2 Corintios 4

1Teajta iteen, teen tu te'ɨ́jna jɨ́n tí'ivaɨre'e ɨ́ Dios jemi a'ɨ́jna jɨme'e tɨ a'ɨ́ɨn Dios ayén tá'ancu'uvajxɨ. A'ɨ́j tu jɨ́n caí muá'itɨche'e. 2Mɨ teajta iteen, tu'uri raatéxɨeehuataca'a tej ti tiyen a'ij pua'a rɨjca avíitzi jɨme'e, tej ti teajta caí tiyen rɨjca a'ɨ́jna tɨ tiu'utévi'iraste'e, tej ti caí ti'itɨj jɨ́n tacuanamua. Catu á'ataca'ane tej tiyen ti'itɨj jɨ́n tiu'uhuá'ita. Catu teajta á'ataca'ane tej seɨcɨé tiu'utaxáj te'ɨ́jna jɨme'e ɨ́ niuucari tɨ jɨ́me'en raxa ɨ́ Dios, sino ayée tu jé'iyecan jɨ́n tí'ixaxa'a tzáahuati'ira'a jɨme'e. Ayee tu te'ɨ́jna jɨ́n rɨcɨ tej ti tiyen tiu'utaseíjrata huá'a jemi matɨ́j mena'a pua'amé ɨ́ teɨte tej ti ca'aníjra'a hua'utá'an mej mi ráamua'aree a'ij tɨ ayén ti'ayajna ɨ́ Dios jemi. 3Ajta, tɨ pua'a ayén a'utanámi'i ɨ́ niuucari ɨ́ tej jɨ́n tihuá'ixaate'e, ayée pu'u na'a a'utanámi'i huá'a jemi ɨ́ mej á'apua'are. 4A'ii mú a'ɨ́ɨn pú'een ɨ́ tɨ hua'utánamua ɨ́ huá'amua'atziira'a tzajta'a a'ɨ́jna ɨ́ dios tɨ naíjmi'ica tí'aijte'e ɨ́ mej íjii huáteɨte. Ayee pu 'een jɨ́n huá'uruu mej mi caí yaú'itɨée muá'ara'ani ɨ́ niuucari tɨ ayén tí'ivaɨre'e tɨ́j tatzari tɨ hua'atátzavi'i ɨ́ huá'a tzajta'a mej mi miyen ráamua'ati me'ɨ́jna ɨ́ tavástara'a tɨ ayén huápɨ'ɨ naa seijre'e. A'ɨ́ɨ pu ajta a'ɨ́ɨn pú'een ɨ́ tɨ nain jɨ́n ruxɨ́'ej 'een tɨ́j ɨ́ Dios. 5Ayee pu xaa ti'ayajna, a'iné catu tajɨ́ɨmua'a tena'a tihuá'ixaate'e, sino a'ɨ́jna ɨ́ tej jɨ́me'en tihuá'ixaate'e, a'ɨ́ɨ pu a'ɨ́ɨn pú'een ɨ́ Jesús tɨ ajta i'i Cɨríistu'u. A'ii pu ajta a'ɨ́ɨn pú'een ɨ́ tavástara'a. Teajta iteen, ayée tu tejá'amuavaɨre'e mú'ejmi Jesús jetze me'ecan. 6Ajta a'ɨ́ɨn ɨ́ Dios, ayée pu ajmí'i ɨmuá ayén tiu'utaxájtaca'a tɨjɨ́n: “Ché'e á'ataaca ɨ́ taij a'ujna a'utɨ́ a'utɨ́ca'a.” A'ɨ́ɨ pu ajta utétatzeaareca'a yú tatzajta'a, tɨ ij a'ɨ́ɨn ayén taatá'an tej yaú'itɨée tá'ara'ani, a'ij tɨ 'een jɨ́n huápɨ'ɨ naa seijre'e ɨ́ Dios a'ɨ́jna jɨme'e tɨ Cɨríistu'u a'ɨ́jna jemi seijre'e. 7Teajta iteen, ayée tu seijre'e ɨ́ Dios jemi tɨ́j xa'ari tɨ xarij jɨ́n taavíjhua, ɨ́ tej tzajta'an teri ruuhuáseɨj ɨ́ tɨ jɨ́n Dios rɨ́'ɨ titaatá'a, ɨ́ tɨ ajta huápɨ'ɨ tí'ijnajche. Ayee pu 'een ɨ́ tɨ seijre'e tɨ a'ɨ́ɨn muárɨ'eri'ire'ara'an tɨ nain jɨ́n tiu'utémua'itɨn, capu téjmi jetze airáninei, sino a'ij pu'u jetze ɨ́ Dios. 8Nain tu jɨ́n rajpuaíjtzi iteen. Mɨ teajta, catu a'atzu muá'itɨche'en. Capu ajta a'ij tá'amitɨejte'e a'ij tɨ té'eme. Mɨ teajta iteen, teen tu a'ij tirájteuve a'ij tej huárɨni. 