2 Corintios 5

1Ajta a'ɨ́jna ɨ́ tej ratéhua'ira'a, ayée pu titaatéva'ɨri tɨ́j ɨnaamua tej jeten chejca. Teajta tiyen tí'ijmua'aree tɨ pua'a huaté'uune a'íjna ɨ́ ɨnaamua, teuche'e tu huatéechi'i ɨ́ tɨ Dios jemi é'eseijre'e, tɨ ajta caí muájca'a jɨ́n taavíjhua. Júte'e pu e'eseíire'e a'ame tɨ́j na'a rusén jɨme'e. 2Teajta iteen, tej teuj íiyen seijre'e chaanaca japua, teen tu taxɨéjniuuste'e yú tatzajta'a, teajta tiyen taxɨeemɨjte'e te'ɨ́jna jɨme'e tej tij te'uun a'uteárute te'újna chi'ita tɨ júte'e é'eseijre'e tɨ ajta Dios jɨ́n ta'icánajsin. 3Ayee pu a'ɨ́jna jɨ́n rɨni tɨ ayén ta'icanán, catu ti ché'e muámua'avijmé'e mé á'ujujhua'ane'e tá'aju'un. 4Ayee pu tí'een, a'iné íjii tej teuj jeten huachéjme a'íjna ɨ́ ɨnaamua, jé'ecan tu tayein yú tatzajta'a, te'ɨ́jna jɨme'e tɨ ayén tamuárɨ'eriste'e ti'itɨ jɨme'e. Capu a'ɨ́ɨ na'a tej tiyen rátziɨɨne'e tɨ Dios ayén tá'ari'i a'ɨ́jna tɨ jɨ́n ta'icánajsin, sino tej huápɨ'ɨ tiyen tí'ijxe'eve'e tɨ a'ɨ́ɨn jaítze'e ta'icáanan, tɨ ij a'ɨ́ɨn tɨ á'ateeri tɨ́j na'a rusén jɨme'e nain ti'icáanan a'ɨ́jna tɨ á'apuapua'are. 5Ajta, a'ɨ́ɨn tɨ ayén rɨ́'ɨ taruure tej ti tiyen te'ɨ́jna ancuré'an, a'ii pu a'ɨ́ɨn pú'een ɨ́ tɨ Dios ruseɨ́j raateájtuaa itejmi jemi, ɨ́ ruxɨ́ejniu'uca tej ti tiyen ráamua'aree tɨ Dios a'ɨ́jna jɨ́n te'ataújratziiri'i itejmi jemi. 6- 7A'ɨ́j tu jɨ́n, ja'anáj tɨ na'a, a'ɨ́ɨ pu ca'aníjra'a tatá'aca, a'iné ayée tu ramua'aree tetɨ́'ɨj teuj tiyen ruuri seijre'e te'íjna jetze ɨ́ tej ratéhua'ira'a, teen tu caí xɨ te'uun a'ujteí ɨ́ tavástara'a jemi. Ayee pu'u xaa ne'u tí'een, a'iné ayée tu 'een jɨ́n yé á'ujujhua'an te'ɨ́jna jɨme'e tej rá'atzaahuate'e. Catu te'ɨ́jna jɨme'e tena'a yé á'ujujhua'an tej ti te'ɨ́jna jetze arátaca'anen a'ɨ́jna tej tí'isise'ij teyajna. 