2 Timuteeyu 3

1Ayej xaa ne'u ti'ayajna tɨ ayén té'eme méjca'ihua yee tɨ́'ɨj te'entipuá'arijme'en nain. Jéihua mú rajpuaíitzi muá'aju'u. 2Ayee mú éene'e muá'aju'u ɨ́ teɨte. Ayee mú raxɨ́'eve'e muá'aju'un seica ɨ́ teɨte a'ij tɨ a'ɨ́mej tihuá'amitɨejte'e seɨj ajta seɨj. Majta jeíhua huápɨ'ɨ raxɨ́'eve'e mej tumin tíseɨre'en. Jéihua mú á'ujtzaahuate'e muá'aju'u, majta jeíhua huá'axɨeehuata muá'aju'u ɨ́ ruxɨ́'ej teɨte. Jéihua mú a'ij pua'a tiu'uxáatave'e muá'aju'u. Camu huá'atzaahuate'e muá'aju'u ɨ́ ruvaújsimua'a. Camu majta rɨ́'ɨ tihua'utá'asin a'ɨ́mej ɨ́ mej ti'itɨ́j jɨ́n hua'utévaɨ. Jéihua mú a'ij pua'a titetiújcha'ɨɨ muá'aju'un. 3Camu huá'axe'eve'e muá'aju'u ɨ́ teɨte. Camu majta tíhua'utá'uuni'ira sino jeíhua mú a'ij pua'a tiu'uxáatave'e muá'aju'u. A'ɨ́ɨ mú majta simuáruuni muá'aju'u. Merájcha'ɨ́ɨre'e mú muá'aju'u nain jɨme'e tɨ i'i xɨ́'epɨ'ɨn. 4Avíitzi mú jɨ́n tiu'utátuiire'esin ɨ́ ruxɨ́'ej tevi. Camu a'atzu á'ujcu'uvée muá'aju'u. Jéihua mú á'ujtzaahuate'e muá'aju'u me'ɨ́jna jɨme'e tɨ ayén tihuá'amitɨejte'e mej jeíhua ruxe'eve'e. Jéihua mú raxɨ́'eve'e muá'aju'u mej miyen huárɨni a'ij tɨ tihua'aráanajche. Majta camu raxɨ́'eve'e muá'aju'u ɨ́ Dios. 5Aru a'ɨ́ɨ mú majta miyen huataújseijrata ɨ́ teɨte jemi mej nu'u rá'astijre'e ɨ́ Dios, aru camu a'ɨ́jna jetze araujca'anée muá'aju'u. Xɨ́ɨ mu'u mena'a ti'iteseíire'e muá'aju'un. Capej huá'ajaahuate'e mú'ee. 6Ayee mú 'een matɨ́j a'ɨ́ɨme ɨ́ mej hua'itzi jɨ́n uteáru'ipi u huá'achi'ita ɨ́ teɨte mej mi hua'utémua'itɨn a'ɨ́mej ɨ́ 'uuca ɨ́ mej caí té'eviicua'i ɨ́ ru tzajta'a, ɨ́ mej ruxɨéemɨste'e me'ɨ́jna jɨme'e ɨ́ mej jɨ́n auteájturaa ɨ́ Dios jemi. Majta miyen huataura'aca tɨ ti'itɨ́j ca'aníjra'a hua'utá'an mej mi miyen huárɨni ti'itɨ́j tɨ a'ij pua'a 'een, tɨ ajta hua'aráanajche. 7Ja'anáj tɨ na'a miyen tihuá'anamuajran ɨ́ mej tihuá'amua'ate mej mi jaítze'e yaú'itɨée muá'ara'ani ti'itɨ́j tɨ jéjcua. Camu ja'anáj huataúra'asin mej ráamua'ati ɨ́ niuucari tɨ ayén ti'ayajna. 8Ajta a'ɨ́ɨme ɨ́ teteca ɨ́ mej tihuá'amua'ate, ayée mú che'atá mena'a tirájcha'ɨre'e ɨ́ tɨ ayén ti'ayajna matɨ́j a'ɨ́ɨme ɨ́ mej Moisés teecan mej tícha'ɨɨre'eca'a, a'ɨ́ɨme ɨ́ mej hua'apua. A'ii mú a'ɨ́ɨn pú'eene'e a'ɨ́jna ɨ́ Janes teecan, ajta a'ɨ́jna ɨ́ Jambres teecan. Ajta a'ɨ́ɨme ɨ́ mej miyen 'een, ayée mú a'ij pua'a mé titeumuámua'aree. Camu a'atzu té'atzaahuate'e tzáahuati'ira'a jɨme'e. 9Camu ché'e á'ateeri mej miyen rɨcɨ a'iné ayée che'atá na'a tihuá'aruuren a'ij tɨ tihuá'uruu ɨ́ seica ɨ́ mej hua'apua. Naími'i mú ramua'aréeren tɨ caí ti'itɨ́j vaɨre'e a'ij mej tí'ixaxa'a. 10Mɨ́ pajta mú'ee ramua'aree nain jɨme'e a'ij nej éeni'icɨ'e á'uche'ecan, ɨ́ nej jɨ́n tí'imɨjhuaca. Mú'ee pej pajta ramua'aree nej tzáahuati'ira'a jɨ́n té'atzaahuate'e, neajta té'eviicua'i temua'a naa ɨ́ nej jɨ́n rajpuaíjtzi. 