2 Corintios 2

1Mɨ neajta inee, ayée nu tihuánxɨ'epɨ'ɨntari'iri'i nej caí neajtahua'a amuáamuaare nej ni caí neajtahua'a amuaatáxɨeemɨjte'en. 2Jee xaa ne'u, tɨ pua'a niyen amuaatáxɨeemɨjte'en, ¿a'atéenqui mena'a mi me'ɨ́n pu'éene'e muá'aju'u ɨ́ mej naatatémua'aviste'esin? Capu ché'e sein ja'atɨ, a'iné mú'een xu se'ɨ́ɨn pú'een ɨ́ nej amuaatéxɨeemɨjte. 3Ayee nu 'een jɨ́n niyen tejamuaatayú'use nej ni ramua'areere sej caí naatéxɨeemɨjte'esin netɨ́'ɨj ne'uun e'ará'asti, a'iné ayée pu tiraavíjte'e sej naatatémua'aviste'en. Mɨ ajta, ayée pu tiná'amitɨejte'eca'a sej siyen 'een naíjmi'i mú'een sej se'ɨ́jna jɨ́n huataújtemua'ave'en se'ɨ́jna jɨme'e ɨ́ nej neajta jɨ́n netémua'avi. 4Netɨ́'ɨj tejamuaatayú'use, jeíhua pu a'ij pua'a né'asejca'a, neajta neyeine temua'a. Jee xaa, huápɨ'ɨ pu nú'ucui'ica'a yú ne tzajta'a, a'iné canu raxɨ́'eve'eca'a nej amuaatáxɨeemɨjte'en, sino ayée nu tí'ijxe'eve'eca'a sej ráamua'aree nej jeíhua huápɨ'ɨ já'amuaxe'eve'e. 5Mɨ ajta, tɨ pua'a ja'atɨ ayén ti'itɨ jɨ́n a'ij tiú'uruu tɨ i ja'atɨ huataújxɨeemɨste'en, capu ayén neetzi na'a huáruu sino je'icáj pu ajta mú'ejmi ayén huáruu. Ayee nu 'een jɨ́n tejá'amua'ixaate'e nej ni caí jeíhua amuaatamuárɨ'eriste'en naíjmi'ica mú'ejmi. 6Pu'uri a'ɨ́ɨ pu'u, ɨ́ mej mu'iitɨ́ meri miyen puaíjtzi raatá'a a'ɨ́jna ɨ́ ja'atɨ tɨ ayén huarɨ́j. 7A'ɨ́j pu jɨ́n, ayée pu ari tiú'ujxe'eve'e sej tiraatá'uuni'i, seajta rɨ́'ɨ ra'anrú'ure'en. Na'ari caí, a'ɨ́ɨ pu muá'itɨche'en nain jɨme'e a'ɨ́jna jɨme'e tɨ jeíhua huápɨ'ɨ ruxɨeemɨ́jte'e. 8A'ɨ́j nu jɨ́n niyen ca'aníjra'a amuaatá'asin sej seajtáhua'a siyen tiraataseíjrate'en sej seuj raxɨ́'eve'e. 9Ayee nu 'een jɨ́n tejamuaatayú'use nej ni amuaatéeseij a'ij sej titetiújcha'ɨɨ mú'een, ajta nej ni ráamua'aree tɨ pua'a siyen nain jɨ́n té'aste. 10- 11Ja'atɨ tɨ na'a sej tiraatá'uuni'i, nee nu neajta niyen che'atá nena'a tiraatá'uuni'ira. Tɨ pua'a niyen ti'itɨ jɨ́n tiraatá'uuni'iri'i, ti'itɨ tɨ na'a, ayée nu 'een jɨ́n tiraatá'uuni'iri'i nej ni a'amua japua huániuuni ɨ́ Cɨríistu'u jemi tɨ ij