1 Timuteeyu 3

1Ayej xaa ne'u ti'ayajna a'íjna i niuucari. Tɨ́ pua'a ja'atɨ́ ayén raxɨ́'eve'e tɨ a'ɨ́ɨn antiújmua'areere a'ɨ́jna jɨme'e tɨ hua'acha'ɨ́ɨ ɨ́ mej e'etiújse'ɨri u teyujta'a, a'ɨ́ɨ pu xaa raxɨ́'eve'e tɨ tiu'umuári'ihua tɨ i'i xɨ́'epɨ'ɨn. 2A'ɨ́j pu jɨ́n, ayén ruxe'eve'e tɨ ayén éene'en a'ɨ́jna tɨ ayén antiújmua'aree a'ɨ́jna jɨme'e tɨ hua'acha'ɨ́ɨ. Ruxe'eve'e tɨ caí ti'itɨ́j jɨ́n a'aturáa mej mi caí a'ij pua'a tí'ixajta ɨ́ teɨte, ajta tɨ seɨ́j na'a neɨche. Ajta ayén ruxe'eve'e tɨ rɨ́'ɨ ti'itiújcha'ɨɨ, tɨ cɨ́j na'a ti'iye'eca ɨ́ ti'itɨ́j nahuáj, ajta tɨ caí tiú'ujxajtave'e, mej mi rɨ́'ɨ tiraatá'an ɨ́ teɨte. Ajta ayén ruxe'eve'e tɨ hua'ancuré'evi'itɨn temua'a naa a'ɨ́mej ɨ́ mej ramuáaren a'ájna tɨ é'eche, ajta tɨ raayɨ́'ɨtɨhua'an tɨ tihuá'umua'aten temua'a naa. 3Ajta ayén ruxe'eve'e tɨ caí rutahuaíve'e, ajta tɨ caí runé'use'eve'e, sino tɨ rɨ́'ɨ tejá'ucati a'ɨ́mej jemi ɨ́ teɨte, ajta tɨ caí ti'itɨ́j jɨ́n tí'ijaaxɨejta. Ayee pu ajta ruxe'eve'e tɨ caí ramuájche'e ɨ́ tumin tɨ ramuá'itɨcɨ. 4Ayee pu ruxe'eve'e tɨ raayɨ́'ɨtɨhua'an tɨ tíhua'uta'aíjte'en temua'a naa a'ɨ́mej ɨ́ mej jemin é'eche, ajta ɨ́ yaújmua'ame'en. Ayee pu che'atá na'a ruxe'eve'e mej ra'ará'asten a'ij tɨ tiraavíjte'e. 5Ayee pu tí'een, a'iné tɨ pua'a caí raayɨ́'ɨtɨhua'an tɨ tíhua'uta'aíjte'en a'ɨ́mej ɨ́ mej jemin é'eche, capu a'ij tí'irɨ'ɨri tɨ huá'ucha'ɨɨn a'ɨ́mej ɨ́ mej a'uun e'etiújse'ɨri ɨ́ teyujta'a mej mi tiraatateújtzi'ire'en ɨ́ Dios. 6Ruxe'eve'e tɨ ari á'atee tɨ té'antzaahua. Na'ari caí, a'ɨ́ɨ pu a'ujtzaahuate'en a'ɨ́jna jɨme'e tɨ ve'ecán jɨ́n ti'itéjvee. Tɨ́ pua'a ayén té'ujtzaahuate'e, Dios pu ayén che'atá tí'ijxɨ'epɨ'ɨntare'en a'ij tɨ ari tiraaxɨ́'epɨ'ɨntare ɨ́ tiyaaru'u jemi. 7Ajta ayén ruxe'eve'e mej jemin ramua'areere tɨ rɨ́'ɨ tí'itevij a'ɨ́ɨme ɨ́ mej caí té'atzaahuate'e. Na'ari caí, seica mú ra'utéxɨeehuari'ira, ajta a'ɨ́ɨn tiyaaru'u, a'ɨ́ɨ pu jɨ́me'en ayén tiraatémua'itɨ. 8Jɨ́me'en a'ɨ́ɨme ɨ́ mej tí'ivaɨre'e u teyujta'a, ayée pu ruxe'eve'e mej miyen rɨ́'ɨ mé tité'ujujhua'ane'en mej caí tí'ihua'ita, mej mi rá'antzaahuate'en ɨ́ teɨte. Ajta ayén ruxe'eve'e mej caí jeíhua raye'eca ti'itɨ́j nahuáj, majta mej caí ramuájche'e ɨ́ tumin mej ramuá'itɨcɨ a'ɨ́jna jɨme'e mej huá'ucuanamua ɨ́ seica. 9Ayee pu ajta ruxe'eve'e mej nain jɨ́n té'atzaahuate'en a'ɨ́jna tɨ rú'avaataca'a ɨ́ Dios jemi, a'ij tɨ tiú'uruu ɨ́ tavástara'a. Jé'ecan pu ruxe'eve'e mej miyen tirú'umua'areere ɨ́ ru tzajta'a tɨ ayén ti'ayajna. 