2 Timuteeyu 4

1Ayee nu 'een jɨ́n tí'imua'ijcate'e jemin ɨ́ Dios, ajta jemin ɨ́ Cɨríistu'u tɨ ajta i'i Jesús. A'iné Cɨríistu'u pu raaxɨ́'epɨ'ɨntare'en a'ɨ́mej jemi ɨ́ mej mauj yen huachéjme íiyen chaanaca japua, ajta a'ɨ́mej jemi ɨ́ mej meri huácuii. A'ɨ́ɨ pu ajtahua'a huataseíjre'esin tɨ́'ij tiu'uta'aíjta nainjapua. 2Patá'aj mú'ee tihua'utá'ixaate'en ɨ́ niuucari jɨme'e. Pajta patá'aj hua'utáhuavii ca'anín jɨme'e mej mi ráanamua tɨ pua'a miyen tité'ujca'ane mej ráanamua na'ari mecaí ranamuajracu. Patá'aj rɨ́'ɨ huá'uruuren a'ɨ́mej ɨ́ mej caí xɨ́'epɨ'ɨn metíteumuámua'aree. Patá'aj hua'utá'ijmɨi mej mi caí a'ij pua'a rɨjca. Patá'aj pajta hua'utá'an ɨ́ ca'aníjra'a mej mi miyen huárɨni a'ij tɨ tiú'ujxe'eve'e. Rɨ́'ɨ pepu'u pe'ɨ́jna jɨme'e pej pi te'utáviicua'i huá'a jemi ɨ́ teɨte, pajta pe'ɨ́jna jɨme'e pej tihuá'umua'aten temua'a naa. 3Ayee pej huárɨni a'iné a'ájna pu teja'uré'enejsin a'ájna xɨcáara'an jetze mej jetzen caí ché'e te'evíicua'ira muá'aju'u mej ráanamua ɨ́ tɨ i'i xɨ́'epɨ'ɨn a'ij pej ti'ihuá'amua'ateca. Mɨ́ majta a'ɨ́ɨme, seica mú huatájeevi a'ɨ́mej mej ráanamua me'ɨ́jna jɨme'e a'ij mej rujɨ́ɨmua'a mena'a tirájteu. 4A'ɨ́ɨ mú yá'uhua'axɨjsin ɨ́ tɨ ayén ti'ayajna mej mi rá'antzaahuate'en ɨ́ niuucari tɨ cha'a na'a pu'u ti'ixa. 5Mɨ́ pajta mú'ee, patá'aj pauj nain jɨ́n rɨ́'ɨ mé teuúmua'aree. Patá'aj pajta te'utáviicua'i tɨ pua'a ti'itɨ́j muaatamuárɨ'eristen. Neajta nu niyen tí'imua'ijcate'e pej rɨ́'ɨ tejá'uche'ecane'en pej pi tihua'utá'ixaate'en ɨ́ teɨte ɨ́ niuucari jɨme'e tɨ jɨ́n Dios hua'irájtuaani. Patá'aj nain jɨ́n te'ará'asten ɨ́ pej jɨ́n antí'amua'aree pe'ɨ́jna jɨme'e ɨ́ pej jɨ́n tí'ivaɨre'e ɨ́ Dios jemi. 6Ayee pu'u tí'een a'iné ayée pu tiná'amitɨejte'e tɨ́j nena'a nej rajpuaíjtzica'a tɨ ayén tí'ivaɨre'e ɨ́ Dios jemi cumu muaɨ'ɨvéjri ɨ́ mej án yejxɨ́re'esin japuan ɨ́ mej jetzen tí'imuaɨ'ɨvajta. Pu'uri teja'uré'ene a'ájna xɨcáara'a nej jetzen huámɨ'ɨni. 7Jéihua nu rá'uviicua'iri'i nej niyen huárɨni a'ij tɨ tiraavíjte'e ɨ́ Dios jemi. Nu'uri ra'anticɨ́'ɨ ɨ́ nej jɨ́n avé'enmua'areereca'a. Canu raatéxɨeehuataca'a sino nerá'astijre'eca'a ɨ́ nevástara'a. 8A'ɨ́j pu jɨ́n Dios raaté'avaataca'a ineetzi jemi ti'itɨ́j tɨ tináacɨ'ɨti a'ɨ́jna jɨme'e nej urarɨ́'ene'en ɨ́ ne tzajta'a. Nevástara'a pu raaxɨ́'epɨ'ɨntare'en a'ij tɨ tiraavíjte'e; a'ɨ́ɨ pu a'ɨ́jna naatátɨstejsin a'ájna xɨcáara'an tɨ jetzen ayén tí'iraxɨ'epɨ'ɨntari'iran ineetzi jɨme'e. Ajta, capu neetzi na'a huatátɨstejsin, sino naíjmi'ica a'achú pua'améca ɨ́ mej aráujca'anéecan jɨ́n rajchú'eve'e tɨ a'ɨ́ɨn ajtahua'a huataseíjre'en huá'a jemi. 9- 10Patá'aj huatá'aca'anen tɨ́j na'a tɨ tí'irɨ'ɨri pej yetanén neetzi jemi, a'iné Demas pu mé núurɨe a'ɨ́jna jɨme'e tɨ jaítze'e ra'aránajcheca'a ɨ́ tɨ ayén tí'iseijre'e íiyen chaanaca japua. Crescente pu a'uun á'ume a'ujna já'ahua'a tɨ huatacá'a u Galacia. 