2 Corintios 11

1Ayee nu tí'ijxe'eve'e sej si a'atzu te'utáviicua'i se'ɨ́jna jɨme'e nej ni niyen netɨ́mua'ira jɨ́n netejá'amua'ixaate'e. Jee xaa, setá'aj a'atzu te'utáviicua'i neetzi jemi. 2Tij caí tɨ a'ɨ́ɨn Dios ayén naatá'a nej ni niyen amuá'anchueere'en mú'ejmi, a'iné nee nu niyen raaxɨ́'epɨ'ɨntare sej si siyen a'ɨ́j sena'a jemin huateáturan ɨ́ Cɨríistu'u sej caí ti'itɨ jɨ́n até'ɨtze'ara'an, yee cumu sej huatéviche'en ɨ́ jemin. 3Mɨ neajta inee, ayée nu éeni'icɨ'e tí'itziɨɨne'e tɨ pua'a ayén che'atá na'a ja'atɨ amuaacuanamuan tɨ́j a'ɨ́ɨn ɨ́ cu'ucu'u ayén tiráacuanamuan ɨ́ rumua'atzíira'a jɨme'e a'ɨ́jna ɨ́ Eva. Ayee nu neajta éeni'icɨ'e tí'itziɨɨne'e, tɨ pua'a ayén a'ij pua'a amuáaruuren ɨ́ á'amuamua'atziira'a jetze sej si caí ché'e tzáahuati'ira'a jɨ́n rá'astijre'e ɨ́ Cɨríistu'u, sej si caí ché'e siyen nain jɨ́n raná'amiche'en. 4Ayee pu tí'een, a'iné tɨ pua'a ja'atɨ mú a'uvé'eme'en tɨ ajta ayén tí'ixaxa'a seica jɨme'e ɨ́ niuucari tɨ jɨ́me'en raxa ɨ́ Jesús, tɨ caí ruxɨ́'ej 'een a'ij tej teri tejamuá'ixaa, mú'een xu xaa rɨ́'ɨ tíra'ancuré'evi'itɨjcɨca. Na'ari caí, tɨ pua'a seɨ́j ayén huateáturan mú'ejmi jemi ɨ́ xɨéjniu'ucari tɨ caí a'ɨ́ɨn pú'een tɨ Dios amuacaí raateájtuaa mú'ejmi jemi, mɨ seajta mú'een, naa xu temua'a tíra'ancuré'evi'itɨjcɨca. Na'ari caí, tɨ pua'a siyen ra'ancuré'an seɨ́j ɨ́ niuucari tɨ ajta caí ruxɨ́'ej 'een a'ij tɨ 'een ɨ́ sej amuacaí ra'ancuré'a, temua'a xu naa tirá'astijre'e se'ɨ́jna. 5Ayee pu tiná'amitɨejte'e ineetzi, nej caí niyen jaítze'e cɨliéene'e jɨ́n tí'ivaɨre'e mecaí a'ɨ́ɨme ɨ́ mej nu'u miyen tiu'uta'aíjti'ire mej mi jeíhua huápɨ'ɨ ve'ecán jɨ́n tiu'utévaɨre'en. 6Tɨ pua'a ayén tí'een nej nu'u caí niyen ne'ɨ́jna jɨ́n tihuá'amua'ate nej ni temua'a naa tiu'utaxáj huá'a jemi ɨ́ teɨte, capu amɨ́n a'ij, a'iné temua'a nu naa inee rɨ́'ɨ tirú'umua'aree ne'ɨ́jna jɨme'e a'ij nej tí'ixaxa'a. Nain tu jɨ́n tiyen temua'a naa tejamuaataseíjrate mú'ejmi jemi, teajta naíjmi'ica jemi. 7¿Ni qui necaí auteájturaa ɨ́ Dios jemi ne'ɨ́jna jɨme'e nej niyen huánruu nej ni cɨliéene'e jɨ́n tiu'utévaɨre'en mú'ejmi jemi tɨ ij Dios huápɨ'ɨ tejamuaatá'an mú'ejmi a'ɨ́jna jɨme'e nej huáapua'a nena'a