Los Hechos 24

1Anxɨ́j xɨcaj pu teuumé'eca, tɨ́'ɨj a'ɨ́ɨn ɨ́ Ananias ɨ́ tɨ tí'aijta u teyujta'a, a'ɨ́ɨ pu a'ucanée a'ujna Cesarea a'ɨ́mej jamuan ɨ́ hua'avaujsi, ajta seɨ́j tɨ abogado pɨ́rɨcɨ. Ayee pu ántehuaa a'ɨ́jna tɨjɨ́n Tértulo. A'ɨ́ɨ mú ti'itɨ́j jɨ́n jetzen te'ujpuá'ajte a'ɨ́jna ɨ́ Pablo ɨ́ tajtuhuan jemi. 2Matɨ́'ɨj u ya'utajé ɨ́ Pablo, aj pu i a'ɨ́ɨn Tértulo a'utéjche tɨ tiraaxájtzi'i. Ayee pu tiraata'ixaa a'ɨ́jna ɨ́ Félix tɨjɨ́n: ―Tu'uri hui jeíhua rɨ́'ɨ ti'itechée naa taxɨéehua pajta pauj mú'ee tí'ita'aijte'e. Jéihua pej rɨ́'ɨ tirájteuve é'e tzajta'a tetá'aj jaítze'e rɨ́'ɨ yee tí'itechéjme'eni. 3Nain tu teri ancuré'a. A'ɨ́j tu jɨ́n naa titaatátemua'ave nainjapua. Rɨ́'ɨ tu timuaatá'aca mú'ee Félix pej i'i tajtuhuan, pej jeíhua naa rɨ́'ɨ tí'iruure. 4Aru tetá'aj caí máàj muá'ɨtzee, ayée nu tí'imuahuavii pej a'atzu huatá'an ɨ́ ca'aníjra'a pej a'atzu táanamua tej timuaatá'ixaate'esin. 5’Ja'iné amɨjna mɨ tevi, jeíhua tu'uri hui tirájteuri'iri'i tɨ tí'itziita íiyen chaanaca japua. Nain japua pu ca'anéjri hua'utá'a ɨ́ teɨte ɨ́ mej Israél jetze ajtéme'ecan mej mi huaujné'usi'ite'en. A'ɨ́ɨ pu ajta antiújmua'aree a'ɨ́mej jɨme'e ɨ́ mej rá'atzaahuate'e me'ɨ́jna tɨ Nazarét é'eme'ecan. 6Ajta a'ɨ́ɨ pu huataújtese tɨ raatéxɨeehuata ɨ́ teyuu. A'ɨ́j tu hui jɨ́n rajví'i. Ayee tu tí'ijxe'eve'eca'a tej puaíjtzi raatá'an a'ij tɨ té'eyu'usi'i ɨ́ yu'uxari jetze. 7’Ajta a'uun tɨ ta'amuájca, a'ɨ́jna ɨ́ Lisias, a'ɨ́ɨ pu a'uun a'uteájrupi. Tɨ́'ɨj i tá'ajajni'iri'i ca'anéeri jɨme'e. 8Ajta ayén titaatá'ixaa tɨjɨ́n mej mú'eetzi jemi a'uvé'eju'un ɨ́ mej tí'ijxajtzi'i. Tɨ pua'a nu'u mú'ee aseɨ́j petiraa'íhua'u, aj pej xaa ramua'aréeren tɨ ayén ti'ayajna nain ɨ́ tej jɨ́n ti'itɨj jɨ́n jetzen tí'ijpua'ajte'e. ―Ayee pu tiraata'ixaa a'ɨ́jna ɨ́ Tértulo. 9Majta me'ɨ́n ɨ́ mej a'uté'uuca'a ɨ́ mej Israél jetze ajtéme'ecan, a'ɨ́ɨ mú majta naími'i miyen tiu'utaxájtaca'a tɨjɨ́n: ―Ayee pu ti'ayajna. 