2 Timuteeyu 1

1Inee, nee nu i'i Pablo, tɨ Dios na'antíhuau ruxɨ́'evi'ira'a jɨme'e nej ni raatévaɨre'en ɨ́ Cɨríistu'u tɨ ajta i'i Jesús a'ɨ́jna jɨme'e tɨ Dios ayén te'ateújratziiri'i tɨ taatá'asin tej ruuri tá'ara'ani rusén jɨme'e jamuan te'ɨ́jna ɨ́ Cɨríistu'u tɨ ajta i'i Jesús. 2Ayee nu yé tí'imuayu'use'e mú'ee pej i'i Timoteo, mɨ pej ní'iyauj. Ché'e a'ɨ́ɨn Dios tɨ tá'iya'upua, ajta a'ɨ́ɨn ɨ́ tavástara'a, ɨ́ Cɨríistu'u tɨ ajta i'i Jesús, miché'e me'ɨ́n rɨ́'ɨ timuaatá'an, miché'e muá'ancu'uvajxɨ'ɨn, majta rɨ́'ɨ tímua'anpuá'ajte'en ɨ́ a'atzajta'a. 3Tɨ́j na'a tetɨ'ɨjtá mua'utámua'aree, nain xɨcaj tzajta'a na'ari nain tɨ́ca'ari tzajta'a, netɨ́'ɨjtá téniuusime'en, nee nu tí'ijteujtzi'ire'e mú'eetzi jɨme'e ɨ́ Dios jemi ɨ́ nej jemin caí ti'itɨ́j jɨ́n auteájturaa nej ravaɨre'e. Ayee nu che'atá nena'a jemin ravaɨre'e matɨ́j me'ɨ́n tí'ivaɨre'eca'a ɨ́ nehuáacɨxa'astemua'a teecan. 4Nee nu mua'utámua'aree ɨ́ pej jɨ́n ayein. A'ɨ́j nu jɨ́n jeíhua raxɨ́'eve'e nej neajtahua'a muaaseíj nej ni ne'ɨ́jna jɨ́n huatántemua'ave'en. 5Nee nu ra'utámua'areeri'i pej té'atzaahuate'e tzáahuati'ira'a jɨme'e. A'ɨ́ɨ pu amuacaícan té'antzaahua ɨ́ á'aye'ecua a'ɨ́jna ɨ́ Loida teecan, ajta á'iyen a'anáàna Eunice ayén che'atá na'a té'antzaahua. Ajta íjii ayée pu tiná'amitɨejte'e ineetzi pej piyen che'atá pena'a té'atzaahuate'e ɨ́ tavástara'a jemi. 6A'ɨ́j nu jɨ́n niyen tí'imua'aijte'e pej pajtáhua'a ahua'aca'anen pej tiu'utévaɨre'en nain jɨme'e a'ij tɨ Dios timuaatá'a netɨ́'ɨj mua'avé'emuarɨej ɨ́ nemuajca'a jɨme'e. 7Patá'aj ahua'aca'anen temua'a naa a'iné capu ayén tiraatá'a ɨ́ Dios tej tiyen tí'itziɨɨne'e. Capu a'atzu, sino a'ɨ́ɨ pu titaatá'a tej te'ɨ́jna jetze arátaca'ane, teajta tej ti taxe'eve'e, teajta tej ti rɨ́'ɨ metíteumuámua'aree. 8A'ɨ́j pej jɨ́n caí tí'itevi'ira'a pej tihua'utá'ixaate'en ɨ́ teɨte a'ij tɨ tiú'uruu ɨ́ tavástara'a. Capej pajta tí'itevi'ira'a pe'ɨ́jna jɨme'e nej rá'astijre'e. Mɨ́ pajta mú'ee, patá'aj ne jamuan huatá'an tej ti naími'i rajpuaíitzi tá'ara'ani, tej ti Dios jetze arátaca'ane tej tiyen huárɨni mej mi jaítze'e ráanamua ɨ́ niuucari tɨ jɨ́n Dios hua'irátuaasin. 