Los Hechos 25

1Aj pu 'i Festo a'uun a'ará'a a'ujna tɨ́'ij te'enteárute tajtuhuan jɨme'e. Huaíca xɨcaj pu á'atee a'ujna Cesarea. Aj pu 'i a'ujnéj a'ájna Jerusalén. 2Majta me'ɨ́n ɨ́ mej tihuá'aijte'e u teyujta'a, majta seica ɨ́ mej Israél jetze ajtéme'ecan ɨ́ mej ve'ecán jɨ́n títetateí, a'ɨ́ɨ mú jemin a'uré'ene me'ɨ́jna ɨ́ Festo. Matɨ́'ɨj mi tiraaxájtzi'iri'i me'ɨ́jna ɨ́ Pablo. 3Jéihua mú rájhuaviiri'i ti'itɨ́j tɨ huá'a jetze ruxe'eve'eca'a tɨ a'ɨ́ɨn Festo raata'aíjta mej ya'uvé'evi'itɨn me'ɨ́jna ɨ́ Pablo. Ayee mú tí'imua'ajca a'ɨ́mej mej raajé'ica á já'ahua'a, juye jetze. 4Ajta ayée pu tihua'utá'ixaa a'ɨ́jna ɨ́ Festo tɨjɨ́n: ―Aitenami'i a'ɨ́jna ɨ́ Pablo a'ujna Cesarea. Neajta inee, a'úu nu a'umé'e na'ame ruijmua'a, na'ari aaruijmua'a. 5Miché'e seica u á'uju'un ne jamuan ɨ́ mej tí'aijta ve'ecán jɨme'e mej mi ráamua'aree tɨ pua'a a'ɨ́ɨn Pablo auté'ɨtze ti'itɨj jɨme'e, mej mi me'ɨ́n ti'itɨj jɨ́n jetzen te'ujpuá'ajte'en. ―Ayee pu tihua'utá'ixaa. 6Ayee pu u é'etee a'achú cumu aráhuaica xɨcaj, na'ari tamuáamuata'a xɨcaj a'ájna Jerusalén. Aj pu i a'ucáane a'ujna Cesarea. Yee ruijmua'ate'e yee pu a'ujyeíjxɨ huá'a jamuan ɨ́ jueesi. Aj pu i raata'aíjtaca'a mej nu'u ye'eráajan me'ɨ́jna ɨ́ Pablo. 7Tɨ́'ɨj a'ɨ́ɨn Pablo a'uteájrupi a'ujna, aj mú mi me'ɨ́n ɨ́ mej Israél jetze ajtéme'ecan, a'ɨ́ɨme ɨ́ mej me'uun e'eráacɨ u Jerusalén, a'ɨ́ɨ mú ajteáxɨɨreca'a. Matɨ́'ɨj mi jeíhua tiraaxájtzi'iri'i me'ɨ́jna jɨme'e tɨ a'ij pua'a een. Aru capu huatárɨ'ɨristareca'a mej raataxáj tɨ pua'a ayén ti'ayajna nusu caí. 8Aj pu i Pablo tiu'utaxájtaca'a tɨ́'ij huateújnan. Ayen tɨjɨ́n: ―Canu hui ti'itɨj jɨ́n auteájturaa jemin ɨ́ huá'ayu'uxa ɨ́ mej Israél jetze ajtéme'ecan ni canu neajta ne'ɨ́jna jɨme'e ɨ́ hua'ateyuu. Canu neajta ti'itɨj jɨ́n auteájturaa a'ɨ́jna jemi ɨ́ tɨ tihuá'aijte'e a'ɨ́mej ɨ́ romanos. ―Ayee pu tihua'utá'ixaa a'ɨ́jna ɨ́ Pablo. 9Ajta a'ɨ́ɨn ɨ́ Festo, a'iné ayée pu tí'ijxe'eve'eca'a tɨ rɨ́'ɨ tiu'uteáturan a'ɨ́mej jemi ɨ́ mej Israél jetze ajtéme'ecan, tɨ́'ɨj i ayén tiraata'íhua'uri'i tɨjɨ́n: ―¿Ni mua'aráanajche pej á'ura'ani pe'ánna Jerusalén neatá'aj ne'ájna ye'uxɨ́'epɨ'ɨntare'en mú'eetzi jɨme'e? 10Pablo pu ayén tiu'utaniú tɨjɨ́n: ―Yee nu huatéjvee huá'a jemi i jueesi i mej huaíca i mej ravaɨre'e ɨ́ tɨ tihuá'aijte'e ɨ́ romanos. Ayee