1 Timuteeyu 5

1Capej a'ij pua'a ti'ijteá'axɨ'ɨ seɨj tɨ ari vástacɨra'i, sino rɨ́'ɨ pej tiraatájeeve cumu a'atáàta pepu'u. Ajta a'ɨ́ɨme ɨ́ teteca ɨ́ mej caí xɨ vaújsicɨra'i, patá'aj rɨ́'ɨ tihua'utájeeve cumu a'ihuáamua'a pepu'u. 2Patá'aj rɨ́'ɨ tihua'utájeeve ɨ́ 'uuca ɨ́ mej meri ucarijse cumu a'anáàna pepu'u, majta a'ɨ́mej ɨ́ mej caí xɨ ucarijse cumu á'acu'utzimua'a pepu'u na'ari á'ajuutzimua'a. Patá'aj rɨ́'ɨ tihua'utájeeve a'ij tɨ tiraavíjte'e nain jɨme'e. 3Ajta a'ɨ́ɨme ɨ́ 'uuca ɨ́ mej meri huaújseɨstareca'a, tɨ pua'a ayén ti'ayajna mej huaújseɨstareca'a, majta ɨ́ mej caí a'ij tí'ijviicua'i, patá'aj hua'utévaɨre'en. 4Na'ari caí, tɨ pua'a auj tiyaúumua'a ca'ɨ́n auj tíye'ecuajmua'a, ayée pej huárɨni. Miché'e a'ɨ́ɨme mi'i rɨ́'ɨ ráaruuren mej me'ɨ́jna jɨ́n te'ará'asten mej hua'utévaɨre'en ɨ́ ruxɨ́'ej teɨte. Matɨ́'ɨj miyen huarɨ́n, mu'uri xaa tiu'unájchitaca'a me'ɨ́jna jɨme'e ɨ́ mej té'echa'ɨca'a ruvaújsimua'a jemi na'ari ruye'ecuajmua'a jemi. Ajta a'ii pu a'ɨ́ɨn pú'een ɨ́ tɨ rɨ́'ɨ tiratá'aca ɨ́ Dios. 5Patá'aj piyen huárɨni, tɨ pua'a ja'atɨ́ xaa huaújseɨstareca'a, tɨ ajta caí a'ij tí'ijviicua'i, a'ɨ́ɨ pu xaa té'antzaahuate'e ɨ́ Dios jemi, ajta téniúuve'e nain xɨcaj tzajta'a, ajta nain tɨ́ca'ari tzajta'a tɨ 'ij ayén tí'ijhuaviira tɨ 'ij Dios raatévaɨre'en. 6Ajta a'ɨ́ɨn ɨ́ 'ɨ́ita'a tɨ huaújseɨstareca'a, tɨ pua'a ayén rɨ́'ɨ tira'aráanajche a'ɨ́jna jɨme'e tɨ naa seijre'e jemin, cu xɨee tɨ huamɨ́'ɨ ɨ́ Dios jemi. Mɨ́ ajta, aúche'e pu ruuri. 7Patá'aj pajta hua'utánamuajriste'en ɨ́ teɨte pe'ɨ́jna ɨ́ niuucari mej mi caí ti'itɨ́j jɨ́n a'aturáa muá'ara'ani, tɨ́'ij ajta caí ja'atɨ́ ti'itɨ́j jɨ́n huá'a jetze tí'ijpua'ajte'e. 8Tɨ́ pua'a ja'atɨ́ caí tihua'utévaɨre'en a'ɨ́mej ɨ́ ruteɨ́testemua'a, a'ɨ́mej ɨ́ mej jaítze'e vejli'i jemin é'eche, a'ɨ́ɨ pu a'ɨ́jna jɨ́n mé rúurɨe tɨ rá'atzaahuate'eca'a ɨ́ Dios jemi. Jaítze'e pu a'ij pua'a rɨcɨ caí seɨ́j tɨ a'ij pua'a ti'itiújcha'ɨɨ, tɨ ajta caí ja'anáj rá'atzaahuate'e. 9Jɨ́me'en a'ɨ́mej ɨ́ mej huaújseɨstareca'a, a'ɨ́mej pepu'u auyú'uxan ɨ́ mej miyen rájcha'ɨɨ a'achú cumu huaícate nine'ira'a o jaítze'e nine'ira'a. Ajta, ayée pu ruxe'eve'e tɨ caí ja'anáj tí'ixana'acɨre'e jemin ɨ́ rucɨ́n teecan. 