caí a'ɨ́ɨn Satanás ti'itɨ jɨ́n ta'antimuá'itɨn, a'iné teen tu xaa ramua'aree a'ij tɨ a'ɨ́ɨn éeni'icɨ'e tí'imuarɨ'e. 12Netɨ́'ɨj ne'uun a'ará'a ne'újna u chajta'a tɨ ayén téja'arájtehuaa tɨjɨ́n Troas, nej ni ne'uun tihua'utá'ixaate'en ɨ́ niuucari tɨ jɨ́me'en raxa ɨ́ Cɨríistu'u, nevástara'a pu ayén naatá'a nej ni nexɨéehua temua'a naa tihua'utá'ixaate'en ɨ́ teɨte. 13Mɨ neajta, jeíhua nu huápɨ'ɨ tí'imuajca ne'ɨ́jna jɨme'e nej caí ráateu ɨ́ ne'ihuaara'a, ne'ɨ́jna ɨ́ Tito, tɨ caí a'uun a'utéveeca'a. A'ɨ́j nu jɨ́n hua'utateúute'e, ne'uun á'ume u Macedonia. 14Ajta, temua'a tu rɨ́'ɨ tiraatá'asin te'ɨ́jna ɨ́ Dios tɨ ayén taatá'aca temua'a naa tej tiu'utémua'itɨn jamuan ɨ́ Cɨríistu'u. Cu xɨee tej cuj iteen já'ita'a huajú'un, ajta a'ɨ́ɨ pu Cɨríistu'u amuacaí huamé'en, majta ta cújta'a huajú'un ɨ́ tej teri hua'utéemua'itɨ. Ajta a'u tɨ na'a tej já'ita'a huajú'un, Dios pu ayén raruure tɨ téjmi jetze airáninei a'ɨ́jna tɨ naa té'eeca ɨ́ mej jɨ́n ráamua'ati. 15Teajta iteen, ayée tu seijre'e ɨ́ Dios jemi. Cu xɨee tej cuj iteen ráatɨsin ɨ́ tɨ naa té'eeca a'ɨ́jna jɨme'e tej tiyen Cɨríistu'u jetze ajtéme'ecan. Ayee tu che'atá tena'a seijre'e huá'a jemi ɨ́ tɨ Dios hua'irátuaasin, ajta huá'a jemi ɨ́ mej á'apua'aren. 16Ayee pu 'een, a'ɨ́mej jemi ɨ́ seica ɨ́ mej á'apua'aren, ayée pu huá'a jemi té'eeca tɨ́j ti'itɨ tɨ huamɨ́'ɨ ɨ́ mej jɨ́n majta á'apua'aren. Ajta a'ɨ́ɨme ɨ́ seica ɨ́ tɨ Dios hua'irátuaasin, ayée pu huá'a jemi té'eeca tɨ́j ti'itɨ tɨ ruuri tɨ naa teáarɨ́'e ɨ́ mej jɨ́n huaújrujte'en. ¿A'ataani ayén á'avejren tɨ́'ij ayén tiu'utévaɨre'en ɨ́ Dios jemi? Capu xaa ne'u mé é'e ja'atɨ tɨ ayén á'avejren. 17Mɨ teajta iteen, catu tiyen e'en matɨ́j ɨ́ seica, ɨ́ mej mu'iitɨ́, ɨ́ mej miyen huateújvaɨre'en ɨ́ mej jɨ́n ramuá'itɨcɨ me'ɨ́jna jɨme'e mej ramuarɨ'e ɨ́ niuucari tɨ jɨ́me'en raxa ɨ́ Dios. Mɨ teajta iteen, ayée tu tzáahuati'ira'a jɨ́n ti'itítacha'ɨɨ a'iné Dios pu ta'antíhuau. Teajta iteen, ayée tu ɨ́ Dios jemi tí'ixaxa'a tɨ́j seɨj tɨ Cɨríistu'u jetze me'ecan tí'ivaɨre'e.

will be added

X\