Los Hechos 10

1Ajta seɨj a'uun a'utéveeca'a a'ujna já'ahua'a chajta'a tɨ ayén téja'arájtehuaa tɨjɨ́n Cesarea. Ayee pu ántehuaaca'a a'ɨ́jna ɨ́ teáata'a tɨjɨ́n Cornelio. A'ɨ́ɨ pu a'ɨ́ɨn pú'eene'e ɨ́ hua'acapítan ɨ́ mej miyen ánte'arua tɨjɨ́n xantaaru'u ɨ́ mej Italia é'eme'ecan. 2A'ɨjna ɨ́ Cornelio, jeíhua pu raná'amiche'e ɨ́ Dios, majta ɨ́ seica ɨ́ teɨtestemua'ame'en. Cornelio pu ajta rá'astehua'a ɨ́ hua'aye'ira a'ɨ́ɨme ɨ́ mej Israél jetze ajtéme'ecan. Jéihua pu hua'utévaɨ tumin jɨme'e, ajta rahuauca'a jeíhua ɨ́ Dios jemi. 3Ja'anáj pu ayén tiuju'urɨ́j. A'atzaj te'ecáará'a ɨ́ tacuarixpua já'ita'a ucamé'ecaa ɨ́ xɨcaj, tɨ́'ɨj ti'itɨ́j huataseíjre. Cu xɨee tevi uteájrupi u chi'ita a'u tɨ a'utéveeca'a a'ɨ́jna ɨ́ Cornelio. Raaseíj temua'a naa. A'ii pu a'ɨ́ɨn pú'een seɨj tɨ tí'ivaɨre'e ɨ́ ta japua ɨ́ Dios jemi a'ɨ́jna tɨ huataseíjre. Aj pu 'i ayén tiraatajé tɨjɨ́n: ―¡Cornelio! 4Tɨ'ɨquí rajseíira'ajraa. Tí'itziɨɨne'eca'a a'ɨ́jna ɨ́ Cornelio. Aj pu 'i ayén tiraata'íhua'uri'i tɨjɨ́n: ―¿Ti'itáani, nevástara'a? Aj pu 'i ayén tiraata'ixaa a'ɨ́jna tɨ tí'ivaɨre'e ɨ́ ta japua tɨjɨ́n: ―Dios pu hui ra'ancuré'a nain ɨ́ pej peri ráahuaviiri'i, ajta ɨ́ pej jɨ́n hua'utévaɨ ɨ́ mej caí a'ij tí'ijviicua'i. 5Patá'aj hua'uta'aíjte'en ɨ́ teteca mej u á'uju'un me'újna u Jope, mej mi ya'uvé'evi'itɨn me'ɨ́jna ɨ́ Simón tɨ ajta ayén ántehuaa tɨjɨ́n Pedro. 6A'uu pu hui a'utéjvee seɨ́j jamuan tɨ ajta ayén ántehuaa tɨjɨ́n Simón. Navij pu tí'ihua'aca a'ɨ́jna ɨ́ Simón. A pu vejli'i é'eche a'u tɨ jaj e'eve'e'ástɨme. A'ɨ́ɨ pu hui timuaatá'ixaate'esin a'ij pej ye'í huárɨni. ―Ayee pu tiraata'ixaa a'ɨ́jna ɨ́ tɨ tí'ivaɨre'e ɨ́ ta japua. 