2 Corintios 6

1A'iné teen tu naíjmi'i tí'imuarɨ'e, ayée tu teajtáhua'a tejá'amuaje sej siyen ra'ancuré'an ɨ́ tɨ jɨ́n Dios rɨ́'ɨ tejámuaatá'asin sej si siyen jeíhua huápɨ'ɨ raatátuiire'en ɨ́ jemin a'ɨ́jna ɨ́ sej jɨ́n tiu'umuárɨej. 2A'ɨ́j pu jɨ́n ayén té'eyu'usi'i tɨjɨ́n: Ayee nu muáanamuajri'i a'ɨ́jna xɨcáara'an tɨ jetzen ari huaxɨ́'epɨ'ɨn. Neajta, niyen muaatévaɨ a'ɨ́jna xɨcáara'an nej hui jetzen mua'irájtuaa. Casi'i, mú'een, pu'uri ayén teja'uré'ene a'ɨ́jna xɨcáara'a tɨ jetzen ari huaxɨ́'epɨ'ɨn sej ra'ancuré'an. Jee xaa ne'u, pu'uri a'ájna pɨ́tí'irɨcɨ a'ɨ́jna xɨcáara'a tɨ jetzen Dios amua'irájtuaani. 3Teajta iteen, catu tiyen hua'utamuárɨ'eriste'e ti'itɨ jɨme'e tɨ tihua'antiú'uuni'i, sino ayée tu rɨ́'ɨ ti'itítacha'ɨ́ɨ tá'aye'i tɨ ij caí ja'atɨ a'ij tí'itaxajta. 4Mɨ teajta iteen, ayée tu mú'ejmi jemi taseíjrata matɨ́j a'ɨ́mej ɨ́ mej tí'ivaɨre'e ɨ́ Dios jemi nain jɨme'e. Capu amɨ́n a'ij, tɨ pua'a tiyen jeíhua huápɨ'ɨ ti'itɨj jɨ́n á'aviicua'ire'e nusu tiyen tirajpuaíjtzi na'ari ti'itɨ tamuárɨ'eriste'e ca'ɨ́n ti'itɨ a'ij pua'a taruure. 5Teuche'e tu tiyen che'atá tena'a tí'ivaɨre'e, tij majta miyen taatévajxɨ'ɨn nusu ta'iteáanan na'ari taatamuárite'en a'u tɨ na'a tej á'ujujhua'an ca'ɨ́n tej muárɨ'eri jɨ́n tí'imuarɨ'e, nusu tej huatáxa'aire'en tej atanéjne'eri na'ari tej huatatɨéjcuca'a. 6Ayee pu ajta seijre'e tej tiyen tí'ivaɨre'e ɨ́ Dios jemi a'ɨ́jna jɨme'e tej caí ti'itɨ jɨ́n a'ij pua'a rɨcɨ, teajta temua'a naa tirú'umua'aree a'ij tɨ 'een ɨ́ Dios, teajta temua'a tu té'eviicua'i huá'a jemi ɨ́ seica. Teen tu teajta rɨ́'ɨ tihuájcha'ɨɨ ɨ́ taxɨ́'ej teɨte, teajta te'ɨ́jna jetze arátaca'ane ɨ́ xɨéjniu'ucare'ara'an ɨ́ Dios. Teajta tu tzáahuati'ira'a jɨ́n huá'axe'eve'e. 7Ayee tu teajta jé'iyecan jɨ́n tí'ixaxa'a. Catu tí'ihua'i tena'a. Teajta te'ɨ́jna jɨ́n tí'imuarɨ'e ɨ́ muárɨ'eri'ire'ara'an jɨme'e ɨ́ Dios. Teajta tu tiyen seijre'e te'ɨ́jna jamuan ɨ́ tej jɨ́n tiu'utése'en nain jɨme'e tɨ ta jetze seijre'e tej ti tiyen huárɨni tɨ naa 'een ɨ́ Dios jemi. 8Tɨ pua'a miyen rɨ́'ɨ titaatá'an na'ari miyen taatéxɨeehua, nusu miyen a'ij pua'a tí'itaxajta ca'ɨ́n rɨ́'ɨ metihuá'a'ixaate'e itejmi jɨme'e, teuche'e tu tiyen tí'ivaɨre'e. Ayee mú majta ti'itaxáata muá'aju'u tej nu'u tí'ihua'itaca. Mɨ teajta iteen, tzáahuati'ira'a tu jɨ́n tiyen rɨcɨ. 9Capu ajta ta jetze ruxe'eve'e tɨ pua'a mecaí tamua'ate nusu métamua'ate. Ayee