2 San Pedro 1

1Inee Simón, i nej neajta Pedro pú'een, a'ij nu jetze tejá'amuayu'use'e ne'ɨ́jna jɨme'e nej ravaɨre'e ne'ɨ́jna ɨ́ Jesús tɨ ajta Cɨríistu'u pú'een. A'ɨ́ɨ pu na'antíhuau nej ni niyen tiu'utévaɨre'en ɨ́ jemin. Seajta mú'een, Dios pu ayén amua'irájtua mú'ejmi, a'ɨ́jna ɨ́ Dios tɨ urarɨ́'ene'acan jɨ́n seijre'e, sej si siyen che'atá sena'a té'atzaahuate'e tetɨ́j iteen. A'ii pu a'ɨ́ɨn pú'een tɨ jeíhua huápɨ'ɨ tejámuatéva'ɨri. 2Ché'e ayén jaítze'e tejá'amuacɨ'ɨti tɨ rɨ́'ɨ tejamuaatá'acare'en, ajta tɨ rɨ́'ɨ tejamua'anpuá'ajte'en a'ɨ́jna jɨme'e sej seri ramua'ate ɨ́ Dios, seajta se'ɨ́jna ɨ́ Jesús, tɨ ajta tavástara'a pú'een. 3Rumuárɨ'eri'ira'a pu jɨ́n Dios ayén titaatá'a nain tɨ ruxe'eve'e ɨ́ tej jɨ́n ruuri huateáturan ɨ́ jemin, ɨ́ tej teajta jɨ́n tiyen rɨ́'ɨ ti'itítacha'ɨɨ a'ij tɨ a'ɨ́ɨn ayén tí'ijxe'eve'e. Ayee pu 'een jɨ́n ayén rɨ́'ɨ titaatá'a a'ɨ́jna jɨme'e tej tiyen raamuá'a te'ɨ́jna tɨ ayén taatajé tej ti tiyen huateáturan ɨ́ jemin tɨ́j na'a rusén jɨme'e tɨ ij ayén titáacɨ'ɨti a'ɨ́jna ɨ́ tej jɨ́n rɨ́'ɨ tiyé'useijra, te'ɨ́jna jɨme'e tɨ a'ɨ́ɨn ayén nain jɨ́n antiújmua'aree. 4A'iné ayén 'een ɨ́ jemin, a'ɨ́ɨ pu ayén titaatá'a a'ɨ́jna ɨ́ niuucari tɨ jɨ́n ve'ecán jɨ́n te'ataújratziiri'i, tɨ ajta jeíhua huápɨ'ɨ ta jetze ruxe'eve'e tej ti te'ɨ́jna jɨ́n huatáta'uuna tɨ ij caí a'ij pua'a táaruuren a'ɨ́jna tɨ a'ij pua'a 'een tɨ huá'a tzajta'a seijre'e ɨ́ teɨte ɨ́ mej yen seijre'e chaanaca japua, tej ti teajta tiyen che'atá tena'a rɨ'éene'ecán jɨ́n seijre'e tɨ́j ajta ɨ́ Dios. 5A'ɨ́j xu jɨ́n, setá'aj siyen huateújca'anen sej se'ɨ́jna jɨ́n ra'ajténaijmire'en ɨ́ sej jɨ́n té'atzaahuate'e se'ɨ́jna jɨme'e sej seajta tzáahuati'ira'a jɨ́n rɨ́'ɨ ti'itiújcha'ɨɨ. Seajta setá'aj siyen se'ɨ́jna jɨ́n ra'ajténaijmire'en sej jɨ́n rɨ́'ɨ ti'itiújcha'ɨɨ se'ɨ́jna jɨme'e sej temua'a naa tirú'umua'aree. 6Setá'aj seajta se'ɨ́jna jɨ́n ra'ajténaijmire'en ɨ́ sej jɨ́n rɨ́'ɨ tirú'umua'aree se'ɨ́jna jɨme'e sej seajta nain jɨ́n á'ujcu'uvée. Setá'aj seajta se'ɨ́jna jɨ́n ra'ajténaijmire'en ɨ́ sej jɨ́n á'ujcu'uvée se'ɨ́jna jɨme'e sej seajta te'utáviicua'i. Setá'aj seajta se'ɨ́jna jɨ́n ra'ajténaijmire'en ɨ́ sej jɨ́n siyen té'eviicua'i se'ɨ́jna jɨme'e sej tzáahuati'ira'a jɨ́n