7Aj pu 'i á'uraa a'ɨ́jna ɨ́ tevi tɨ tirá'ixaa a'ɨ́jna ɨ́ Cornelio. Aj pu 'i a'ɨ́ɨn Cornelio, hua'apuaca huata'íteca'a ɨ́ mej ravaɨre'e. Seɨ́j pu ajta seɨj huata'íteca'a tɨ i'i xantaaru'u. Jé'ecan pu rá'astejca'a ɨ́ hua'aye'ira a'ɨ́jna jɨme'e a'ɨ́jna ɨ́ xantaaru'u. 8Nain pu hua'utá'ixa a'ij tɨ ti'itɨ́j huarɨ́j. Aj pu 'i hua'uta'íteca'a mej nu'u u á'uju'un u Jope. 9Yee ruijmua'ate'e yee, a'atzaj tacuarixpua, matɨ́'ɨj meri á vejli'i aujú'ucaa u chajta'a, aj pu 'i Pedro antíraa ɨ́ chi'ij japua a'u tɨ a'upá'atza tɨ́'ij raatéjhuauni ɨ́ Dios jemi. 10Jé'ecan pu huata'í'icuataca'a. Pu'uri ayén tí'ijxe'eve'eca'a tɨ tiú'ucua'ani. Matɨ́'ɨj mauj rɨ́'ɨ tí'iruurejca'a ɨ́ tɨ tí'icua'ani, aj pu 'i ti'itɨ́j huataseíjre ɨ́ jemin. 11Ayee pu a'ɨ́jna tiu'uséij tɨ nu'u antaújcu u ta japua. Ti'itɨj pu á e'icáme'eca'a á júte'e, saavana ti'itɨ́j, muáacuacɨ'e pu uhuá'isquíinajme, ajta antijɨ́'ɨcɨ'ihuaca'a. 12Naíjmi'i mú tité'eseijre'eca'a a'ɨ́jna jetze ɨ́ saavana naíjmi'i ɨ́ animaales, ɨ́ mej muáacuaca ajta'ɨ́ɨcajmee, majta ɨ́ mej chuaata'a huacɨ'ɨca, ɨ́ mej á'usinuurejye'i, majta ɨ́ mej rá'ara'ive. 13Aj pu 'i ja'atɨ huánamuajri'i tɨ ayén tiraata'ixaa tɨjɨ́n: ―Pedro, ajchesi. Iiya'a huá'ucuii patá'aj huá'ucua'ani. 14Ajta a'ɨ́ɨn ɨ́ Pedro, ayée pu tiu'utaniú tɨjɨ́n: ―Canu xaa ne'u. Canu ja'anáj racua'ani ɨ́ tɨ caí tatá'aca ɨ́ taye'irá na'ari ti'itɨ́j tɨ xána'avi'ire'e. 15Ajtahua'a ja'atɨ huánamuajri'i. Ayen tɨjɨ́n: ―A'iné nain pu rɨ́'ɨ tiu'uteájtuaa ɨ́ Dios, capej ché'e piyen tí'ixajta yee xána'avi'ire'e. 16Ayee pu huaícacajetze. Ajtahua'a tíraa júte'e u ta japua a'ɨ́jna ɨ́ saavana. 17Jé'ecan pu tí'imua'ajca a'ɨ́jna ɨ́ Pedro tɨjɨ́n a'iquí 'een jɨ́n yé tanéj a'ɨ́jna mɨ ti'itɨ́j, a'iquí té'eme íjii a'ɨ́jna jɨme'e ɨ́ hua'aye'ira. Aúche'e pu tí'imua'ajcá matɨ́'ɨj me'ɨ́n a'ará'a tá'apueerta a'ɨ́ɨme ɨ́ tɨ huaja'uta'íteca'a a'ɨ́jna ɨ́ Cornelio. A'ɨ́ɨ mú tiu'uta'íhua'u a'u tɨ é'echejca'a a'ɨ́jna ɨ́ Simón. Matɨ́'ɨj me'uun a'ará'a. 18Aj mú mi ca'anín jɨ́n hua'utajé tɨ pua'a nu'u a'uun á'uca a'ɨ́jna ɨ́ Simón tɨ ajta ayén ántehuaa tɨjɨ́n Pedro. 19Ajta a'ɨ́jna, aúche'e pu tí'imua'ajcá a'ɨ́jna jɨme'e ɨ́ tɨ huataseíjre ɨ́ jemin. Aj pu 'i ayén tiraata'ixaa ɨ́ xɨéjniu'ucare'ara'an ɨ́ Dios tɨjɨ́n: ―Simón, seica mú hui muahuauhuau. Mé huaíca a'ɨ́ɨme ɨ́ mej muaatéhuaunen. 