Los Hechos 3

1Seɨ́j xɨcaj jetze pu ayén tiuju'urɨ́j a'ɨ́jna ɨ́ Pedro, ajta a'ɨ́jna ɨ́ Juan. Naíimi'i mú á a'ujnéj a'ánna já'ahua'a teyuu tɨ a'utéjvee. Ayee mú huarɨ́j, a'iné pu'uri teja'uré'enejca'a a'atzaj mej pua'a téniúuve'e muá'aye'i ɨ́ Dios jemi. A'atzaj pu pɨ́tí'irɨjcaa cumu ayée a'ucamé'eca ɨ́ xɨcaj. 2Seica mú ja'atɨ á á'utu'ara'a muá'aye'i mej mi me'ɨ́n ye'itéjcheti a'ujna já'ahua'a tá'apueerta a'u mej miyen taja'atamuá'amua tɨjɨ́n tɨ naa seijre'e. Ayee mú tí'ijrɨ'ɨrejca'a tɨ́j na'a nain xɨcaj tzajta'a, tɨ́'ij a'ɨ́ɨn tumin huá'ahuaviira ɨ́ mej me'uun a'uteáru'ipi u teyujta'a. Capu ráye'ivejca'a a'ɨ́jna ɨ́ ja'atɨ. Ayee pu éene'e huanú'ihuaca'a, capu ráye'ivejca'a, a'iné cɨyáaxara'aca'a ɨ́ ru'ɨ́ɨca jetze. 3Tɨ́'ɨj a'ɨ́mej huaseíj a'ɨ́jna ɨ́ Pedro, ajta a'ɨ́jna ɨ́ Juan ɨ́ mej me'uun a'uteárutijme'e u teyujta'a, tɨ'ɨqui tumin hua'utáhuaviiri'i. 4Aj pu i a'ɨ́ɨn Pedro ra'aráaseij temua'a naa. Ajta a'ɨ́jna ɨ́ Juan, ayée pu che'atá na'a naa tira'aráaseij. Aj pu i ayén tiraata'ixaa a'ɨ́jna ɨ́ Pedro tɨjɨ́n: ―Patá'aj hui taaseíj. 5Tɨ'ɨquí anpuá'areca'a a'ɨ́jna ɨ́ teáata'a. Ayee pu tí'imuajca a'ɨ́jna tɨjɨ́n tumin mú raatá'asin. 6Ajta a'ɨ́ɨn Pedro ayén tiraata'ixaa tɨjɨ́n: ―Canu plata tícha'ɨɨ, canu neajta oro tícha'ɨɨ ɨ́ nej muaatapuaíjve'en. Aru ti'itɨ́j nu tícha'ɨɨ, a'ɨ́j nu'u hui muaatá'asin. Ayee nu tí'imua'ixaate'e a'ɨ́jna jetze me'ecan ɨ́ Jesús tɨ Nazarét é'eme'ecan, ajchesi, patá'aj hui rájra'ani. 7Tɨ'ɨquí ra'anáavi'i ɨ́ muájca'are'ara'an jetze. Ajta ra'ajjáj. Jɨ́me'en pu'u ra'ajjáj, aj pu i huarúj ɨ́ ru'ɨ́ɨca jetze ajta nainjapua ɨ́ ruchepuá jetze. 8A'ɨjna tɨ cɨyáaxara'aca'a tɨ'ɨqui ájtzucu. Ajta á a'utéechaxɨ. Aj pu i a'utéjche tɨ á'uche'ecane'en. Tɨ'ɨquí huá'a jamuan u a'uteájrupi u teyujta'a ɨ́ Pedro, ajta ɨ́ Juan. Titzúna'iche'e pu huamé'ecaa. Rɨ́'ɨ pu tiratá'acare'e ɨ́ Dios. 9Naíimi'i mú raaseíj ɨ́ teɨte tɨ ari á'uche'ecane'e a'ɨ́jna ɨ́ tɨ cɨyáaxara'aca'a, majta ráanamuajri'i tɨ rɨ́'ɨ tiratá'aca'a ɨ́ Dios. 10Maraamuá'a tɨjɨ́n a'ɨ́ɨ pu pɨ́rɨcɨ ɨ́ tɨ aj je'itécatii a'u tɨ é'epueerta tɨ ayén téja'arájtehuaa tɨjɨ́n tɨ naa seijre'e, ajta ɨ́ tɨ vaɨ́ri'ira huá'ahuavi'iraca'a ɨ́ teɨte. Matɨ́'ɨj mi naa rɨ́'ɨ tira'utaseíj, majta tɨ́n tí'itziɨɨne'eca'a. 11Ajta a'ɨ́ɨn ɨ́ tɨ cɨyáaxara'aca'a, a'ɨ́ɨ pu huá'ahuavi'iraca'a a'ɨ́jna ɨ́ Pedro, ajta a'ɨ́jna ɨ́ Juan. Aa mú