rana'amiche ɨ́ Dios. 7Setá'aj seajta se'ɨ́jna jɨ́n ra'ajténaijmire'en ɨ́ sej jɨ́n tzáahuati'ira'a jɨ́n rana'amiche ɨ́ Dios se'ɨ́jna jɨme'e sej temua'a naa huateúrihuaamua'ata. Setá'aj seajta se'ɨ́jna jɨ́n ra'ajténaijmire'en ɨ́ sej siyen rɨ́'ɨ tiu'uteúrihuaamua'ataca'a se'ɨ́jna jɨme'e sej siyen titehuaújxe'eve'en. 8Setá'aj siyen nain jɨ́n ra'ajténaijmire'en a'iné tɨ pua'a siyen rɨ́'ɨ titeetiújcha'ɨɨca temua'a naa, ayée pu á'amuaruure a'ame sej jeíhua huápɨ'ɨ tiu'utévaɨre'en sej si temua'a naa ti'itɨ́j jɨ́n tiu'utátuiire'en ɨ́ Dios jemi se'ɨ́jna jɨme'e sej tzáahuati'ira'a jɨ́n ramua'ate se'ɨ́jna ɨ́ tavástara'a, a'ɨ́jna ɨ́ Jesús tɨ ajta Cɨríistu'u pú'een. 9Na'ari caí, ja'atɨ́ tɨ na'a tɨ ayén tirá'aturaate'e tɨ ayén nain jɨ́n ra'ajténaijmire'en ɨ́ tɨ jɨ́n té'atzaahuate'e, ayée pu che'atá na'a 'een tɨ́j ja'atɨ́ tɨ arácun, tɨ caí a'ɨmuá tí'iseijrave. A'ɨ́ɨ pu ari ya'uhuá'axɨ tɨ Dios ayén tiraatá'uuni'iri'i a'ɨ́jna tɨ ajmí'i jɨ́n auteájturaa ɨ́ jemin. 10A'ɨ́j xu jɨ́n, ne'ihuaamua'a, setá'aj siyen jaítze'e huateújca'anen sej si siyen huárɨni tɨ ij ayén ámitɨeere'e tɨ Dios ayén amuaatajé, ajta amua'antíhua'u. Tɨ́ pua'a siyen huárɨni, capu ja'anáj ayén á'amuaruuren tɨ Dios ayén mé amúuhua'axɨn tɨ́j na'a rusén jɨme'e. 11Mɨ́ ajta, ayée pu tejá'amuacɨ'ɨti sej si temua'a naa se'uun a'uteárute a'u tɨ rusén jɨ́n teja'uta'áijta a'ɨ́jna ɨ́ tavástara'a tɨ tu'irájtuaa, a'ɨ́jna ɨ́ Jesús tɨ ajta Cɨríistu'u pú'een. 12A'ɨ́j nu jɨ́n niyen rɨni nej ja'anáj tɨ na'a niyen tejá'amua'ixaate'e sej siyen tira'utámua'aree se'ɨ́jna. Capu amɨ́n a'ij sej seri ramua'aree, seajta seri te'utáviicua'iri'i se'ɨ́jna jɨme'e sej siyen té'atzaahuate'e. 13- 14Ayee pu tiná'amitɨejte'e tɨ ayén tiraavíjte'e nej niyen huárɨni tɨ́j na'a nej nauj yen seijre'e, nej ni ca'aníjra'a amuaatá'acare'en sej si siyen tira'utámua'aree a'ij sej huárɨni, a'iné nu'uri niyen ramua'aree tɨ ari vejli'i pɨ́tí'irɨcɨ a'ájna xɨcáara'an jetze nej jetzen mɨ'ɨni. Ayee nu ne'ɨ́jna jɨ́n ramua'aree a'iné a'ɨ́ɨ pu tavástara'a, a'ɨ́jna ɨ́ Jesús, tɨ ajta Cɨríistu'u pú'een, ayée pu tinaatá'ixaa. 15Neajta nu niyen huaténca'anejsin nej ni niyen tejamuá'itɨii tɨ ij ayén huatárɨ'ɨristare sej siyen ja'anáj tɨ na'a tira'utámua'aree