2 Corintios 1

1Inee, i nej i'i Pablo, nee nu seɨ́j ne'ɨ́n pú'een tɨ Dios ayén tinaa'íjca ruxɨ́'evi'ira'a jɨme'e nej ni niyen tihua'utá'ixaate'en a'ij tɨ ti'itɨ tí'iseijre'e ɨ́ Cɨríistu'u jemi, ɨ́ tɨ ajta i'i Jesús. Jamuan a'ɨ́jna ɨ́ ta'ihuaara'a a'ɨ́jna ɨ́ Timoteo, ayée tu tejá'amuayu'use'e mɨ sej e'etiújse'ɨri sej si raateánajche ɨ́ Dios, mɨ sej Corinto a'uchéjme, teajta tiyen tihuá'ayu'use'e naíjmi'ica ɨ́ mej Dios jemi seijre'e, matɨ́j mena'a ɨ́ mej me'uun a'uchéjme tɨ́j na'a tɨ a'uun huatacá'a u Acaya. 2Ché'e a'ɨ́jna ɨ́ Dios, ɨ́ tej rájya'upua, ajta a'ɨ́jna ɨ́ tavástara'a, a'ɨ́jna ɨ́ Jesús tɨ ajta Cɨríistu'u pú'een, miché'e rɨ́'ɨ tejamuaatá'acare'en, majta rɨ́'ɨ tejamua'anpuá'ajte'en sej si temua'a naa ru'ihuáamua'ataa xá'ara'ani. 3Tiché'e rɨ́'ɨ tiraatá'acare'en te'ɨ́jna ɨ́ Dios tɨ ajta ya'upuáara'an pú'een ɨ́ tavástara'a, a'ɨ́jna ɨ́ Jesús tɨ ajta Cɨríistu'u pú'een. A'ɨjna ɨ́ Dios, a'ii pu a'ɨ́ɨn pú'een ɨ́ tej rájya'upua tɨ ajta nain jɨ́n ta'acu'uvée á'aye'i. A'ii pu a'ɨ́ɨn pú'een ɨ́ Dios tɨ ajta nain jɨ́n rɨ́'ɨ taarú'u. 4A'ɨ́ɨ pu ajta rɨ́'ɨ taarú'u a'ɨ́jna jɨme'e ɨ́ tej jɨ́n á'aviicua'ire'e tá'aye'i tej ti tiyen che'atá tena'a rɨ́'ɨ hua'anrú'ure'en a'ɨ́mej ɨ́ mej ti'itɨj jɨ́n á'aviicua'ire'e. A'ɨ́j tu jɨ́n tiché'e tiyen rɨ́'ɨ hua'anrú'ure'en te'ɨ́jna jɨme'e ɨ́ tɨ jɨ́n Dios ajta rɨ́'ɨ taarú'u. 5Ayej xaa ne'u ti'ayajna tɨ temua'a naa ayén tí'itacɨ'ɨpuaca a'ɨ́jna tɨ jɨ́n ajta rajpuaíjtzica'a a'ɨ́jna ɨ́ Cɨríistu'u. Ayen che'atá na'a Cɨríistu'u ajta temua'a naa rɨ́'ɨ taarú'u tej ti te'utáviicua'i. 6Tɨ pua'a tiyen ti'itɨj jɨ́n á'aviicua'ire'e, ayée pu ajta tí'ivaɨre'e tɨ ij Dios rɨ́'ɨ amua'anrú'ure'en, ajta amua'irájtuaani. Ajta, tɨ pua'a Dios ayén rɨ́'ɨ ta'anrú'ure'e, ayée pu ajta tí'ivaɨre'e tɨ ij ajta a'ɨ́ɨn rɨ́'ɨ amua'anrú'ure'en. Ayee pu xaa tejá'amuaruure mú'ejmi tɨ pua'a siyen che'atá sena'a temua'a naa te'utáviicua'i ɨ́ sej jɨ́n rajpuaíjtzi tetɨ́j iteen tirajpuaíjtzi. 7Ayee pu titá'amitɨejte'e sej siyen xaa ne'u té'eviicua'i, a'iné ayée tu tí'ijmua'aree tɨ ayén che'atá sena'a teja'amuacɨ'ɨpuaca sej siyen rajpuaíjtzi tetɨ́j iteen, ajta Dios pu ayén che'atá na'a rɨ́'ɨ amua'anrú'ure'e a'ame mú'ejmi tɨ́j ajta rɨ́'ɨ tita'anrú'ure'e a'ame itejmi. 