9A'ɨ́j tu jetze arátaca'ane ɨ́ Dios tɨ tu'irájtuaa itejmi, ajta titaa'íjca tej ti tiyen urarɨ́'ene'en tá'ara'ani ɨ́ tatzajta'a. Capu a'ɨ́jna jɨ́n tu'irájtuaa a'ɨ́jna jɨme'e tej ti'itɨ́j jɨ́n tiu'utévaɨ. Capu xaa ne'u. Ayee pu'u na'a tu'irájtuaa a'ɨ́jna jɨme'e a'ij tɨ amuacaícan tiraaxɨ́'epɨ'ɨntare, ajta a'ɨ́jna jɨme'e tɨ rɨ́'ɨ titaatá'a. A'ɨ́ɨ pu ajmí'i rɨ́'ɨ titaatá'a jamuan ɨ́ Cɨríistu'u tɨ ajta i'i Jesús. Tɨ́'ɨj caí xɨ seijre'eca'a ɨ́ chaanaca tej yen japuan puaseaaruve'e, a'ɨ́ɨ pu ayén rɨ́'ɨ titaatá'a. 10Aru íjii, pu'uri á jéjre'e seijre'e a'ij tɨ rɨ́'ɨ titaatá'a a'ɨ́jna jɨme'e tɨ huataseíjre a'ɨ́jna tɨ tu'irájtuaa, a'ɨ́jna ɨ́ Cɨríistu'u tɨ ajta i'i Jesús. A'ɨ́ɨ pu ra'antipuá'ajte a'ɨ́jna ɨ́ mej jɨ́n cui'ini. Ajta, a'ɨ́ɨ pu taatá'a tej raaseíj ɨ́ tej ruuri tá'ara'ani rusén jɨme'e tej raará'astijre'en ɨ́ niuucari tɨ jɨ́n Dios tu'irátuaasin. 11Ajta ineetzi, Dios pu na'antíhuau nej ni tihua'utá'ixaate'en ɨ́ teɨte ne'ɨ́jna ɨ́ niuucari, neajta ne'ɨ́jna jɨ́n tiu'utévaɨre'en, neajta nej tihuá'umua'aten. 12A'ɨ́j nu jɨ́n niyen nena'a rajpuaíjtzi. Mɨ́ neajta, canu tí'itevi'ira'a a'iné nee nu ramua'ate ne'ɨ́jna ɨ́ nej rá'astijre'e. Ajta ayén tiná'amitɨejte'e tɨ a'ɨ́ɨn raayɨ́'ɨtɨ tɨ raté'avaa ɨ́ nej jɨ́me'en tira'íjca tɨ́'ij a'ájna huataseíjre'en a'ájna xɨcájra'a tɨ jetzen Dios ayén na'uxɨ́jte'en a'ij tɨ tiraavíjte'e. 13Ayee pepu'u pauj tihuá'umua'aten pe'ɨ́jna jɨme'e a'ij pej tináanamuajri'i, ɨ́ neniuuca jɨme'e ɨ́ tɨ rɨ́'ɨ tíhua'utarújte'en. Patá'aj pauj piyen rá'astijre'e ɨ́ tavástara'a, patá'aj pajta pauj piyen huá'axe'eve'e ɨ́ teɨte. 14Patá'aj rɨ́'ɨ tiraté'avaa ɨ́ tɨ jɨ́n Dios timua'íjca. Patá'aj rɨ́'ɨ te'uhuaté'aca'anen pe'ɨ́jna jɨme'e xɨéjniu'ucare'ara'an ɨ́ Dios pej jetze ará'aca'ane pej pi rɨ́'ɨ tiraté'avaa, a'iné a'ɨ́ɨn xɨéjniu'ucare'ara'an yé huateáturaasin téjmi jemi. 15Pepu'uri ramua'aree ɨ́ mej mé núurɨe naími'i a'ɨ́ɨme ɨ́ mej a'uun é'eme'ecan tɨ́j na'a a'úu tɨ huatacá'a u Asia. A'ɨ́ɨ mú huá'a jetze ajtéme'ecan a'ɨ́jna ɨ́ Figelo, ajta a'ɨ́jna ɨ́ Hermógenes. 16Ayee nu tí'ijxe'eve'e tɨ a'ɨ́ɨn tavástara'a rɨ́'ɨ huá'ancu'uvajxɨ'ɨn ɨ́ teɨtestemua'ame'en a'ɨ́jna ɨ́ Onesíforo a'iné jeíhua pu yé nevé'etui ɨ́ nej jɨ́n huarún. Capu ajta raatatévi'iraste nej aiteánami'ihuaca'a. 17Mɨ́ ajta a'ɨ́ɨn Onesíforo, tɨ́'ɨj a'uun a'utéveeca'a u Roma, a'ɨ́ɨ pu náahuau muárɨ'eri jɨme'e. Aj pu i xaa náateu. 18Ché'e tavástara'a ayén tiraatá'an tɨ Dios rɨ́'ɨ rá'ancu'uvajxɨ'ɨn a'ájna xɨcájra'a tɨ jetzen tavástara'a ajtahua'a huataseíjre'en. Mú'ee pe ramua'aree temua'a naa naíjmi'i tɨ́j na'a ɨ́ tɨ jɨ́n tinaatévaɨ netɨ́'ɨj ne'uun á'ucatii u Éfeso.

will be added

X\