2 Tesalonicenses 2

1- 2Jɨ́me'en a'ɨ́jna xɨcáara'an tɨ jetzen yen uvé'enejsin ɨ́ tavástara'a, a'ɨ́jna ɨ́ Jesús tɨ ajta i'i Cɨríistu'u, tɨ́'ɨj a'ɨ́ɨn tájseɨre'en ɨ́ ru jemi, ayée tu tejá'amuahuavii, ta'ihuaamua'a, sej caí tí'itziɨɨne'e. Caxu ti'itá'acare'en tɨ ja'atɨ tejamua'antiú'uuni'iran, tɨ ayén tí'ixajta yee pu'uri teja'uré'ene a'ɨ́jna xɨcáara'an tɨ jetzen yen uvé'enejsin ɨ́ tavástara'a. Caxu rá'atzaahuate'e tɨ pua'a ayén tejá'amua'ixaate'e yee nee nu ti'ixa Dios jetze me'ecan ne'ɨ́jna jɨme'e, na'ari tɨ pua'a ja'atɨ ayén yee ayée nu te'encuré'anamuajri'i tɨjɨ́n yee pu'uri teja'uré'ene. Caxu seajta rá'atzaahuate'e tɨ ja'atɨ mú'ejmi jemin a'uré'enen, ayén tejá'amua'ixaate'e yee yu'uxari nu a'aráapi tɨ a'ɨ́ɨn Pablo ra'utéyu'uxaca'a tɨ jetzen té'eyu'usi'i tɨ yee ari teja'uré'ene a'ɨ́jna xɨcáara'an tɨ jetzen yen uvé'enejsin. 3Caxu ja'atɨ tá'acare'en tɨ amuáacuanamua ti'itɨ jɨme'e, a'iné ayée pu ruxe'eve'e tɨ amuacaí ayén teja'uré'enen mej mé rúurɨeni ɨ́ Dios, majta autéhuijsin mej rájcha'ɨɨre'e muá'aju'un. Aj pu i huataseíjre'esin a'ɨ́jna ɨ́ ja'atɨ tɨ caí ti'itɨ á'astijre'e. A'ɨ́ pu huá'a jetze ajtéme'ecan a'ɨ́mej ɨ́ tɨ Dios hua'antipuá'ajte'esin. 4A'ɨ́ pu ajta rájcha'ɨɨre'e matɨ́j mena'a pua'amé ɨ́ mej miyen huataújmua'a tɨjɨ́n dioosi mej pɨ́rɨcɨ. A'ɨ́ pu ayén á'ujtzaahuate'e tɨ nu'u jaítze'e ruxe'eve'e caí máàj ti'itɨ ɨ́ mej miyen rateáanajche. A'ɨ́ pu jɨ́n ayén huarɨ́n, aj pu i a'uun a'uteárute teyujta'a a'u mej ya'uténajche ɨ́ Dios. Aj pu i a'ɨ́jna japua a'ujyeíjxa ɨ́ ɨpuari japua, ajta a'uun huataújseijrata tɨ nu'u a'ɨ́ɨn pú'een ɨ́ Dios. 5¿Ni qui secaí ché'e ramua'aree nej niyen ne'ɨ́jna jɨ́me'en tejámuaatá'ixaa netɨ́'ɨj ne'uun a'utéveeca'a mú'ejmi jemi? Jee xaa ne'u, seúche'e xu ramua'aree. 6Seajta siyen ramua'aree ti'itɨ tɨ pɨ́rɨcɨ tɨ rá'ijmɨi tɨ ij caí ca'anacan huataseíjre'en a'ɨ́jna ɨ́ ja'atɨ ajta na'a caí ari teja'uré'enen ja'anáj tɨ pua'a huaújxɨ'epɨ'ɨntari'iri'i. 7Ayej xaa ne'u ti'ayajna. Pu'uri tí'imuarɨ'e a'ɨ́jna tɨ rú'avaa tɨ caí ti'itɨ á'astijre'e. Mɨ ajta a'ɨ́ɨn tɨ rá'ijmɨi, aúche'e pu ayén raateánajsin ajta na'a caí yá'uvi'itɨn. 8Aj pu xaa huataseíjre'esin mé jéjre'e a'ɨ́jna tɨ caí ti'itɨ á'astijre'e. Ajta a'ɨ́ɨn tavástara'a, a'ɨ́jna ɨ́ Jesús, a'ɨ́ɨ pu rajé'icatan. A'ɨ́ pu rá'apua'ajte'en a'ɨ́jna ɨ́ runiuuca jɨme'e, ajta a'ɨ́jna jɨme'e tɨ naa seíire'e a'ame tɨ́'ɨj ajtahua'a huataseíjre'esin