10Aj pu i a'ɨ́ɨn tajtuhuan rumuájca'a jɨ́n tiraata'ixaa a'ɨ́jna ɨ́ Pablo ayén tɨjɨ́n: ―Patá'aj hui tiu'utaxáj. Tɨ́'ɨj i Pablo ayén tiu'utaxájtaca'a tɨjɨ́n: ―Rɨ́'ɨ pu hui tinaatá'a nej huatánne'a inee, a'iné néjmua'aree tɨjɨ́n juees pej pɨ́rɨcɨ a'íjna chuéjra'a japua. Pepu'uri á'atee pej juees pɨ́rɨcɨ. 11¿A'iné tí'irɨ'ɨri pej ráamua'aree tɨ ayén ti'ayajna? Auchén pu tamuáamuata'a japuan hua'apua xɨcaj á'atee nej a'án a'ujnéj án Jerusalén nej ni rɨ́'ɨ tiraatá'an ɨ́ Dios. 12’Majta a'ɨ́ɨme ɨ́ mej tí'inexajtzi'i, matɨ́'ɨj naateevi'i, canu hua'ajteá'axɨ'ɨca'a ɨ́ teɨte a'ujna teyujta'a tɨ ve'ée tzajta'a, ni canu neajta ca'aníjra'a hua'atá'aca mej huataníniu'ucacun a'ujna teyujta'a, ni canu neajta ca'aníjra'a hua'atá'aca ne'újna u chajta'a. 13Amɨ́ɨme mɨ teɨte, camu majta a'ij tirájteusin ɨ́ mej jɨ́n ne jetze te'ujpuá'ajte'en. 14’Ayee nu'u xaa tí'imua'ixaate'e. Nee nu hui ravaɨre'e ɨ́ Dios ɨ́ mej raná'amiche'e ɨ́ nevaújsimua'acɨ'ɨ. Nee nu ravaɨre'e ne'ɨ́jna jɨme'e ɨ́ ye'irá ɨ́ mej jetzen huajú'ucaa. A'ɨjna jɨme'e ɨ́ neye'irá, ayée mú ti'ixa amɨ́ɨme tɨjɨ́n neseɨ́j nu a'ij tirájteu. Mɨ neajta, canu. Nain nu hui ántzaahua a'ij tɨ ye'í té'eyu'usi'i ɨ́ yu'uxari jetze ɨ́ tɨ te'anxɨ́vi, neajta nain a'achú mej caj ra'uyú'uxaca'a a'ɨ́ɨme ɨ́ mej tí'ixaxa'ata'a ɨ́ Dios jetze me'ecan. 15’Ayee nu hui neajta inee tirájxe'evi'ira'a ɨ́ Dios jemi, matɨ́j amɨ́ɨme ne'ɨ́jna jɨme'e mej huatarújsin ɨ́ mɨ'ɨchite tzajta'a ɨ́ mej meri huácuii, a'ɨ́ɨme ɨ́ mej rɨ́'ɨ tí'iteteɨtestaca'a, majta a'ɨ́ɨme ɨ́ mej a'ij pua'a titeetiújcha'ɨɨca. 16Aj nu hui jɨ́n tí'itese'e nej niyen rɨ'éene'e mé né'uche'ecane'en ɨ́ Dios jemi, neajta huá'a jemi ɨ́ teɨte. 17’Tɨ́'ɨj teuumé'eca a'achú pua'an nine'ira'a nej á'uche'ecan nej ni tumin hua'utá'an ɨ́ neteɨ́testemua'a, neajta tiu'utámuaɨ'ɨvejtan ɨ́ Dios jemi. 18Netɨ́'ɨj ni u e'ehuánjejcuare a'ij tɨ té'axa ɨ́ taye'irá jɨme'e ɨ́ yu'uxari jetze. Ayee nu rɨjcaa matɨ́'ɨj seica taaseíj me'újna teyujta'a tɨ ve'ée. 19’A'ɨ́ɨ mú me'ɨ́n pú'eene'e ɨ́ mej me'uun é'eme'ecan a'uun tɨ huatacá'a a'ujna Asia. Camu jeíhua á é'eteɨtestaca'a ineetzi jemi, camu majta rú'itziite'eca'a. Tɨ pua'a ti'itɨ́j a'ij meté'umua'areere ineetzi jemi, miché'e me'ɨ́n yé ve'eré'enen mú'eetzi jemi mej mi me'ɨ́jna jɨ́n ne jetze te'ujpuá'ajte'en. 20Na'ari caí, miché'e memɨ́n mɨ mej yé huaté'uu raataxáj ti'itɨ́j ɨ́ nej jɨ́n auteájturaa netɨ́'ɨj ne'uun a'utéveeca'a huá'a jemi ɨ́ huá'a jueesi. 