20Ájchesi. Patá'aj acájra'ani. Pej pi á'ura'ani huá'a jamuan. Capej tí'itziɨɨne'e a'iné nee nu hua'uta'íteca'a. 21Aj pu 'i acájraa a'ɨ́jna ɨ́ Pedro a'u mej a'uté'uuca'a. Tɨ'ɨquí ayén tihua'utá'ixaa tɨjɨ́n: ―Nee nu ne'ɨ́n pú'een i sej nehuahuau. ¿Ti'itájni jɨ́n yé sevé'eju'un? 22Aj mú mi miyen titeetaniú tɨjɨ́n: ―Ayee tu 'een jɨ́n yevé'eju'un a'ɨ́jna jetze me'ecan a'ɨ́jna ɨ́ Cornelio ɨ́ tɨ hua'acapítan. Rɨ́'ɨ pu hui tí'itevij. Jéihua pu hui raná'amiche'e ɨ́ Dios. Ajta naími'i mú rɨ́'ɨ tirájcha'ɨɨ ɨ́ mej Israél jetze ajtéme'ecan. Seɨj tɨ tí'ivaɨre'e u ta japua ɨ́ Dios jemi, a'ɨ́ɨ pu raatá'ixaa tɨ a'ɨ́ɨn mú'eetzi huata'áijta pej nu'u á'ura'ani áa tɨ é'eche a'ɨ́jna, tɨ́'ij a'ɨ́ɨn Cornelio muáanamua nain jɨme'e a'achú pej pena'a caj tihua'utá'ixaate'esin ɨ́ niuucari. ―Ayee mú tiraata'ixaa. 23Tɨ'ɨquí a'ɨ́ɨn hua'utá'inee mej uteárute u chi'ita. A'uu mú a'uteájturaa a'ujna. Yee ruijmua'ate'e yee pu á'uraa a'ɨ́jna ɨ́ Pedro huá'a jamuan ɨ́ mej huaíca. Majta seica mú a'ucɨ́j í'ihuaamua'ame'en ɨ́ mej té'atzaahuate'e me'uun é'echejca'a a'ujna u Jope. 24Majta seɨ́j jetze ɨ́ xɨcaj, a'úu mú a'ará'a u Cesarea. A'ɨ́ɨ pu huá'achu'eve'eca'a a'ɨ́jna ɨ́ Cornelio. A'ɨ́j pu jɨ́n hua'utajé ɨ́ ru'ihuaamua'a, ajta ɨ́ ru'amiigustemua'a. Naíjmi'i mú tiújseɨj u chi'ita. 25Tɨ́'ɨj Pedro u a'uteájrupi u chi'ita, a'ɨ́ɨ pu ra'antinájcheca'a a'ɨ́jna ɨ́ Cornelio. Aj pu 'i a'ɨ́ɨn Cornelio á e'erájve á vejli'ipuan ɨ́ Pedro. 26Aj pu 'i a'ɨ́ɨn Pedro pu ra'ajjáj. Ayee pu tiraata'ixaa tɨjɨ́n: ―Huatéechaxɨ, tevi nu'u pú'een inee. 27Matɨ́'ɨj a'atzu tiu'uxáata rujɨ́ɨmua'a, matɨ́'ɨj mi uteájrupi u chi'ita. Tɨ'ɨquí a'ɨ́ɨn Pedro hua'useíj ɨ́ mej tiújseɨj jeíhua ɨ́ teɨte. 