a'uté'uuca'a tá'apueerta tɨ ayén téja'arájtehuaa tɨjɨ́n a'u tɨ Salomón e'evé'echi'ive'e. Naíimi'i mú a'utéarua a'ɨ́ɨme ɨ́ teɨte a'u mej a'uté'uuca'a. Jé'ecan mú naa tite'utaújmuajteca'a a'ɨ́mej jemi. 12Tɨ́'ɨj a'ɨ́ɨn Pedro hua'useíj, ayée pu tihua'utá'ixaa tɨjɨ́n: ―¿A'iné 'een jɨ́n siyen a'ij tejá'useij mɨ ru tzajta'a mú'een, mɨ sej Israél jetze ajtéme'ecan? ¿A'iné sej si jé'ecan taseíj? ¿Ni siyen tí'imua'atze tej iteen tajɨ́ɨmua'a tiráahuaa a'íjna i ja'atɨ? ¿Ni ayén tejamuá'amitɨejte'e tej iteen raarújte te'ɨ́jna tɨ ayén mé tejá'uche'ecane'en te'ɨ́jna jɨme'e ɨ́ tej raayɨ́'ɨtɨ na'ari te'ɨ́jna jɨme'e ɨ́ tej caí ja'anáj auteájturaa ɨ́ Dios jemi? Capu xaa ne'u ayén ti'ayajna. 13’Ajta a'ɨ́jna ɨ́ Dios, a'ɨ́ɨ pu rɨ́'ɨ tihua'atá'acare'e ɨ́ á'amuavaujsimua'a teeca a'ɨ́jna ɨ́ Abraham teecan, ajta a'ɨ́jna ɨ́ Isaac teecan, ajta a'ɨ́jna ɨ́ Jacobo teecan. A'ɨ́ɨ pu hua'aDioj raarújte a'íjna i ja'atɨ, a'iné a'ij pu té'antzaahua a'ɨ́jna jemi ɨ́ Jesús tɨ Nazarét é'eme'ecan. Dios pu ayén tiraatá'a a'ɨ́jna tɨ ravaɨre'e tɨ a'ɨ́ɨn ti'itéveeca'a ti'itɨj jɨme'e tɨ jaítze'e ve'ée, a'ɨ́jna sej mú'een tiu'utátui a'ɨ́jna ɨ́ Jesús huá'a jemi ɨ́ mej tí'aijta. Ajta a'ɨ́ɨn Pilato, raxɨ́'eve'eca'a tɨ raatátuaani. Mɨ seajta mú'een, caxu raataxɨ́'eve, sino ayée xu tí'ijxe'eve'eca'a tɨ huámɨ'ɨni. 14’Caxu raatátuaa se'ɨ́jna ɨ́ ja'atɨ tɨ caí ja'anáj ti'itɨj jɨ́n auteájturaa ɨ́ Dios jemi, ajta ɨ́ tɨ rɨ́'ɨ tí'itevistaca'a sino ayée xu tiraata'ixaa tɨ a'ɨ́jna huatátuaani ɨ́ seɨ́j tɨ a'ij pua'a tí'itevistaca'a. 15Mú'een xu hui seajta raajé'ica se'ɨ́jna ɨ́ ja'atɨ tɨ hua'atá'acare'e mej ruuri muá'ara'ani ɨ́ teɨte. Ajta Dios pu ajtahua'a raatatɨ́ste ɨ́ xɨéjniu'ucare'ara'an tɨ i ajtahua'a ruuri á'ara'ani. A'ɨ́j tu xaa huaseíj, iteen. 16A'ɨ́j pu jetze araújca'ane ɨ́ Jesús a'ɨ́jna ɨ́ tɨ cɨyáaxara'aca'a. Ɨ́ sej raaseíj, sej seajta seri ramua'ate, a'ɨ́ɨ pu rá'antzaahua ɨ́ Jesús ajta tiráahuaate'e. A'ɨ́j pu jɨ́n ari huarúj. 17’Me'ecui xaa ne'u, ne'ihuaamua'a, nee nu ramua'aree a'ij sej ti'itɨj huáruu sej caí ramua'areereca'a, majta ɨ́ mej tejá'amua'ijte'e, camu majta ramua'areereca'a. 18Ajta Dios pu ra'ará'aste a'ij mej amuacaícan tiu'utaxájtaca'a a'ɨ́mej ɨ́ mej tí'ixaxa'ata'a ɨ́ Dios jetze me'ecan. Ayee mú tiu'utaxájtaca'a tɨ nu'u a'ɨ́ɨn Cɨríistu'u rajpuaíitzi a'ame, a'ɨ́jna jɨme'e tɨ nu'u Dios án yá'ujra ɨpuari japua. 