tejámuaatá'ixaa ɨ́ niuucari tɨ jɨ́me'en raxa ɨ́ Dios? Canu xaa a'atzu a'ɨ́jna jɨ́n auteájturaa ɨ́ Dios jemi. Single line Composer 8Nee nu huajá'urɨiiri'i a'ɨ́mej ɨ́ mej pua'amecɨé e'etiújse'ɨri ɨ́ Dios jemi nej ni ne'ɨ́jna jɨ́n huaténvaɨre'en nej ni neajta amuaatévaɨre'en mú'ejmi. 9Ajta, netɨ́'ɨj ne'uun a'utéveeca'a mú'ejmi jemi, ajta jeíhua pu tiná'aturaate'eca'a, canu ti'itɨj jɨ́n amuaatamuárɨ'eriste a'iné a'ɨ́ɨme ɨ́ ne'ihuaamua'a ɨ́ mej me'uun a'uvé'eju'un, a'ɨ́ɨ mú miyen naatá'a ɨ́ tɨ tiná'aturaate'eca'a. Ayee nu nain jɨ́n huarɨ́j nej ni caí amuaatájaaxɨejte'en. Neajta naúche'e nu niyen ne'ɨ́jna jɨ́n rɨcɨ. 10Tɨ́j na'a tɨ ayén ti'ayajna Cɨríistu'u jemi, a'ɨ́ɨ pu ajta neetzi jemi seijre'e. A'ɨ́j nu jɨ́n caí raatá'asin tɨ ja'atɨ ayén naatá'ijmɨi nej ni caí ché'e tihua'utá'ixaate'en tɨ́j na'a a'u tɨ huatacá'a u Acaya a'ɨ́jna ɨ́ nej jɨ́n a'utántzaahuate'en. 11¿A'iné 'éen jɨme'e? ¿Ni qui a'ɨ́jna jɨme'e nej caí já'amuaxe'eve'e? Capu xaa ne'u. Dios pu xaa ramua'aree tɨjɨ́n nejá'amuaxe'eve'e. 12Neajta, a'ij nej rɨcɨ, naúche'e nu jaítze'e niyen rɨni nej ni ra'antipuá'ajte'en ne'ɨ́jna jɨme'e ɨ́ mej jɨ́n á'ujtzaahuate'e mej nu'u miyen che'atá mena'a tí'imuarɨ'e tetɨ́j iteen. Single line Composer 13Matɨ́j mena'a mej miyen 'een matɨ́j a'ɨ́ɨme, a'ɨ́ɨ mú caí tzáahuati'ira'a jɨ́n huata'íti'ihuaca'a. A'ɨ́ɨ mú hua'itzi jɨ́n tí'imuarɨ'e, majta miyen tiú'ujseijrata tɨ nu'u Cɨríistu'u hua'uta'íteca'a. 14Teajta iteen, catu rɨ́'ɨ tira'utaseíj te'ɨ́jna jɨme'e. Teen tu teri tiyen ramua'aree tɨ a'ɨ́ɨn Satanás ajta ayén ruseijrata tɨ a'ɨ́ɨn pú'een seɨj tɨ tí'ivaɨre'e u ta japua a'u tɨ á'uneeri'i rusén jɨme'e. 15A'ɨ́j pu jɨ́n, capu a'ij taatéjteuuve tɨ pua'a a'ɨ́ɨme ɨ́ mej miyen tí'ijvaɨre'e ɨ́ Satanás jemi miyen che'atá mena'a tiú'ujseijrata mej nu'u me'ɨ́jna jɨ́n tí'ivaɨre'e ɨ́ tɨ xɨ́'epɨ'ɨn 'éen jɨme'e. Majta, ayée mú te'entipuá'ajte a'ij mej meri tiraamuá'itɨ me'ɨ́jna jɨme'e a'ij mej ti'itɨj huáruu. 