10Tɨ́ pua'a miyen tí'ijxe'eve'e mej mi tiu'utévaɨre'en u teyujta'a, a'ɨ́ɨ pu ruxe'eve'e mej me'ɨ́n teɨte amuacaícan miyen tiraaxɨ́'epɨ'ɨntare'en a'ɨ́mej jemi ɨ́ mej tí'ivaɨre'ecu. Tɨ́ pua'a caí ti'itɨ́j a'ij tihuá'aturaate'e, aj pu rɨ'ɨríista a'ame mej miyen tiu'utévaɨre'en. 11Ayee pu che'atá na'a tí'een a'ɨ́mej jemi ɨ́ 'uuca ɨ́ mej huajá'uvi'itɨn. Jé'ecan pu ruxe'eve'e mej miyen rɨ́'ɨ mé tité'ujujhua'ane'en. Ruxe'eve'e mej caí a'ij pua'a tiú'ujxajtave'e, majta caí rutá'aruaijve'e, mej caí ti'itɨ́j jɨ́n até'ɨtze'ara'an. 12Majta a'ɨ́ɨme ɨ́ mej tí'ivaɨre'e u teyujta'a, ayée pu ruxe'eve'e tɨ seɨ́j na'a neɨche, ajta tɨ raayɨ́'ɨtɨhua'an tɨ temua'a naa tíhua'uta'aíjte'en ɨ́ ruyaujmua'a, ajta a'ɨ́mej ɨ́ seica ɨ́ ruteɨ́testemua'a. 13Tɨ́ pua'a seɨ́j rɨ́'ɨ tiu'utévaɨre'en u teyujta'a, ayée pu raamuá'itɨn mej rɨ́'ɨ tiraatá'an ɨ́ teɨte me'ɨ́jna jɨme'e tɨ rɨ́'ɨ tiu'utévaɨ. Ajta pu Dios raatáca'anisti'ire'esin tɨ ij auj tí'ivaɨre'e, ajta caí tí'itziɨɨne'e a'iné a'ɨ́ɨ pu té'aste a'ɨ́jna ɨ́ Cɨríistu'u jemi tɨ ajta i'i Jesús. 14- 15Ijii, nej tí'imuayu'use'e, ayée nu tí'ijxe'eve'e nej ca'anacan ne'uun a'utevée ná'ara'ani mú'eetzi jemi. Aru tɨ pua'a ná'ateevi'in niyájna, ayée nu tí'ijxe'eve'e pej ráamua'aree a'ij mej ti'itɨ́j jɨ́n huárɨni a'ɨ́ɨme ɨ́ teɨtestemua'ame'en ɨ́ Dios, a'ɨ́ɨme ɨ́ mej e'etiújse'ɨri u teyujta'a mej mi tiraatateújtzi'ire'en me'ɨ́jna ɨ́ Dios tɨ i'irúuri. A'ii mú a'ɨ́ɨn pú'een ɨ́ mej tihuá'a'ixaate'e ɨ́ niuucari tɨ ayén ti'ayajna ɨ́ Dios jemi. Majta a'ɨ́ɨme, camu taúra'aca mej seɨcɨé tihua'utémua'itɨn. 16Jee xaa ne'u, ayée pu ti'ayajna, capu hua'itzi na'a. Huápɨ'ɨ pu muárɨ'eri tɨ ja'atɨ́ ráamua'ati a'ɨ́jna tɨ rú'avaa ɨ́ Dios jemi, ɨ́ tej jɨ́n tiyen tí'iye'ira, a'iné ayée pu tiuju'urɨ́j: A'ɨ́ɨ pu ayén huataseíjre tehuá'ira'acan jɨme'e. Ajta a'ɨ́ɨn xɨéjniu'ucare'ara'an ɨ́ Dios, a'ɨ́ɨ pu ayén té'axajtaca'a tɨ ayén ti'ayajna ɨ́ Cɨríistu'u jemi. Majta a'ɨ́ɨme ɨ́ mej ta japua tí'ivaɨre'e, a'ɨ́ɨ mú raaseíj. Majta a'ɨ́ɨme ɨ́ teɨtejra'a mej yen huachéjme íiyen chaanaca japua, seica mú miyen tihua'utá'ixaa a'ij tɨ a'ɨ́ɨn huarɨ́j. Majta a'ɨ́ɨme ɨ́ mej yen huachéjme íiyen chaanaca japua, mu'iitɨ́ mú té'antzaahua a'ɨ́jna jemi. Ajta Dios pu ya'uví'itɨ ɨ́ ta japua tɨ ij a'uun nain jɨ́n antiújmua'areere á'ara'ani.

will be added

X\