8Ayee tu tí'ijxe'eve'e, ta'ihuaamua'a, sej ráamua'aree a'ij tej tirajpuaíjtzica'a tetɨ́'ɨj te'uun a'uté'eca'a a'ujna u Asia. Jé'ecan tu huápɨ'ɨ á'aviicua'ire'eca'a, ajta na'a caí utéevatzɨ ɨ́ tatzajta'a. Ayee pu titá'amitɨejte'eca'a tej caí ché'e a'ij huárɨni. 9Jee tzɨ́te'e, ayée pu titá'amitɨejte'eca'a ɨ́ tatzajta'a tej huácui'ini. Mɨ ajta, ayée pu a'ɨ́jna jɨ́n táaruu tej ti caí tajɨ́ɨmua'a á'atatzaahuate'e sino tej ti te'ɨ́jna jetze arátaca'anen ɨ́ Dios tɨ hua'ajjá'apuana ɨ́ mej meri huácuii. 10A'ɨ́ɨ pu ayén tu'irájtuaa tɨ ij caí ayén titáacɨ'ɨti tej te'ɨ́jna jɨ́n huácui'ini tɨ huápɨ'ɨ a'ij pua'a seijre'e. A'ɨ́ɨ pu ajta aúche'e tu'irátuaasin. Jee xaa ne'u, ayée tu ti'ijchú'eve'e tɨ a'ɨ́ɨn ajtahua'a tu'irájtuaani. 11Mɨ ajta, ayée pu tiú'ujxe'eve'e sej se'ɨ́jna jɨ́n taatévaɨre'en, sej rahuaviira ɨ́ Dios itejmi jɨme'e, mej mi majta mu'íi miyen rɨ́'ɨ tiraatá'acare'en ɨ́ Dios itejmi jɨme'e me'ɨ́jna jɨme'e tɨ a'ɨ́ɨn Dios ayén che'atá na'a rɨ́'ɨ titaatá'a itejmi a'ij sej seri mu'iitɨ́ tirájhuaviiri'i. 12A'ɨ́j tu xaa jɨ́n á'atatzaahuate'en. Ajta a'ɨ́ɨn ɨ́ taxɨejniu'uca ayén tí'ita'ixaate'e tɨ ayén ti'ayajna tej tiyen rɨ́'ɨ ti'itítacha'ɨɨ huá'a jemi ɨ́ mej íiyen seijre'e chaanaca japua, teajta jaítze'e rɨ́'ɨ ti'itítacha'ɨɨ mú'ejmi jemi. Tɨ́j na'a tej tiyen huarɨ́j, ayée tu tzáahuati'ira'a jɨ́n tiyen rɨjcaa ɨ́ Dios jemi, nain jɨme'e a'ij tɨ tiraavíjte'e. Catu tiyen tí'ijrɨ'ɨrejca'a a'ij mej tí'ijrɨ'ɨre ɨ́ teteca mej íiyen seijre'e ɨ́ chaanaca japua sino Dios pu ayén rɨ́'ɨ titaatá'a. 13- 14Ajta, ɨ́ nej tejá'amuayu'use'e, ayée pu'u na'a a'ɨ́ɨn pú'een a'ij sej sena'a tiraayɨ́'ɨtɨ sej ra'ujíjve'en, a'ij sej sena'a seajta tiyeú'itɨe. Ayee nu neajta tí'ijxe'eve'e sej ráamua'aree nain jɨme'e tej te'ɨ́ɨn pú'een ɨ́ sej jɨ́n rɨ́'ɨ tiraatá'asin ɨ́ Dios. Jee xaa, xu'uri siyen ráamua'areeri'i. Seajta mú'een, mú'een xu se'ɨ́ɨn pú'een ɨ́ tej jɨ́n rɨ́'ɨ tiraatá'asin a'ɨ́jna xɨcáara'an tɨ jetzen ajtahua'a huataseíjre'esin a'ɨ́jna ɨ́ tavástara'a, a'ɨ́jna ɨ́ Jesús. 