8Temua'a pu ca'aníjra'a tatá'aca, ajta jaítze'e pu ta'aráanajche tej tíhuiini te'íjna jetze ɨ́ tej ratéhua'ira'a tej ti te'uun é'eseijre'e a'u tej a'utéechi'i ɨ́ tavástara'a jemi. 9A'ɨ́j tu jɨ́n, tiyen tí'itese'e tej tiyen rɨ́'ɨ ti'itítacha'ɨɨ tej tiyen rɨ́'ɨ tiraatá'an ɨ́ tavástara'a. Capu amɨ́n a'ij, tɨ pua'a tiyen a'ɨmuá seijre'e nusu tiyen jemin seijre'e. 10Jee xaa ne'u tɨ ayén tí'een, a'iné ayée pu tiú'ujxe'eve'e tej naíjmi'i tiyen huatátaseijrata a'ujna a'u tɨ a'utáca ɨ́ Cɨríistu'u tɨ ij a'ɨ́ɨn tá'uxɨjte'en naíjmi'ica itejmi. Aj pu xaa ayén tí'ijcɨ'ɨti a'ij tɨ tiraavíjte'e seɨj ajta seɨj a'ij tɨ ti'itɨ tiu'umuá'itɨ a'ɨ́jna jɨme'e a'ij tɨ huarɨ́j tɨ́'ɨj auj ruurica'a, tɨ pua'a xɨ́'epɨ'ɨn huarɨ́j nusu a'ij pua'a huarɨ́j. 11A'ɨ́j tu jɨ́n, tu'uri ramua'aree tɨ ayén tiú'ujxe'eve'e tej jeíhua huápɨ'ɨ rá'atese'e ɨ́ tavástara'a, ayée tu 'een jɨ́n tí'itese'e tá'aye'i tej ti hua'utémua'itɨn ɨ́ teteca mej mi ra'ancuré'an ɨ́ tɨ ayén ti'ayajna itejmi jetze. Ajta a'ɨ́ɨn ɨ́ Dios, a'ɨ́ɨ pu ramua'aree a'ij tej e'en. Ajta, ayée nu tí'ijxe'eve'e tɨ ayén che'atá na'a tejamuá'amitɨejte'e ɨ́ a'amua xɨéjniu'uca tzajta'a. 12Catu teajtáhua'a mú'ejmi jemi ra'irá'aca ɨ́ tej jɨ́n ahuátatzaahuate'en, sino teen tu jamuatá'aca ɨ́ sej jɨ́n huataújtemua'ave'en itejmi jɨme'e sej si siyen raayɨ́'ɨtɨhua'an sej huatáaniuni a'ɨ́mej jemi ɨ́ mej miyen me'ɨ́jna jɨ́n ahuaújtzaahuate'en me'ɨ́jna jɨme'e a'ij tɨ ja'atɨ huaújse'irataca mejseíiraca'a ɨ́ teɨte, ɨ́ mej majta caí huá'a jetze ruxe'eve'e a'ij tɨ 'een a'ɨ́jna ɨ́ ja'atɨ ɨ́ ru tzajta'a. 13Tɨ pua'a ayén ti'ayajna a'ij mej tí'ixaxa'a tej nu'u tatɨ́mua'i, ayée tu 'een jɨ́n tatɨ́mua'i tej ti tiyen raatévaɨre'en ɨ́ Dios. Na'ari caí, tɨ pua'a tiyen rɨ́'ɨ mé titeumuámua'aree, ayée tu 'een jɨ́n rɨcɨ tej ti rɨ́'ɨ jamuaatévaɨre'en mú'ejmi. 14A'ii pu xaa a'ɨ́ɨn pú'een ɨ́ tɨ tí'ita'aijte'e tɨ a'ɨ́ɨn Cɨríistu'u taxe'eve'e. Ayee pu titá'amitɨejte'e itejmi tɨ seɨj na'a huamɨ́'ɨ huá'a jetze me'ecan, naíjmi'ica, a'achú pua'amé ɨ́ teɨte. Ajta, tɨ pua'a ayén tiu'urɨ́j, a'ɨ́j mú jɨ́n naíjmi'i jamuan huácuii. 15Ayee pu ajta 'een jɨ́n huá'a jetze me'ecan huamɨ́'ɨ mej mi a'ɨ́ɨme ɨ́ mej mauj ruuri mej caí ché'e rujɨ́ɨmua'a mena'a a'ij tirájteuve'en a'ij mej ye'í jetze me'ecan huamɨ́'ɨ, tɨ ajta huatarúj huá'a tzajta'a ɨ́ mɨ'ɨchite. 