1 Inee, i nej vásta'a pú'een, a'ij nu jetze yé muateujte'e, mú'ee mɨ pej hua'anáànaj pú'een a'ɨ́mej ɨ́ mej me'uun e'etiújse'ɨri, mú'ee tɨ Dios mua'antíhuau. Yee nu neajta huá'ateujte'e ɨ́ á'ayaujmua'a ɨ́ mej rá'astijre'e ɨ́ niuucari tɨ ayén ti'ayajna. Ayee nu niyen jé'iyecan jɨ́n tejá'amuaxe'eve'e, majta miyen che'atá mena'a tejá'amuaxe'eve'e matɨ́j mena'a pua'amé ɨ́ mej miyen tí'ijmua'aree ɨ́ niuucari tɨ ayén ti'ayajna. 2 Ayee tu te'ɨ́jna jɨ́n tejá'amuaxe'eve'e te'ɨ́jna jɨme'e tɨ a'ɨ́ɨn niuucari tɨ ayén ti'ayajna, ayée pu téjmi jemi seijre'e, ajta ayén téjmi jemi seíire'e a'ame tɨ́j na'a rusén jɨme'e. 3 Ché'e a'ɨ́ɨn Dios ɨ́ tej rájya'upua, a'ɨ́jna jamuan ɨ́ Jesús tɨ Cɨríistu'u pú'een, a'ɨ́jna tɨ ajta yaujra'an pɨ́rɨcɨ ɨ́ Dios, ché'e a'ɨ́ɨn ayén rɨ́'ɨ tejamuaatá'acare'en, ajta jamuá'ancu'uvajxɨ'ɨn, ajta jamuaatépua'ajte'en sej si siyen jé'iyecan jɨ́n rɨ́'ɨ ti'itiújcha'ɨɨ, sej si seajta huataújxe'eve'en seɨj seajta seɨj. 4 Jé'ecan nu netémua'ave'e ne'ɨ́jna jɨme'e nej niyen tiráamua'areeri'i mej seica ɨ́ mej mú'eetzi jetze ajtéme'ecan miyen che'atá mena'a jé'iyecan jɨ́n miyen rɨ́'ɨ ti'itiújcha'ɨɨ a'ij tɨ titaata'aíj a'ɨ́jna ɨ́ tej rájya'upua. 5 Ajta íjii, mɨ pej hua'anáànaj pú'een, ayée nu ti'itɨ́j jɨ́n tí'imuahuavii. Canu jéjcuacan jɨ́n tí'imuayu'use'e ne'ɨ́jna jɨ́me'en tɨ Dios ayén a'ɨ́jna jɨ́n titaata'aíj sino a'ij nu jɨ́n tí'imuayu'use'e ne'ɨ́jna jɨ́me'en tɨ jéjcua ɨmuá téjmi jemi raateájtuaa tej nu'u tiyen titehuátaxe'eve'en seɨj teajta seɨj. 6 Ayee pu a'ɨ́jna jɨ́n té'emitɨeere'e tej seɨj teajta sei jé'iyecan jɨ́n tira'ará'astijre'en a'ij tɨ a'ɨ́ɨn tí'ita'aijte'e, tej nu'u tiyen titehuátaxe'eve'en. Ajta, a'ii pu a'ɨ́ɨn pú'een ɨ́ tɨ jɨ́n titaata'aíj. A'ɨ́j pu jɨ́n, a'iné ayée xu jéjcua ɨmuá tiráanamuajri'i tɨ́j na'a tɨ yú e'iré'ene, ayée pu tiú'ujxe'eve'e sej nu'u siyen titehuaújxe'eve'en. 7 Ayee pu a'ɨ́jna jɨ́n tiú'ujxe'eve'e sej siyen huárɨni, a'iné a'ɨ́ɨme ɨ́ mej tiú'ucuanamuajca, mu'uri mu'iitɨ́ huataseíjre huá'a tzajta'a a'ɨ́mej ɨ́ mej yen huachéjme ɨ́ chaanaca japua. A'ɨ́ mú miyen avíitzi jɨ́n tí'ixaxa'a tɨ nu'u a'ɨ́ɨn Jesús tɨ ajta Cɨríistu'u pú'een ayén nu'u caí tiu'uteújtevistaca'a. A'ii mú a'ɨ́ɨn pú'een ɨ́ mej tiú'ucuanamuajca, ɨ́ mej majta rájcha'ɨɨre'e ɨ́ Cɨríistu'u. 8 Rɨ́'ɨ xu'u mú'een, tɨ ij caí ayén amuáaruuren mɨ a'amua tzajta'a sej si caí yá'urɨeeni ɨ́ sej jɨ́n tiu'umuárɨej sino tɨ ij ayén naíjmi'i tejamuáacɨ'ɨti ɨ́ sej raamuá'itɨ ɨ́ Dios jemi. 9 Ja'atɨ́ tɨ na'a tɨ ayén rɨcɨ ruseɨ́j a'ij tɨ tirájteuve, ajta tɨ caí ayén tirá'astijre'e a'ɨ́jna ɨ́ niuucari tɨ jɨ́n Cɨríistu'u ayén titá'itɨiiri'i, capu seijre'e ɨ́ Dios jemi a'ɨ́jna ɨ́ ja'atɨ. Mɨ́ ajta, ja'atɨ́ tɨ na'a tɨ ayén tirá'astijre'e a'ɨ́jna tɨ jɨ́n ayén titá'itɨiiri'i, a'ɨ́ɨ pu rájya'upua ɨ́ Dios. Ayee pu che'atá na'a seijre'e a'ɨ́jna jemi tɨ yaujra'an pú'een ɨ́ Dios. 10 - 11 Tɨ́ pua'a ja'atɨ́ mú'ejmi jemi mú a'uvé'eme'en tɨ caí ayén tirá'astijre'e a'ɨ́jna ɨ́ niuucari tɨ téjmi jemi raateájtuaa, caxu rateújte'e, caxu seajta ra'ancuré'evi'itɨjcɨjcare'en a'u sej é'eche, a'iné ja'atɨ́ tɨ na'a tɨ ayén ra'ancuré'evi'itɨn, a'ɨ́ɨ pu jamuan ajta ayén rɨcɨ tɨ a'ij pua'a 'een. 12 A'iné capu tí'iseicaj na'a ɨ́ tɨ tiú'ujxe'eve'e ɨ́ nej jɨ́n tejámuaatá'ixaate'en, sino ti'imu'íi, a'ɨ́j nu jɨ́n caí raxɨ́'eve'e nej niyen tejámuaata'íti'i a'íjna i yu'uxari jetze sino ayée nu ti'ijchú'eve'e nej neseɨ́j u á'ume'en mú'ejmi jemi tej ti naíjmi'i taseíira tá'ara'ani, tej ti tiyen tenaími'i tihua'utá'ixaate'en tej ti nain jɨ́n huátatemua'ave'en. 13 Majta a'ɨ́ɨme ɨ́ mej yaújmua'ame'en pú'een, ɨ́ mej jamuan e'etiújse'ɨri me'ɨ́jna á'ajuu ɨ́ tɨ Dios ra'antíhua'u, a'ɨ́ɨ mú yé á'amuateujte'e. Ayee pu'u, ché'e ayén teja'uré'enen.
