1 Timuteeyu 6

1Ayee pu ruxe'eve'e mú'ejmi jemi setɨ́j sena'a pua'amé mej ca'anéeri jɨ́n tejá'amuamuariste'e tɨ i ayén tejamuá'amitɨejte'e tɨ ayén raavíjte'e sej hua'ará'astijre'en a'ɨ́mej ɨ́ mej tejá'amua'aijte'e. Na'ari tɨ pua'a secaí siyen huárɨni, a'ɨ́ɨ mú a'ij pua'a tiu'utaxájta me'ɨ́jna jɨme'e ɨ́ tej tiyen ratamuá'amua tɨjɨ́n Dios tɨ ta'ivástara'a, majta me'ɨ́jna jɨme'e a'ij tej tí'imua'ata. 2Ajta, a'iné a'ɨ́ɨ mú ɨ́ mej tejá'amua'aijte'e, a'ɨ́ɨ mú majta té'atzaahuate'e, ayée xu huárɨni. Caxu huá'axɨeehuari'ira se'ɨ́jna jɨme'e sej ru'ihuaamua'a ɨ́ tavástara'a jemi, sino ayée xu jaítze'e tihua'utévaɨre'en. Ayee xu huárɨni a'iné jaítze'e pu tihuá'acɨ'ɨti a'ɨ́mej ɨ́ mej tejá'amua'aijte'e a'ɨ́jna jɨme'e sej siyen tihua'utévaɨre'en, majta miyen té'atzaahuate'e, ajta Dios pu huá'axe'eve'e. A'ii pu a'ɨ́ɨn pú'een ɨ́ tɨ ruxe'eve'e pej piyen tihuá'umua'aten. Pajta, patá'aj ca'aníjra'a hua'utá'an mej mi miyen huárɨni. 3- 4Seica mú miyen tí'imua'ataca me'ɨ́jna jɨme'e tɨ caí ayén ti'ayajna, tɨ seɨcɨé een a'ɨ́jna jɨme'e ɨ́ niuucari tɨ rɨ́'ɨ táaruuren tɨ jɨ́me'en taamuá'ate ɨ́ tavástara'a ɨ́ Jesús tɨ ajta i'i Cɨríistu'u. Majta miyen tí'imua'ataca a'ɨ́jna jɨme'e tɨ seɨcɨé een a'ɨ́jna jɨme'e ɨ́ niuucari tɨ tzáahuati'ira'a jɨ́n ti'ixa ɨ́ Dios jemi. Tɨ́ pua'a ja'atɨ́ ayén éene'en, capu ti'itɨ́j ú'umua'aree sino á'ujtzaahuate'e pu'u. Jéihua pu tiú'urihua'uve'e nain jɨme'e, ajta runé'use'eve'e a'ɨ́jna jɨme'e a'ij tɨ huataújmua'a seɨj ɨ́ niuucari. A'ii pu a'ɨ́ɨn pú'een ɨ́ tɨ te'iráaye'i tɨ ayén rɨcɨ. Muaújchueere'e rujɨ́ɨmua'a na'ari muaújtese'e. Majta a'ij pua'a tiú'ujxajtave'e ca'ɨ́n sei pu ayén tí'ijxajtzi'i ɨ́ ruxɨ́'ej tevi tɨ ij a'ij pua'a ráaruuren. 5Ja'anáj tɨ na'a muaújtese'e a'ɨ́ɨme ɨ́ mej a'ij pua'a mé titeumuámua'aree. A'ɨ́ɨ pu tiyaaru'u tihuá'ari'iri'i ɨ́ mej amuacaícan jɨ́n rú'umua'areereca'a tzáahuati'ira'a jɨme'e. A'ɨ́j pu jɨ́n ayén tihuá'amitɨejte'e mej miyen tiraamuá'itɨn me'ɨ́jna jɨme'e mej huataújseijrata mej nu'u Cɨríistu'u jemi tí'ivaɨre'e. 6Mɨ́ ajta, tɨ pua'a ja'atɨ́ rɨ́'ɨ huá'uruuren a'ɨ́jna jɨme'e tɨ rá'astijre'e ɨ́ Dios, jeíhua pu a'ɨ́jna jɨ́n raamuá'itɨn, tɨ pua'a ajta rutémua'ave'e. 7A'iné tetɨ́'ɨj huataseíjre íiyen chaanaca japua, catu ti'itɨ́j uvé'eneijte. Ajta, tetɨ́'ɨj huirácɨɨne tiyánna chaanaca japua, catu ti'itɨ́j á'atɨni. 