2 Corintios 10

1Neajta inee, i nej i'i Pablo, ayée nu ca'aníjra'a amuatá'aca ne'ɨ́jna jɨme'e nej niyen che'atá nena'a rɨ́'ɨ ti'itíncha'ɨɨ tɨ́j ajta ɨ́ Cɨríistu'u tɨ ayén te'utáviicua'iri'i matɨ́'ɨj a'ij pua'a ráaruu, tɨ ajta huá'ancu'uvajxɨ ɨ́ teɨte. Nee nu ne'ɨ́n pú'een ɨ́ mej miyen tí'ixaxa'a nej nu'u tí'itziɨɨne'e tɨ pua'a mú'ejmi jemi naatéveeca, neajta nu'u huaténca'ane yú ne tzajta'a mú'ejmi jemi netɨ́'ɨj nu'u ye'ɨmuá huatéveeca. 2Mɨ neajta inee, ayée nu amuaatáhuaviira sej caí siyen rɨjca netɨ́'ɨj ne'uun a'utéveeca mú'ejmi jemi, setá'aj caí ca'aníjra'a neetá'acare'en nej niyen huatánseijrata nej niyen che'atá nena'a neca'ane yú ne tzajta'a netɨ́j niyen ti'ihuánxɨ'epɨ'ɨntari'ire nej niyen huatánseijrata huá'a jemi ɨ́ mej miyen tí'itaxajtzi'i tej nu'u tiyen ti'itítacha'ɨɨ matɨ́j a'ɨ́ɨme ɨ́ mej íiyen huachéjme chaanaca japua. 3Teajta iteen, teen tu á'ujujhua'an íiyen chaanaca japua tatevij jɨme'e ɨ́ tej ratéhua'ira'a. Mɨ teajta iteen, catu tiyen tatevij jɨ́n ne'use'e. 4A'iné a'ɨ́jna ɨ́ tej jɨ́n ne'use'e, capu a'uun a'uvé'emej ɨ́ huá'amua'atziira'a jetze ɨ́ mej rutevij jɨ́n á'ujujhua'an, sino a'úu pu a'uvé'emej ɨ́ tej jetzen arátaca'ane tej ti muárɨ'eri'ire'ara'an jɨ́n raaté'uuna te'ɨ́jna ɨ́ mej jɨ́n téujnaamua. 5Teen tu ra'uré'uunaca tɨ́j na'a ɨ́ huá'amua'atziira'a ɨ́ mej jɨ́n huá'acuanamua ɨ́ teɨte. Teen tu ramuá'itɨcɨ ɨ́ huá'amua'atziira'a, tɨ́j na'a ɨ́ mej jɨ́n á'ujtzaahuate'e mecaí ratá'aca ɨ́ ruxɨ́ejniu'uca mej ráamua'ati ɨ́ Dios. Tɨ́j na'a huá'amua'atziira'a, ayée tu che'atá tena'a raruure tɨ́j ɨ́ xantaaru'u tɨ ja'atɨ seɨ́j huatéevi'i, ajta tiu'utátuiire'en a'ɨ́jna jemi tɨ tí'aijta. A'ɨ́j tu jɨ́n tɨ́j na'a ɨ́ huá'amua'atziira'a tej tiyen ramuá'itɨcɨ, teen tu Cɨríistu'u jemi tí'ituiire'e tɨ ij ayén ra'ará'astijre'en. 6Teajta iteen, tu'uri rɨ́'ɨ huatarúu tej ti tiyen huárɨni setɨ́'ɨj rɨ́'ɨ raanaíjmire'en sej rá'astijre'en ɨ́ Dios. Tɨ pua'a a'ɨ́jna seɨ́j ayén raatéxɨeehuata tɨ caí ché'e ayén ra'ará'astijre'en, puaíjtzi tu raatá'asin naíjmi'ica ja'atɨ tɨ na'a tɨ ayén rɨni. 7Me'ecui xaa, setá'aj siyen se'íjna jetze tiú'umua'ati ɨ́ tɨ ayén ti'ayajna. Tɨ pua'a ja'atɨ ayén tirá'amitɨejte'e tɨ a'ɨ́ɨn Cɨríistu'u jetze ajtéme'ecan, ché'e a'ɨ́ɨn ajta ra'utámua'aree ɨ́ ru tzajta'a tej teajta tiyen che'atá tena'a iteen ɨ́ Cɨríistu'u jetze ajtéme'ecan tɨ́j ajta a'ɨ́jna. 8Capu amɨ́n a'ij, tɨ pua'a inee jaítze'e na'ahuántzaahuate'en ne'ɨ́jna jɨme'e ɨ́ tɨ jɨ́n nevástara'a tinaa'íjca. Capu a'ɨ́jna