2 Tesalonicenses 1

1Inee i nej i'i Pablo, jamuan i Silvano, ajta a'íjna i Timoteo, ayée tu tejá'amuayu'use'e mɨ sej Tesalónica é'eche, seajta mɨ sej e'etiújse'ɨri jemin a'ɨ́jna ɨ́ Dios ɨ́ tej rájya'upua, seajta jemin ɨ́ tavástara'a a'ɨ́jna ɨ́ Jesús tɨ ajta i'i Cɨríistu'u. 2Ajta a'ɨ́ɨn ɨ́ Dios ɨ́ tej rájya'upua, ajta a'ɨ́ɨn ɨ́ tavástara'a, a'ɨ́jna ɨ́ Jesús tɨ ajta Cɨríistu'u pú'een, miché'e me'ɨ́n rɨ́'ɨ tejamuáacha'ɨɨn, majta amua'anpuá'ajte'en temua'a naa a'amua tzajta'a. 3Ayee pu xaa ne'u tijí'ixɨ'epɨ'ɨn tej tiyen tí'ijteujtzi'ire'e ɨ́ Dios ja'anáj tɨ na'a mú'ejmi jɨme'e. Ayee pu tiraavíjte'e a'iné tɨ́j na'a tɨ yú auucá'a, jaítze'e xu mú'een té'atzaahuate'e, ajta jaítze'e xu mú'een huaújxe'eve'e seɨj seajta seɨj. 4A'ɨ́j tu jɨ́n rɨ́'ɨ tejá'amuaxa ɨ́ seica jemi ɨ́ mej e'etiújse'ɨri mej mi tí'ijteujtzi'ire'e ɨ́ Dios. Ayee tu een jɨ́n rɨ́'ɨ tejá'amuaxa a'iné mú'een xu rá'aviicua'i temua'a naa ɨ́ sej jɨ́n rajpuaíjtzi. Seajta mú'een, seúche'e xu rá'astijre'e ɨ́ tavástara'a. 5A'ɨ́j tu jɨ́n ramua'aree tɨ Dios ayén tí'ixɨ'epɨ'ɨntare'e a'ij tɨ tiraavíjte'e. Ajta ayée pu tirá'amitɨejte'e ɨ́ Dios tɨ ayén tiraavíjte'e sej se'uun u a'uteárute a'u tɨ tejé'aijta. A'ɨ́j xu jɨ́n rajpuaíitzi xa'aye'i íjii. 6Dios pu ajta ayén che'atá na'a een naíjmi'ica jemi. A'ɨ́ pu seɨj huatá'asin a'ij tɨ tiraavíjte'e. Majta a'ɨ́ɨme ɨ́ mej tejamua'antiú'uuni'iri'i, a'ɨ́ɨ pu puaíjtzi hua'utá'asin a'ij mej meri puaíjtzi tejamuaatá'a mú'ejmi. 7Ajta Dios pu amuaatá'asin sej huaújse'upe'en ta jamuan a'ájna xɨcáara'an tɨ jetzen ajtahua'a huataseíjre'esin u júte'e ɨ́ tavástara'a, a'ɨ́jna ɨ́ Jesús. A'ɨ́ pu huá'a jamuan huataseíjre'esin a'ɨ́mej ɨ́ mej ta japua tí'ivaɨre'e. Ayee pu seíire'e a'ame, cu xɨee tɨ tí'itechejca a'ɨ́jna jɨme'e tɨ teátaasin. 8A'ɨ́ pu puaíjtzi hua'utá'asin a'ɨ́mej ɨ́ mej caí ramua'ate ɨ́ Dios, majta ɨ́ mej caí ra'ará'astijre ɨ́ niuucari tɨ jɨ́me'en raxa a'ij tɨ huarɨ́j ɨ́ tavástara'a a'ɨ́jna ɨ́ Jesús. 9A'ɨ́ pu puaíjtzi jɨ́n hua'utá'asin tɨ caí ja'anáj antipuá'ari. A'ɨ́ pu ajta hua'uré'iti mej mi me'uun a'uteárute a'u tɨ caí é'eseijre'e ɨ́ mej jɨ́n ráamua'aree tɨ Dios nainjapua tí'aijta rumuárɨ'eri'ire'ara'an jɨme'e. 10Ayee pu huá'aruuren a'ájna xɨcáara'an tɨ jetzen ajtahua'a yen uvé'enejsin mej mi rɨ́'ɨ tiraatá'an a'ɨ́mej ɨ́ teɨtestemua'ame'en ɨ́ mej jemin huaté'uu. Majta naími'i ɨ́ mej meri ra'ará'astijre, a'ɨ́ɨ mú rɨ́'ɨ te'utaseíjra me'ɨ́jna jemi. Ayee pu ajta che'atá na'a tejamuáacɨ'ɨti sej raaseíj a'ɨ́jna jɨme'e sej rá'antzaahuate a'ij tej tejamuá'ixaa. 11A'ɨ́j tu jɨ́n, ja'anáj tɨ na'a tu rahuauhuau ɨ́ Dios jemi mú'ejmi jɨme'e. Ayee tu rahuauhuau tɨ ayén tiraatámitɨejte'e ɨ́ Dios tɨ ayén tiraavíite'e á'aye'i tɨ amua'antíhua'u. Ché'e a'ɨ́ɨn raanaíjmire'en naíjmi'i tɨ́j na'a sej seri jɨ́n te'ataújratziiri'i tɨ xɨ́'epɨ'ɨn een. Ché'e a'ɨ́ɨn raanaíjmire'en a'ɨ́jna jɨme'e ɨ́ rumuárɨ'eri'ire'ara'an, ajta naíjmi'i tɨ́j na'a sej jɨ́n tiu'umuárɨ'en a'ɨ́jna jɨme'e sej té'atzaahuate'e. 12Ayee tu een jɨ́n rahuauhuau sej si rɨ́'ɨ tiraatá'an se'ɨ́jna ɨ́ tavástara'a a'amua tzajta'a. Ché'e a'ɨ́ɨn tavástara'a ajta rɨ́'ɨ tejamuaatá'an mú'ejmi. Ayee tu tí'ijxe'eve'e a'iné a'ɨ́jna ɨ́ Dios, ajta ɨ́ tavástara'a, a'ɨ́jna ɨ́ Jesús tɨ ajta i'i Cɨríistu'u, a'ɨ́ɨ mú rɨ́'ɨ tejá'amuacha'ɨ́ɨ muá'aju'un tɨ́j na'a rusén jɨme'e.

will be added

X\