Los Hechos 11

1Aj mú mi a'ɨ́ɨme ɨ́ mej tamuáamuata'a japuan hua'apua ará'ase, majta a'ɨ́ɨme ɨ́ mej ihuáamua'ame'en pú'een ɨ́ mej me'uun a'uchéjme nainjapua ɨ́ Judea, a'ɨ́ɨ mú ráamua'areeri'i tɨjɨ́n a'ɨ́ɨ mú majta ra'ancuré'a ɨ́ niuucari ɨ́ tɨ a'ɨ́jna jetze a'uvé'emej ɨ́ Dios a'ɨ́ɨme ɨ́ mej seɨj chuéjra'a japua é'eme'ecan. 2Tɨ́'ɨj a'ɨ́ɨn Pedro a'ánna a'ará'a a'ánna Jerusalén, majta á'iyen a'ɨ́ɨme ɨ́ mej té'atzaahuate'e, ɨ́ mej ra'antisí'iche ɨ́ runavij, a'ij mú pua'a tiraatajé me'ɨ́jna. 3Miyen tɨjɨ́n: ―A'ij pej pua'a huarɨ́j a'iné a'ɨ́mej pej huaja'uvé'emuaareca'a ɨ́ mej caí ra'antisí'iche ɨ́ runavij, pajta huá'a jamuan tiú'ucuaa. ―Ayee mú tiu'utaxájtaca'a a'ɨ́ɨme. 4Aj pu 'i Pedro a'utéjche tɨ tihua'utá'ixaate'en nain a'ij tɨ ti'itɨ́j huarɨ́j. 5Ayen tɨjɨ́n: ―A'uu nu chajta'a a'utéveeca'a a'ujna Jope. Neraatéhuausime'ecaa ɨ́ Dios jemi. Aj pu 'i ti'itɨ́j ineetzi jemi huataseíjre, saavana ti'itɨ́j tɨ júte'e á e'icaanej. Muáacuacɨ'e pu ajtaujhua'isquíinajmee, ajta antijɨ́'ɨcɨ'ihuaca'a. An pu hui e'icaanej a'u nej á'ujcatii. 6Nee nu raseíjraca'a. Aj nu ni a'ɨ́mej huaseíj a'ɨ́jna tzajta'a ɨ́ saavana jeíhua mú animaales, ɨ́ mej muáacuaca ajta'ɨ́ɨcajmee, majta ɨ́ mej simuáruuni, majta ɨ́ mej chuaata'a huacɨ'ɨca ɨ́ mej á'usinuurejye'i, majta ɨ́ mej rá'ara'ive. 7’Netɨ́'ɨj ni ne'ɨ́jna huánamuajri'i. Aj pu 'i ja'atɨ ayén tinaatá'ixaa tɨjɨ́n: “¡Pedro, ajchesi! Iiya'a huá'ucuii, patá'aj huá'ucua'ani.” 8Ayee nu hui tiu'utaniú tɨjɨ́n: “Nevástara'a, canu xaa ne'u, a'iné canu ja'anáj ráacua ti'itɨ́j tɨ caí tatá'aca ɨ́ taye'irá nusu ti'itɨ́j tɨ xána'avi'ire'e.” 9’Ute'e pu hui pújme'en ajtahua'a ja'atɨ ayén tinaatá'ixaa tɨjɨ́n: “A'iné nain pu tiú'utaahuaca'a ɨ́ Dios, capej ché'e piyen tí'ixajta yee xána'avi'ire'e.” 10Huaíca pu ayén tiuju'urɨ́j. Ajta á'iyen tíraa júte'e u ta japua a'ɨ́jna ɨ́ saavana. 11’Jɨ́me'en pu'u tíraa, seica mú hui u a'ará'a a'ujna a'u nej á'ucatii inee. Mé huaícaca'a a'ɨ́ɨme. A'uu mú nu'u huaja'uta'íteca'a u Cesarea mej mi náahuauni ineetzi. 12Ajta a'ɨ́ɨn ɨ́ xɨéjniu'ucare'ara'an ɨ́ Dios, a'ɨ́ɨ pu naata'áij nej nu'u á'ura'ani huá'a jamuan a'ɨ́mej, nej nu'u caí huá'atziɨɨne'e. A'ɨ́ɨ mú majta a'ucɨ́j ne jamuan a'ímej i ta'ihuaamua'a i mej arájsevi. Naíimi'i tu a'uteájrupi u chi'ita a'u tɨ é'eche a'ɨ́jna ɨ́ ja'atɨ. 13’A'ɨ́ɨ pu taata'ixaa tɨ nu'u seɨj huataseíjre a'ájna a'u tɨ é'eche. A'ɨjna ɨ́ tevi, a'ɨ́ɨ pu a'ɨ́ɨn pú'eene'e seɨj tɨ nu'u tí'ivaɨre'e u ta japua ɨ́ Dios jemi. Ayee pu nu'u tiraata'ixaa a'ɨ́jna ɨ́ tevi tɨjɨ́n: “Patá'aj hua'uta'íte mɨ teteca a'ujna u Jope mej mi u ya'utájeeve a'ɨ́jna ɨ́ Simón tɨ ajta ayén ántehuaa tɨjɨ́n Pedro. 