1 Casi'i, ne'ihuaamua'a, setá'aj siyen rahuaviira téjmi jɨme'e tej ti ca'anacan tihua'utá'ixaate'en ɨ́ niuucari jɨme'e ɨ́ tavástara'a tɨ raxa naíjmi'icɨ'e mej miyánna huachéjme, mej mi majta ráanamua a'ɨ́ɨme ɨ́ mej á ɨmuá a'uchéjme ajta na'a caí nainjapua huánamuajre'en. Setá'aj siyen rahuaviira mej miyen che'atá mena'a ra'ará'astijre'en ɨ́ niuucari setɨ́j mú'een tira'ará'astijre. 2 Setá'aj seajta rahuaviira tɨ a'ɨ́ɨn tavástara'a tu'irájtuaani mej mi caí a'ij táaruuren ɨ́ teteca ɨ́ mej a'ij pua'a titetiújcha'ɨɨ, ɨ́ mej majta a'ij pua'a tí'iteteɨte. Ayee xu rahuaviira a'iné camu naími'i té'atzaahuate'e. 3 Ajta a'ɨ́ɨn ɨ́ tavástara'a, capu ja'anáj até'ɨtzea'ara. A'ɨ́ pu xaa ca'aníjra'a amuaatá'asin sej si te'utáviicua'i. Ajta, a'ɨ́ɨ pu rɨ́'ɨ tejá'amuacha'ɨɨ a'ame tɨ́'ij caí amuaatémua'itɨn a'ɨ́jna tɨ a'ij pua'a een. 4 Teajta iteen, ayée pu titá'amitɨejte'e a'ɨ́jna jemi ɨ́ tavástara'a sej siyen huárɨni a'ij tej teri tejamuaata'aíj. Ajta, ayée pu che'atá na'a titá'amitɨejte'e sej seuj siyen huárɨni méjca'ihua yee. 5 Ché'e a'ɨ́ɨn tavástara'a ca'aníjra'a amuaatá'an ɨ́ a'amua tzajta'a sej si siyen che'atá sena'a titehuaújxe'eve'en seɨj seajta seɨj tɨ́j ajta Dios tejá'amuaxe'eve'e mú'ejmi. Ché'e a'ɨ́ɨn ajta amuaatá'an ɨ́ ca'aníjra'a sej si siyen che'atá sena'a te'utáviicua'i tɨ́j ajta Cɨríistu'u te'utáviicua'iri'i. 6 Ayee tu tejá'amua'ijte'e, ta'ihuaamua'a, niuucajtze'en ɨ́ tavástara'a, a'ɨ́jna ɨ́ Jesús tɨ ajta i'i Cɨríistu'u, sej si siyen caí titejá'ujujhua'ane'en jamuan seɨj á'amua'ihuaara'a tɨ ajta i'i huá'ɨna'ase'e, tɨ caí tí'imɨjhuaca, tɨ caí ayén che'atá na'a rɨ́'ɨ ti'itiújcha'ɨɨ a'ij tej teri tejamuá'ixaa mú'ejmi. 7 Mú'een xu rujɨ́ɨmua'a seri ramua'aree a'ij sej ye'í huárɨni, sej si siyen che'atá sena'a huárɨni tetɨ́j iteen. Catu a'atzu huá'ɨna'ase'eca'a tetɨ́'ɨj teuj mú'ejmi jemi a'uté'uuca'a. 8 Catu huáapua'a tena'a tiú'ucuaa seɨj jemi, sino tetiu'unájchitaca'a ticu. Nain tújca'ari tzajta'a, teajta nain tɨ́ca'ari tzajta'a, tetiu'umuárɨej ca'anín jɨme'e. Jéihua tu te'utáviicua'iri'i tej ti caí ti'itɨ jɨ́n amuaatamuárɨ'eriste'en. 9 Jee xaa ne'u, ayée pu tiraavíjte'eca'a tej huáapua'a tena'a tiú'ucua'ani. Capu amɨ́n a'ij. Seɨcɨé tu huarɨ́j tej ti amuáamua'aten a'ij sej huárɨni, sej si siyen che'atá sena'a rɨ́'ɨ titetiújcha'ɨɨ. 10 Ayej xaa ne'u ti'ayajna. Tetɨ́'ɨj teuj a'uté'uuca'a mú'ejmi jemi, ayée tu tejámuaata'aíjte a'ɨ́jna jɨme'e yee: Tɨ pua'a ja'atɨ caí jírá'ujca'ane tɨ tiu'umuárɨ'en, caxu raatá'acare'en tɨ a'ɨ́ɨn tiú'ucua'ani. 11 Ajta íjii, ayée tu tí'inamua tɨjɨ́n seica a'ɨ́ɨme, a'ɨ́ɨ mú huá'ɨna'ase'e. Camu ti'itɨj jɨ́n tí'imuarɨ'e sino ayée mu'u rucɨɨnive'e mej mi tiú'ɨtzíite'e. 12 Ayee tu ca'aníjra'a hua'utá'asin naíjmi'ica ɨ́ mej miyen 'een, ayée tu tíhua'uta'aíjte'esin a'ɨ́jna jemi ɨ́ tavástara'a, a'ɨ́jna ɨ́ Jesús tɨ ajta i'i Cɨríistu'u, mej mi tiu'umuárɨ'en, mej caí ché'e a'ij mena'a ti'itéruurejne'en, mej mi rujɨ́ɨmua'a raamuá'itɨn ɨ́ mej jɨ́n huateújvaɨre'en. 13 Seajta mú'een, ne'ihuaamua'a, caxu raxɨéehuata sej siyen huárɨni a'ij tɨ tiraavíjte'e. 14 Tɨ pua'a ja'atɨ caí á'ujca'ane tɨ ra'ará'astijre'en a'ij tej tejá'amuayu'use'e te'íjna jetze i yu'uxari, ayée xu huárɨni. Setá'aj ráamua'ati se'ɨ́jna ɨ́ ja'atɨ, seajta siyen tiyá'uhua'axɨn tɨ ij huataujtévi'irata a'ɨ́jna ɨ́ ja'atɨ. 15 Mɨ́ seajta mú'een, caxu siyen a'ij pua'a raruure tɨ́j ja'atɨ tɨ amuájcha'ɨɨre'e, sino ayée xu rɨ́'ɨ tiraatájeeve a'iné á'amua'ihuaara'a pu pú'een. 16 Ajta a'ɨ́ɨn tavástara'a tɨ tiu'utépua'ajte, ché'e a'ɨ́ɨn ruseɨ́j amua'anpuá'ajte'en a'amua tzajta'a, ja'anáj tɨ na'a, ajta nain jɨme'e. Ché'e a'ɨ́ɨn tavástara'a huateáturan mú'ejmi jemi. 17 Inee Pablo, nemuajca'a nu jɨ́n tejá'amuayu'use'e a'íjna i yu'uxari jetze i nej jɨ́n amuaatateújte'e. Ayee nu té'eyu'uxaca nainjapua ɨ́ tí'ineyu'uxa. A'ɨ́j xu jɨ́n ráamua'aree tɨ ayén ti'ayajna nej ra'uyú'uxaca'a neseɨ́j. 18 Ajta a'ɨ́ɨn tavástara'a, a'ɨ́jna ɨ́ Jesús, tɨ ajta i'i Cɨríistu'u, ché'e a'ɨ́ɨn rɨ́'ɨ tejamuáacha'ɨɨn naíjmi'ica mú'ejmi.
