Los Hechos 4

1Maúche'e mú tihuá'a'ixaate'eca'a ɨ́ teɨte. Matɨ́'ɨj mi seica áa e'iré'ene a'u mej a'uté'uuca'a a'ɨ́jna ɨ́ Pedro, ajta a'ɨ́jna ɨ́ Juan. A'ii mú me'ɨ́n pú'eene'e ɨ́ mej tí'icha'ɨɨ u teyujta'a, majta a'ɨ́ɨme ɨ́ Saduceos. 2Capu hua'aránajcheca'a ɨ́ teɨte ɨ́ mej miyen tihuá'amua'atejca'a a'ɨ́jna ɨ́ Pedro, ajta ɨ́ Juan. Majta miyen tihuá'a'ixaate'eca'a tɨ jɨ́n Dios pu ajtahua'a raatatɨ́ste ɨ́ xɨéjniu'ucare'ara'an a'ɨ́jna ɨ́ Jesús. 3Aj mú mi hua'uvívi'i. Matɨ́'ɨj mi hua'iteáana a'ujna já'ahua'a carcel. Camu tihua'uta'íhua'uri'i a'iné pu'uri téchuijxarijme'eca. 4Majta ɨ́ teɨte, jeíhua mú tiú'unamuajri'i a'ij mej tiu'uxájtaca'a. Majta rá'antzaahua. A'ɨ́j mú jɨ́n meri miyen ará'axcaa a'achú cumu anxɨ́j vi'ira'a a'ɨ́ɨme ɨ́ mej té'atzaahuate'eca'a. 5Yee ruijmua'a yee, a'ɨ́ɨ mú tiújseɨj a'ánna Jerusalén a'ɨ́ɨme ɨ́ mej antiújmua'aree a'ánna chajta'a, majta a'ɨ́ɨme ɨ́ huá'avaujsimua'a, majta a'ɨ́ɨme ɨ́ mej tihuá'amua'atehua'a ɨ́ yu'uxari jetze. 6A'uu pu a'utéveeca'a a'ɨ́jna ɨ́ Anás ɨ́ tɨ hua'avastara'a, ajta a'ɨ́jna Caifás, ajta a'ɨ́jna ɨ́ Juan, ajta a'ɨ́jna ɨ́ Alejandro. Mu'iitɨ́ mú ma'án na'a a'uté'uuca'a a'ɨ́ɨme ɨ́ mej teɨtestemua'ame'en pú'een a'ɨ́jna ɨ́ hua'avastara'a. 7A'ɨ́ɨ mú mi miyen tiu'uta'aíjtaca'a mej hue'irávi'itɨn a'ɨ́jna ɨ́ Pedro, majta a'ɨ́jna ɨ́ Juan mej mi tihua'u'íhua'u. Aj mú mi á já'ita'a huaja'utéhuii. Matɨ́'ɨj mi tihua'uta'íhua'uri'i. Miyen tɨjɨ́n: ―¿A'ataani jetze xa'araújca'ane sej si siyen rɨcɨ, na'ari a'atani jetze me'ecan siyen tí'iruure se'íjna jɨme'e? 8Aj pu i a'ɨ́ɨn Pedro a'ɨ́jna jetze araújca'ane a'ɨ́jna ɨ́ xɨéjniu'ucare'ara'an ɨ́ Dios. Ayee pu tihua'utá'ixaa tɨjɨ́n: ―Mú'een mɨ sej antiújmua'aree íiye chajta'a, seajta mú'een mɨ sej huá'avaujsimua'a a'ɨ́ɨme ɨ́ mej yen huachéjme íiye Israél. 9Cunqui íjii sej seri tí'ita'ihua'u se'ɨ́jna jɨme'e ɨ́ tɨ i'i xɨ́'epɨ'ɨn ɨ́ tɨ tiraacɨ́'ɨ a'íjna i teáata'a i tɨ cɨyáaxara'aca'a, setá'aj ráamua'aree a'ij tɨ 'een jɨ́n huarúj. 10’Ayee tu tejá'amua'ixaate'e mú'ejmi, teajta a'achú pua'améca sej yen huachéjme íiye Israél: A'íjna i teáata'a íiye tɨ huatéjvee, a'ɨ́j pu jɨ́n ari huarúj a'ɨ́jna jɨme'e tɨ'ɨrí rá'antzaahua a'ɨ́jna ɨ́ Jesús ɨ́ Cɨríistu'u tɨ Nazarét é'eme'ecan, a'ɨ́jna ɨ́ sej rá'utatai ɨ́ cúruu jetze. Dios pu ajtahua'a raatatɨ́ste ɨ́ xɨéjniu'ucare'ara'an tɨ́'ij ajtahua'a ruuri á'ara'ani. 11’A'ɨjna ɨ́ Jesús, a'ii pu a'ɨ́ɨn pú'een “ɨ́ tetej sej méjca'i ya'uhuá'axɨ mɨ sej chi'ij ájtaahuaca'a. Ayee pu te'irájraa tɨ a'ɨ́ɨn pu'eene'e já'araa ɨ́ tetej tɨ anájca.” 