14A'ɨ́ɨ pu nu'u timuaatá'ixaate'esin a'ij tɨ ye'í Dios timuaatá'uuni'ira ajta naíjmi'ica a'ɨ́mej á'ateɨtestemua'a.” Ayee pu hui tiraata'ixaa a'ɨ́jna ɨ́ ja'atɨ. 15’Netɨ́'ɨj a'utéjche nej tihua'utá'ixaate'en, aj pu 'i yé ve'ecáane a'ɨ́jna ɨ́ xɨéjniu'ucare'ara'an ɨ́ Dios. A'ɨ́ɨ pu hui a'uteájturaa huá'a tzajta'a a'ɨ́mej. Ayee pu che'atá na'a tiu'uteájturaa itejmi tzajta'a. 16Aj nu ni ra'utámua'areeri'i ne'ɨ́jna ɨ́ tɨ ayén tiu'utaxájtaca'a ɨ́ tavástara'a tɨjɨ́n: “Ayej xaa ne'u ti'ayajna, a'ɨ́jna jɨme'e ɨ́ Juan, a'ɨ́ɨ pu nu'u huá'umuaɨ'ɨhuacare'e á jaj jɨme'e. Aru a'ɨ́ɨ pu xɨéjniu'ucare'ara'an ɨ́ Dios huateáturaasin mú'ejmi tzajta'a.” Ayee pu tiu'utaxájtaca'a a'ɨ́jna ɨ́ tavástara'a. 17’A'ɨ́j pu jɨ́n, tɨ pua'a Dios ayén che'atá na'a tíhua'utapuaíjve'en ɨ́ tɨ ajta taatapuaíjve itejmi tetɨ́'ɨj rá'antzaahua a'ɨ́jna ɨ́ Jesús ɨ́ tɨ Dios án yá'ujra ɨ́ ɨpuari japua, a'iné auj tí'irɨ'ɨri nej ra'antimuá'itɨn ɨ́ Dios. ―Ayee pu'u tiu'utaxájtaca'a a'ɨ́jna ɨ́ Pedro. 18Matɨ́'ɨj ráanamuajri'i me'ɨ́jna í'ihuaamua'ame'en ɨ́ mej me'uun a'uchéjme a'ánna Jerusalén, camu ché'e ti'itɨ́j xajtaca'a, sino rɨ́'ɨ mú tiraatá'a ɨ́ Dios tɨjɨ́n: ―Huateáxcui'ihua, pu'uri hui Dios hua'utá'a ɨ́ mej seɨ́j chuéjra'a japua é'eche mej mi jéjcuacan jɨ́n tiú'umua'ati mej mi ruuri muá'ara'ani tɨ́j na'a rusén jɨme'e. 19Majta me'ɨ́n ɨ́ mej a'ucɨ́jxɨ me'ɨ́jna jɨme'e ɨ́ mej seica raajé'ica me'ɨ́jna ɨ́ Esteban, majta a'ij pua'a huá'uruu a'ɨ́mej ɨ́ mej té'atzaahuate'e, a'ɨ́ɨ mú a'ɨmuá a'ucɨ́jxɨ. A'uu mú a'ará'a a'ájna já'ahua'a Fenicia, majta seica a'ujna já'ahua'a Chipre, majta seica a'ujna já'ahua'a tɨ ayén téja'arájtehuaa tɨjɨ́n Antioquía. A'ɨ́mej mú huatá'ixaa ɨ́ niuucari ɨ́ mej Israél jetze ajtéme'ecan. 20Majta ɨ́ seica ɨ́ mej Chipre é'eme'ecan a'ɨ́mej jamuan ɨ́ mej Cirene é'eme'ecan, a'ɨ́ɨ mú me'uun a'atanéj me'újna u Antioquía. Aj mú mi autéjhuii mej hua'utá'ixaate'en a'ɨ́mej ɨ́ mej hua'aniuuca jɨ́n tí'ixaxa'a ɨ́ griego. A'ɨ́j mú hua'utá'ixa ɨ́ niuucari ɨ́ tɨ tiu'utémua'aviste'e a'ɨ́jna jetze me'ecan ɨ́ tavástara'a a'ɨ́jna ɨ́ Jesús. 