19’Setá'aj seɨcɨé tiú'umua'ati ɨ́ Dios jemi. Seajta huataújtuiire'en ɨ́ Dios jemi tɨ ij a'ɨ́ɨn tejamuaata'áijte'en, tɨ ij ajta a'ɨ́ɨn tejámuaatá'uuni'i ɨ́ sej jɨ́n auteájturaa ɨ́ jemin. Aj pu hui teja'uré'enejsin a'ájna xɨcájra'a jetze tɨ́'ɨj jetzen tavástara'a ta japua niuuni. 20Aj pu i Dios u ye'uta'íti'i mú'ejmi jemi a'ɨ́jna ɨ́ Cɨríistu'u tɨ ari raatá'a tɨ a'ɨ́jna jɨ́n antiújmua'areere tɨ tiu'uta'aíjta nainjapua. A'ii pu a'ɨ́ɨn pú'een ɨ́ Cɨríistu'u a'ɨ́jna ɨ́ Jesús. 21’Ruxe'eve'e tɨ a'ɨ́ɨn Jesús u a'utevée á'ara'ani a'ujna u ta japua ajta na'a caí Dios tiu'ujéjcuare'en nain tɨ́j na'a ɨ́ tɨ íiyen tí'iseijre'e ɨ́ chaanaca japua. Ayee pu a'ɨ́ɨn Dios ajmí'i te'ataújratziiri'i matɨ́'ɨj tiu'utaxájtaca'a a'ɨ́ɨme ɨ́ mej jetzen me'ecan tí'ixaxa'ata'a ɨ́ Dios. 22Ayee pu a'ɨ́ɨn Moisés tihua'utá'ixaa a'ɨ́mej ɨ́ tavaújsimua'a teeca tɨjɨ́n: “Dios pu nu'u seɨ́j avé'evi'itɨ ɨ́ ja'atɨ tɨ ayén che'atá na'a jetzen me'ecan tiu'utaxájta netɨ́j inee. A'ɨ́ɨ pu mú'ejmi jetze ajtéme'ecanta a'ame. Xáanamuajri'i naíjmi'i a'ij tɨ a'ɨ́ɨn tiu'utaxájta, setá'aj seajta rá'antzaahuate'en. 23Tɨ pua'a nu'u caí ja'atɨ rá'antzaahuate'en, miché'e raatamuárite'en. Ché'e caí ché'e a'ɨ́ɨn huá'a jemi seijre'e ɨ́ teɨte.” Ayee pu nu'u hui tihua'utá'ixaa a'ɨ́jna ɨ́ Moisés. 24’Ayej xaa ne'u ti'ayajna naími'i ɨ́ mej tiu'utaxájtaca'a ɨ́ Dios jetze me'ecan, tɨ́j na'a a'ɨ́jna tɨ́'ɨj a'ɨ́ɨn Samuel seijre'eca'a, ajta tɨ́j na'a tɨ yú e'iré'ene, a'ɨ́ɨ mú amuaaté'ee tiu'utaxájtaca'a a'ájna xɨcájra'a jetze tɨ́'ɨj Dios tiraata'aíjte'en a'ɨ́jna ɨ́ Cɨríistu'u. 25A'íjna ɨ́ tɨ Dios jɨ́n te'ataújratziiri'i, a'ɨ́ɨ pu hui ajta mú'ejmi jemi huateáturaasin a'iné mú'een xu naími'i huayaujmua'a pú'een ɨ́ mej tí'ixaxa'ata'a ɨ́ Dios jetze me'ecan. Dios pu ajta te'ataújratziiri'i ɨ́ runiuuca jɨme'e a'ɨ́mej jemi ɨ́ ruvaújsimua'a teeca. Ayee pu a'ɨ́jna jɨ́n tiraata'ixaa ɨ́ Abraham teecan tɨjɨ́n: “Naíimi'i ɨ́ teɨte ɨ́ mej me'uun huachéjme'e muá'aju'un ɨ́ chaanaca japua, a'ɨ́ɨ mú ra'ancuré'asin ɨ́ tɨ i'i xɨ́'epɨ'ɨn tɨ́j na'a ɨ́ tɨ hua'utévaɨre'esin a'ɨ́mej ɨ́ mej á jetze a'iránejsin.” 26Tɨ́'ɨj i Dios ra'antíhua'u a'ɨ́jna ɨ́ Jesús tɨ ravaɨre'e. A'ɨ́ɨ pu u ye'uta'íteca'a mú'ejmi jemi tɨ́'ij a'ɨ́ɨn rɨ́'ɨ tejamuaatá'an sej si naíjmi'i raatapuá'ajta se'ɨ́jna ɨ́ tɨ a'ij pua'a een. ―Ayee pu tihua'utá'ixaa a'ɨ́jna ɨ́ Pedro.

will be added

X\