1 Nu'uri hua'apua jama'uvé'emuaareca'a, neajtahua'a nu neri tɨ́n a'atanéjsin mú'ejmi jemi. Ayee nu rɨni a'ij tɨ té'eyu'usi'i tɨjɨ́n: “Mej mi tzáahuati'ira'a jɨ́n seɨ́j a'uxɨ́jte'en, ayée pu ruxe'eve'e mej miyen tiu'utaxáj hua'apua ɨ́ teɨte nusu huaíca.” 2 - 3 Ayee nu tihua'utániuuche ɨ́ mej mejmí'i auteájturaa ɨ́ Dios jemi, neajta naíjmi'ica ɨ́ seica. Ijii, nej ye'ɨmuá huatéjvee, nu'uri neajtahua'a niyen che'atá nena'a tihuá'aniuuche netɨ́j huarɨ́j netɨ́'ɨj hua'apua amuáamuaareca'a. Tɨ pua'a neajtahua'a ne'uun a'atanén, canu ché'e tíhua'utá'uuni'ira, a'iné mú'een xu siyen raxɨ́'eve'e nej ti'itɨ jamuaataseíjrate'en ɨ́ sej jɨ́n ráamua'aree tɨ a'ɨ́ɨn Cɨríistu'u ayén ca'aníjra'a tinaatá'aca nej ni niyen tiu'uxáj a'ɨ́jna jetze me'ecan. Ajta a'ɨ́ɨn Cɨríistu'u, capu ayén 'een mú'ejmi jemi tɨ́j seɨ́j tɨ caí rú'uca'anisti'i, sino jé'ecan pu huápɨ'ɨ tiu'umuárɨej mú'ejmi jemi a'ɨ́jna jɨme'e ɨ́ rumuárɨ'eri'ire'ara'an. 4 A'ɨ́ɨ pu xaa jɨ́n ayén á'utataihuaca'a ɨ́ cúruu jetze a'ɨ́jna jɨme'e tɨ caí rú'uca'anisti'iraca'a ɨ́ rutevij jetze. Mɨ ajta íjii, a'ɨ́ɨ pu ruuri seijre'e a'ɨ́jna jɨme'e ɨ́ muárɨ'eri'ire'ara'an ɨ́ Dios. Ajta, itejmi, ayée pu che'atá na'a caí tú'uca'anisti'i a'ɨ́jna jɨme'e tej Cɨríistu'u jetze ajtéme'ecan. Mɨ teajta iteen, ɨ́ tej jɨ́n tí'ivaɨre'e mú'ejmi jemi, teen tu ruuri tá'aju'un ɨ́ jemin te'ɨ́jna jɨme'e tej jetzen arátaca'ane ɨ́ Dios. 5 Setá'aj siyen huaújmua'atziite'en aisí tɨ pua'a siyen rá'astijre'e se'ɨ́jna jɨme'e sej té'atzaahuate'e nusu secaí. Setá'aj huateújseɨj temua'a naa ɨ́ ru jetze. ¿Ni qui ayén ari tejamuá'amitɨejte'e tɨ a'ɨ́ɨn Jesús, tɨ ajta Cɨríistu'u pú'een, a'ɨ́ɨn mú'ejmi jemi huateájturaa? Na'ari caí, nusu seri huamuá'itɨche. 6 Ayee nu tí'ijxe'eve'e tɨ ij ayén tejamuá'amitɨejte'e tej caí huamuá'itɨche iteen. 7 Mɨ teajta iteen, ayée tu tí'ijhuavii ɨ́ Dios sej si caí ti'itɨ jɨ́n auteáturan. Catu tiyen ta jɨ́me'en rahuauhuau tɨ ij ayén tejamuá'amitɨejte'e tej tiyen te'ɨ́jna jɨ́n te'ará'asten, sino sej si siyen huárɨni a'ij tɨ tiraavíjte'e. Capu amɨ́n a'ij, tɨ pua'a ayén tejamuá'amitɨejte'e tej huamuá'itɨche nusu tecaí. 8 Ayee nu 'een jɨ́n niyen tejá'amua'ixaate'e, a'iné catu te'ɨ́jna jɨ́n antítamua'aree tej raatá'ijmɨi te'ɨ́jna tɨ tzáahuati'ira'a jɨ́n seijre'e, sino teen tu te'ɨ́jna jɨ́n antítamua'aree tej ti tiu'utévaɨre'en te'ɨ́jna jɨme'e tɨ tzáahuati'ira'a jɨ́n seijre'e. 9 Teen tu xaa tiyen tátemua'ave'e te'ɨ́jna jɨme'e tɨ caí tú'uca'anisti'i itejmi, teajta te'ɨ́jna jɨme'e sej mú'een seri huateújca'ane ɨ́ ru tzajta'a ɨ́ tavástara'a jemi. Ayee tu mú'ejmi jɨ́me'en tí'ijhuavii tɨ ij Dios ayén amuaanaíjmire'en. 10 Ayee nu ye'ɨmuá huatéjvee niyen tejá'amuayu'use'e tɨ ij caí ayén tiú'ujxe'eve'e á'ara'ani nej ni niyen amuaatamuárɨ'eriste'en ne'ɨ́jna jɨme'e tɨ nevástara'a ayén tinaa'íjca nej ni rɨ́'ɨ amuáaruuren. Capu xaa ne'u a'ɨ́jna jɨ́n ayén tinaa'íjca nej ámuaaté'uuna. 11 Setá'aj huaújtemua'ave'en, ne'ihuaamua'a. Setá'aj rɨ́'ɨ huaújruuren se'ɨ́jna jɨme'e a'ij sej ti'itiújcha'ɨɨ. Setá'aj seajta siyen rá'astijre'e ɨ́ nej jɨ́n á'amuahuavii. Setá'aj seajta siyen che'atá sena'a rɨ́'ɨ tiú'umua'ati, setá'aj seajta ruxɨéehua tí'itechejca. Tɨ pua'a siyen huárɨni, a'ɨ́ɨ pu mú'ejmi tzajta'a huateáturaasin a'ɨ́jna ɨ́ Dios tɨ ayén já'amuaxe'eve'e, tɨ ajta amua'anpuá'ajte'en. 12 Setá'aj siyen huaújteujte'en, xu'iteújpɨ'ɨtze'axɨ'ɨn se'ɨ́jna jɨme'e sej naími'i Cɨríistu'u jetze ajtéme'ecan. 13 Naími'i ɨ́ mej té'atzaahuate'e, ɨ́ mej majta íiye tiújse'ɨri, a'ɨ́ɨ mú á'amuateujte'e. 14 Ché'e ayén mú'ejmi jemi huateáturan a'ɨ́jna ɨ́ tɨ jɨ́n rɨ́'ɨ tejamuaatá'aca ɨ́ tavástara'a, a'ɨ́jna ɨ́ Jesús tɨ ajta Cɨríistu'u pú'een. Ché'e ajta já'amuaxe'eve'e ɨ́ Dios. Ché'e ajta a'ɨ́ɨn xɨéjniu'ucare'ara'an ɨ́ Dios ayén huateáturan mú'ejmi jemi naíjmi'ica. Ché'e ayén teja'uré'enen. Antipuá'areca'a.