21Jéihua pu hua'utévaɨ ɨ́ tavástara'a. A'ɨ́j mú jɨ́n mu'iitɨ́ rá'antzaahua. Majta ra'ancuré'evi'itɨ ɨ́ tavástara'a. 22Majta me'ɨ́n ɨ́ mej té'atzaahuate'e, ɨ́ mej me'uun a'uchéjme a'ánna Jerusalén, matɨ́'ɨj me'ɨ́n ráanamuajri'i a'ij tɨ ti'itɨ́j huarɨ́j, a'ɨ́j mú huata'íteca'a ɨ́ Bernabé a'ujna Antioquía. 23Tɨ́'ɨj a'uun a'ará'a a'ɨ́jna ɨ́ Bernabé, tɨ'ɨqui raaseíj tɨ Dios rɨ́'ɨ tiú'uruu huá'a jemi. A'ɨ́j pu jɨ́n jé'ecan huataújtemua'ave a'ɨ́jna ɨ́ Bernabé. Ayee pu tihua'utá'ixaa mej nu'u u huateújca'anen ɨ́ ru tzajta'a mej mi mauj rá'atzaahuate'e ɨ́ tavástara'a. 24Ayee pu tiú'uruu a'ɨ́jna ɨ́ Bernabé, a'iné rɨ́'ɨ pu tí'itevistaca'a. Jé'ecan pu a'ɨ́jna jetze aráujca'anejca'a ɨ́ xɨéjniu'ucare'ara'an ɨ́ Dios. Ajta jeíhua pu té'atzaahuate'eca'a. A'ɨ́j pu jɨ́n jeíhua hua'utéemua'itɨ ɨ́ teɨte mej mi rá'antzaahuate'en me'ɨ́jna ɨ́ tavástara'a. 25Tɨ́'ɨjtá'i á'uraa a'ɨ́jna ɨ́ Bernabé a'ujna u Tarso tɨ i ráahuauni a'ɨ́jna ɨ́ Saulo. 26Tɨ'ɨquí ráateu. Aj pu 'i a'uun ye'eráavi'itɨ a'ujna Antioquía. A'uu mú á'atee huá'a jamuan ɨ́ mej té'atzaahuate'e a'achú cumu seɨ́j nine'ira'a. Majta tihua'umuá'ate jeíhua ɨ́ teɨte a'ɨ́jna ɨ́ Bernabé, ajta a'ɨ́jna ɨ́ Saulo. A'ujna u Antioquía, majta me'ɨ́n ɨ́ teɨte amuacaícan mú miyen hua'utamuájteca'a tɨjɨ́n cristianos mú pú'een. 27A'ájna xɨcájra'a jetze, seica mú u a'ará'a a'ujna Antioquía Jerusalén mej e'eráacɨ. A'ɨ́ɨ mú me'ɨ́n pú'eene'e ɨ́ mej Dios jetze me'ecan tí'ixaxa'a. 28Ayee pu ántehua'aca'a seɨj tɨjɨ́n Agabo. A'ɨ́ɨ pu á a'utéechaxɨ á já'ita'a huá'a tzajta'a. A'ɨ́j pu jetze aráujca'anejca'a ɨ́ xɨéjniu'ucare'ara'an ɨ́ Dios, tɨ́'ij ayén tihua'utá'ixaate'en tɨ nu'u huatúuri'ihua a'ame nainjapua íiyen chaanaca japua. (Ayej xaa ne'u tiuju'urɨ́j tɨ́'ɨj a'ɨ́ɨn tí'aijtaca'a a'ɨ́jna ɨ́ rey tɨ ayén ántehuaa tɨjɨ́n Claudio.) 29Aj mú mi me'ɨ́n ɨ́ mej té'atzaahuate'e ɨ́ mej me'uun a'uchéjme a'ujna Antioquía, a'ɨ́ɨ mú raaxɨ́'epɨ'ɨntare mej tíhua'uta'aíjte'en a'ɨ́mej ɨ́ ru'ihuaamua'a a'ujna u Judea ɨ́ mej jɨ́n huateújvaɨre'en, seɨj majta seɨj mej miyen tíhua'utapuaíjve'en a'achú mej caj tí'ijviicua'i. 30Ayee mú huarɨ́j. U mú tihuaja'uta'íti'iri'i nain ɨ́ mej tíhua'utapuaíjve. Ajta a'ɨ́ɨn ɨ́ Bernabé, a'ɨ́jna jamuan ɨ́ Saulo, a'ɨ́ɨ mɨ hua'utátuii ɨ́ huá'avaujsimua'a a'ɨ́mej ɨ́ mej me'uun a'uté'uuca'a a'ánna Jerusalén.

will be added

X\