10Ayee pu ajta ruxe'eve'e, mej naími'i ramua'areere ɨ́ teɨte tɨ pua'a xɨ́'epɨ'ɨn huarɨ́j ti'itɨ́j jɨme'e, tɨ rɨ́'ɨ tihua'uxá'apuairi'i ɨ́ tɨ'ɨríi ca'ɨ́n tɨ hua'ancuré'evi'itɨ a'ɨ́mej ɨ́ mej rámuaarecare'e nusu tɨ hua'anája'usixɨ ɨ́ huá'ɨɨca jetze a'ɨ́mej ɨ́ mej huaté'uu ɨ́ Dios jemi na'ari tɨ hua'utévaɨ a'ɨ́mej ɨ́ mej tihua'amuárɨ'eriste'e o tɨ ayén huataúra'a tɨ ayén huárɨni ti'itɨ́j tɨ a'ij tí'ixɨ'epɨ'ɨn. 11Ajta a'ɨ́ɨme ɨ́ mej huataújseɨ́stareca'a, ɨ́ mej mauj téemuastaca'a, capej piyen huá'ayu'uxa jetzen ɨ́ cuapée, a'iné tɨ́'ɨj ari jaítze'e hua'utá'asi mej huavíche'en, majta caí ché'e raxɨ́'eve'e muá'aju'u mej tiu'utévaɨre'en ɨ́ Cɨríistu'u jemi, a'ɨ́ɨ mú xaa huatéviche'esin. 12Tɨ́ pua'a piyen hua'uyú'uxan ɨ́ cuapée jetze, ajta tɨ pua'a miyen huatéviche'en, a'ɨ́ɨ mú rajpuaíitzi muá'aju'un ɨ́ Dios jemi a'iné mu'uri ra'utéxɨeehuari'iri'i ɨ́ mej amuacaícan jɨ́n te'ataújratziiri'i ɨ́ Dios jemi. 13Ajta a'ɨ́jna jɨme'e, ayée mú tí'ijrɨ'ɨre mej á'ujujhua'ane'en ɨ́ huá'achi'i tzajta'a méyee, majta méyee. Ayee mú jɨ́n mé'ujujhua'an a'iné ayée mú rɨcɨ a'ij tɨ ti'itɨ́j tihua'aráanajche. Ayee mú á'ujujhua'an méyee, majta méyee mej jeíhua tiú'ujxajtave'e, majta jeíhua tiú'urihua'uve'e me'ɨ́jna jɨme'e a'ij tɨ rɨcɨ ɨ́ xɨ́'ejra'an tevi. Ajta, ayée te'irájra'ani mej jeíhua tiú'ujxajtave'e tɨ caí ayén tiraavíjte'e. 14Ayee pu tí'irɨneca a'ɨ́mej jemi ɨ́ mej mauj téemuastaca'a ɨ́ mej huataújseɨ́stareca'a. A'ɨ́j nu jɨ́n niyen tí'imua'ixaate'e tɨjɨ́n miché'e huatéviche'en mej mi tiyaúumua'a muá'ara'ani. Miché'e majta rɨ́'ɨ tiu'umuárɨ'en a'u mé é'eche mej mi caí raatá'an me'ɨ́jna tɨ tájcha'ɨɨre'e tɨ ti'itɨ́j jɨ́n huá'a jetze te'ujpuá'ajte'en. 15Ayee pu ti'ayajna mej seica meri mé rúurɨe ɨ́ mej amuacaícan te'ataújratziiri'i ɨ́ Dios jemi mej mi ra'ará'asten me'ɨ́jna ɨ́ Satanás. 16Ajta a'ɨ́ɨn 'ɨ́ita'a tɨ ajta té'atzaahuate'e, tɨ pua'a á mé é'eche jemin seica ɨ́ mej huaújseɨstareca'a, ché'e a'ɨ́ɨn hua'utévaɨre'en tɨ ij caí huá'amuarɨ'eriste'e a'ɨ́mej ɨ́ mej tí'ivaɨre'e u teyujta'a. Tɨ́ pua'a ayén huárɨni, aj pu xaa huatárɨ'ɨristari a'ɨ́mej jemi ɨ́ mej teyujta'a tí'ivaɨre'e mej mi hua'utévaɨre'en ɨ́ mej caí a'ij tí'ijviicua'i ɨ́ mej huaújseɨstareca'a. 17Patá'aj piyen huá'uruuren a'ɨ́mej ɨ́ mej antiújmua'aree u teyujta'a. Tɨ́ pua'a xɨ́'epɨ'ɨn merɨcɨ, ayée pu tiraavíjte'e pej temua'a rɨ́'ɨ tihua'atá'acare'en ti'itɨ́j jɨme'e tɨ tihuá'aturaate'e. Patá'aj jaítze'e rɨ́'ɨ tihua'utá'an a'ɨ́mej mej mi'i huateújca'anen me'ɨ́jna jɨme'e mej tihua'utá'ixaate'en, majta mej tihuá'umua'aten. 18Ayee pej huárɨni, a'iné ayée pu té'eyu'usi'i ɨ́ yu'uxari jetze tɨjɨ́n: “Caxu ra'amuajɨ́'ɨquihua'an mɨ puuya tɨ rayún ɨ́ triigu ruɨ́ɨca jɨme'e sino ché'e rɨ'ɨriistan tɨ cɨ́j caj tiráacua'ani.” Ajta pu ayén té'eyu'usi'i tɨjɨ́n: “Ayee pu tiraavíjte'e mej mi tiraanájchite'e ja'atɨ́ tɨ tí'imɨjhuaca a'achú tɨ caj tiraamuá'itɨ.” 19Tɨ́ pua'a ja'atɨ́ ti'itɨ́j jɨ́n jetzen tí'ijpua'ajte'e seɨj tɨ hua'acha'ɨ́ɨ u teyujta'a, tɨ pua'a a'ɨ́ɨ na'a tí'ijpua'ajte'e, capej ranamuajra. Aru tɨ pua'a mé hua'apua na'ari mehuaíca miyen jetzen tí'ijpua'ajte'e, aj pej xaa ráanamua. 20Majta a'ɨ́ɨme ɨ́ mej hua'acha'ɨ́ɨ ɨ́ teɨte teyujta'a, tɨ pua'a a'ij pua'a mé titetiújcha'ɨɨ ɨ́ Dios jemi, patá'aj hua'ajteá'axɨ'ɨn, meti'inamuáaraca ɨ́ teɨte, mej mi ráamua'aree ɨ́ seica mej mi caí miyen tité'ɨtzee ti'itɨ́j jɨme'e tɨ caí xɨ́'epɨ'ɨn. 21Jemin ɨ́ Dios, neajta jemin ɨ́ Cɨríistu'u tɨ ajta i'i Jesús, neajta huá'a jemi ɨ́ mej tí'ivaɨre'e ɨ́ ta japua, Dios tɨ hua'antíhuau, ayée nu tí'imua'ijcate'e patá'aj nain jɨ́n na'ará'astijre'en a'ij nej neri timuá'ixaa. Capej ti'itɨ́j jɨ́n a'ij rɨjca pe'ɨ́jna jɨme'e pej seɨj jaítze'e xe'eve'e, pajta seɨj caí piyen tí'ixe'eve'e sino patá'aj piyen che'atá pena'a huá'uruuren naíjmi'ica. 22Capej a'iyé'itze'e pej ra'avé'emɨjhua'an seɨj ɨ́ ja'atɨ ti'itɨ́j tɨ a'ij jɨ́me'en pej pi caí jamuan auteáturan ɨ́ Dios jemi. Patá'aj aseɨ́j rɨ́'ɨ tihuá'acha'ɨɨn patá'aj caí ti'itɨ́j jɨ́n auteáturan ɨ́ Dios jemi, seɨj jamuan ɨ́ tevi. 23Patá'aj raatapuá'ajta pej caí a'ɨ́ɨ pena'a jaj ye'eca. Patá'aj cɨ́j caj ti'itɨ́j nahuáj tiu'uyé'en a'iné jeíhua pej tí'icui'i muá'a tzajta'a. 24A'ɨ́jna jɨme'e ɨ́ seica ɨ́ teteca, á jéjre'e pu seijre'e ɨ́ mej jɨ́n auteájturaa ɨ́ Dios jemi tɨ ij amuacaícan puaíjtzi hua'utá'an. Ajta seica jɨme'e, capu a'ij ámitɨeere'e amuacaícan ɨ́ mej jɨ́n auteájturaa ɨ́ Dios jemi, sino méjca'i huáyee xaa teja'uré'enejsin a'ájna xɨcáara'an tɨ jetzen huataseíjre'esin. 25Ayee pu che'atá na'a een a'ɨ́jna jɨme'e ɨ́ tɨ xɨ́'epɨ'ɨn ɨ́ mej jɨ́n meri tiu'utévaɨ, a'ɨ́ɨ pu á jéjre'e seijre'e. Na'ari tɨ pua'a caí amuacaí ámitɨeere'e, méjca'i huáyee pu huataseíjre'esin. Capu rɨ'ɨrí tɨ huateúravaa tɨ́j na'a rusén jɨme'e.

will be added

X\