21’Tij caí hui a'ɨ́ɨ pú'een ɨ́ ti'itɨ́j ɨ́ nej jɨ́n auteájturaa netɨ́'ɨj u a'utéveeca'a huá'a jemi, netɨ́'ɨj ni huajíjhuaca'a niyen tɨjɨ́n: “Mú'een xu tí'inexajtzi'i íjii se'ɨ́jna jɨme'e ɨ́ nej té'atzaahuate'e a'ɨ́jna jɨme'e mej nu'u majtáhua'a huatarújsin ɨ́ mɨ'ɨchite.” ―Ayee pu tiu'utaxájtaca'a a'ɨ́jna ɨ́ Pablo. 22Tɨ́'ɨj Félix ráanamuajri'i, capu ra'aránajcheca'a tɨ raaxɨ́'epɨ'ɨntare'en. A'iné a'ɨ́ɨ pu rú'umua'areereca'a a'ij tɨ éene'e ɨ́ hua'aye'ira ɨ́ mej té'atzaahuate'e. Ayee pu tihua'utá'ixaa tɨjɨ́n: ―Che'e mi'i uvé'enen ɨ́ xantaaru'u ɨ́ ta'amuájca a'ɨ́jna ɨ́ Lisias. Aj nu temua'a naa tí'ijmua'areeren a'íjna ɨ́ sej jɨ́n tí'ijxajtzi'i mú'een. 23Aj pu 'i Félix a'ɨ́jna huata'áij ɨ́ xantaaru'u tɨ anxɨ́te tí'aijta tɨ auj racha'ɨɨca a'ɨ́jna ɨ́ Pablo. Ajta nu'u a'atzu raatá'an tɨ á'uche'ecane'en ruseɨ́j. Ajta mej ráamuaare ɨ́ amiigustemua'ame'en, majta ti'itɨ́j tiraatá'an tɨ tirá'aturaate'e. Ajta a'ɨ́jna ɨ́ Félix, aj pu i á'uraa. 24Tɨ́'ɨj teuumé'eca a'achú pua'an xɨca, ajtahua'a pu uvé'ene a'ɨ́jna ɨ́ Félix, ajta jamuan ɨ́ra'ara'an tɨ ayén ántehuaa tɨjɨ́n Drusila. A'ɨ́ɨ pu Israél jetze ajtéme'ecan. Tɨ́'ɨj i raata'aíjtaca'a ɨ́ Pablo tɨ i a'ɨ́ɨn tiraata'íhua'u a'ɨ́jna jɨme'e tɨ pua'a ja'atɨ rá'atzaahuate'e a'ɨ́jna ɨ́ Jesús, tɨ i'i Cɨríistu'u. 25Pablo pu ayén tiraata'ixaa tɨ ayén tiú'ujxe'eve'e tɨ ja'atɨ ayén huárɨni ɨ́ tɨ i'i xɨ́'epɨ'ɨn jɨme'e naíjmi'ica jemi, ajta nu'u tɨ rɨ́'ɨ hua'utécha'ɨɨn. Pablo pu ajta ayén a'ɨ́jna tiu'utá'ixaa a'ɨ́jna ɨ́ Félix tɨ Dios ayén puaíjtzi tihua'utá'asin a'ɨ́ɨme ɨ́ mej yen seijre'e íiyen ɨ́ chaanaca japua. A'ɨ́j pu jɨ́n tiu'utátziɨn a'ɨ́jna ɨ́ Félix. Aj pu i ayén tiraata'ixaa tɨjɨ́n: ―Patá'aj á'ura'ani íjii. Nemuaatájeevi hui neajtahua'a netɨ́'ɨj huatácɨ'ɨpe. Aj nu ni muánamuajran neajtahua'a. 26Mɨ ajta a'ɨ́ɨn Félix ayée pu tí'ijxe'eve'eca'a tɨ Pablo tumin raatá'an a'ɨ́jna jɨme'e tɨ raatátuaani. A'ɨ́j pu jɨ́n jeíhua pu raata'aíjtaca'a tɨ tiu'uxáj jamuan. 27Tɨ́'ɨj teuumé'eca hua'apua nine'ira'a, tɨ'ɨqui Félix airájraa tɨ ti'itéveeca'a tajtuhuan jɨme'e. Tɨ'ɨquitá'i seɨj te'enteájrupi tajtuhuan jɨme'e. Ayee pu ántehuaaca'a tɨjɨ́n Porcio Festo. Ajta a'ɨ́ɨn ɨ́ Félix, ayée pu tí'ijxe'eve'eca'a tɨ rɨ'éene'e huateáturan a'ɨ́mej jemi ɨ́ mej Israél jetze ajtéme'ecan. A'ɨ́j pu jɨ́n caí raatátuaa ɨ́ Pablo.

will be added

X\