2 Corintios 7

1A'iné Dios pu ayén te'ataújratziiri'i, mú'een ta'ihuaamua'a ɨ́ tej já'amuaxe'eve'e, tiché'e tiyen mé tirúurɨeeni tɨ́j na'a tɨ ayén tí'itaxana'aviste'e, tɨ a'ɨ́jna jetze airánineica ɨ́ tatevij jetze nusu ɨ́ ta tzajta'an, tej ti raanaíjmire'en a'ɨ́jna tɨ tita'aturáate'e tej ti rɨ'éene'ecán jɨ́n huateáturan ɨ́ Dios jemi. Teta'aj tiyen huárɨni te'ɨ́jna jɨme'e tɨ Dios ayén huateúra'ate itejmi jemi. 2Caxu ra'antánaamuan ɨ́ á'amuaxɨejniu'uca itejmi jemi, a'iné catu a'ij pua'a amuáaruu. Catu teajta ja'atɨ ca'aníjra'a huatá'a tɨ ij a'ij pua'a ti'itiújcha'ɨɨ. Jee xaa ne'u, catu ja'atɨ tiu'uhuá'itze tej ti ti'itɨj jɨ́n huatétavaɨre'en. 3Canu niyen tejá'amua'ixaate'e nej ni ti'itɨj jɨ́n ama'uxɨ́jte'en. Canu a'atzu, a'iné nu'uri niyen tejamuá'ixaa tej tiyen á'ataca'ane mú'ejmi jemi, tɨ pua'a tiyen naími'i huácui'ini nusu tiyen naími'i ruuri huateáturan. 4Jé'ecan nu nexɨéehua tejá'amua'ixaate'e, canu a'ij tí'itziɨɨne'e nena'a. Jéihua nu á'antzaahuate'e mú'ejmi jɨme'e, neajta jeíhua nu rɨ́'ɨ té'enemua'ate. Neajta huápɨ'ɨ nu netémua'ave'e nain jɨme'e ɨ́ tej rajpuaíjtzi. 5Mɨ teajta iteen, tetɨ́'ɨj te'uun a'ará'a u Macedonia, capu a'atzu huatárɨ'ɨristareca'a tej huátase'upe'en, sino teen tu rajpuaíjtzica'a nain jɨme'e, tɨ́j na'a tɨ ayén titáaruu. Jé'ecan tu á'aviicua'ire'eca'a huá'a jemi ɨ́ teɨte, teajta tí'itziɨɨne'eca'a ɨ́ tatzajta'a. 6Ajta a'ɨ́ɨn ɨ́ Dios tɨ rɨ́'ɨ hua'anrú'ure'e á'aye'i ɨ́ mej a'ij té'ujmua'ate, a'ɨ́ɨ pu ayén rɨ́'ɨ táaruu a'ɨ́jna jɨme'e tɨ a'ɨ́ɨn yé uvé'ene ɨ́ Tito. 7Ayee pu xaa a'ɨ́jna jɨ́n rɨ́'ɨ táaruu, ajta a'ɨ́jna jɨme'e tɨ a'ɨ́ɨn Tito ajta rɨ́'ɨ táaruu ajta a'ɨ́jna jɨme'e sej amuacaí rɨ́'ɨ ráaruu a'ɨ́jna ɨ́ ta'ihuaara'a. A'ɨ́ɨ pu xaa titaatá'ixaa mú'ejmi jɨme'e, sej nu'u jeíhua huápɨ'ɨ siyen tí'ijxe'eve'e sej naaseíj, sej nu'u temua'a seajta tiújxɨeemɨjte'e, ajta nu'u temua'a mú'ejmi jetze ruxe'eve'e a'ij tɨ tí'inevaɨre'e ineetzi. A'ɨ́j nu jɨ́n jaítze'e huatántemua'ave. 8Mɨ neajta inee, capu ché'e a'ij pua'a ne'ase nej niyen amuaatéxɨeemɨjte ne'ɨ́jna jɨme'e a'ij nej tejámuaatá'itɨiiri'i. Amuacaí pu xaa, a'ij pua'a né'asejca'a, aru capu ché'e, a'iné a'atzu pu'u á'atee sej ruxɨeemɨjte'eca'a. 9Mɨ ajta, canu ne'ɨ́jna jɨ́n netémua'ave'e ne'ɨ́jna jɨme'e sej huataújxɨeemɨste, sino a'ɨ́j nu jɨ́n nena'a netémua'ave'e sej siyen huataújxɨeemɨste sej si seɨcɨé ti'itiújcha'ɨɨca'a. Ayee pu xaa