Los Hechos 14

1Ajta a'ɨ́ɨn ɨ́ Pablo, ajta ɨ́ Bernabé, matɨ́'ɨj me'uun a'ará'a a'ujna Iconio, aj mú mi a'uteájrupi hua'atéyujta'a a'ɨ́ɨme ɨ́ mej Israél jetze ajtéme'ecan. A'uu mú tihuaú'ixaa ɨ́ teɨte tzáahuati'ira'a jɨme'e. A'ɨ́j mú jɨ́n, jeíhua rá'antzaahua a'ɨ́ɨme ɨ́ mej Israél jetze ajtéme'ecan, majta ɨ́ mej seɨj chuéjra'a japua é'eme'ecan. 2Majta seica, ɨ́ mej caí té'atzaahuate'eca'a, a'ɨ́ɨ mú ca'aníjra'a hua'utá'a a'ɨ́mej ɨ́ mej seɨj chuéjra'a japua é'eme'ecan. A'ɨ́j mú jɨ́n a'ij pua'a te'utánamuajri'i a'ɨ́mej ɨ́ mej hua'apua. 3A'ɨ́j mú jɨ́n á'atee a'ɨ́jna ɨ́ Pablo, ajta a'ɨ́jna ɨ́ Bernabé, ca'anín mú jɨ́n tihua'utá'ixaa ɨ́ tavástara'a jetze me'ecan. A'ɨ́j pu jɨ́n ca'aníjra'a hua'utá'a mej mi miyen huárɨni mej ráamua'aree ɨ́ teɨte, mej Dios jetze araújca'ane ɨ́ mej hua'apua. 4Majta ɨ́ teɨte ɨ́ mej é'echejca'a u chajta'a, a'ɨ́ɨ mú tiújse'ɨrihua'a seica mej miyen tí'ijmua'areereca'a a'ɨ́mej jemi ɨ́ mej Israél jetze ajtéme'ecan, majta seica tí'ijmua'areereca'a a'ɨ́mej jemi ɨ́ mej hua'apua. 5Aj mú mi me'ɨ́n ɨ́ mej Israél jetze ajtéme'ecan, majta a'ɨ́ɨme ɨ́ mej seɨj chuéjra'a japua é'eme'ecan, a'ɨ́mej jamuan ɨ́ mej tihuá'aijte'e, a'ɨ́ɨ mú miyen tiraaxɨ́'epɨ'ɨntare mej nu'u a'ij pua'a huárɨni, majta nu'u hua'uteátu'asixɨ'ɨn tetej jɨme'e. 6Aj mú mi ráamua'areeri'i a'ɨ́ɨme ɨ́ mej hua'apua. A'ɨ́j mú jɨ́n huataúruu. A'uu mú a'ará'a a'ujna já'ahua'a tɨ ayén téja'arájtehuaa tɨjɨ́n Listra, ajta tɨ ayén téja'arájtehuaa tɨjɨ́n Derbe. A'uu pu jetzen ajtéme'ecan a'ujna u Licaonia. Majta á'ujujhua'ane'e tɨ́j na'a a'u tɨ ɨmuá ja'u'ástɨmee ɨ́ chuej. 7Maúche'e mú tihuá'a'ixaate'eca'a ɨ́ teɨte a'ɨ́jna ɨ́ niuucari tɨ jɨ́n Dios hua'irátuaasin. 8A'uu pu seɨj a'utéveeca'a a'ujna já'ahua'a Listra, tevi tɨ caí rá'aye'ivejca'a ɨ́ ru'ɨ́ɨca jetze. Ayee pu éene'e huanú'ihuaca'a. Capu huáye'icaa. 9A'ɨ́ɨ pu ráanamuajri'i a'ij tɨ tí'ixajtaca'a a'ɨ́jna ɨ́ Pablo. Tɨ'ɨquí a'ɨ́ɨn Pablo raaseíj. A pu temua'a naa tirú'umua'areereca'a tɨ a'ɨ́jna tɨ caí rɨ́'en ru'ɨ́ɨca jetze, a'ɨ́ɨ pu rujni a'ɨ́jna jɨme'e tɨ té'antzaahuate'en. 10Aj pu i ayén tiraatajé ca'anín jɨme'e tɨjɨ́n: ―Huatéechaxɨ. Tɨ'ɨquí a'ɨ́ɨn ájtzucu. Ajta á á'uche'ecane'e já'araa. 11Matɨ́'ɨj raaseíj a'ij tɨ ti'itɨ́j huáruu ɨ́ Pablo, aj mú mi huajíjhuaca'a ɨ́ teɨte runiuuca jɨme'e mej jɨ́me'en