15A'iné ayée pu tiná'amitɨejte'eca'a, ayée nu tiraaxɨ́'epɨ'ɨntare nej amuacaí ne'uun a'atanén mú'ejmi jemi nej ni neajtahua'a rɨ́'ɨ tejamuaatá'an. 16Ayee nu tí'ijxe'eve'eca'a nej amuáamuaare netɨ́'ɨj ne'uun á'ume'en u Macedonia, neajta netɨ́'ɨj ne'uun pɨ́ é'ejveti neajtahua'a á'amuamuaaren. Neajta niyen raxɨ́'eve'eca'a sej siyen tiraaxɨ́'epɨ'ɨntare'en ɨ́ sej jɨ́n naatévaɨre'e nej ni ne'uun á'ume'en u Judea. 17¿A'iné tejamuá'amitɨejte'e mú'ejmi? ¿Ni qui siyen tiná'aseijrate'e tɨ caí rɨ'ɨrí sej ná'antzaahuate'en se'ɨ́jna jɨme'e nej nu'u caí tzáahuati'ira'a jɨ́n tí'ixɨ'epɨ'ɨntare'e? Mɨ neajta inee, canu xaa ne'u niyen 'een, a'iné canu niyen tí'ijrɨ'ɨre matɨ́j a'ɨ́ɨme ɨ́ teteca ɨ́ mej rujɨ́ɨmua'a tí'imua'atze tɨjɨ́n “jee.” Mɨ ajta, capu ayén te'iráame. 18Mɨ ajta Dios, a'ɨ́ɨ pu caí ja'anáj até'ɨtzea'ara. A'ɨ́j pu jɨ́n, a'ɨ́jna ɨ́ tej teri amuaatá'ixaa, capu ayén 'een tɨ hua'apuaca jɨ́n huataújmua'a. A'ɨjna tɨ jɨ́me'en raxa yee “jee”, capu ajta ayén huataújmua'a yee “capu.” 19Ajta a'ɨ́jna tɨ yaujra'an pú'een ɨ́ Dios, a'ɨ́jna ɨ́ Jesús tɨ ajta Cɨríistu'u pú'een, teen tu tiyen jɨ́me'en amuá'ixaa inee, jamuan a'ɨ́jna ɨ́ Silvano, ajta a'ɨ́jna ɨ́ Timoteo. A'ɨjna ɨ́ Cɨríistu'u, nain pu jɨ́n tihuaújmua'atziite'e, ajta raxɨ́'epɨ'ɨntare'e. A'ɨjna jemi tɨ́j na'a ɨ́ niuucari tɨ jɨ́me'en raxa yee “jee”, ja'anáj tɨ na'a pu ayén te'iráame tɨjɨ́n “jee.” 20Ajta nain ɨ́ tɨ jɨ́n Dios te'ataújratziiri'i, a'ɨ́ɨ pu araúrastejsin ɨ́ Cɨríistu'u jetze. A'ɨ́j tu jɨ́n tiyen tí'ixaxa'a yee “jee.” Yee pu ti'ayajna ɨ́ jemin. Ayee tu jɨ́n rɨ́'ɨ tiratá'aca ɨ́ Dios. 21Mɨ ajta Dios, a'ii pu a'ɨ́ɨn pú'een ɨ́ tɨ rɨ́'ɨ titájcha'ɨɨ itejmi. A'ɨ́ɨ pu ajta rɨ́'ɨ tejamuájcha'ɨɨ mú'ejmi jemin ɨ́ Cɨríistu'u. 22A'ɨ́ɨ pu itejmi huateúra'ate, ajta raateájtuaa ɨ́ ruxɨ́ejniu'uca itejmi jemi tej ti ráamua'aree tɨ a'ɨ́ɨn raanaíjmire'en ɨ́ tɨ ari taatá'a. 23Dios pu rú'umua'aree a'ij nej tí'imua'atze. Canu tí'ihua'i nena'a. Canu ché'e nena'a tí'ixɨ'epɨ'ɨntare'e sino rɨ́'ɨ nu tí'ixɨ'epɨ'ɨntare'e. Ayee nu 'een jɨ́n caí ne'uun a'atanéj mú'ejmi jemi nej ni caí amuaatamuárɨ'eriste'en. 24Catu xaa ne'u tiyen tejá'amua'aijte'e sej si ca'anéeri jɨ́n ra'ará'astijre'en ɨ́ tavástara'a, sino a'amua jamuan tu tí'imuarɨ'e sej si se'ɨ́jna jɨ́n huataújtemua'ave'en, a'iné mú'een xu rá'astijre'e xa'aye'i temua'a naa.

will be added

X\