netɨ́'ɨj caí ché'e mé'e a'ahua'atan. 16Tetɨ́'ɨj te'ɨ́jna jamuá'ixa a'ij tɨ éeni'icɨ'e huataseíjre'esin a'ájna xɨcáara'an jetze tɨ jetzen ajtahua'a yé ve'ecánejsin a'ɨ́jna ɨ́ tavástara'a, a'ɨ́jna ɨ́ Jesús tɨ ajta Cɨríistu'u pú'een, tɨ ij ayén nain jɨ́n antiújmua'areere, catu rá'astijre'eca'a te'ɨ́jna ɨ́ niuucari ɨ́ mej rujɨ́ɨmua'a mena'a rájteu, ɨ́ mej miyen tí'imua'atzejca'a. Catu xaa ne'u tajɨ́ɨmua'a tena'a rájteu sino tajɨ́'ɨsin tu jɨ́n naa rɨ́'ɨ tiye'useíira ta'araa tɨ a'ɨ́ɨ pu nain jɨ́n antiújmua'aree. 17Ajta, Dios ayén rɨ́'ɨ tiraateájtuaa, ajta rɨ́'ɨ tiraatá'a a'ɨ́jna jɨme'e tɨ huápɨ'ɨ tí'iseijre'e u ta japua tɨ́'ɨj Dios ayén jɨ́me'en tiu'utaxájtaca'a tɨjɨ́n: “A'ii pu a'ɨ́ɨn pú'een ɨ́ niyauj, ɨ́ nej jeíhua huápɨ'ɨ raxɨ́'eve'e. A'ɨ́ɨ pu ajta rɨ́'ɨ tineetá'aca ineetzi.” 18Teajta iteen, ayée tu ráanamuajri'i te'ɨ́jna ɨ́ niuucari tɨ júte'e je'icánamuajre tetɨ́'ɨj te'ánna a'uté'uuca'a te'ɨ́jna jamuan a'ánna ɨ́ jɨrí jetze tɨ Dios huateúra'ate. 19Ajta a'ɨ́jna ɨ́ tej ya'useíj, a'ɨ́ɨ pu ayén araúraste a'ɨ́jna tɨ ajmí'i ayén té'eyu'usi'ihuaca'a a'ɨ́jna ɨ́ yu'uxari jetze ɨ́ mej jɨ́me'en tiu'utaxájtaca'a ɨ́ Dios jetze me'ecan. A'ɨ́j tu jɨ́n teri jaítze'e temua'a naa tirú'umua'aree tɨ ayén ti'ayajna a'ɨ́jna tɨ ajmí'i ayén té'eyu'usi'ihuaca'a. Rɨ́'ɨ pu tejámuaatévaɨre'esin tɨ pua'a siyen che'atá sena'a ra'ará'astijre'en tɨ́j ajta ja'atɨ́ ayén temua'a naa te'atánee tatzari jɨme'e a'u tɨ a'utɨ́ca'a. Setá'aj siyen che'atá sena'a ra'ará'astijre'en tɨ́j ajta ja'atɨ́ tɨ ayén atánee ajta na'acai huataseíjre'en a'ɨ́jna ɨ́ xu'ura'ave tɨ tapuá'arijme'eca u jé'ijninei. Setá'aj siyen ra'ará'astijre'en ajta na'acai a'ɨ́ɨn xɨéjniu'ucare'ara'an ɨ́ Dios ayén huateáturan ɨ́ a'amua tzajta'a. 20Amuacaí, ayée pu ruxe'eve'e sej siyen ráamua'aree tɨ caí ja'atɨ́ ja'anáj ruseɨ́j a'ij tirájteu a'ij tɨ huataújmua'a a'ɨ́jna ɨ́ niuucari ɨ́ mej miyen tiu'utaxájtaca'a ɨ́ Dios jetze me'ecan tɨ ayén raateájtuaa itejmi jemi. 21Capu ja'atɨ́ ja'anáj ruseɨ́j a'ij tirájteu tɨ ayén tiu'utaxáj ɨ́ Dios jetze me'ecan sino a'ɨ́jna xɨéjniu'ucare'ara'an ɨ́ Dios, ayée pu ca'aníjra'a hua'utá'a mej miyen tiu'utaxáj, a'ɨ́mej ɨ́ mej me'ɨ́jna jɨ́n tiu'utaxájtaca'a ɨ́ Dios jetze me'ecan.

will be added

X\