tí'ixaxa'a a'ujna Licaonia. Miyen tɨjɨ́n: ―Ɨ́ Dioosi mú yé ve'ecáane. Cu xɨee muaateújteɨtesteca'a mej mi yé huataseíjre íiye itejmi jemi. 12Yee mú tiu'utaxájtaca'a tɨjɨ́n: ―Amɨjna mɨ Bernabé, a'ɨ́ɨ pu hui a'ɨ́ɨn pú'een ɨ́ Dios tej tiyen ratamuá'amua tɨjɨ́n Júpiter, ajta amɨjna ɨ́ Pablo, a'ɨ́ɨ pu hui a'ɨ́ɨn pú'een a'ɨ́jna ɨ́ Mercurio. Ayee mú raatamuá'a me'ɨ́jna ɨ́ Pablo, a'iné a'ɨ́ɨ pu nu'u raataxájtaca'a. 13Aa pu vejli'i jé'eseijre'eca'a ɨ́ teyuu a'ɨ́jna ta'anténine'i a'ujna chajta'a. Ajta a'ɨ́ɨn ɨ́ puaarij tɨ tí'ivaɨre'e Júpiter jemi a'ujna teyujta'a, a'ɨ́ɨ pu u huaja'uvé'ejajpuaca'a ɨ́ tuuru'use, ajta ɨ́ xuuxu'u tɨ tutíjhua. A'ɨjna ɨ́ puaarij, majta ɨ́ teɨte, a'ɨ́ɨ mú huá'ana'amiche'e ɨ́ tuuru'use, majta huá'umuaɨ'ɨvejtaca'a. 14Majta me'ɨ́n ɨ́ Pablo, ajta a'ɨ́jna ɨ́ Bernabé, matɨ́'ɨj ráamua'areeri'i, á mú aúurupi ɨ́ teɨte tzajta'a, meruaachijmé'e, majta antijíihua. Matɨ́'ɨj mi amuacaícan tiu'utésiujtza'anaxɨ ɨ́ tiú'ujcɨɨxu me'ɨ́jna jɨme'e mej mi me'ɨ́jna jɨ́n hua'utá'ijmɨijra ɨ́ teɨte. 15Miyen tɨjɨ́n: ―Mú'een teteca, ¿a'iné sej si siyen rɨcɨ? Teen tu hui teajta teteca pú'een, setɨ́j mú'een. Ayee tu 'een jɨ́n mú a'uvé'eju'un tetá'aj tejamuá'ixaate'en setá'aj mú'een raatapuá'ajta se'íjna tɨ caí ti'itɨj vaɨre'e, setá'aj raténa'amiche'en ɨ́ Dios tɨ i'irúuri, tɨ ajta raatétaahuaca'a ɨ́ ta japua tɨ auuteájmua, ajta ɨ́ chaanaca tej japuan yen seijre'e, ajta ɨ́ jaj tɨ íiyen seijre'e ta jamuan, ajta nain tɨ́j na'a pua'amé tí'iseijre'e íiyen chaanaca japua, ajta jaj tzajta'a tɨ tí'iseijre'e. 16’A'ájná'ɨmua pu hui Dios hua'utá'a ɨ́ teɨte mej miyen éene'en seijre'e matɨ́j me'ɨ́n tí'ijxe'eve'eca'a. 17Mɨ ajta, tɨ́j na'a jéjcua ɨmuá tɨ́j na'a tɨ yú e'iré'ene, Dios pu huá'a jemi tiu'uteájtuaa ɨ́ mej jɨ́me'en ráamua'aree a'ij tɨ ye'í huarɨ́j ɨ́ Dios. Ayee xu hui tí'ijmua'aree tɨ Dios á'amuacha'ɨ́j temua'a naa. Nain pu jɨ́n tejámuaatévaɨre'esin viite jɨme'e, mej huáviiye, ajta tɨ tiú'ucɨɨre, ajta tejámuaatá'asin ɨ́ sej ráacua'ani, ajta sej rɨ'éene'e seíire'e xá'ara'ani mɨ ruxɨ́ejniu'uca jetze. ―Ayee pu tihua'utá'ixaa. 18Mu'iicáca pu huatá'ixaa ɨ́ teɨte. Xa'ichu'i pu hua'utéemua'itɨ mej mi caí miyen tihuá'amuaɨ'ɨvejte'e. 19Aj mú mi seica u a'uvé'eju'un. A'uu mú e'eráacɨ a'ujna já'ahua'a Antioquía, majta me'újna Iconio. A'ii mú a'ɨ́ɨn pú'een ɨ́ mej Israél jetze ajtéme'ecan. Matɨ́'ɨj mi hua'utá'ixa ɨ́ teɨte tɨ nu'u a'ij pua'a tí'itevij ɨ́ Pablo. Matɨ́'ɨj mi raateátu'asixɨ tetej jɨme'e. Ayee mú tiu'umuá'aj tɨjɨ́n huamɨ́'ɨ. A'ɨ́j mú jɨ́n mi ya'ujáanajraa á pua'acɨé ɨ́ chajta'ana jetze. 