11Ajta a'ɨ́jna ɨ́ Lucas, a'ɨ́ɨ pu'u yé huateájturaa neetzi jemi. Patá'aj raatá'inen pe'ɨ́jna ɨ́ Marcos tɨ pua'a mé'e piya'useíj tɨ ajamuan yé tanén. Patá'aj ye'erávi'itɨn, a'iné a'ɨ́ɨ pu netéva'ɨri ɨ́ nej jɨ́n tí'ivaɨre'e ɨ́ Dios jemi. 12Neraata'íteca'a ne'ɨ́jna ɨ́ Tíquico tɨ a'uun á'ume'en u Éfeso. 13Patɨ́'ɨj mú a'arájra'ani, patá'aj mú neja'arápijre'en ɨ́ nej ra'iteváara ná'aye'i ɨ́ nej ne'uun ye'uteájtua a'ɨ́jna jemi ɨ́ Carpo, a'ujna Troas tɨ é'eche. Pajta, patá'aj mú tineja'arápijre'en ɨ́ yu'uxari, ajta ɨ́ seica ɨ́ cuapée, neetzi tɨ tí'ine'aa. 14Ajta a'ɨ́ɨn ɨ́ Alejandro tɨ tepúusti'i tí'ita'ahuaca, jeíhua pu a'ij pua'a náaruu. Aru tavástara'a pu ayén raruuren a'ij tɨ tiraavíjte'e a'ɨ́jna jemi a'ɨ́jna jɨme'e a'ij tɨ náaruu. 15Pajta mú'ee, rɨ́'ɨ pepu'u pe'ɨ́jna jemi tɨ́'ij a'ɨ́ɨn caí muaatémua'itɨn, a'iné jeíhua pu rájcha'ɨɨre'eca'a a'ij tej tihua'utá'ixaate'eca'a ɨ́ teɨte. 16Netɨ́'ɨj amuacaícan huatánne'a'aca'a, capu ja'atɨ́ neetzi jɨme'e huatéechaxɨ tɨ ne japua huániuuni. Naími'i mú mé núurɨe. Ché'e Dios caí puaíjtzi hua'atá'acare'en a'ɨ́jna jɨme'e a'ij mej huarɨ́j. 17Mɨ́ neajta inee, a'ɨ́j nu jetze ará'anca'ane ɨ́ tavástara'a. A'ɨ́ɨ pu naatá'a ɨ́ ruca'aníjra'a nej ni nain jɨ́n tihua'utá'ixaate'en ɨ́ teɨte, mej mi naími'i ráanamua a'ɨ́ɨme ɨ́ mej caí Israél jetze ajtéme'ecan. Ajta a'ɨ́ɨ pu nu'irájtuaa nej ni caí ca'anacan huámɨ'ɨni. 18Tavástara'a pu naatévaɨre'esin nain jɨme'e tɨ́'ij caí a'ɨ́ɨn tɨ a'ij pua'a 'een naatémua'itɨn ti'itɨ́j jɨme'e. A'ɨ́ɨ pu nu'irájtuaasin tɨ ij ná'avi'itɨn u júte'e a'u tɨ a'ɨ́ɨn tejé'aijta nej ni ne'uun a'utevée ná'ara'ani. Tiché'e tiyen rɨ́'ɨ tiraatá'an tɨ́j na'a tɨ yú auumé tɨ́j na'a rusén jɨme'e. Ché'e ayén té'ara'ani. 19Patá'aj naatateújti'itze'en a'ɨ́jna ɨ́ Prisca, ajta a'ɨ́jna ɨ́ Aquila, ajta a'ɨ́mej ɨ́ teɨtestemua'ame'en a'ɨ́jna ɨ́ Onesíforo. 20Ajta a'ɨ́ɨn ɨ́ Erasto, a'úu pu a'uteájturaa a'ujna chajta'ara'a jetze u Corinto. Neajta Trófimo nu a'uun a'uteájtuaa tí'icui'ican a'ujna chajta'ara'a jetze u Mileto. 21Patá'aj huatá'aca'anen pej yetanén amuacaícan ajta caí xɨ a'ájna pɨ́tejá'arɨcɨ tɨ huáseevi'i á'aye'i. A'ɨ́ɨ mú yé muatateújte'esin a'ɨ́jna ɨ́ Eubulo, ajta a'ɨ́jna ɨ́ Pudente, ajta a'ɨ́jna ɨ́ Lino, ajta a'ɨ́jna ɨ́ Claudia, majta naími'i ɨ́ ta'ihuaamua'a ɨ́ mej té'atzaahuate'e. 22Ché'e a'ɨ́ɨn tavástara'a huateáturan mú'eetzi jemi. Ché'e a'ɨ́ɨn rɨ́'ɨ timuaatá'an. Yee pu'u. Pu'uri antipuá'areca'a.

will be added

X\