Los Hechos 26

1Aj pu i Agripa ayén tiraata'ixaa a'ɨ́jna ɨ́ Pablo tɨjɨ́n: ―Nee nu muaatá'asin pej tiu'utaxáj mua'a niuuca jɨme'e. Aj pu i Pablo ajmeíjca'ataca'a. Tɨ́'ɨj i a'utéjche tɨ huateújnan runiuuca jɨme'e. 2Ayen tɨjɨ́n: ―Agripa mú'ee pej i'i rey, yee pu hui tiná'amitɨejte'e tɨ temua'a naa tineetéva'ɨri nej yé huatéjvee mú'eetzi jemi nej ni huaténnan íjii i mej jɨ́n tí'inexajtzi'i ɨ́ mej Israél jetze ajtéme'ecan. 3Naa pu ne'ase a'iné pepu'uri ramua'aree a'ij tɨ 'een ɨ́ hua'aye'ira ɨ́ mej Israél jetze ajtéme'ecan, pajta ramua'aree ɨ́ mej jɨ́me'en rújee. A'ɨ́j nu jɨ́n niyen tí'imuaahuavii pej náanamua temua'a naa. 4’Naíimi'i ɨ́ mej Israél jetze ajtéme'ecan mu'uri hui ramua'aree a'ij nej yé tiu'utéveeca netɨ́'ɨj pá'arɨ'ɨstaca'a, ajta íjii nej neri vásta'a. Canu ti'itɨj a'ij huáruu a'ujna nej é'eche ni iiyecuí, canu neajta ti'itɨj a'ij ruure. 5Mu'uri á'atee mej nemua'ate. Tɨ pua'a hua'aráanajche, í'irɨ'ɨri mej miyen tiu'utaxáj yee nain nu jɨ́n te'ara'aste'a ɨ́ ye'irá ɨ́ mej raaxɨ́'epɨ'ɨntare ɨ́ mej i'i fariseo. Jaítze'e pu hui muárɨ'eri hua'aye'ira a'ɨ́mej ɨ́ fariseo. 6’Mɨ́ majta, mu'uri u ne'aráajaj mej mi neetzi jetze te'ujpuá'ajte'en me'ɨ́jna jɨme'e nej rachú'eve'e ne'ɨ́jna tɨ Dios jɨ́n te'ataújratziiri'i ɨ́ tavaújsimua'acɨ'ɨ jemi. 7’Majta a'ɨ́ɨme ɨ́ tateɨ́testemua'a ɨ́ mej tamuáamuata'a japuan hua'apua ará'ase, a'ɨ́ɨ mú majta rachú'eve'e ajta na'a caí teja'uré'enen a'ɨ́jna xɨcáara'a jetze matɨ́'ɨj huatarújsin huá'a tzajta'a ɨ́ mɨ'ɨchite. A'ɨ́j mú hui jɨ́n raná'amiche'e ɨ́ Dios. Nain tújca'ari tzajta'a, majta nain tɨ́ca'ari tzajta'a mú ravaɨre'e. Ajta mú'ee, Agripa, pej i'i rey, a'iné ayée nu che'atá nena'a tí'ijchu'eve'en ne'ɨ́jna, a'ɨ́j mú jɨ́n tí'inexajtzi'i. 8¿Ni tzaa caí rɨ'ɨrí sej rá'antzaahuate'en tɨ Dios ajtahua'a hua'utá'asen ɨ́ mej meri huácuii mej mi majtáhua'a huatarún? 9’Nee nu neajta jéjcua'ɨmua niyen tí'imua'ajca tɨ ayén tiú'ujxe'eve'e nej nain jɨ́n tihua'utá'ijmɨi ɨ́ mej rá'atzaahuate'e me'ɨ́jna tɨ ayén ántehuaa tɨjɨ́n Jesús tɨ Nazarét é'eme'ecan. 10Neajta niyen huarɨ́j a'ánna Jerusalén. A'ɨ́ɨme ɨ́ mej tí'aijta teyujta'a, a'ɨ́ɨ mú hui cuapée naatapíj ɨ́ nej jɨ́n huatáncɨ'ɨpua nej hua'iteáanan jeíhua ɨ́ mej té'atzaahuate'e. Ajta, matɨ́'ɨj huá'acui'icare'e, nee nu neajta tiu'utá'a ɨ́ ca'aníjra'a ne'ɨ́jna jɨme'e tɨ na'aránajcheca'a. 11’Mu'iitɨ́ nu hui puaíjtzi hua'utá'a mej mi ra'antipuá'ajte'en ɨ́ mej rá'atzaahuate'e, mej mi majta raatéxɨeehuata me'ɨ́jna ɨ́ Jesús. Ayee nu huá'aruurejca'a nainjapua hua'atéyujta'a, a'iné jeíhua nu huá'ajcha'ɨre'eca. A'u tɨ na'a nu huayé'ive matɨ́j mena'a titeechéejme'ecaa nej ni a'ij pua'a huá'uruuren. 