2 Corintios 3

1¿Ni qui ayén tejamuá'amitɨejte'e tej teajtáhua'a autéjhuii tej tajɨ́ɨmua'a tiyen rɨ́'ɨ ti'itáta'aca mú'ejmi jemi? Na'ari, ¿ni qui ayén ruxe'eve'e tɨ ja'atɨ ayén yu'uxari autéyu'uxan ɨ́ tɨ jɨ́n rɨ́'ɨ tejamuaatá'aca itejmi jɨme'e nusu ayén tiú'ujxe'eve'e sej ra'utéyu'uxan ɨ́ sej jetzen rɨ́'ɨ ti'itáta'aca itejmi? Seica jemi pu xaa ayén tiú'ujxe'eve'e, aru itejmi jemi, capu. 2Mú'een xu rujɨ́ɨmua'a sena'a se'ɨ́ɨn pú'een ɨ́ tɨ titaatéva'ɨri tɨ́j yu'uxari ɨ́ tej jɨ́n huatátaseijrata huá'a jemi, matɨ́j mena'a pua'amé mej yen seijre'e mej mi ra'ujíjve'en, mej yaú'itɨée muá'ara'ani. 3Mú'een xu xaa siyen 'een tɨ́j yu'uxari tɨ Cɨríistu'u jetze a'uvé'emej. Mɨ ajta, capu tetej jetze a'uyú'usi'ihuaca'a sino a'ɨ́ɨn ɨ́ xɨéjniu'ucare'ara'an ɨ́ Dios, a'ɨ́ɨ pu raateájtuaa mú'ejmi jemi tɨ́'ij ayén a'amua tzajta'a te'useíire'e á'ara'ani mɨ sej seuj ruuri. 4Ayee tu té'atzaahuate'e a'iné Cɨríistu'u pu ayén tí'iseijre'e ɨ́ Dios jemi. 5Capu ayén tiraavíjte'e tej tajɨ́ɨmua'a tiyen tiu'utaxáj yee téjmi pu jetze seijre'e ɨ́ muárɨ'eri'ira'a tej ti tiyen raayɨ́'ɨtɨhua'an sino a'ɨ́jna ɨ́ tej jetzen arátaca'ane, a'ɨ́ɨ pu a'uun a'uvé'eye'i ɨ́ Dios jemi. 6Ajta a'ɨ́ɨn Dios, a'ɨ́ɨ pu ayén ta'antíhuau tej ti tiyen te'ɨ́jna jɨ́n tiu'utévaɨre'en, a'ɨ́jna ɨ́ niuucari tɨ jéjcua tɨ Dios ajta jɨ́n te'ataújratziiri'i. Teajta iteen, catu te'ɨ́jna jɨ́n tí'imuarɨ'e tɨ á á'ayu'usi'i tetej jetze, sino a'ij tu jɨ́me'en tɨ ayén seijre'e tɨ jetzen airáninei ɨ́ xɨéjniu'ucare'ara'an ɨ́ Dios. Ajta a'ɨ́ɨn ɨ́ niuucari tɨ á é'eyu'usi'ihuaca'a ɨ́ tetej jetze, a'ɨ́ɨ pu ayén hua'atá'aca mej mi miyen ja'atɨ a'uxɨ́jte'en tɨ ij a'ɨ́ɨn huámɨ'ɨni. Mɨ ajta, a'ɨ́ɨn ɨ́ xɨéjniu'ucare'ara'an ɨ́ Dios, a'ɨ́ɨ pu ruurican a'ihuateájtuaani. 7Mɨ ajta a'ɨ́ɨn ɨ́ niuucari ɨ́ mej jɨ́n miyen ja'atɨ a'uxɨ́jte'en tɨ́'ij a'ɨ́ɨn huámɨ'ɨni, ayée pu á é'eyu'usi'ihuaca'a tetej jetze tɨ a'uré'etzatzaihuaca'a. Jé'ecan pu huápɨ'ɨ naa seijre'eca'a tɨ́'ɨj Dios ayén raateájtuaa a'ɨ́jna jemi ɨ́ Moisés. Ajta a'ɨ́ɨn Moisés, ayée pu huápɨ'ɨ tetáatɨye'icaa ɨ́ néerime'ara'an jetze. Majta a'ɨ́ɨme ɨ́ mej Israél jetze ajtéme'ecan, capu rɨ'ɨríistaca'a mej ra'aráaseij ɨ́ Moisés a'ɨ́jna jɨme'e tɨ ayén huápɨ'ɨ tetáatɨye'icaa ɨ́ néerime'ara'an jetze. Mɨ ajta, a'ɨ́ɨ pu tépua'arijme'eca'a. 8Ajta a'ɨ́ɨn tɨ jɨ́n tí'ivaɨre'e a'ɨ́jna ɨ́ xɨéjniu'ucare'ara'an ɨ́ Dios, ¿ni caí ayén jeíhua huápɨ'ɨ jaítze'e naa seíire'e á'ara'ani? 9Jee xaa ne'u, ayée pu ti'ayajna. Tɨ pua'a ayén jeíhua huápɨ'ɨ naa seijre'eca'a a'ájná'ɨmua tɨ́'ɨj Dios raateájtuaa ɨ́ niuucari ɨ́ mej jɨ́n ja'atɨ a'uxɨ́jte'en, ayée pu tiú'ujxe'eve'e tɨ jaítze'e huápɨ'ɨ naa seíire'e á'ara'ani a'ɨ́jna ɨ́ niuucari tɨ raatá'aca ɨ́ ja'atɨ tɨ a'ɨ́ɨn rɨ'éene'ecán jɨ́n huateáturan ɨ́ Dios jemi. 10Jee tzɨ́te'e, ayée pu ti'ayajna, a'ɨ́ɨ pu ajmí'i huápɨ'ɨ naa seijre'eca'a a'ɨ́jna ɨ́ niuucari tɨ raateájtuaa ɨ́ Moisés jemi. Ajta íjii, capu ché'e naa seijre'e a'ɨ́jna jɨme'e tɨ ari seɨ́j huataseíjre tɨ jaítze'e huápɨ'ɨ naa seijre'e. 11Ajta, tɨ pua'a ayén naa éene'en huataseíjre a'ɨ́jna tɨ ajta tépua'ari, jaítze'e pu huápɨ'ɨ naa seíire'e a'ame a'ɨ́jna ɨ́ tɨ ayén huateáturaasin tɨ́j na'a rusén jɨme'e. 12A'iné tu'uri tiyen rachú'eve'e ɨ́ Dios jemi tɨ ayén te'irájra'ani, a'ɨ́j tu jɨ́n tiyen taxɨéehua tihuá'ixaate'e, teajta caí tí'itziɨɨne'e. 13Catu tiyen rɨcɨ a'ij tɨ a'ɨ́ɨn Moisés huarɨ́j tɨ cɨ́ɨxuri jɨ́n araújna ɨ́ runéerime jetze mej mi caí ra'aráaseij a'ɨ́ɨme ɨ́ mej Israél jetze ajtéme'ecantaca'a, mej mi caí raaseíjra tɨ́'ɨj a'ɨ́jna tépua'arijme'en a'ɨ́jna tɨ tetáatɨye'icaa. 14Majta me'ɨ́n, a'ɨ́ɨ mú caí huataúra'a mej yaú'itɨée muá'ara'ani. Ayee mú huarɨ́j. Cu xɨee mej cuj araújna cɨ́ɨxuri jɨme'e. Tɨ́j na'a a'ájná'ɨmua tɨ yú e'iré'ene, ayée pu 'een seijre'e. Matɨ́'ɨj ra'ujiíve'e me'ɨ́jna ɨ́ niuucari tɨ mí'ime'ecan ɨ́ tɨ jɨ́n Dios ayén amuacaí te'ataújratziiri'i, aúche'e pu ayén seijre'e ɨ́ mej jɨ́n aránami'i, ajta capu xɨ ja'atɨ hua'utáxɨɨxɨ, a'iné a'ɨ́ɨ pu'u raayɨ́'ɨtɨ ɨ́ Cɨríistu'u. 15Jee xaa ne'u, ayée pu tí'een íjii, ja'anáj tɨ na'a tɨ ayén ruxe'eve'e mej ra'ujíjve'en a'ɨ́jna ɨ́ yu'uxari tɨ Moisés ra'uyú'uxaca'a, maúche'e mú miyen aranámi'ihuajmee mej mi caí yaú'itɨée muá'ara'ani. 16Mɨ ajta, tɨ pua'a ja'atɨ ayén huataújtuiire'en ɨ́ tavástara'a jemi, Dios pu ra'utáxɨjta a'ɨ́jna tɨ jɨ́n aránami'ihuaca'a. 17Ajta a'ɨ́ɨn ɨ́ tɨ i'i tavástara'a, ajta a'ɨ́ɨn ɨ́ tɨ i'i xɨéjniu'ucare'ara'an, a'ɨ́ɨ mú ruxɨ́'ej 'een, ajta a'u tɨ a'ɨ́ɨn é'eseijre'e ɨ́ xɨéjniu'ucare'ara'an ɨ́ tavástara'a, a'úu pu é'erɨ'ɨri tɨ ja'atɨ ruxɨéehua á'uche'ecane'en ɨ́ Dios jemi. 18Mɨ teajta iteen, ayée tu éeni'icɨ'e seijre'e. Ayee tu seijre'e. Cu xɨee tej caí aranámi'ihuajmee, teajta tiyen che'atá tena'a temua'a naa tí'itaseijrata tɨ́j ajta a'ɨ́ɨn tavástara'a temua'a naa tiú'ujseijrata. Teen tu seɨcɨé huatétaruurejsin tej ti tiyen seíire'e tá'ara'ani tɨ́j tévira'an ɨ́ tavástara'a, tej ti jaítze'e temua'a naa rɨ́'ɨ ti'itaseijratáa tá'aju'un tɨ́j na'a tɨ yú auca'itɨ́ a'ame. Ajta, a'ɨ́ɨ pu jetzen airáninei ɨ́ tavástara'a jetze, ajta a'ɨ́jna jamuan ɨ́ ruxɨ́ejniu'uca.

will be added

X\