16Neajtahua'a nu niyen tejá'amua'ixaate'e: caxu siyen tí'ineseijra nej nu'u netɨ́mua'i. Na'ari caí, tɨ pua'a siyen tí'ineseijra, setá'aj siyen na'ancuré'evi'itɨn tɨ́j seɨj tɨ rutɨ́mua'i nej ni neajta a'atzu ahuántzaahuate'en. 17Canu ne'ɨ́jna jɨ́n niyen tejá'amua'ixaate'e ne'ɨ́jna jɨme'e tɨ ayén tinaa'íjca ɨ́ tavástara'a, sino nej niyen netɨ́mua'iracan jɨ́n ti'ixa nej ni tzáahuati'ira'a jɨ́n ahuántzaahuate'en. 18A'iné mu'iitɨ́ mú miyen á'ujtzaahuate'e me'ɨ́jna jɨme'e a'ij mej ti'itiújcha'ɨɨ ɨ́ ru jetze, ayée nu che'atá nena'a á'antzaahuate'en a'ij nej ti'itíncha'ɨɨ ɨ́ ne jetze. 19Mɨ seajta mú'een, jeíhua xu rɨ́'ɨ mé tite'umuámua'aree. A'ɨ́j xu jɨ́n temua'a naa te'ataví'icua'i a'ɨ́mej jemi ɨ́ mej rutɨ́mua'i. 20Tɨ pua'a ja'atɨ ayén tejámuaata'aíjte'en sej si ca'anéeri jɨ́n tiu'umuárɨ'en, mú'een xu siyen te'ataví'icua'i. Na'ari, tɨ pua'a ja'atɨ ayén amuá'ari'i ɨ́ sej jɨ́n huateújvaɨre'en, mú'een xu seajta te'ataví'icua'i se'ɨ́jna jɨme'e. Seajta siyen che'atá sena'a rɨcɨ tɨ pua'a ja'atɨ amuaacuanamuan nusu tɨ pua'a ja'atɨ á'ujtzaahuate'e mú'ejmi jemi na'ari tɨ pua'a ayén amu'itéjveeni. 21Jee xaa ne'u, jé'ecan nu huápɨ'ɨ tí'itevi'ira'a tej caí tiyen che'atá tena'a á'ataca'ane matɨ́j a'ɨ́ɨme. Mɨ ajta, ti'itɨ tɨ na'a tɨ jɨ́n ja'atɨ ayén á'ujtzaahuate'e, ayée nu che'atá inee ne'ɨ́jna jɨ́n á'antzaahuate'e. 22¿Ni qui miyen nu'u a'ɨ́mej jetze ajtéme'ecan ɨ́ mej miyen hua'atamuá'amua tɨjɨ́n Hebreos? Nee nu neajta a'ɨ́mej jetze ajtéme'ecan. ¿Ni qui miyen nu'u me'ɨ́jna jetze airáane a'ɨ́jna ɨ́ Israél? Ayee nu che'atá inee ne'ɨ́jna jetze airáane. Na'ari, tɨ pua'a miyen nu'u Abraham jetze airaújneijte. Neajta nu inee a'ɨ́jna jetze airánneijte. 23¿Ni qui miyen nu'u tí'ivaɨre'e Cɨríistu'u jetze me'ecan? Jaítze'e nu inee niyen tí'ivaɨre'e. Ijii nu xaa netɨ́mua'iracan jɨ́n tejá'amua'ixaate'e. Jaítze'e nu jeíhua tí'imuarɨ'e mecaí a'ɨ́ɨme. Jaítze'e nu jeíhua aiteánami'ihuaca'a mecaí a'ɨ́ɨme. Mu'iitɨ́ mú naatéevajxɨ. Canu ché'e ramua'aree a'achú mej pua'amé miyen náaruu. Neajta nu mu'iitɨ́ tɨ́n huamɨ́'ɨ. 24Anxɨ́vi pua'amé mú miyen náaruu a'ɨ́ɨme ɨ́ mej Israél jetze ajtéme'ecan, mej miyen na'itéevajxɨ navij puáasire'ara'a jɨme'e ayén pua'amé seité japuan tamuáamuata'a japuan aramuáacua. Single line Composer 25Huaíca pua'amé mú na'itéevajxɨ cɨyej jɨme'e. Majta seɨ́j naatétu'asixɨ tetej jɨme'e. Huaíca pua'amé pu a'ucájrupi ɨ́ baarcu ɨ́ nej