ɨ́ tavástara'a. 9Ajta a'ɨ́ɨn tɨ caí ti'itɨj á'astijre'e, a'ɨ́ɨ pu amuacaí huataseíjre'esin jɨ́me'en ɨ́ muárɨ'eri'ire'ara'an a'ɨ́jna ɨ́ Satanás. Jéihua pu ayén raruuren mej mi naa rɨ́'ɨ tira'utaseíj ɨ́ teɨte. Jéihua pu huá'acuanamuan a'ɨ́jna jɨme'e ɨ́ tɨ jɨ́n hua'utaseíjrate'esin, ɨ́ mej jɨ́n ramua'aréeren a'ij tɨ té'eme. 10Ayee pu een jɨ́n huá'acuanamuan nain jɨme'e a'ij tɨ tirú'umua'aree mej mi a'upuá'arixɨ'ɨn ɨ́ teɨte a'iné camu huataúra'a mej raataxɨ́'eve'en ɨ́ tɨ ayén ti'ayajna tɨ ij Dios hua'irájtuaani. 11- 12A'ɨ́j pu jɨ́n Dios tiu'uta'aíjta tɨ a'uun a'uteáturan huá'a jemi a'ɨ́jna tɨ huá'acuanamua mej mi ca'anéeri jɨ́n rá'antzaahuate'en ɨ́ tɨ hua'itzi na'a, tɨ ij Dios hua'uxɨ́'epɨ'ɨntari'ire'en ayén tihuá'axɨjte'en mej miyen a'ij pua'a huarɨ́j a'ɨ́jna jɨme'e mej rá'atzaahuate'e ɨ́ tɨ caí ayén ti'ayajna, sino ayée pu hua'aránajcheca'a mej miyen huárɨni ɨ́ tɨ a'ij pua'a een ɨ́ Dios jemi. 13Seajta mú'een, mɨ sej ta'ihuaamua'a, jeíhua pu já'amuaxe'eve'e ɨ́ tavástara'a. Ajta, ayée pu tiraavíjte'e tej tiyen tí'ijteujtzi'ire'e ɨ́ Dios tɨ́j na'a mú'ejmi jɨme'e a'iné jéjcua ɨmuá Dios pu amua'antíhua'u tɨ ij a'ɨ́ɨn amua'irájtuaani a'ɨ́jna jɨme'e tɨ a'ɨ́ɨn xɨéjniu'ucare'ara'an ayée amuaatéhuii, ajta a'ɨ́jna jɨme'e sej rá'atzaahuate'e ɨ́ tɨ ayén ti'ayajna ɨ́ Dios jemi. 14Ayee pu een jɨ́n Dios ayén amuaatajé a'ɨ́jna jɨme'e ɨ́ tej tejamuá'ixaa ɨ́ Cɨríistu'u jetze me'ecan tɨ ij ayén tejamuáacɨ'ɨti sej siyen che'atá sena'a naa seíire'e xá'ara'ani tɨ́j ajta ayén naa seijre'e u ta japua ɨ́ tavástara'a, a'ɨ́jna ɨ́ Jesús tɨ ajta i'i Cɨríistu'u. 15A'ɨ́j xu jɨ́n, mɨ sej ta'ihuaamua'a, setá'aj huateújca'anen ɨ́ ru tzajta'a. Seajta mú'een, ayée xu huárɨni se'ɨ́jna jɨme'e, ti'itɨ tej a'ij tejamuaamuá'ate, nain tɨ́j tena'a tejámuaatá'itɨiiri'i nusu tej amuá'ixaa, caxu yá'uhua'anan. 16- 17Yee pu icu, ta'ihuaamua'a, ché'e ayén té'ara'ani, mej miyen amua'anpuá'ajte'en ɨ́ a'amua tzajta'a, majta ca'aníjra'a amuaatá'an sej si siyen tiu'umuárɨ'en se'ɨ́jna jɨme'e nain jɨme'e tɨ tí'imuari'ira'a tɨ i'i xɨ́'epɨ'ɨn, sej si seajta siyen tihua'utá'ixaate'en. Ché'e ayén rɨ́'ɨ amuáaruuren a'ɨ́jna ɨ́ tavástara'a, a'ɨ́jna ruseɨ́j ɨ́ Jesús tɨ ajta i'i Cɨríistu'u, ajta ɨ́ Dios ɨ́ tej rájya'upua, ɨ́ tɨ taxe'eve'e tɨ́j na'a rusén jɨme'e, ajta ayén taatá'a a'ij tej tiraachú'eve'en a'ɨ́jna jɨme'e tɨ rɨ́'ɨ titáacha'ɨɨn.

will be added

X\