12Capu hui mé'e ja'atɨ seijre'e tej jetzen arátaca'anen tɨ́'ij Dios ta japua huániuuni. A'ɨ́ɨ pu'u na'a Dios ayén raateájtuaa ɨ́ Jesús itejmi jemi íiyen tej seijre'e íiyen chaanaca japua tej ti Jesús jetze arátaca'anen tɨ́'ij Dios ta japua huániuuni. ―Ayee pu tihua'utá'ixaa a'ɨ́jna ɨ́ Pedro. 13Jé'ecan mú a'ij hua'utaseíj a'ɨ́ɨme ɨ́ teteca. Ayee mú tihuá'axajtaca'a tɨjɨ́n: ―Huá'uca'anisti'i ɨ́ huá'a tzajta'a amɨjna mɨ Pedro, ajta amɨjna mɨ Juan. Majta ráamua'areeri'i tɨjɨ́n mej caí ja'anáj ti'ihuaújmua'ate, majta miyen tɨjɨ́n: ―Camu ti'itɨj jɨ́n titeeté'uuca. Aj mú mi hua'umuájteca'a tɨjɨ́n a'ɨ́ɨ mú jamuan á'ujujhua'ane'e a'ɨ́jna ɨ́ Jesús. 14Majta me'ɨ́jna huaseíj ɨ́ ja'atɨ tɨ huarúj. A'uu pu a'utéveeca'a jamuan a'ɨ́jna ɨ́ Pedro, ajta a'ɨ́jna ɨ́ Juan. A'ɨ́j mú jɨ́n caí a'ij tiu'utaxájtaca'a yee capu ayén ti'ayajna. 15Aj mú mi hua'uta'aíj mej huirácɨɨne a'ujna mej a'iráatei me'ɨ́jna ɨ́ jueesi. Matɨ́'ɨj mi ti'itiúrixáate'ajraa. 16Majta miyen tɨjɨ́n: ―¿A'iquí tehuá'aruuren temɨ́ɨme mɨ teteca? ―Ayee mu'u tiú'urihua'uraca'a. Majta miyen tɨjɨ́n: ―Capu hui rɨ'ɨrí tej tiyen tiraataxáj yee capu ayén ti'ayajna a'iné naíjmi'i ɨ́ mej íiyen a'uchéjme íiyen Jerusalén, a'ɨ́ɨ mú ramua'aree a'ij tɨ ti'itɨj huáruu a'ɨ́jna ɨ́ tevi a'ɨ́jna jɨme'e ɨ́ tɨ tí'icui'ica'a. 17Peru, tej ti caí jaítze'e méjca'i huáyee huá'anamuajra ɨ́ teɨte tzajta'a, tiché'e hua'utá'ijmɨi íjii mej caí ché'e tihuá'a'ixaate'e ɨ́ teɨte me'ɨ́jna jɨme'e niuucajtze'en a'ɨ́jna ɨ́ Jesús. ―Ayee mú tiu'utaú'ixaa. 18Aj mú mi hua'utajé. Majta hua'utá'ijmɨijri'i mej nu'u caí ché'e tihuá'a'ixaate'e ɨ́ teɨte me'ɨ́jna jɨme'e niuucajtze'en ɨ́ Jesús. Majta nu'u caí ché'e miyen tihua'amua'atée ɨ́ teɨte. 19Ajta a'ɨ́jna ɨ́ Pedro, ajta a'ɨ́jna ɨ́ Juan, ayée mú tihua'utá'ixaa tɨjɨ́n: ―Mú'een xu raaxɨ́'epɨ'ɨntaren rujɨ́ɨmua'a tɨ pua'a ayén tiraavíjte'e tej amuá'antzaahuate'en mú'ejmi nusu tej rá'antzaahuate'en a'ɨ́jna ɨ́ Dios. 20A'iné ayée pu hui tiú'ujxe'eve'e tej raataxáj a'ɨ́jna tej teri raaseíj, ajta ɨ́ tej teri ráanamuajri'i. 21Majta me'ɨ́jna ɨ́ jueesi, a'ɨ́ɨ mú mauj hua'utá'ijmɨijri'i, majta hua'utáneeche. Matɨ́'ɨj mi hua'utá'a mej huirácɨɨne me'ɨ́jna jɨme'e mej caí a'ij