12’Ayee nu éeni'icɨ'e aumé'ecaa ne'újna Damasco. A'ɨ́ɨme ɨ́ mej tí'aijta teyujta'a, a'ɨ́ɨ mú hui naata'íteca'a, majta naatá'a ɨ́ nej jɨ́n niyen rɨcɨ. 13’Ayee nu tí'imua'ixaate'e, mú'ee pej i'i rey, a'úu nu auumé'eca juye jetze a'atzaj cumu tacuarixpua netɨ́'ɨj raaseíj tɨ a'icátaaxɨ u ta japua. Temua'a pu ne jetze ti'irájve ɨ́ taij, ajta huá'a jetze ɨ́ mej ne jamuan á'ujujhua'ane'e. Jaítze'e pu huatátaaxɨ caí ɨ́ xɨcaj. 14Tetɨ́'ɨj ti a'itavátzɨ. Aj nu ni ja'atɨ huánamuajri'i tɨ á'a teja'utaxájtaca'a hua'aniuuca jɨme'e a'ɨ́ɨme ɨ́ mej Israél jetze ajtéme'ecan tɨjɨ́n: “Saulo, Saulo, ¿a'iné pej pi piyen a'ij pua'a neruure ineetzi? Mú'ee pe aseɨ́j a'aa ɨ́ puaíjtzi.” 15’Netɨ́'ɨj ni niyen tiraata'íhua'uri'i tɨjɨ́n: “¿A'ataani pej pú'een, nevástara'a?” ’Aj pu i ayén tiu'utaniú tɨjɨ́n: “Nee nu nu'u ne'ɨ́n pú'een ɨ́ Jesús, pej a'ij pua'a neruure. 16Ájchesi. Huatéechaxɨ. Ayee nu 'een jɨ́n huataseíjre mú'eetzi jemi nej ni timua'íjcate'en ne'ɨ́jna jɨme'e pej naatévaɨre'e, pajta tihua'utá'ixaate'en ɨ́ teɨte a'ij pej peri tiu'uséij inee jemi, pajta piyen tihua'utá'ixaate'esin a'ij nej nauj éeni'icɨ'e timuaataseíjrate'esin. 17- 18’“Nee nu nu'u á japua niuuni huá'a jemi ɨ́ mej Israél jetze ajtéme'ecan, neajta huá'a jemi ɨ́ mej seɨj chuéjra'a japua é'eme'ecan. Ijii nu hui muaata'íti pej á'ura'ani a'ɨ́mej jemi mej mi yaú'itɨée muá'ara'ani, majta ráamua'aree a'ij tɨ tí'ijxe'eve'e ɨ́ Dios, tɨ i caí ché'e a'ɨ́ɨn tihuá'aijte'e ɨ́ Satanás sino Dios pu'u tíhua'uta'aíjte'esin. Aj pu nu'u xaa Dios tíhua'utá'uuni'ira. Ajta hua'utá'asin mej me'uun a'uté'e muá'ara'ani a'ɨ́mej jamuan ɨ́ tɨ Dios rɨ́'ɨ á tihuaja'utéhuii a'ɨ́jna jɨme'e ɨ́ mej ná'antzaahua.” Ayee pu hui tinaatá'ixaa a'ɨ́jna ɨ́ Jesús. 19’Ayee pu'u xaa, Agripa mú'ee pej i'i rey, nera'ará'aste ne'ɨ́jna u ta japua tɨ é'eseijre'e. 20Netɨ́'ɨj ni amuacaí tihua'utá'ixaa ne'ɨ́mej ɨ́ mej a'uun a'uchéjme a'ujna Damasco. Neajta a'ɨ́mej jemi ɨ́ mej me'uun Jerusalén é'eche. Neajta naíjmi'icɨ'e tɨ́j na'a a'uun tɨ huatacá'a u Judea, a'úu nu tihua'utá'ixaa ɨ́ teɨte, neajta ɨ́ mej seɨj chuéjra'a japua é'eme'ecan. Jéihua nu hui hua'ujé mej mi seɨcɨé tiú'umua'ati ɨ́ ru tzajta'a, mej mi majtáhua'a Dios jemi seíire'e muá'ara'ani, matá'aj majta miyen huárɨni mej mi seica ráamua'aree tɨjɨ́n: “Mu'uri seɨcɨé tiu'umuá'aj.” 21A'ɨ́j mú hui jɨ́n ɨ́ mej Israél jetze ajtéme'ecan, a'ɨ́ɨ mú naateevi'i a'ujna teyujta'a. Méneje'icatacuca'a, micu. 22- 23’Mɨ́ ajta, Dios pu naatévaɨ jeíhua. A'ɨ́j nu jɨ́n caí xɨ huamɨ́'ɨ sino naúche'e nu hui tihuá'a'ixaate'e naíjmi'ica ɨ́ teɨte, ɨ́ mej tɨ'ɨríi, neajta