9A'ɨ́ɨme ɨ́ teɨte, a'ij mú pua'a xaa táruurée muá'aye'i. Mɨ ajta Dios, capu mé túuhua'ana. A'ɨ́ɨ mú xaa tá'ajɨpua. Mɨ ajta, camu ta'antipuá'ajte'esin. 10A'u tɨ na'a tej é'ecɨɨne, ayée tu che'atá tena'a ti'ipuaíjti'ihua tá'aju'un, a'ij tɨ éeni'icɨ'e huamɨ́'ɨ ɨ́ Jesús. Ayee tu te'ɨ́jna jɨ́n rɨni, a'iné teen tu rá'aviicua'i, ajta ayén che'atá na'a seijre'e jemin ɨ́ tej ratéhua'ira'a a'ɨ́jna tɨ jɨ́n Jesús ajta taatá'aca tej teuj ruuri. 11A'iné iteen, i tej teuj ruuri, ayée pu tí'itaruure, ja'anáj tɨ na'a tu á'ataca'ane tej huácui'ini niuucajtze'en ɨ́ Jesús. Ajta a'ɨ́jna jemi ɨ́ tej ratéhua'ira'a, tɨ ajta á'apuapua'are, a'ɨ́jna jemi pu ajta seíire'e a'ame ɨ́ muárɨ'eri'ira'a tɨ jɨ́n ajtahua'a ruuri a'ɨ́jna ɨ́ Jesús. 12A'ɨ́j pu jɨ́n, teen tu tiyen rajpuaíjtzi te'ɨ́jna jɨme'e tej tiyen á'ataca'ane tej huácui'ini. Mɨ seajta mú'een, ruxɨéehua xu rɨ́'ɨ ti'itechéjme se'ɨ́jna jɨme'e tej iteen rajpuaíjtzi. 13- 14Ayee pu té'eyu'usi'i tɨjɨ́n: “Nee nu té'antzaahua. A'ɨ́j nu hui jɨ́n niyen tiu'utaxájtaca'a.” Ayee pu che'atá na'a 'een itejmi jemi. Teen tu teajta té'atzaahuate'e, teajta tiyen tí'ixaxa'a te'ɨ́jna jɨme'e tej teri ramua'aree tɨ a'ɨ́jna ɨ́ tɨ ra'ajjáj ɨ́ tavástara'a, a'ɨ́jna ɨ́ Jesús, huá'a tzajta'a ɨ́ mɨ'ɨchite, a'ɨ́ɨ pu ajta ta'ajjájpuaxɨ'ɨsin jamuan ɨ́ Jesús. A'ɨ́ɨ pu ajta taataseíjrata mú'ejmi jamuan tej ti naími'i huateáturan ɨ́ jemin. 15Ajta nain tɨ ayén tiu'urɨ́j, a'ɨ́ɨ pu tejámuatéva'ɨri mú'ejmi, a'iné setɨ́'ɨj jaítze'e huatámu'iire se'ɨ́jna jɨme'e tɨ Dios rɨ́'ɨ tejamuatá'aca, jaítze'e xu huataújtemua'ave'esin sej si huápɨ'ɨ rɨ́'ɨ tiraatá'an ɨ́ Dios. 16Ayee tu jɨ́n caí cataxɨéehuajye'i. Jee xaa, a'ɨ́jna ɨ́ tej ratéhua'ira'a tɨ mé jéjre'e seijre'e, a'ɨ́ɨ pu á'apuapua'are'e. Mɨ ajta ɨ́ tɨ yú tatzajta'a seijre'e, a'ɨ́ɨ pu rujéjcuare'e ja'anáj tɨ na'a nain xɨcaj tzajta'a. 17Ajta a'ɨ́jna ɨ́ tej jɨ́n cɨ́j caj rajpuaíjtzi, tɨ ajta caí jeíhua ruxe'eve'e, a'ɨ́ɨ pu ayén rɨ́'ɨ taruure tej ti tiyen ra'ancuré'an te'ɨ́jna tɨ huápɨ'ɨ naa seíire'e a'ame tɨ́j na'a rusén jɨme'e. Capu a'atzu ratí'ase a'ɨ́jna tɨ íjii seijre'e. Ajta, jeíhua pu jaítze'e ruxe'eve'e caí ɨ́ tej jɨ́n rajpuaíjtzica'a. 18A'ɨ́j tu jɨ́n, catu á'ataca'ane a'ɨ́jna jemi ɨ́ tɨ tí'itaavijhua, tɨ ajta mé jéjre'e seijre'e, sino a'ij tu jemi á'ataca'ane te'ɨ́jna tɨ caí taavíjhua, ɨ́ tɨ ajta caí mé jéjre'e seijre'e, a'iné a'ɨ́jna tɨ ayén taavíjhua, capu á'ateeri. Mɨ ajta, a'ɨ́jna tɨ caí taavíjhua, tɨ ajta caí mé jéjre'e seijre'e, a'ɨ́ɨ pu xaa á'ateeri tɨ́j na'a rusén jɨme'e.

will be added

X\