pu hui tiraavíjte'e sej raaxɨ́'epɨ'ɨntare'en seyajna a'iné pepu'uri temua'a ramua'aree, canu ti'itɨj jɨ́n auteájturaa a'ɨ́mej jemi ɨ́ mej Israél jetze ajtéme'ecan. 11Tɨ pua'a xaa na'uteáturanche'e ti'itɨj jɨme'e tɨ hua'atá'aca mej naajé'ica, aj nu xaa ánca'anénche'e nej huámɨ'ɨni. Na'ari caí, tɨ pua'a hui caí ayén ti'ayajna a'ij mej meri tinaaxájtzi'iri'i, capu ja'atɨ huataújcɨ'ɨpua tɨ neetzi tiu'utátuiire'en huá'a jemi. Némuahuavii tɨ a'ɨ́ɨn raaxɨ́'epɨ'ɨntare'en a'ɨ́jna tɨ tihuá'aijte'e ɨ́ romanos. 12Ajta a'ɨ́ɨn ɨ́ Festo, a'ɨ́mej jamuan pu tiu'uxájtaca'a ɨ́ mej tirá'ixaa. Aj pu i ayén tiraata'ixaa a'ɨ́jna ɨ́ Pablo tɨjɨ́n: ―Mú'ee pe hui rájhuau tɨ a'ɨ́ɨn raaxɨ́'epɨ'ɨntare'en ɨ́ tɨ tihuá'aijte'e ɨ́ romanos, a'ɨ́jna jemi pe a'umé. 13Teuumé'eca a'achú cumu hua'apua xɨcaj, huaíca xɨcaj tɨ́'ɨj seɨj a'uun a'ará'a a'ujna u Cesarea. A'ii pu a'ɨ́ɨn pú'een a'íjna tɨ rey jɨme'e ti'itéveeca'a. A'ɨ́ɨ pu tihuá'aijte'e a'ɨ́mej ɨ́ mej Israél jetze ajtéme'ecan. Ayee pu ántehuaaca'a tɨjɨ́n Agripa. A'ii pu ajta a'uun a'ará'a a'ɨ́jna tɨ yá'uvi'itɨn tɨ ayén ántehuaaca'a tɨjɨ́n Berenice. A'uu mú a'uvé'eju'un mej mi raatateújte'en me'ɨ́jna ɨ́ Festo. 14- 15A'iné jeíhua mú u á'ateeri me'újna, Festo pu raatá'ixaa a'ɨ́jna ɨ́ rey a'ɨ́jna jɨme'e ɨ́ Pablo. Ayee pu tiraata'ixaa tɨjɨ́n: ―A'ɨ́jna tɨ́'ɨj hui Félix airájraa ɨ́ tɨ jɨ́n ti'itéveeca'a, netɨ́'ɨj ne'újna á'ucatii u Jerusalén, a'ɨ́ɨme ɨ́ mej tí'aijta huá'a teyujta'a, majta hua'avaujsi ɨ́ mej Israél jetze ajtéme'ecan, a'ɨ́ɨ mú ti'itɨj jɨ́n jetzen te'ujpuá'ajte me'ɨ́jna ɨ́ Pablo. Majta á'iyen néjhuaviiri'i nej puaíjtzi raatá'an. 16Ayee nu tihua'utá'ixaa ne'ɨ́jna jɨme'e tɨ caí taatá'aca ɨ́ hua'aye'ira ɨ́ romanos tej tiyen puaíjtzi raatá'an ɨ́ Ja'atɨj tɨ a'ɨ́ɨn huámɨ'ɨni. Amuacaí pu ayén tiú'ujxe'eve'e tɨ a'ɨ́ɨn ja'atɨ tiu'uxáj huá'a jamuan ɨ́ mej ti'itɨj jɨ́n jetzen tí'ijpua'ajte'e tɨ ruseɨ́j runiuuca jɨ́n huateújnan. 17’A'ɨ́j nu hui jɨ́n, matɨ́'ɨj mú a'uvé'eju'un neetzi jemi, canu a'achú á'atee, sino yee ruijmua'ate'e yee nu a'ujyeíjxɨ huá'a jamuan ɨ́ jueesi. Netɨ́'ɨj ni raata'aíjtaca'a mej rá'anvi'itɨn ɨ́ Pablo. 