi'i ɨ́ Esteban. Matɨ́'ɨj me'uun ya'uví'itɨ a'ɨ́mej jemi ɨ́ rujuéesi. 13Majta seica mú avé'ehuau ɨ́ mej miyen tí'ihua'itaca'a tɨjɨ́n: ―Tɨ́'ɨj pɨ́ na'a nain xɨca tzajta'a, a'ii pu hui a'ij pua'a ti'ixa a'ɨ́jna ɨ́ teyuu, ajta ɨ́ yu'uxari. 14Tu'uri tiyen tiráanamuajri'i tɨ a'ɨ́ɨn ayén tiu'utaxájtaca'a tɨ nu'u tiraatá'uuna a'ɨ́jna ɨ́ teyuu a'ɨ́jna ɨ́ Jesús tɨ Nazarét é'eme'ecan, ajta tɨ nu'u tá'ari'i ɨ́ taye'irá ɨ́ tɨ taatá'a a'ɨ́jna ɨ́ Moisés teecan tɨ raateájtuaa. ―Ayee mú tiu'utaxájtaca'a. 15Aj mú mi ca'anín jɨ́n ra'aráaseij naími'i ɨ́ hua'ajueesi. Ayee mú ra'utaseíj cumu tɨ tétaave'en ɨ́ néerime'ara'an a'ɨ́jna ɨ́ Esteban. Yee pu éene'e tɨ́j néerime'ara'an ɨ́ seɨj ɨ́ xɨéjniu'ucari tɨ tí'ivaɨre'e u ta japua ɨ́ Dios jemi.

will be added

X\