11Mú'ee pej ramua'aree temua'a naa mej a'ij pua'a náaruu, nej jeíhua rajpuaíjtzi na'araa. Mú'ee pej ramua'aree ti'itɨ́j tɨ a'ij náaruu a'ujna já'ahua'a u Antioquía, ajta a'ujna u Iconio, ajta a'ujna u Listra. Jéihua nu te'utáviicua'iri'i ɨ́ nej jɨ́n rajpuaíjtzica'a. Ajta nevástara'a pu nu'irájtuaa nain jɨme'e ɨ́ nej rajpuaíjtzica'a. 12Ayej xaa ne'u, ayén che'atá na'a tí'iruuren ja'atɨ́ tɨ na'a tɨ tí'itese'e tɨ ra'ará'astijre'en ɨ́ Cɨríistu'u tɨ ajta i'i Jesús. A'ij mú pua'a raruuren me'ɨ́jna ɨ́ ja'atɨ. 13Ajta a'ɨ́ɨme ɨ́ mej a'ij pua'a titetiújcha'ɨɨ, majta a'ɨ́ɨme ɨ́ mej caí tzáahuati'ira'a jɨ́n miyen rɨcɨ, maúche'e mú jaítze'e a'ij pua'a 'eene'e muá'aju'u ɨ́ ru tzajta'a. Maúche'e mú jaítze'e huá'acuanamua muá'aju'u seica ɨ́ teɨte. Majta jaítze'e mú te'uteúhua'itze'esin rujɨ́ɨmua'a. 14Mɨ́ pajta mú'ee, patá'aj pauj piyen té'atzaahuate'e a'ij pej tíraarɨ́'ɨre, pe'íjna jetze tɨ ayén timuá'amitɨejte'eca'a. Patá'aj piyen pauj té'atzaahuate'e a'iné mú'ee pe ramua'aree a'ij mej timuaamuá'ate. 15Pajta, tɨ́j na'a patɨ́'ɨj pá'arɨ'ɨsta, mú'ee pe ramua'areereca'a a'ij tɨ té'eyu'usi'i a'ɨ́jna jetze ɨ́ yu'uxari tɨ Dios ru jemi raaté'avaataca'a. A'ii pu a'ɨ́ɨn pú'een ɨ́ niuucari tɨ muaatá'asin pej rɨ́'ɨ mé teuúmua'aree tɨ ij Dios mua'irájtuaani a'ɨ́jna jɨme'e pej rá'antzaahua ɨ́ Cɨríistu'u tɨ ajta i'i Jesús. 16Naíjmi'i tɨ́j na'a tɨ té'eyu'usi'i ɨ́ yu'uxari jetze tɨ Dios ru jemi raaté'avaataca'a, a'úu pu é'eme'ecan ɨ́ Dios jemi a'iné xɨéjniu'ucare'ara'an ɨ́ Dios, a'ɨ́ɨ pu rumuárɨ'eri'ire'ara'an jɨ́n hua'utá'a mej mi miyen tira'uyú'uxa. Ajta tí'ivaɨre'e mej mi jɨ́n tihuá'umua'aten ɨ́ teɨte na'ari mej mi jɨ́n hua'utá'ixaate'en ɨ́ mej jɨ́n ráamua'aree ɨ́ mej jɨ́n auteájturaa ɨ́ Dios jemi, mej mi rɨ́'ɨ huá'uruuren. Ajta pu tí'ivaɨre'e mej mi tihuá'umua'aten a'ij tɨ tí'ixɨ'epɨ'ɨn ɨ́ Dios jemi, ajta a'ij tɨ caí tí'ixɨ'epɨ'ɨn mej mi urarɨ́'ene'e muá'ara'ani ɨ́ ru tzajta'a. 17Ajta ayén tiraatéva'ɨri a'ɨ́jna ɨ́ ja'atɨ tɨ rá'astijre'e ɨ́ Dios tɨ a'ɨ́ɨn ɨ́ yu'uxari jɨ́n huaújnaijmire'en naími'i tɨ́j na'a tɨ ruxe'eve'e tɨ ij ayén huárɨni ti'itɨ́j tɨ a'ij tí'ixɨ'epɨ'ɨn.

will be added

X\