ɨ́ mej vaujsi. A'ii nu'u hua'utá'ixa a'ij mej tiu'utaxájtaca'a a'ɨ́ɨme ɨ́ mej tí'ixaxa'ata'a ɨ́ Dios jetze me'ecan, ajta a'ɨ́jna ɨ́ Moisés teecan. Ayee mú tiu'utaxájtaca'a tɨ ayén éene'en rɨníiche'en tɨ nu'u ayén rajpuaíitzi á'ara'ani a'ɨ́ɨn tɨ Dios án yá'ujra ɨ́ ɨpuari jetze. Ajta nu'u tɨ́'ɨj huamɨ́'ɨn, a'ɨ́ɨ pu a'ɨ́ɨn pú'eene'e a'ame ɨ́ tɨ amuacaí huatarújsin ɨ́ mɨ'ɨchite tzajta'a. Ajta á'iyen a'ɨ́ɨn nu'u tihuá'a'ixaate'en tɨ ari é'eseijre'e ɨ́ tɨ jɨ́n Dios hua'utévaɨ ɨ́ teɨte ɨ́ mej Israél jetze ajtéme'ecan, ajta ɨ́ mej seɨj chuéjra'a japua é'eme'ecan. 24Jɨ́me'en pu'u ayén tiu'utaxájtaca'a ɨ́ Pablo, aj pu i á'iyen huajíjhuaca'a a'ɨ́jna ɨ́ Festo tɨjɨ́n: ―Pablo, pá'atɨmua'i mú'ee. Pá'atɨmua'i hui pe'ɨ́jna jɨme'e pej jeíhua tihuá'amua'ate. 25Ajta a'ɨ́ɨn ɨ́ Pablo, ayée pu tiraata'ixaa tɨjɨ́n: ―Festo pej i'i tajtuhuan. Canu hui netɨ́mua'i. A'ɨjna jɨme'e ɨ́ nej neri tejamuá'ixaa nemua'atziira'a jetze pu huanéj tɨ rɨ́'en, ajta ayén ti'ayajna. 26Amɨ́ pu hui rey rú'umua'aree a'ɨ́jna jɨme'e. A'ɨ́j pu jɨ́n í'irɨ'ɨri nej caí tí'itziɨɨne'e netiu'utaxáj jamuan. Ayej ne'ase, capu ti'itɨ́j a'ij huarɨ́j tɨ caí ráamua'areeri'i, a'iné capu ti'itɨ́j a'ij huarɨ́j avíitzi'i jɨme'e. 27’Ari mú'ee, Agripa pej i'i rey, ¿ni pecaí rá'atzaahuate'e ɨ́ mej tiu'utaxájtaca'a a'ɨ́ɨme ɨ́ mej tí'ixaxa'ata'a ɨ́ Dios jetze me'ecan? Nee nu ramua'aree pej rá'atzaahuate'e. 28Ajta Agripa ayén tiraata'ixaa tɨjɨ́n: ―¿Ni ayén timuá'amitɨejte'e pej pe'ɨ́jna jɨ́n na'antimuá'itɨn nej neajta inee té'antzaahuate'en a'ɨ́jna jɨme'e ɨ́ niuucari tɨ caí ti'imu'íi? 29Ajta a'ɨ́ɨn ɨ́ Pablo ayén tiu'utaniú tɨjɨ́n: ―Tɨ pua'a cɨ́j na'a, na'ari tɨ pua'a jeíhua, ayée nu hui tí'ijxe'eve'e ɨ́ Dios jemi, pej mú'ee, majta naími'i mɨ seica ɨ́ mej nenamua íjii, mej mi miyen tira'ará'asten me'ɨ́jna ɨ́ Jesús netɨ́j inee, ɨ́ nej jɨ́me'en neri puaíjtzi huatánne'a, sino mej caí miyen tirajpuaíitzi muá'ara'ani netɨ́j inee. 30Jɨ́me'en pu'u ayén tiu'utaxájtaca'a a'ɨ́jna ɨ́ Pablo, tɨ́'ɨj i huatéechaxɨ a'ɨ́jna ɨ́ rey, ajta a'ɨ́jna ɨ́ tajtuhuan, ajta a'ɨ́jna ɨ́ Berenice; majta mú huatéhuiixɨ ɨ́ mej e'eré'ete'ecaa huá'a jamuan. 31Aj mú mi huiráacɨ rujɨ́ɨmua'a mej mi ti'ihuaúrixaate'en me'ɨ́jna jɨme'e. Majta miyen tiú'urixaate'ecaa tɨjɨ́n: ―Amɨjna mɨ tevi, capu hui ti'itɨj a'ij huáruu ɨ́ tɨ ti'itá'aca ɨ́ mej jɨ́n raajé'ica. Capu ajta ayén tiraavíjte'e tɨ ayén aiteánami'ihua. 32Ajta a'ɨ́ɨn Agripa, a'ɨ́ɨ pu ayén tiraata'ixaa a'ɨ́jna ɨ́ Festo tɨjɨ́n: ―Tɨ pua'a a'ɨ́ɨn caí ayén tí'ijhuauca tɨ a'ɨ́ɨn raaxɨ́'epɨ'ɨntare'en ɨ́ tɨ tí'ita'aijte'e, rɨ'ɨríistaca'a pu tej ra'uxɨ́jte'enche'e iteen.

will be added

X\