28Aj pu 'i ayén tihua'utá'ixaa a'ɨ́jna ɨ́ Pedro tɨjɨ́n: ―Mú'een xu tirú'umua'aree ɨ́ taye'irá tɨ caí taatá'aca itejmi i tej Israél jetze ajtéme'ecan tej nu'u caí tiyen titejá'ujujhua'ane'en a'ɨ́mej jamuan ɨ́ mej seɨj chuéjra'a japua é'eme'ecan ni tej nu'u caí tiyen tihuá'amuaare. ’Mɨ ajta Dios pu naataseíjra tɨ caí ayén tiraavíjte'e nej niyen tiraaxajta yee capu amɨ́n té'aste amɨjna ɨ́ ja'atɨ nusu yee xána'avi'ire'e pu seijre'e amɨjna. 29A'ɨ́j mú jɨ́n, naatajé me'íjna i ta'ihuaamua'a nej nu'u mú a'uvé'eme'en, canu ti'itɨ́j a'ij tiu'utaxájtaca'a. Ayee nu tí'ijxe'eve'e nej ráamua'aree a'iquí 'een jɨ́n senaatajé. ―Ayee pu tiu'utaxájtaca'a a'ɨ́jna ɨ́ Pedro. 30Aj pu 'i ayén tiu'utaniú a'ɨ́jna ɨ́ Cornelio tɨjɨ́n: ―Pu'uri hui teuumé muáacua xɨcaj, ayée nu niche huatacaí, nehuánitzi'ive'e. Neajta raatéjhuau ɨ́ Dios jemi, a'atzaj cumu já'ita'a ucamé'ecaa ɨ́ xɨcaj. Tɨ'ɨquí ja'atɨ huataseíjre ineetzi jemi. Naa pu ti'itemastájye'icaa a'ɨ́jna ɨ́ tɨ ru'ucáviɨjca'a. 31Ajta ayén tinaatá'ixaa a'ɨ́jna ɨ́ ja'atɨ tɨjɨ́n: “Cornelio, Dios pu nu'u ari ráanamuajri'i a'ɨ́jna ɨ́ pej raatéjhuau ɨ́ jemin. Ajta a'ɨ́ɨ pu ra'utámua'areeri'i a'achú pej caj tíhua'utapuaíjve ɨ́ mej caí a'ij tí'ijviicua'i. 32Patá'aj hui hua'uta'íte mej u á'uju'un a'ujna u Jope. Miché'e nu'u ya'uvé'evi'itɨn me'ɨ́jna ɨ́ Simón, tɨ ajta ayén ántehuaa tɨjɨ́n Pedro. Aa pu á'uca a'u tɨ é'eche ɨ́ Simón, a'ɨ́jna tɨ navij tí'ihua'aca. Aa pu nu'u é'eche a'ájna vejli'i jaj tɨ e'eve'e'ástɨme.” Ayee pu hui tinaatá'ixaa. 33’A'ɨ́j nu jɨ́n ca'anacan hua'uta'íteca'a mɨ seica mej mi muaaja'utájeeve. Xɨ́'epɨ'ɨn pej huarɨ́j pej peri mú ya'uvé'eme. Yee tu'uri, ticu, naími'i u'uté'uu. Dios pu ramua'aree a'ij tej ye'í tí'ijxe'eve'e, tetá'aj naími'i ráanamua a'achú tɨ́j na'a caj a'ɨ́ɨn tavástara'a tímuaata'aíj pej titaatá'ixaate'en. ―Ayee pu tiu'utaxájtaca'a a'ɨ́jna ɨ́ Cornelio. 34Aj pu 'i ayén tihua'utá'ixaa a'ɨ́jna ɨ́ Pedro tɨjɨ́n: ―Nu'uri xaa niyen tí'initɨejte'e íjii tɨjɨ́n ayej xaa ne'u ti'ayajna a'ɨ́jna jemi ɨ́ Dios naími'i mú miyen titeetaniú tɨjɨ́n Dios pu ayén che'atá na'a tí'ijxe'eve'e naíjmi'ica jɨme'e tɨ́j ajta itejmi. 