16A'ɨ́j pu jɨ́n, íjii tɨ yú auca'itɨ́ a'ame, catu ché'e tiyen ja'atɨ mé 'usíse'ij a'ij tɨ titá'amitɨejte'e ɨ́ tatzajta'a a'ɨ́jna jɨme'e ɨ́ tej jɨ́n raaseíj mé jéjre'e. Jee xaa, ayée tu tejmí'i tí'ijseijraca'a ɨ́ Cɨríistu'u tɨ́'ɨj a'ɨ́ɨn auj tevi na'a pú'eene'e. Ajta íjii, catu ché'e tiyen rasise'i. 17A'ɨ́j pu jɨ́n, tɨ pua'a ja'atɨ ayén Cɨríistu'u jetze ajtéme'ecan, a'ɨ́ɨ pu a'ɨ́ɨn pú'een seɨ́j tɨ Dios ari raajéjcuare. Pu'uri mé teuvátzɨ a'ij tɨ ti'itiújcha'ɨɨca'a tɨ mí'ime'ecan jɨme'e. Nain pu jéjcuacan jɨ́n seijre'e ɨ́ jemin. 18Naíjmi'i tɨ́j na'a a'íjna ɨ́ tej jɨ́me'en ti'ixa, a'ɨ́ɨ pu jemi é'eme'ecan ɨ́ Dios tɨ ayén táaruu tej ti teajtáhua'a rɨ'éene'en huateáturan ɨ́ jemin a'ɨ́jna jɨme'e tɨ Cɨríistu'u ayén ta japua huaniú. A'ɨ́ɨ pu Dios ajta ayén a'ɨ́jna jɨ́n titaa'íjca tej ti teajta tiyen huá'uruuren ɨ́ teɨte mej mi majtáhua'a rɨ'éene'en huateáturan ɨ́ jemin. 19Ayee pu huataújmua'a tɨ a'ɨ́ɨn Dios ayén huá'uruu a'ɨ́mej ɨ́ mej yen huachéjme ɨ́ chaanaca japua mej mi majtáhua'a rɨ'éene'en huateáturan ɨ́ jemin a'ɨ́jna jɨme'e tɨ Cɨríistu'u huá'a japua huaniú. A'ɨ́j pu jɨ́n caí ayén Dios hua'uxɨ́jte a'ɨ́jna jɨme'e ɨ́ mej jɨ́n auteájturaa ɨ́ jemin, sino a'ɨ́ɨ pu a'ɨ́jna jɨ́n titaa'íjca a'ɨ́jna jɨme'e ɨ́ niuucari ɨ́ tej jɨ́n rɨ́'ɨ huá'uruuren mej mi majtáhua'a rɨ'éene'en huateáturan ɨ́ jemin. 20A'ɨ́j tu jɨ́n, teen tu te'ɨ́ɨn pú'een ɨ́ tɨ Dios taata'íteca'a tej ti tihua'utá'ixaate'en ɨ́ Cɨríistu'u jetze me'ecan. Dios pu ayén tihuá'ajee a'ɨ́jna jɨme'e ɨ́ niuucari ɨ́ tej jɨ́n tihuá'ixaate'e. A'ɨ́j tu jɨ́n tiyen tejá'amuaje setá'aj siyen seajtáhua'a rɨ'éene'en huateáturan ɨ́ Dios jemi. 21Ajta a'ɨ́ɨn ɨ́ Dios, ayée pu ráaruu ɨ́ Cɨríistu'u téjmi jetze me'ecan. A'íjna tɨ caí ja'anáj ti'itɨ jɨ́n auteájturaa ɨ́ jemin, a'ɨ́ɨ pu Dios ayén ráaruu tɨ japuan rájveti nain ɨ́ puaíjtzi tɨ tacɨ'ɨtíiche'en itejmi a'ɨ́jna jɨme'e ɨ́ tej jɨ́n auteájturaa ɨ́ Dios jemi, tej ti jamuan ɨ́ Cɨríistu'u tiyen rɨ'éene'ecán jɨ́n huateáturan ɨ́ jemin.

will be added

X\