18Majta me'ɨ́n ɨ́ mej ti'itɨj jɨ́n jetzen te'ujpuá'ajte, matɨ́'ɨj autéjhuii mej tiu'utaxáj, camu me'ɨ́jna jɨ́n jetzen te'ujpuá'ajte a'ij nej tí'imua'ajca. 19A'ii mu'u jɨ́n tiraaxájtzi'iri'i me'ɨ́jna jɨme'e ɨ́ ruye'irá, ajta a'ɨ́jna ɨ́ ja'atɨ teecan tɨ ayén ántehuaaca'a tɨjɨ́n Jesús. Mɨ ajta a'ɨ́ɨn Pablo ayén ti'ixa tɨjɨ́n: “Aúche'e pu nu'u ruuri a'ɨ́jna ɨ́ Jesús.” 20’Ja'iné canu a'atzu rájteu a'ij nej ye'í huárɨni ne'íjna jɨme'e, netiraata'íhua'uri'i ne'ɨ́jna ɨ́ Pablo tɨ pua'a u á'uye'imɨ'ɨ a'ánna Jerusalén mej mi ye'uxɨ́'epɨ'ɨntare'en me'ɨ́jna jɨme'e. 21Tɨ'ɨquí a'ɨ́ɨn naatáhuaviiri'i tɨ a'ɨ́ɨn hui raaxɨ́'epɨ'ɨntare'en ɨ́ tɨ tí'ita'aijte'e itejmi i tej romanos pú'een. Netɨ́'ɨj ni raata'íteca'a tɨ aiteánami'ihua, ajta caí capu rɨ'ɨrí nej raata'íte ne'ɨ́jna jemi ɨ́ tɨ tí'ita'aijte'e. 22Aj pu i a'ɨ́ɨn Agripa ayén tiraata'ixaa tɨjɨ́n: ―Na'aráanajche hui nej ráanamua inee ruséntacan. Aj pu i ayén tiu'utaniú a'ɨ́jna ɨ́ Festo tɨjɨ́n: ―Ruijmua'a pej hui ranamuajran. 23Yee ruijmua'ate'e yee pu a'uun a'ará'a a'ɨ́jna ɨ́ Agripa, ajta a'ɨ́jna ɨ́ Berenice, ajta a'ɨ́jna ɨ́ Festo. Jéihua mú á'ujtzaahuate'eca'a. Matɨ́'ɨj mi me'uun a'uteájrupi huá'a jamuan ɨ́ mej vivejmé'en jɨ́n títetateí ɨ́ xantaaru'u, majta ɨ́ mej ye'eráaja me'ɨ́jna ɨ́ Pablo. 24Yee pu tiu'utaxájtaca'a a'ɨ́jna ɨ́ Festo tɨjɨ́n: ―Agripa mɨ pej i'i rey, seajta mɨ sej yee huaté'uu ta jamuan, xaaseíj hui semɨ́jna mɨ tevi. A'ɨ́ɨme ɨ́ mej Israél jetze ajtéme'ecan ɨ́ mej a'uun é'eche a'ánna Jerusalén, majta ɨ́ mej íiyen a'uchéjme ayujna Cesarea, naími'i mú naatáhuaviiri'i amɨjna jɨme'e i tevi. Ayee mú títetéjijhuajmé'e tɨjɨ́n: “Capu nu'u ché'e ayén tiraavíjte'e tɨ ruuri.” 25’Ayee pu hui tiná'amitɨejte'e ineetzi tɨ caí ti'itɨj jɨ́n auté'ɨtze tɨ hua'atá'aca mej raajé'ica. Ajta amɨjna, ayée pu tinaatáhuaviiri'i tɨ a'ɨ́ɨn nu'u raaxɨ́'epɨ'ɨntare'en a'ɨ́jna ɨ́ tɨ tí'ita'aijte'e. Netɨ́'ɨj ni niyen tiu'umuá'aj tɨjɨ́n niché'e raata'íte ne'újna u Roma. 26’Ja'iné capu hui a'ij tiná'amitɨejte'e a'ij nej ye'í tiraata'íte ɨ́ nevástara'a, a'ɨ́jna tɨ tí'ita'aijte'e a'íjna jɨme'e i tevi, nee nu yee ravé'evi'itɨ mú'ejmi jemi, ne'ihuaamua'a, neajta mú'eetzi jemi, Agripa, mɨ pej i'i rey, patá'aj tiraa'íhua'u tɨ́'ij huámua'areeri'ihua a'ij nej ye'í tiraata'íte. 27Ayee pu'u, a'iné ayej ne'ase capu ti'itɨj vaɨre'e tɨ pua'a nej caí ra'uyú'uxan a'ij mej ti'itɨj jɨ́n jetzen tí'ijpua'ajte'e nej ni raata'íte. ―Ayee pu tiraata'ixaa a'ɨ́jna ɨ́ Festo.

will be added

X\