35Naíjmi'ica pu a'ancuré'evi'itɨ ɨ́ Dios a'ɨ́mej ɨ́ teɨte ɨ́ mej rɨ́'ɨ tiratá'aca, majta mej xɨ́'epɨ'ɨn rɨcɨ. Capu Dios jetze ruxe'eve'e tɨ pua'a seɨ́j chuéjra'a japua mé'eme'ecantan me'ɨ́jna ɨ́ ja'atén. 36’A'ii pu hui a'ɨ́ɨn pú'een ɨ́ niuucari ɨ́ tɨ Dios jɨ́n ayén tihua'utajé a'ɨ́mej ɨ́ huáacɨxa'astemua'ame'en a'ɨ́jna ɨ́ Israél teecan. A'ɨ́ɨ pu ayén tihua'utá'ixaa ɨ́ niuucari jɨme'e tɨ tiu'utémua'aviste'e a'ɨ́jna jɨme'e tɨ huá'a japua huaniú a'ɨ́jna ɨ́ Jesús ɨ́ tɨ Dios án yá'ujra ɨ́ ɨpuari japua. A'ɨjna ɨ́ tɨ tavástara'a pú'een itejmi, a'ɨ́ɨ pu taatá'a tej ti rɨ́'ɨ titeeteáturan ɨ́ Dios jemi. 37’Xu'uri ramua'aree a'ij tɨ ye'í ti'itɨ huarɨ́j a'ujna já'ahua'a tɨ́j na'a nainjapua u Judea. A'uu pu a'utéjche a'ujna u Galilea tɨ́'ɨj a'ɨ́ɨn tihua'utá'ixaa ɨ́ teɨte, ajta tɨ́'ɨj ráamuaɨ'ɨhuaca'a a'ɨ́jna ɨ́ Juan. 38Dios pu ya'uta'íteca'a ɨ́ ruxɨ́ejniu'uca tɨ́'ij a'ɨ́ɨn jemin huateáturan ɨ́ Jesús. Ajta a'ɨ́ɨn ɨ́ xɨéjniu'ucare'ara'an ɨ́ Dios, a'ɨ́j pu jetze aráujca'anejca'a a'ɨ́jna ɨ́ Jesús. Tɨ'ɨquí á'uche'ecane'e já'araa. Ayee pu í'irɨjcaa ɨ́ tɨ í'ixɨ'epɨ'ɨn jɨme'e. Ajta tihuá'ahua'atehua'a naíjmi'ica ɨ́ mej rajpuaíjtzi me'ɨ́jna jɨme'e tɨ tiyaaru'u tihuá'a'aijte'eca'a. Ayee pu 'i rɨjcaa a'ɨ́jna ɨ́ Jesús a'iné Dios pu raatévaɨ. 39’Teen tu raaseíj nain jɨme'e a'ij tɨ huarɨ́j íiye a'u mej é'eche a'ɨ́ɨme ɨ́ mej Israél jetze ajtéme'ecan ajta a'ánna Jerusalén. A'ɨ́ɨ mú rá'utatai ɨ́ cɨyej jetze ta'utácúruu. Ayee mú hui 'een jɨ́n raajé'ica me'ɨ́jna ɨ́ Jesús. 40Ajta, Dios pu ajtahua'a raatatɨ́ste ɨ́ xɨéjniu'ucare'ara'an tɨ́'ɨj teuumé'eca huaíca xɨcaj tɨ huamɨ́'ɨ. A'ɨ́j pu jɨ́n ajtahua'a huatarúj a'ɨ́jna ɨ́ Jesús. Ajta Dios pu hui hua'utá'a mej mi seica raaseíj. 41Camu naími'i raaseíj, sino a'ɨ́ɨ mu'u ɨ́ tɨ hua'avé'evi'itɨ ɨ́ Dios. Iteen tu te'ɨ́ɨn pú'een i tej tiú'ucuaa, teajta hua'í jamuan a'ɨ́jna ɨ́ Jesús tɨ́'ɨj a'itara'a a'u mej e'evé'enami'ihuajme ɨ́ mɨ'ɨchite. Teen tu hui xaa ne'u raaseíj. 