20Aj mú mi me'ɨ́n ɨ́ mej té'atzaahuate'e me'uun e'etiújseɨj a'u mej yauujájsime'e ɨ́ Pablo. Mua'ajteáxɨɨreca'a a'u mej yauutéj. Jɨ́me'en mu'u jemin ajteáxɨɨreca'a, aj pu i ájchee a'ɨ́jna ɨ́ Pablo. Ajtahua'a, pu a'uteájrupi u chajta'a. Yee ruijmua'ate'e yee, a'ɨ́ɨ pu á'uraa a'ɨ́jna jamuan ɨ́ Bernabé. A'uu mú a'ucɨ́j u Derbe. 21A'uu mú tihuaú'ixaa ɨ́ niuucari jɨme'e tɨ jɨ́n Dios hua'irátuaasin. Jéihua mú hua'utéemua'itɨ ɨ́ teɨte a'ujna Derbe, mej mi me'ɨ́n té'antzaahuate'en. Aj mú mi huaré'acɨ me'újna u Listra, majta me'újna u Iconio, majta u Antioquía. 22Nainjapua mú ca'aníjra'a hua'atá'a a'ɨ́mej ɨ́ mej té'atzaahuate'e mej mi caí ratápuaapua'ajta'an mej té'atzaahuate'e, majta hua'utá'ixa tɨ nu'u ayén tiú'ujxe'eve'e tɨ ja'atɨ amuacaícan ayén tirajpuaíitzi á'ara'ani tɨ i a'uun a'uteárute a'ujna tɨ é'eseijre'e ɨ́ Dios. 23Majta hua'avé'ehuau ɨ́ hua'avaujsi mej mi tiu'utévaɨre'en u huá'a teyujta'a. Matɨ́'ɨj téniúuve'e, majta huaúritzi'ive, aj mú mi ra'íjca ɨ́ tavástara'a naíjmi'ica ɨ́ mej rá'atzaahuate'e. 24Matɨ́'ɨj antacɨ́j a'ujna já'ahua'a seɨ́j chuéjra'a japua tɨ ayén téja'arájtehuaa tɨjɨ́n Pisidia. A'uu mú a'ará'a a'ujna já'ahua'a seɨ́j chuéjra'a japua tɨ ayén téja'arájtehuaa tɨjɨ́n Panfilia. 25Aj mú mi me'uun a'ará'a chajta'a tɨ ayén téja'arájtehuaa tɨjɨ́n Perge. A'uu mú tihuaú'ixaa ɨ́ niuucari jɨme'e. Aj mú mi a'ucɨ́j a'ujna já'ahua'a chajta'a tɨ ayén téja'arájtehuaa tɨjɨ́n u Atalia. 26A'uu mú baarcu jetze atéecɨ. Matɨ́'ɨj mi antacɨ́j yútan pújme'en a'ujna já'ahua'a Antioquía. Aa pu pɨ́tejá'arɨcɨ a'u mej yau'íjca ɨ́ Dios tɨ hua'acha'ɨ́ɨ á'ara'ani mej mi miyen rɨjca a'ij mej tíhua'uta'íti'iri'i ɨ́ ru'ihuaamua'a. 27Matɨ́'ɨj mi me'uun a'ará'a a'ujna Antioquía. Aj mú mi hua'ajtéseɨj ɨ́ mej teyujta'a e'etiújse'ɨrihua'a. Nain mú tihua'utá'ixaa ɨ́ niuucari jɨme'e a'ij tɨ Dios ayén tihua'utá'a a'ɨ́mej ɨ́ mej seɨj chuéjra'a japua é'eme'ecan mej mi majta me'ɨ́n té'antzaahuate'en. 28Matɨ́'ɨj mi me'uun á'atee huá'a jamuan ɨ́ mej té'atzaahuate'e a'ujna Antioquía.

will be added

X\