8Ayee pu éene'e, tiché'e huátatemua'ave'en te'ɨ́jna jɨme'e tej tí'ijcha'ɨɨ ɨ́ tej tí'icua'a, ajta ɨ́ tej jɨ́n ti'itétache'ete. 9Majta a'ɨ́ɨme ɨ́ mej miyen raxɨ́'eve'e mej huateújchijteaanita, ayée mú 'een matɨ́'ɨj a'ɨ́ɨme ɨ́ ti'itén ja'atɨ́ tɨ caujnari jɨ́n hua'utéejɨ'ɨcɨ'e. A'ɨ́ɨ pu hua'utánamua ɨ́ huá'a tzajta'a mej mi jeíhua tí'ijxe'eve'e, mej caí jɨ́n rɨ́'ɨ mé teuúmuámua'are'e, tɨ jeíhua a'ij pua'a tiú'uruure. A'ii pu a'ɨ́ɨn pú'een ɨ́ tɨ nain tihuá'ari'ira, tɨ hua'antipuá'ajte'esin rusén jɨme'e. 10A'iné a'ij pu jetze airáninei naíjmi'i tɨ́j na'a tɨ a'ij pua'a seijre'e a'ɨ́jna jɨme'e mej huápɨ'ɨ tumin necua'atze'e. Majta seica, a'ɨ́ɨ mú meri ra'atéxɨeehuataca'a ɨ́ mej té'atzaahuate'e me'ɨ́jna jɨme'e mej jeíhua huápɨ'ɨ ranecua'atze'e ɨ́ tumin. Matɨ́'ɨj miyen huárɨni, jeíhua mú rajpuaíitzi muá'aju'u. 11Pajta mú'ee, mɨ pej rá'astijre'e ɨ́ Dios, patá'aj caí a'atzu té'aste pe'ɨ́jna jɨme'e sino ayée pepu'u huárɨni. Patá'aj piyen tiráahuauuni pej urarɨ́'ene'en ɨ́ a'atzajta'a, pajta patá'aj rɨ́'ɨ tí'ichejca ɨ́ Dios jemi. Pajta patá'aj té'atzaahuate'e tzáahuati'ira'a jɨme'e. Ayee pepu'u pajta tiráahuauuni pej huá'axe'eve'e temua'a naa ɨ́ teɨte, pej te'utáviicua'i, pajta ayén huateá'apua'ajte'e mɨ a'atzajta'a. 12Patá'aj tí'itese'e temua'a naa pej pi raatémua'itɨn pe'ɨ́jna tɨ xɨ́'epɨ'ɨn een a'ɨ́jna jɨme'e pej té'atzaahuate'e. Patá'aj tí'itese'e pe'ɨ́jna huatémua'itɨn pej ruuri puá'ara'ani rusén jɨme'e ɨ́ Dios jemi, a'iné a'ɨ́j pu jɨ́n Dios muaatajé a'ájna xɨcáara'an pej jetzen raatá'a á'aniuuca meti'iseíiraca'a ɨ́ teɨte. Xɨ́'epɨ'ɨn pej raataxájtaca'a pej nu'u ra'ará'astijre'en ɨ́ tavástara'a jemi. 13Ayee nu tí'imua'ijcate'e ti'itɨ́j jɨme'e jemin ɨ́ Dios tɨ naíjmi'ica hua'atá'aca mej ruuri muá'ara'ani, ajta jemin ɨ́ Cɨríistu'u tɨ ajta i'i Jesús tɨ ajta xɨ́'epɨ'ɨn tiu'utaxájtaca'a tɨ́'ɨj a'ɨ́ɨn tí'ixaate'eca'a jemin a'ɨ́jna ɨ́ tajtuhuan tɨ ayén ántehuaaca'a tɨjɨ́n Póncio Pilato. 14Ayee nu tí'imua'ijcate'e pej piyen ra'ará'astijre'en nain jɨ́n a'ij nej neri tímuaata'aíj, pej pi caí ti'itɨ́j jɨ́n auteáturan, tɨ ij caí ja'atɨ́ ti'itɨ́j jɨ́n mú'eetzi jetze te'ujpuá'ajte'en. Patá'aj pauj piyen rɨjca tɨ́j na'a tɨ yú auca'itɨ́ a'ame asta caí ajtahua'a yé huataseíjre'en ɨ́ tavástara'a, a'ɨ́jna ɨ́ Jesús tɨ ajta i'i Cɨríistu'u. 15Ajta ayén té'eme tɨ́'ɨj Dios ayén raaxɨ́'epɨ'ɨntare'en yee pu'uri raavíjte'e tɨ ajtahua'a huataseíjre'en. Ajta a'ɨ́ɨn Dios, a'ii pu a'ɨ́ɨn pú'een ɨ́ tej rɨ́'ɨ tiraatá'aca, ɨ́ tɨ ruseɨ́j nain japua tí'aijta. A'ɨ́ɨ pu huá'amu'ucán pú'een a'ɨ́mej ɨ́ mej Tajtuhuan jɨ́n títeté'u'upu'u. A'ii pu ajta a'ɨ́ɨn pú'een ɨ́ hua'avastara'a a'ɨ́mej ɨ́ tej tiyen hua'atamuá'amua tɨjɨ́n yee tavástara'a, ɨ́ mej miyánna seijre'e íiyen chaanaca japua. 