3 San Juan 1

1Inee i nej vásta'a pú'een, yé nu muateaujte'e, mú'ee Gayo mɨ nej muaxe'eve'e. Jee xaa ne'u, tzáahuati'ira'a nu jɨ́n muaxe'eve'e. 2Ayee nu tí'ijhuavii mú'eetzi jɨme'e, mɨ nej muaxe'eve'e, tɨ ij temua'a naa timuáavaɨre'en, pej pi pajta caí ti'ijcuí'ine. Nee nu ramua'aree pej rɨ'éene'ecán jɨ́n seijre'e mua'a tzajta'a. 3Jéihua nu huatántemua'ave ne'ɨ́jna jɨme'e matɨ́'ɨj yé ra'áa seica ɨ́ ta'ihuaamua'a, matɨ́'ɨj miyen tinaatá'ixaa pej nu'u tzáahuati'ira'a jɨ́n rɨ́'ɨ ti'iti'á'acha'ɨɨ, a'iné mú'ee pej xaa piyen rá'astijre'e pe'ɨ́jna tɨ ayén ti'ayajna. 4A'ii pu a'ɨ́ɨn pú'een tɨ huápɨ'ɨ rɨ́'ɨ naa tinaatá'aca nej ni niyen tiráanamua mej miyen tzáahuati'ira'a jɨ́n rɨ́'ɨ ti'itiújcha'ɨɨ muá'aye'i ɨ́ niyaujmua'a. 5- 6Mɨ́ nej muaxe'eve'e, xɨ́'epɨ'ɨn pej rɨcɨ tɨ́j na'a pej piyen ti'itɨ́j jɨ́n tihua'atéva'ɨri ɨ́ ta'ihuaamua'a. Ajta jaítze'e pu xɨ́'epɨ'ɨn jɨ́n seijre'e ɨ́ Dios jemi tɨ pua'a piyen hua'utévaɨre'en pe'ɨ́mej ɨ́ pej caí huá'amuajte a'iné a'ɨ́ɨ mú miyen raataxájtaca'a huá'a jemi ɨ́ mej yé tiújse'ɨri mú'eetzi jɨ́me'en pej nu'u piyen huá'axe'eve'e ɨ́ a'axɨ́'ej teɨte. Ayee nu tí'imuahuavii patá'aj piyen tihua'utévaɨre'en temua'a naa tɨ ij caí ti'itɨ́j huá'aturaate'e matɨ́'ɨj a'ucɨ́ɨne a'iné ayée pu tiraavíjte'e a'ɨ́jna jɨme'e mej miyen tí'ivaɨre'e ɨ́ Dios jemi. 7A'ɨ́ mú me'ɨ́jna jetze me'ecan u e'eráacɨ, majta camu ti'itɨ́j ancuré'a a'ɨ́mej jemi ɨ́ mej seɨj chuéjra'a japua é'eme'ecan. 8A'ɨ́j pu jɨ́n ayén tiú'ujxe'eve'e tej tiyen temua'a naa tihua'ancuré'evi'itɨn, teajta hua'utévaɨre'en ti'itɨ́j jɨme'e ɨ́ mej miyen rɨcɨ tej ti huá'a jamuan naíjmi'i tiu'umuárɨ'en te'ɨ́jna jetze me'ecan tɨ ayén ti'ayajna. 9Nu'uri ti'itɨ́j tíhua'uta'íti'iri'i a'ɨ́mej ɨ́ mej me'uun e'etiújse'ɨri. Mɨ́ ajta a'ɨ́ɨn Diótrefes, tɨ huápɨ'ɨ ra'aráanajche tɨ nain jɨ́n antiújmua'areere huá'a jemi, a'ɨ́ɨ pu caí ra'ancuré'aca'a a'ɨ́jna ɨ́ niuucari. 10A'ɨ́j nu jɨ́n, netɨ́'ɨj ne'uun a'atanén mú'ejmi jemi, nee nu niyen tejámuaatá'asin sej ra'utámua'aree a'ij tɨ a'ɨ́ɨn rɨcɨ, tɨ ayén a'ij tí'inexa a'ɨ́jna jɨme'e ɨ́ niuucari tɨ hua'itzi pú'een. Ajta, capu a'ɨ́ɨ na'a ayén tira'aráanajche tɨ ayén neruure, sino a'ɨ́ɨ pu ajta caí hua'ancuré'evi'itɨjca ɨ́ ta'ihuaamua'a. Jee xaa, a'ɨ́ɨ pu ajta ayén huá'ijmɨi a'ɨ́mej ɨ́ mej miyen tí'ijxe'eve'e mej miyen tihua'ancuré'evi'itɨn. Ajta, a'ɨ́ɨn Diótrefes, a'ɨ́ɨ pu ayén tihuá'amuarite'e mej mi caí ché'e me'uun e'etiújse'ɨrihua'an. 11Mɨ́ nej muaxe'eve'e, capej piyen che'atá pena'a rɨjca tɨ́j a'ɨ́jna tɨ a'ij pua'a ti'itiújcha'ɨɨ, sino patá'aj piyen che'atá pena'a rɨjca tɨ́j ajta a'ɨ́ɨn tɨ xɨ́'epɨ'ɨn ti'itiújcha'ɨɨ. Ja'atɨ́ tɨ na'a tɨ xɨ́'epɨ'ɨn rɨcɨ, a'ɨ́ɨ pu Dios jetze ajtéme'ecan. Mɨ́ ajta, ja'atɨ́ tɨ na'a tɨ a'ij pua'a rɨcɨ, a'ɨ́ɨ pu caí ja'anáj raamuá'a ɨ́ Dios. 12Mɨ́ ajta, jɨ́me'en a'ɨ́jna ɨ́ Demetrio, naími'i mú miyen rɨ́'ɨ tí'ijxa. Jee xaa ne'u, ayée pu ti'ayajna tɨ a'ɨ́ɨn ayén tzáahuati'ira'a jɨ́n ti'itiújcha'ɨɨ. Nee nu neajta niyen tiraataxájtave ne'ɨ́jna ɨ́ Demetrio. Seajta mú'een, ayée xu siyen tí'ijmua'aree neetzi jɨme'e nej jé'iyecan jɨ́n niyen tirataxájtave. 13Netɨ́'ɨj tí'imuayu'use'eca'a, ayée pu ca'aníjra'a tineetá'aca nej jeíhua timuaatá'ixaate'en. Mɨ́ neajta inee, canu niyen raataxɨ́'eve nej niyen timuaatayú'use'en i yu'uxari jetze. 14Ayee nena'a éeni'icɨ'e tí'ijxe'eve'e nej ca'anacan mú'ejmi jemi a'atanén tej ti naíjmi'i tiu'utaxáj temua'a naa. 15Ché'e Dios mua'anpuá'ajte'en. A'ɨ́ mú ɨ́ ta'amiigustemua'a yé muateujte'e. Patá'aj mú'ee piyen neetzi jetze me'ecan hua'utateújte'en naíjmi'ica ɨ́ ne'amiigustemua'a ɨ́ mej me'uun a'uté'uu. Ayee pu'u xaa, nu'uri ra'antipuá'ajte.

will be added

X\