jɨ́n ayén tinaa'íjca nej ni amua'antipuá'ajte'en sino nej ni rɨ́'ɨ amuáaruuren. Mɨ neajta inee, canu ja'atɨ huatá'asin tɨ a'ɨ́ɨn ayén naatatévi'iraste'en. 9Ayee nu 'een jɨ́n tejá'amua'ixaate'e sej si caí ayén tinejá'useijra nej nu'u tejá'amuamuarite'e ne'ɨ́jna jɨme'e a'ij nej tejá'amuayu'use'e. 10A'iné ayée mú tí'ixaxa'a tɨjɨ́n tɨ́j na'a tɨ rá'ayu'uxaca, ca'aníjra'a pu tatá'aca, ajta ca'anéeri pu jɨ́n tí'ita'aijte'e a'ɨ́jna ɨ́ yu'uxari jetze. Mɨ ajta a'ɨ́ɨn, tɨ pua'a nu'u yé huatéveeca itejmi jemi, capu á'ujca'ane tɨ ayén titaatá'ixaate'en. Ajta, capu nu'u a'atzu ruxe'eve'e a'ij tɨ ti'ixáata a'ame. 11Majta a'ɨ́ɨme ɨ́ mej miyen tí'ixaxa'a, miché'e miyen ráamua'aree tɨjɨ́n ayée tu che'atá tena'a tí'ixaxa'a ɨ́ yu'uxari jetze tɨ pua'a ye'ɨmuá taaté'uuca tetɨ́j teajta tí'ixaxa'a tɨ pua'a te'uun mú'ejmi jemi a'uté'uuca'a. 12Mɨ teajta iteen, catu á'ataca'ane tej tiyen raataxáj yee teen tu huá'a jetze ajtéme'ecan ɨ́ seica. Catu teajta tiyen yee ayée tu che'atá tena'a 'een matɨ́j ɨ́ seica ɨ́ mej miyen rɨ́'ɨ ruruure mú'ejmi jemi. Majta a'ɨ́ɨme, tɨ pua'a miyen tiú'ujseijra seɨj ajta seɨj, majta miyen á'ujtzaahuate'e rujɨ́ɨmua'a, tɨ pua'a miyen rɨjca, camu xaa ne'u miyen rɨ́'ɨ mé titeumuámua'aree. 13Mɨ teajta iteen, ayée tu tena'a á'atatzaahuate'e a'ij tɨ ayén tiraavíjte'e. Ayee tu rɨcɨ a'achú tɨ caj Dios ayén taaté'itɨiitze tej ti tiyen ahuátatzaahuate'en mú'ejmi jɨme'e. 14Catu tiyen huápɨ'ɨ mú a'ucɨ́'ɨca ɨ́ tɨ jɨ́n Dios taaté'itɨiitze tɨ pua'a tiyen te'uun a'atanén mú'ejmi jemi sino teen tu te'ɨ́ɨn pú'een ɨ́ tej amuacaí tejámuaatá'ixaa ɨ́ niuucari tɨ jɨ́me'en raxa ɨ́ Cɨríistu'u. 15Catu huápɨ'ɨ á'atatzaahuate'e te'ɨ́jna jɨme'e ɨ́ mej jɨ́n tiu'umuárɨej ɨ́ seica, sino ayée tu tí'ijxe'eve'e iteen, sej jaítze'e té'antzaahuate'en, tej ti jaítze'e tiu'utévaɨre'en mú'ejmi jemi. 16Teen tu tiyen raxɨ́'eve'e tej te'uun tihua'utá'ixaate'en ɨ́ niuucari tɨ jɨ́me'en raxa ɨ́ Cɨríistu'u, huá'a jemi ɨ́ mej a'ɨmuá a'uchéjme seɨ́j chuéjra'a japua, tɨ ij caí ayén ruxe'eve'e tej tiyen á'atatzaahuate'e te'ɨ́jna jɨme'e a'ij tɨ tiu'umuárɨej ɨ́ seɨj, a'ujna a'u tɨ ayén tirá'itɨiitze. 17Ayen tɨjɨ́n: “A'ɨjna tɨ ayén á'ujtzaahuate'e, ché'e a'ɨ́ɨn a'ɨ́jna jɨ́n á'ujtzaahuate'e a'ij tɨ Dios ayén rɨ́'ɨ tiraatá'a.” 18Ayee pu'u xaa tí'een, a'iné a'ɨ́jna tɨ ruseɨ́j rɨ́'ɨ tiú'ujseijrata, capu a'ɨ́ɨn pú'een a'ɨ́jna tɨ Dios ayén ra'ancuré'evi'itɨ sino a'ɨ́jna ɨ́ ja'atɨ tɨ a'ɨ́ɨn tavástara'a ayén rɨ́'ɨ tí'ijseijra.

will be added

X\