ne'u a'ij pua'a amuaatá'a sej si siyen huataújxɨeemɨste'en jemin ɨ́ Dios. A'ɨ́j pu jɨ́n, catu tajɨ́ɨmua'a tena'a puaíjtzi amuaatá'a. 10Jee xaa ne'u. Tɨ pua'a ja'atɨ ayén huataújxɨeemɨste'en ɨ́ Dios jemi tɨ ij seɨcɨé ti'itiújcha'ɨɨca'a, capu xaa a'ij pua'a tiraatá'asin, sino Dios pu ru'irátuaasin. Na'ari tɨ pua'a ja'atɨ ayée na'a ruxɨeemɨ́jte'e matɨ́j a'ɨ́ɨme ɨ́ mej yen japuan seijre'e ɨ́ chaanaca, ayée pu teja'uré'enejsin tɨ auupuá'are. 11Aru casi'i mú'een, a'ij tɨ tejamuáaruu a'ɨ́jna jɨme'e sej siyen huataújxɨeemɨste'en ɨ́ Dios jemi. Huápɨ'ɨ pu ca'aníjra'a amuaatá'a sej ráahuauni ɨ́ tɨ jɨ́n Dios tejámuaatá'uuni'i. Jé'ecan xu huataníniu'ucacuca'a se'ɨ́jna jɨme'e tɨ a'ij pua'a éene'e. Jé'ecan xu seajta tí'itziɨɨne'eca'a se'ɨ́jna jɨme'e tɨ a'amuacɨ'ɨtíiche'e ɨ́ puaíjtzi. Seajta jé'ecan huápɨ'ɨ á'ujca'anejca'a ineetzi jɨme'e, seajta huápɨ'ɨ xu a'ij té'ujmua'ate. Mú'een xu seajta temua'a naa puaíjtzi raatá'a a'ɨ́jna tɨ a'ij pua'a rɨjcaa. Ijii tu xaa tiyen ramua'aree sej caí ti'itɨ jɨ́n auteájturaa a'ɨ́jna jɨme'e tɨ a'ij pua'a éene'e. 12A'ɨ́j pu jɨ́n temua'a tiu'utévaɨ ɨ́ nej amuaata'íti'iri'i. Mɨ neajta inee, canu ne'ɨ́jna jɨ́n amuaata'íti'iri'i ne'ɨ́jna jɨme'e ɨ́ ja'atɨ tɨ ayén auteájturaa, canu neajta amuaata'íti'iri'i ne'ɨ́jna jɨme'e tɨ ja'atɨ seɨ́j jemi auteájturaa, sino ayée nu 'een jɨ́n amuaata'íti'iri'i tɨ ij ayén amuaatámitɨejte'en mú'ejmi ɨ́ Dios jemi a'achú sej caj á'ujca'ane téjmi jemi. 13A'ɨ́j tu jɨ́n teri rɨ́'ɨ huarɨ́j ɨ́ tatzajta'a. Capu ajta a'ɨ́ɨ na'a tej teri rɨ́'ɨ huarɨ́j, sino teajta tiyen te'ɨ́jna jɨ́n huatátatemua'ave'e te'ɨ́jna jɨme'e tɨ a'ɨ́ɨn Tito ayén che'atá na'a rutémua'ave'e, a'iné mú'een naími'i xu rɨ́'ɨ tiraatá'a ɨ́ tzajta'an. 14Jee xaa, nu'uri nejmí'i ahuántzaahua ɨ́ Tito jemi mú'ejmi jɨme'e. Seajta mú'een, caxu a'atzu naatatévi'iraste. A'iné nain ɨ́ tej teri tejamuá'ixaa, ayée pu ti'ayajna, ayée pu che'atá na'a ayén ti'ayajna ɨ́ tej jɨ́me'en ahuátatzaahuate jemin ɨ́ Tito. 15Ajta jaítze'e pu a'ɨ́ɨn ayén ahuaújca'ane mú'ejmi jemi, a'iné a'ɨ́ɨ pu ayén ra'utámua'areeri'i a'ij sej mú'een naími'i titá'astijre'e. A'ɨ́ɨ pu ajta a'ɨ́jna atamuá'areeri'ihua'a á'aye'i sej siyen temua'a naa ra'ancuré'evi'itɨ, sej siyen jeíhua huápɨ'ɨ tí'itziɨɨne'eca'a. 16Neajta inee, nee nu netémua'ave'e, a'iné nain nu jɨ́n á'anca'ane mú'ejmi jemi, a'iné mú'een xu xaa araúrastejsin.

will be added

X\