tirájteuve'eca'a a'ij mej ye'í tihua'ajteá'axɨ'ɨn a'ɨ́jna jɨme'e a'iné naími'i ɨ́ teɨte, a'ɨ́ɨ mú rɨ́'ɨ tiraatá'acare'e ɨ́ Dios me'ɨ́jna jɨme'e a'ij tɨ ti'itɨj huarɨ́j. 22Ajta a'ɨ́ɨn ɨ́ teáata'a tɨ Jesús jetze araújca'ane a'ɨ́jna ɨ́ tɨ huarúj, ayée pu tirájcha'ɨɨca'a a'achú cumu hua'apuate nine'ira'a japuan já'ita'a. 23Matɨ́'ɨj mi hua'utátuaa me'ɨ́jna ɨ́ Pedro, majta me'ɨ́jna ɨ́ Juan. Aj mú mi a'ucɨ́j a'ɨ́ɨme ɨ́ mej huanámi'ihuaca'a. Matɨ́'ɨj mi a'uun a'ará'a a'u mej a'uté'uuca'a a'ɨ́ɨme ɨ́ huá'a'amigustemua'a. Aj mú mi hua'utá'ixa nain a'ij mej ye'í tiu'utaxájtaca'a a'ɨ́ɨme ɨ́ mej ve'ecán jɨ́n títetateí, majta ɨ́ hua'avaujsi. 24Matɨ́'ɨj me'ɨ́n huá'unamuajri'i, aj mú mi naími'i miyen tiraatáhuaviiri'i ɨ́ Dios. Miyen tɨjɨ́n: ―Tavastara'a, mú'ee pej pe'ɨ́n pú'een ɨ́ pej raatétaahuaca'a a'ɨ́jna ɨ́ ta japua, pajta pe'ɨ́jna i chaanaca tej yen japuan seijre'e, pajta mú'ee raateájtuaa ɨ́ jaj ɨ́ tɨ ve'ée. Naíimi'i tɨ́j na'a a'achú tɨ́j pua'amé yen tí'iseijre'e, mú'ee pej nain tiú'utaahuaca'a. 25Mú'ee pej hui piyen tiu'utaxájtaca'a ajca'ihuá'ɨmua pe'ɨ́jna jɨme'e tɨ ayén axɨejniu'uca jetze araújca'ane a'ɨ́jna ɨ́ David teecan, a'ɨ́jna tɨ muavaɨre'eca'a. Ayee pu ra'uyú'uxaca'a tɨjɨ́n: ¿A'iné mej mi níniu'ucacu a'ɨ́ɨme ɨ́ mej seɨj chuéjra'a japua é'eme'ecan? Majta ɨ́ teɨte, a'ɨ́ɨ mú tí'imua'ajca me'ɨ́jna jɨme'e tɨ caí ayén te'irájra'ani. 26Rɨ́'ɨ mú u á'uruuren mej mi huateújne'usi'ite'en a'ɨ́ɨme ɨ́ hua'arey íiyen mej seijre'e chaanaca japua. Majta a'ɨ́ɨme ɨ́ mej tihuá'aijte'e ɨ́ teɨte, a'ɨ́ɨ mú tiújseɨre'esin, naími'i ɨ́ mej rájcha'ɨɨre'e a'íjna i tavástara'a, majta a'íjna tɨ án yá'ujra ɨ́ ɨpuari japua. Ayee pu ra'uyú'uxaca'a a'ɨ́jna ɨ́ David teecan. 27’Ayej xaa ne'u ti'ayajna, a'ɨ́jna ɨ́ Heródes, ajta a'ɨ́jna ɨ́ Póncio Pilato, a'ɨ́ɨ mú hui tiújseɨj íiye chajta'a huá'a jamuan ɨ́ teɨte mej seɨj chuéjra'a japua é'eme'ecan, majta huá'a jamuan ɨ́ mej yéchej íiye Israél. Maújmua'atziite'eca'a a'ij mej tiraatémua'itɨn a'ɨ́jna tɨ muavaɨre'e, a'ɨ́jna ɨ́ Jesús, a'ɨ́jna tɨ caí ja'anáj ti'itɨj jɨ́n auteájturaa mú'eetzi jemi. A'ii pu a'ɨ́ɨn pú'een pej mú'ee án yá'ujra ɨ́ ɨpuari japua. 28Ayee mú che'atá mena'a rɨjcu a'ij pej ye'í amuacaícan tiraaxɨ́'epɨ'ɨntare tɨ ayén tiú'ujxe'eve'e á'ara'ani, tɨ́'ij ayén tiú'urɨni. 