tu teajta huá'a jemi seijre'e cu xɨee tej cui'icu. Mɨ teajta iteen, teuche'e tu ruuri. Puaíjtzi mú tá'ate'e aru camu tá'apua'ajte'en. 10Ayee tu seijre'e cumu tej taxɨeemɨjte'e. Mɨ teajta iteen, ja'anáj tɨ na'a tu tátemua'ave'e. Catu a'ij tí'ijviicua'i. Mɨ teajta, ayée tu huá'aruuren mu'iitɨ́ mej mi huateújchijteaanita. Catu nu'u ti'itɨ tícha'ɨɨ. Mɨ teajta, nain tu xaa tí'ijcha'ɨɨ. 11Ayee nu e'ehuauritɨéecan jɨ́n tejamuá'ixaa nain jɨme'e, mú'een, mɨ sej Corinto a'uchéjme. Jéihua nu á'anca'ane mú'ejmi jemi. 12Catu ti'itɨ á'amuamuaire'e mú'ejmi, sino mú'een xu rujɨ́ɨmua'a sena'a rumuaire'e se'ɨ́jna jɨme'e a'ij tɨ tejamuá'amitɨejte'e ɨ́ á'amuatzajta'a. 13A'ɨ́j nu jɨ́n niyen tejá'amuahuavii sej si seajtáhua'a ahuaújca'anen itejmi jemi. Ayee nu xaa tejá'amua'ixaate'e cumu sej tɨ'ɨríi pú'eene'en. 14Caxu hua'ajtéja'ahuatehua'an a'ɨ́mej ɨ́ mej caí té'atzaahuate'e. Xu'uhuaújmua'atzɨ a'ɨ́jna jɨme'e, ¿a'iné tí'irɨ'ɨri mej seɨ́j mena'a teɨtejra'a pú'eene'en a'ɨ́jna tɨ urarɨ́'en ɨ́ Dios jemi, ajta a'ɨ́jna tɨ a'ij pua'a ti'itiújcha'ɨɨ? Capu xaa ne'u a'ij tí'irɨ'ɨri. Ari a'ɨ́jna, ¿ni qui ruxɨ́'ej na'a seijre'e ɨ́ néeriste'e, ajta ɨ́ tɨ́ca'ari tzajta'a? Capu xaa ne'u. 15¿Ti'itájni a'ij metí'ixɨ'epɨ'ɨntare'en a'ɨ́jna ɨ́ Cɨríistu'u, jamuan a'ɨ́jna ɨ́ Satanás? Capu xaa ne'u ti'itɨ. Ajta a'ɨ́ɨn tɨ té'atzaahuate'e, ¿ni qui ayén ruxɨ́'ej na'a ra'ancuré'asin tɨ́j ajta ra'ancuré'asin a'ɨ́jna tɨ caí té'atzaahuate'e? Capu xaa ne'u ti'itɨ. 16¿Ti'itájni a'ij metí'ixɨ'epɨ'ɨntare'en a'ɨ́ɨme ɨ́ mej tí'ivaɨre'e teyujta'a a'ɨ́mej jamuan ɨ́ ti'itén ɨ́ mej huá'ana'amiche'e ɨ́ mej caí Dios pú'een? Capu xaa ne'u ti'itɨ. Teajta iteen, ayée tu tí'ivaɨre'e ɨ́ Dios jemi tɨ́j teyuu tɨ tzajta'an huiirájca ɨ́ Dios tɨ i'irúuri. A'ɨ́j pu jɨ́n ayén tiu'utaxájtaca'a tɨjɨ́n: Nee nu u'uchée na'ame huá'a tzajta'a. Neajta nu huá'a Dios pu'éene'e na'ame. Majta a'ɨ́ɨme, a'ɨ́ɨ mú neteɨ́testemua'a pu'éene'e muá'aju'u. 17Ayee pu ti'ixa ɨ́ tavástara'a tɨjɨ́n: A'ɨ́j xu jɨ́n ajtácɨɨne huá'a jemi sej si rujɨ́me'en á'ujujhua'ane'en. Caxu ti'itɨ muarɨ'e tɨ xána'avi'ire'e. Neajta nu niyen rɨ́'ɨ amua'ancuré'evi'itɨ. 18Ajta ayén ti'ixa ɨ́ tavástara'a tɨ nain jɨ́n antiújmua'aree tɨjɨ́n: Nee nu á'amuaya'upua pu'éene'e na'ame. Seajta mú'een, ayée xu niyaujmua'a pu'éene'e xá'aju'un, setɨ́j sena'a sej teteca pú'een, ajta mɨ sej 'uuca. Yee pu'u.

will be added

X\