1 Timuteeyu 2

1- 2Ayee pu tiná'amitɨejte'e tɨ ayén ruxe'eve'e sej si siyen huárɨni. Setá'aj naíjmi'ica jɨ́n huatéjniuuni. A'ɨ́j xu jɨ́n siyen tiraatáhuavii, seajta siyen huá'a jemi huatéjniuuni, seajta tíhua'ateújtzi'ire naíjmi'ica jemi, a'ɨ́mej ɨ́ mej Tajtuhuan jɨ́n títeté'u'upu'u, majta a'ɨ́mej ɨ́ mej tí'aijta. Ayee xu huárɨni tej ti rɨ́'ɨ yee tí'itechejca, teajta ra'ará'asten ɨ́ taye'irá jɨme'e, teajta rɨ́'ɨ tirájcha'ɨ́ɨ tá'ara'ani ɨ́ tavástara'a tɨ́'ɨj caí ja'atɨ́ tájaaxɨejte'e. 3- 4Ayee pu tiraavíjte'e sej si siyen huárɨni. Ayee pu tira'aráanajche a'ame ɨ́ Dios tɨ tu'irájtuaa, a'iné a'ɨ́ɨ pu ayén tí'ijxe'eve'e tɨ naíjmi'ica huirájtuaani, mej mi ráamua'aree nain tɨ́j na'a tɨ ayén ti'ayajna a'ɨ́jna jemi. 5Ayee pu'u tí'een, a'iné seɨj pu'u ɨ́ Dios, ajta seɨj pu'u a'ɨ́ɨ pú'een tɨ huá'a japua huániuuni ɨ́ teɨte ɨ́ mej jɨ́n auteájturaa ɨ́ Dios jemi. Ajta pu teáata'a pɨ́rɨcɨ. A'ii pu a'ɨ́ɨn pú'een ɨ́ Cɨríistu'u tɨ ajta i'i Jesús. 6A'ɨ́ɨ pu huataújmuaɨ'ɨvejritaca'a tɨ́'ij a'ɨ́ɨn tiu'utanájchita nain jɨme'e ɨ́ mej jɨ́n auteájturaa ɨ́ teɨte ɨ́ Dios jemi. A'ii pu a'ɨ́ɨn pú'een a'ɨ́jna tɨ Dios tihua'utá'ixaa á jéjre'e, a'atzaj tɨ pua'a raaxɨ́'epɨ'ɨntare. 7Mɨ́ neajta inee, a'ɨ́j pu jɨ́n na'antíhuau nej ni tihua'utá'ixaate'en ɨ́ teɨte ne'ɨ́jna jɨme'e nej ni tiu'utévaɨre'en ɨ́ Dios jemi. Ayee nu tí'imua'ixaate'e tzáahuati'ira'a jɨme'e. Canu tí'ihua'i. Nee nu xaa tihuá'amua'ate a'ɨ́mej ɨ́ mej té'atzaahuate'e ɨ́ tavástara'a jemi, neajta tihua'utá'ixaate'esin tzáahuati'ira'a jɨme'e a'ɨ́mej ɨ́ mej majta Israél jetze ajtéme'ecan. 8A'ɨ́j nu jɨ́n niyen tí'ijxe'eve'e matɨ́j mena'a a'úu mej a'ucaíjmee, miché'e huatéjniuuni ɨ́ Dios jemi, miyen rɨ́'ɨ tite'urarɨ́'eene'en ɨ́ ru tzajta'a majta caí níniu'ucacu, majta caí rújaaxɨéevi'ira. 9Ajta a'ɨ́ɨme ɨ́ 'uuca, ayée nu che'atá tí'ijxe'eve'e mej mi miyen tí'itechejca a'ij tɨ tiraavíjte'e, miché'e miyen caí tí'itechejca me'ɨ́jna jɨme'e tɨ tiu'utévi'iraste'e sino me'ɨ́jna jɨme'e tɨ caí a'ij pua'a tihuá'aseijrate'e. Miché'e caí ayée mena'a teva'ujhuá'atehua'an ɨ́ rucɨpuá jetze a'ɨ́jna jɨme'e tɨ huápɨ'ɨ tí'ijnajche, miché'e majta caí ayée mena'a te'ucarújte'ejmé'en cumu ti'itɨ́j oro tɨ ti'ipu'éene'ejmee, miché'e majta caí huápɨ'ɨ ayée mena'a te'ecamuátzɨ'ɨvi'ijmé'e me'ɨ́jna jɨme'e ti'itɨ́j perla, nusu mecaí ayée mena'a ti'iteújche'etehua'an me'ɨ́jna jɨme'e ɨ́ cɨ́ɨxuri tɨ huápɨ'ɨ tí'ijnajche. 10Miché'e miyen huárɨni ɨ́ 'uuca mej mi seica miyen ráamua'areere mej rɨ́'ɨ tí'iteteɨte. Miché'e miyen tiú'uruuren a'ij tɨ tí'ixɨ'epɨ'ɨn, a'iné ayée pu tihua'uvíjte'e a'ɨ́mej ɨ́ 'uuca ɨ́ mej miyen tiú'ujseijrata mej miyen rá'astijre'e ɨ́ Dios jemi. 11Ayee pu ruxe'eve'e a'ɨ́mej jemi ɨ́ mej 'uuca mej mi ráarɨ'ɨren miyen ti'inamuáara, majta miyen tihua'ará'astijre'en ɨ́ teteca. 12Canu hua'atá'aca a'ɨ́mej ɨ́ 'uuca mej mi tihuá'umua'aten u teyujta'a ɨ́ teteca, ni mej majta tíhua'uta'aíjte'en. Ruxe'eve'e tɨ a'ɨ́ɨn 'ɨ́ita'a a'uun teyujta'a caí avé'eniuuca'an. 13Ayee pu'u tí'een, a'iné Dios pu amuacaícan Adán huatétaahuaca'a. Ajta á'iyen a'ɨ́ɨn Eva huatétaahuaca'a. 14Ajta, a'ɨ́ɨn Adán, a'ɨ́ɨ pu ramua'areereca'a a'ij tɨ rɨjcaa tɨ́'ɨj auteájturaa ɨ́ Dios jemi. Capu ja'atɨ́ ráacuanamua. Mɨ́ ajta a'ɨ́ɨn Eva, Satanás pu xaa ráacuanamua. A'ɨ́j pu jɨ́n a'aturáa já'araa ɨ́ Dios jemi. 15Aru Dios pu hua'irátuaasin a'ɨ́mej ɨ́ 'uuca matɨ́'ɨj a'ɨ́ɨme tiyaúumua'a muá'ara'ani tɨ pua'a miyen á'ateeren mej té'atzaahuate'e, majta mej rɨ́'ɨ tihuá'ajcha'ɨ́ɨ ɨ́ seica. Majta mej urarɨ́'enejme'eni ɨ́ ru tzajta'a me'ɨ́jna jɨme'e mej miyen huárɨni a'ij tɨ tiraavíjte'e.

will be added

X\