29’Me'ecui xaa ne'u, mú'ee pej ta'ivástara'a, casi'i, pɨ́ mi tí'itaneeche. Taatá'a ɨ́ ca'aníjra'a ɨ́ tatzajta'a itejmi i tej muavaɨre'e tetá'aj hui caí tí'itziɨɨne'e tej tihua'utá'ixaate'en mú'eetzi jetze me'ecan. 30Patá'aj pajta ahua'aca'anen pej pi tihuá'uhuaate'en ɨ́ mej tí'icucui'i. Pajta hua'utaseíjrate'en a'íjna ɨ́ pej jɨ́n peri hua'utá'a mej raayɨ́'ɨtɨhua'an a'íjna jetze me'ecan i Jesús tɨ muavaɨre'e, tɨ caí ja'anáj ti'itɨj jɨ́n auteájturaa mú'eetzi jemi. ―Yee mú tiraatáhuaviiri'i ɨ́ Dios. 31Matɨ́'ɨj me'ɨ́jna jɨ́n miyen huarɨ́j, aj pu'i huateújca'atzɨjxɨ ɨ́ chi'ij mej tzajta'an huiiráte'eca'a. Aj pu'i i huateájturaa ɨ́ huá'a tzajta'a a'ɨ́jna ɨ́ xɨéjniu'ucare'ara'an ɨ́ Dios. A'íjna jetze mú a'ujca'anéecan jɨ́n miyen tihua'utá'ixaa ɨ́ Dios jetze me'ecan. Camu tí'itziɨɨne'eca'a. 32Naíimi'i ɨ́ mej rá'atzaahuate'eca'a, a'ɨ́ɨ mú rɨ́'ɨ tiú'urixaate'ecaa. Camu a'ij tihuá'axajtaca'a seɨj majta seɨj. Majta tiu'uré'ura'a seɨj majta seɨj ɨ́ mej tí'ijcha'ɨɨca'a. Capu ja'atɨ a'atzu ayén ti'ixa me'ɨ́jna jɨme'e yee neetzi pu tí'ine'aa. Metiu'uré'ura'ate micu, a'ɨ́ɨme. 33Majta me'ɨ́n ɨ́ mej tamuáamuata'a japuan hua'apua ará'ase, maúche'e mú tihuá'a'ixaate'eca'a me'ɨ́jna jɨme'e tɨ Dios ajtahua'a raatatɨ́ste ɨ́ xɨéjniu'ucare'ara'an a'ɨ́jna ɨ́ Jesús. A'ɨ́j mú jetze aráujca'anejca'a ɨ́ xɨéjniu'ucare'ara'an ɨ́ Dios huápɨ'ɨ mej mi tihuá'a'ixaate'eca'a. Rɨ́'ɨ mú tihuá'ajcha'ɨɨca'a, seɨj majta seɨj. 34Ajta ayén éene'e, capu ja'anáj ja'atɨ caí a'ij tí'ijviicua'iraca'a a'ɨ́jna jɨme'e naími'i mú tiú'utuaaxɨ a'achú mej caj tí'ijcha'ɨ́jme'eca'a, ti'itɨj chuej, na'ari chi'ij. Aj mú mi miyen huarɨ́j, u mú ye'erájtɨ ɨ́ tumin mej ra'ancuré'a me'ɨ́jna jɨme'e mej tiu'utuáa. 35Aj mú mi tiu'utátui a'ɨ́mej jemi ɨ́ mej tamuáamuata'a japuan hua'apua ará'ase. Majta me'ɨ́n, a'ɨ́ɨme mú huaré'a ɨ́ tumin ɨ́ mej caí a'ij tí'ijviicua'i. 36A'ɨ́j pu jɨ́n ayén tiuju'urɨ́j a'ɨ́jna ɨ́ José, a'ɨ́jna tɨ tí'ivaɨre'eca'a a'ɨ́mej jamuan huáacɨxa'astemua'ame'en ɨ́ Leví teecan. A'uu pu é'eme'ecan a'ɨ́jna ɨ́ José, a'ujna já'ahua'a tɨ ayén téja'arájtehuaa tɨjɨ́n Chipre. Ayee mú majta raatamuá'a tɨjɨ́n Bernabé. A'íjna i niuucari tɨjɨ́n Bernabé, ayée pu huataújmua'a a'íjna tɨjɨ́n Tɨ rɨ́'ɨ tihua'atá'aca a'ɨ́mej ɨ́ mej ruxɨeemɨ́jte'e. 37Seɨ́j pu chuej tícha'ɨɨca'a a'ɨ́jna ɨ́ José. Aj pu 'i ráatuaa. Ajta u ye'erájtɨ a'ɨ́jna ɨ́ tumin. Tɨ'ɨquí a'ɨ́mej huatátui ɨ́ mej tamuáamuata'a japuan hua'apua ará'ase.

will be added

X\