1 Timuteeyu 4

1Ajta a'ɨ́ɨn xɨéjniu'ucare'ara'an ɨ́ Dios, a'ɨ́ɨ pu ayén ti'ixa e'ehuauritɨéecan jɨme'e tɨ nu'u ayén té'eme méjca'ihua yee tɨ́'ɨj te'entipuá'arijme'en. Seica mú nu'u yá'uhua'axɨjsin ɨ́ mej té'atzaahuate'e. A'ɨ́ɨme mú nu'u namuaara muá'aju'u ɨ́ xɨéjniu'ucari ɨ́ mej tihuá'ahuaitze'e, majta mú ranamuajran a'ij tɨ a'ɨ́ɨn tiyaaru'u tihuá'amua'aten. 2A'ɨ́j pu jɨ́n ayén huataseíjre'esin mej miyen hua'itzi jɨ́n tihuá'amua'aten me'ɨ́jna jɨme'e a'ɨ́ɨme ɨ́ mej tí'ihua'itaca, ɨ́ majta a'ij pua'a titetiújcha'ɨɨ. Capu rɨ'ɨrí tɨ ja'atɨ́ hua'utatévi'imua'an. A'iné camu miyen rɨcɨ a'ij mej tirú'umua'aree ɨ́ ru tzajta'a tɨ ayén tiraavíjte'e, cu xɨee tiyaaru'u pu huá'ataixɨ'ɨ ɨ́ hua'amu'úu jetze. 3A'ɨ́ɨ mú hua'utá'ijmɨijra ɨ́ teɨte mej caí huateneɨ́chen, mej caí huatéviche'en. Majta miyen tíhua'uta'aíjte'esin mej caí ráacua'ani ti'itɨ́j tɨ tí'icua'iri'i. Aru a'ɨ́ɨn Dios, nain pu yen tiu'uteájtuaa mej mi ra'ancuré'an ɨ́ teɨte ɨ́ mej té'atzaahuate'e, majta ramua'aree ti'itɨ́j tɨ ayén ti'ayajna, mej mi me'ɨ́jna jɨ́n tiraatateújtzi'ire'en. 4- 5A'iné temua'a pu ti'irɨ́'een naíjmi'i tɨ́j na'a tɨ Dios tiú'utaahuaca'a, capu ayén tiraavíjte'e tɨ ja'atɨ́ ti'itɨ́j mé úrɨeni sino ché'e a'ɨ́ɨn ra'ancuré'an. Ché'e ajta a'ɨ́jna jɨ́n tiraatateújtzi'ire'en ɨ́ Dios jemi, a'iné pu'uri a'uun e'avíitzi'ire'e ɨ́ Dios jemi a'ɨ́jna jɨme'e tɨ a'ɨ́ɨn Dios ari ayén tiu'utátuiire'esin tɨ́'ɨj huatéjniuuni ɨ́ Dios jemi. 6Patá'aj piyen tihua'utá'an mej mi ráamua'ati ɨ́ a'ihuáamua'a a'íjna i nej neri muaatá'ixaa. Tɨ́ pua'a piyen huárɨni, temua'a pej tiu'utévaɨre'esin ɨ́ Cɨríistu'u jemi tɨ ajta i'i Jesús. Petiu'utévaɨre'esin pe'ɨ́jna jɨme'e tɨ́j na'a pej pá'arɨ'ɨstaca'a, mú'ee pej ranamuájraca'a ɨ́ niuucari pej jetzen té'antzaahua, ɨ́ niuucari ɨ́ mej temua'a naa timuaamuá'ate. 7Capej rá'atzaahuate'e a'ɨ́jna ɨ́ niuucari tɨ caí Dios jemi é'eme'ecan, ti'itɨ́j mej tí'imuarita tɨ caí ayén ti'ayajna, tɨ caí ti'itɨ́j vaɨre'e. Patá'aj piyen ámua'ate pe'ɨ́jna jɨme'e pej piyen huárɨni a'ij tɨ tí'ijxe'eve'e ɨ́ Dios. 8Cɨ́j pu caj tí'ivaɨre'e tɨ pua'a piyen huá'acua'ajte'en pe'ɨ́jna jɨme'e pej raatá'an ɨ́ a'atzajta'a pej pi huaté'aca'ane ɨ́ mua'atévira'a jetze. Aru tí'ivaɨre'e tɨ́j na'a naíjmi'ica tɨ pua'a piyen ámua'ate pe'ɨ́jna jɨme'e pej piyen huárɨni a'ij tɨ tí'ijxe'eve'e ɨ́ Dios. Tí'ivaɨre'e íjii pej yen huateáturan íiyen chaanaca japua, ajta timuaatéva'ɨre pej pi ruuri puá'ara'ani tɨ́j na'a rusén jɨme'e. 9Ayee nu tí'imua'ixaate'e tzáahuati'ira'a jɨme'e tɨ ayén ti'ayajna. Ché'e caí ja'atɨ́ ayén seɨcɨé tí'ixajta. 10Ayee tu een jɨ́n tí'imɨjhuaca, teajta tí'itese'eca'a tej tiyen raachú'eve'en te'ɨ́jna jemi ɨ́ Dios tɨ i'irúuri, tɨ ajta rɨ́'ɨ tihua'atá'aca naíjmi'ica ɨ́ teɨte jaítze'e. A'ɨ́ɨ pu ajta hua'irátuaasin a'ɨ́mej ɨ́ mej té'atzaahuate'e. 11Paúche'e tihuá'amua'ate, pajta pauj tíhua'uta'aíjte'en pe'ɨ́jna jɨme'e nej yé tí'imuayu'use'e. 12Capej ti'itá'acare'en tɨ ja'atɨ́ muacáxɨeehuata a'ɨ́jna jɨme'e pej pauj temuaij, sino ayée pepu'u rɨ́'ɨ tejá'uche'ecane'en temua'a naa mej mi a'ɨ́ɨme ɨ́ mej té'atzaahuate'e miyen che'atá mena'a á'ujujhua'ane'en patɨ́j mú'ee a'ɨ́jna jɨme'e a'ij pej tihuá'ixaate'e, a'ij pej rɨ́'ɨ ti'iti'á'acha'ɨɨ, ajta a'ij pej tihuá'axe'eve'e. Miché'e majta miyen che'atá mena'a timuá'ɨjchue patɨ́j mú'ee a'ɨ́jna jɨme'e a'ij pej tirá'astijre'e ɨ́ tavástara'a, ajta a'ij pej te'urarɨ́'en ɨ́ a'atzajta'a. 13Ayee pej rɨjca asta necaí uvé'enen, patá'aj piyen hua'utánamuajriste'en ɨ́ yu'uxari jetze ɨ́ teɨte tzajta'a, pajta tihua'utá'ixaate'en, pajta tihuá'umua'aten. 14Capej raxɨéehuata a'ɨ́jna tɨ Dios muaatapuaíjve matɨ́'ɨj mej vaujsi mua'ajtamuárɨej, majta tiu'utaxájtaca'a mú'eetzi jɨme'e ɨ́ Dios jetze me'ecan. 15Patá'aj piyen raruure pe'ɨ́jna jɨme'e, patá'aj nain jɨ́n tí'amua'ate mej mi naími'i miyen tiraaseíj pej raanaíjmire'en ɨ́ tɨ mú'eetzi jemi huateájturaa. 16Rɨ́'ɨ pepu'u pe'ɨ́jna jɨme'e a'ij pej ti'itɨ́j ruure, pajta a'ij pej ti'itɨ́j tihuá'amua'ate. Patá'aj piyen te'utáviicua'i pe'ɨ́jna jɨme'e a'iné tɨ pua'a piyen huárɨni, mú'ee pej aseɨ́j huiirá'atuaasin, pajta hua'irátuaasin a'ɨ́mej ɨ́ mej muánamuajran.

will be added

X\