42’A'ɨ́ɨ pu titaata'aíj tej ti tihua'utá'ixaate'en ɨ́ teɨte, teajta tiyen tiraataxáj yee Jesús pu a'ɨ́ɨn pú'een ɨ́ tɨ Dios ra'antíhua'u a'ɨ́jna jɨme'e ɨ́ tɨ hua'uxɨ́jte'en naíjmi'ica ɨ́ teɨte, ɨ́ mej mauj ruurijme, majta ɨ́ mej meri huácuii. 43Ajta ɨ́ mej títetaté'eca'a me'ɨ́jna jɨme'e mej Dios jetze me'ecan tí'ixaxa'ata'a, naími'i mú tiu'utaxájtaca'a me'ɨ́jna jɨme'e tɨ pua'a nu'u ja'atɨ tɨ na'a, rá'antzaahuate'en a'ɨ́jna ɨ́ Jesús, nain pu nu'u jɨ́n tiraatá'uuni'ira ɨ́ tɨ jɨ́n auteájturaa ɨ́ Dios jemi niuucajtze'en ɨ́ Jesús. 44Aúche'e pu tí'ixajtaca'a a'ɨ́jna ɨ́ Pedro, tɨ́'ɨj a'ɨ́ɨn xɨéjniu'ucare'ara'an ɨ́ Dios yé ve'ecáane. Tɨ'ɨquí huateájturaa huá'a tzajta'a naíjmi'ica jemi a'ɨ́mej ɨ́ mej ráanamuajri'i a'ij tɨ tiu'utaxájtaca'a a'ɨ́jna ɨ́ Pedro. 45Seica mú majta á a'uté'uuca'a ɨ́ mej a'ɨ́mej jetze ajtéme'ecan ɨ́ mej té'atzaahuate'e, ɨ́ mej majta a'ɨ́mej jetze ajtéme'ecan ɨ́ mej ra'ancuré'ecura'a ɨ́ runavij ɨ́ ta'antiújvi'i ɨ́ mej jetzen sea'araca. Jé'ecan mú rɨ́'ɨ ta'utaseíj a'ɨ́ɨme me'ɨ́jna jɨ́n tɨ Dios ajta raateájtuaa ɨ́ ruxɨ́ejniu'uca a'ɨ́mej jemi ɨ́ mej seɨj chuéjra'a japua é'eme'ecan. 46Ayee mú 'een jɨ́n rɨ́'ɨ ta'utaseíj a'iné ayée mú tíhuá'unamuajri'i ɨ́ mej seica niuucari jɨ́n tí'ixajtaca'a, majta jé'ecan mú rɨ́'ɨ tiratá'acare'e ɨ́ Dios. 47Aj pu 'i ayén tihua'utá'ixaa a'ɨ́jna ɨ́ Pedro tɨjɨ́n: ―Ayee mú che'atá mena'a tira'ancuré'a ɨ́ xɨéjniu'ucare'ara'an ɨ́ Dios tetɨ́j iteen. Ayej ne'ase, capu méèj ja'atɨ tɨ hua'utá'ijmɨi mej caí rumuaɨ'ɨhua a'ɨ́ɨme ɨ́ teɨte. Capu xaa ne'u méèj ja'atɨ. 48Ajta á'iyen hua'uta'aíj mej huaújmuaɨ'ɨhua niuucajtze'en a'ɨ́jna ɨ́ Jesús ɨ́ tɨ ajta Cɨríistu'u pú'een, ɨ́ tɨ Dios án yá'ujra ɨ́ ɨpuari japua. Ayee pu a'ɨ́jna jɨ́n huarɨ́j, matɨ́'ɨj mi me'ɨ́n ɨ́ mej huámuaɨ'ɨvijhuaca'a, a'ɨ́ɨ mú raatáhuaviiri'i me'ɨ́jna ɨ́ Pedro tɨ a'ɨ́ɨn á a'uteáturan huá'a jamuan a'achú cumu hua'apua xɨcaj, huaíca xɨcaj.

will be added

X\