tzajta'an yé'icacare'e. Ayee nu neajta á'atee seɨ́j tɨ́ca'ari, neajta seɨ́j tújca'ari nej ne'uun jaj japua huajaújsime'e. 26Jéihua nu a'ɨmuá huayé'ive ɨ́ juye jetze, neajta jeíhua nu tiu'utátziɨn ne'ɨ́jna jɨme'e nej antáye'icáa ɨ́ játe'ana japua, neajta ne'ɨ́mej jɨme'e ɨ́ nahua'ari, ajta a'ɨ́mej jemi ɨ́ nej hua'axɨ́'ej Israél jetze ajtéme'ecan na'ari a'ɨ́mej jemi ɨ́ mej seɨj chuéjra'a japua é'eme'ecan. Neajta niyen che'atá nena'a tiu'utátziɨn a'u nej á'uye'icaa tɨ pua'a chajta'a na'ari a'u tɨ caí mé'e é'e ja'atɨ nusu játe'ana jetze tɨ ve'ée, neajta a'ɨ́mej jemi mej miyen tí'ihua'itaca me'ɨ́jna jɨme'e mej nu'u ta'ihuaamua'a pú'een. 27Jéihua nu rá'uviicua'iri'i, neajta jeíhua rajpuaíjtzica'a. Mu'iitɨ́ nu pua'amé huatáxa'ai nej atanee ne'ɨ́jna jɨme'e ɨ́ nej tiu'utátziɨn. Neajta nu rajpuaíjtzica'a ne'ɨ́jna jɨme'e nej huata'í'icuataca'a, neajta nej huata'í'imɨ. Mu'iitɨ́ nu pua'amé necaí tiú'ucuaa, neajta huatéxaamɨ, neajta caí ti'itéchejca'a. 28Ajta i'i, tɨ́j na'a nain tújca'ari tzajta'a, ayée pu ti'inemuárɨ'eriste'e a'ɨ́jna jɨme'e ne jé'ecan a'ij té'enemua'ate a'ɨ́mej jemi ɨ́ mej nainjapua e'etiújse'ɨri ɨ́ Dios jemi. 29Ayee nu tejá'amua'ixaate'e, tɨ pua'a seɨ́j caí rú'uca'anisti'ira tɨ huá'a jetze ajtéme'ecan ɨ́ mej e'etiújse'ɨri ɨ́ Dios jemi, ayée pu ajta caí neetzi tinú'uca'anisti'i ɨ́ jemin. Ajta, tɨ pua'a ja'atɨ ayén ca'aníjra'a raatá'an seɨ́j tɨ ajta huá'a jetze ajtéme'ecan tɨ ij a'ɨ́ɨn ayén auté'ɨtzen ɨ́ Dios jemi, jé'ecan pu naatájaaxɨejte'esin. 30Tɨ pua'a ayén tiú'ujxe'eve'e nej ti'itɨ jɨ́n ahuántzaahuate'en, ayée nu huárɨni nej niyen ne'ɨ́jna jɨ́n á'antzaahuate'en ne'ɨ́jna jɨme'e ɨ́ tɨ caí nú'uca'anisti'i. 31Ajta a'ɨ́ɨn ɨ́ Dios tɨ ajta ya'upuáara'an pú'een ɨ́ tavástara'a, a'ɨ́jna ɨ́ Jesús, a'ɨ́ɨ pu ramua'aree nej caí tí'ihua'i. Tiché'e rɨ́'ɨ tiraatá'an a'ɨ́jna ɨ́ Dios tɨ́j na'a rusén jɨme'e. 32Netɨ́'ɨj ne'uun a'utéveeca'a u Damasco, a'ɨ́jna ɨ́ tajtuhuan tɨ a'ɨ́ɨn rey ra'antíhua'u, a'ɨ́ɨ pu racha'ɨɨca'a ɨ́ chajta'a, a'ujna u Damasco, tɨ ij a'ɨ́ɨn ayén naateevi'i. 33Mɨ neajta inee, ayée nu éeni'icɨ'e huirájraa mej na'acájtuaa sicɨ́ri jetze a'ujna a'u tɨ anacun ɨ́ jaxu'u jetze.

will be added

X\