16A'ɨ́ɨ pu'u na'a a'ɨ́ɨn pú'een ɨ́ tɨ caí ja'anáj mɨ'ɨni, ajta a'ɨ́ɨn pu a'uun á'uca a'u tɨ ayén jeíhua á'utaaca a'u tej caí a'arájvee ɨ́ jemin. Capu ja'atɨ́ ja'anáj raaseíj, ajta capu rɨ'ɨrí tɨ ja'atɨ́ rujɨ́'ɨ jɨ́n raaseíj. Tiché'e rɨ́'ɨ tiraatá'an, ajta ché'e a'ɨ́ɨn nain jɨ́n antiújmua'aréere á'ara'ani rusén jɨme'e. 17Ayee pej tíhua'uta'aíjte'en a'ɨ́mej ɨ́ mej chíjteaani pú'een, ɨ́ mej yen huachéjme íiyen chaanaca japua mej mi caí huá'axɨeehuata ɨ́ seica ɨ́ mej caí a'ij tí'ijviicua'i. Miché'e majta caí me'ɨ́jna jɨ́n á'ujtzaahuate'e me'ɨ́jna jɨme'e mej jeíhua tí'ijcha'ɨɨ tɨ huápɨ'ɨ tí'ijnajche, a'iné capu rɨ'ɨrí mej ráamua'aree a'ij tɨ tíhua'atéva'ɨrihua'an méjca'i huáyee. A'ɨ́j pu jɨ́n, miché'e rá'atzaahuate'e ɨ́ Dios tɨ ruxɨ́'evi'ira'a jɨ́n taatapuaíjve'esin naíjmi'i tɨ́j na'a tej ti te'ɨ́jna jɨ́n huátatemua'ave'en. 18Patá'aj tíhua'uta'aíjte'en mej mi miyen huárɨni ɨ́ tɨ i'i xɨ́'epɨ'ɨn jɨme'e, mej mi jeíhua huápɨ'ɨ miyen tiu'umuárɨ'en me'ɨ́jna jɨme'e tɨ xɨ́'epɨ'ɨn, mej mi ruxɨ́'evi'ira'a jɨ́n tihua'utá'an ɨ́ mej caí a'ij tí'ijviicua'i, mej mi rá'ujca'ane mej tiu'án temua'a naa a'ɨ́jna mej tí'ijcha'ɨɨ. 19Tɨ́ pua'a miyen huárɨni, jeíhua mú huápɨ'ɨ raté'avaata ɨ́ Dios jemi tɨ tíhua'atéva'ɨrihua'an méjca'i huáyee rusén jɨme'e. Ayee mú miyen huarɨ́n, a'ɨ́ɨ mú xaa ramua'aréeren mej me'uun te'enteárute ɨ́ Dios jemi mej mi ruuri muá'ara'ani rusén jɨme'e. A'ii pu a'ɨ́ɨn pú'een ɨ́ tɨ tíhua'atéva'ɨrihua'an tzɨ́te'e. 20Mú'ee, mɨ pej i'i Timoteo, patá'aj rɨ́'ɨ pena'a pej pi nain jɨ́n te'ará'asten Dios tɨ jɨ́me'en timua'íjca. Capej a'atzu rá'aste ɨ́ mej jeíhua tiú'ujxajtave'e me'ɨ́jna jɨme'e ɨ́ niuucari tɨ caí ti'itɨ́j vaɨre'e, ajta tɨ seɨcɨé 'een. Ayee mú té'ujtzaahuate mej tirú'umua'aree, aru capu ayén ti'ayajna. Camu a'atzu rú'umua'aree. 21Majta seica meri huá'unamuajri'i. Ayee mú jɨ́n huarɨ́n, matɨ́'ɨj mi me'ɨ́n ca'anacan ya'uhuá'axɨ ɨ́ mej té'atzaahuate'e. Aj mú mi ajtacɨ́j ɨ́ tavástara'a jemi, micu. Yee pu i cu. Ché'e a'ij tí'imuavaɨre'e.

will be added

X\