1 Timuteeyu 1

1Inee, i nej i'i Pablo, nee nu ne'ɨ́n pú'een seɨ́j tɨ ravaɨre'e a'ɨ́jna ɨ́ Cɨríistu'u tɨ ajta Jesús pú'een. Ayee pu éeni'icɨ'e na'antíhuau a'iné ayée pu tinaata'aíj ɨ́ Dios tɨ tu'irájtuaa, ajta ɨ́ Cɨríistu'u tɨ ajta i'i Jesús, ɨ́ tej rajchú'eve'e. 2Ayee nu yé tí'imuayu'use'e mú'ee, Timoteo, pej piyen nemuari yee niyauj a'iné mú'ee pej pajta piyen che'atá pena'a tzáahuati'ira'a rá'astijre'e ɨ́ tavástara'a netɨ́j inee. Ayee nu tí'ijhuauhuau mú'eetzi jɨme'e tɨ a'ɨ́ɨn ɨ́ Dios ɨ́ tɨ tá'iya'upua, ajta a'ɨ́ɨn ɨ́ Cɨríistu'u tɨ ajta Jesús ɨ́ i'i tavástara'a, miché'e me'ɨ́n rɨ́'ɨ timuaacha'ɨ́j muá'ara'ani, miché'e majta muá'ancu'uvajxɨ'ɨn, miché'e majta rɨ́'ɨ mu'uhuáruuren ɨ́ á'a tzajta'a. 3Netɨ́'ɨj ne'uun aumé'ecaa u Macedonia, ayée nu timuaatáhuaviiri'i pej pe'uun a'uteáturan a'ujna Éfeso. Neajtahua'a nu niyen tí'imuahuavii pej pe'uun a'uteáturan pej pi piyen tihua'utá'ijmɨi ɨ́ seica ɨ́ teteca mej mi caí ché'e miyen tihuá'amua'ate me'ɨ́jna jɨme'e ɨ́ niuucari tɨ hua'itzi jɨ́n namuajre'e. 4Mata'aj caí ché'e me'ɨ́jna namuajra a'ij mej ti'itɨ́j tihuá'a'ixaate'e me'ɨ́jna jɨme'e a'ij metiteejnéj ɨ́ huáacɨxa'astemua'ame'en. Cu xɨee mecaí ja'anáj ra'antipuá'ajte'esin mej miyen raataxáj yee a'ii pu a'ɨ́ɨn pú'een tɨ ayén huanéj ɨ́ seɨ́j jetze, ajta ɨ́ seɨj, seɨ́j pu ajta jetzen huanéj asta mena'a caí e'ará'asti ɨ́ Dios jemi. Naíjmi'i tɨ́j na'a, ayée pu'u tí'ivaɨre'e mej mi huateújne'usi'ite'en ɨ́ teɨte me'ɨ́jna jɨme'e ɨ́ mej caí a'ij tirú'umua'aree. Capu ti'itɨ́j vaɨre'e mej mi raanaíjmire'en a'ij tɨ tí'ijxe'eve'e ɨ́ Dios. Tɨ́'ij ja'atɨ́ ayén raanaíjmire'en, ayée pu tiú'ujxe'eve'e tɨ a'ɨ́ɨn ja'atɨ́ ayén tirá'antzaahuate'en ɨ́ Dios. 5Ayee tu een jɨ́n tí'imua'ijcate'e mej mi huaújxe'eve'en seɨj majta seɨj me'ɨ́jna jɨme'e ɨ́ mej urarɨ́'en ɨ́ ru tzajta'a, majta ɨ́ mej rɨ́'ɨ mé titeumuámua'arejme, majta ɨ́ mej tzáahuati'ira'a jɨ́n rá'astijre'e ɨ́ tavástara'a. 6Seica mú meri ya'uhuá'axɨ mej miyen 'eene'e. A'ɨ́j mú jɨ́n autéjhuii mej miyen tiu'utaxáj me'ɨ́jna jɨme'e ɨ́ niuucari tɨ caí ti'itɨ́j vaɨre'e. 7Ayee mú tí'ijxe'eve'e mej te'enteárute me'ɨ́jna jɨme'e mej tihuá'umua'aten a'ij tɨ huataújmua'a ɨ́ niuucari ɨ́ mej jɨ́n tí'aijta tɨ Moises ra'uyú'uxaca'a. Mɨ́ majta a'ɨ́ɨme, camu a'atzu yaú'itɨe a'ij mej ti'ixa. Camu majta ramua'aree a'ij tɨ een me'ɨ́jna jɨme'e ɨ́ mej jɨ́n miyen raataxáj yee ayée pu ti'ayajna. 8Teen tu ramua'aree tɨ tí'ivaɨre'e a'ɨ́jna ɨ́ niuucari ɨ́ mej jɨ́n tí'aijta, Moises tɨ ra'uyú'uxaca'a. Tɨ́ ij ayén ti'itéva'ɨrihua'an, ayée pu ruxe'eve'e mej nain jɨ́n ra'ará'astijre'en a'ij tɨ tiú'ujxe'eve'e. 9Teajta, tiyen tí'ijmua'aree tɨjɨ́n ayée mú een jɨ́n ra'uyú'uxaca'a a'ɨ́jna ɨ́ niuucari ɨ́ mej jɨ́n tí'aijta mej mi hua'utá'ijmɨi a'ɨ́mej ɨ́ mej a'ij pua'a titetiújcha'ɨɨ. Camu me'ɨ́jna jɨ́n hua'utá'ijmɨijra a'ɨ́mej ɨ́ mej rɨ́'ɨ mé titeumuámua'aree ɨ́ ru tzajta'a. A'ɨ́ɨme mú xaa me'ɨ́jna jɨ́n hua'utá'ijmɨijra ɨ́ mej caí ranamuajracu a'ij tɨ tirá'axa ɨ́ niuucari ɨ́ mej jɨ́n tí'aijta, majta a'ɨ́mej ɨ́ mej caí rá'astijre'e a'ij tɨ tí'ijxe'eve'e ɨ́ Dios. Majta seica, a'ii mú a'ɨ́ɨn pú'een ɨ́ mej rá'axɨeehuari'i ɨ́ hua'aye'ira, majta a'ɨ́ɨme ɨ́ mej a'ij pua'a titetiújcha'ɨɨ, majta a'ɨ́ɨme ɨ́ mej rutáàta cui'ica, na'ari runáàna, ja'atɨ́ tɨ na'a tɨ tí'itecui'ica. 10Ayee mú majta ɨ́ niuucari jɨ́n hua'utá'ijmɨijra a'ɨ́mej ɨ́ mej xána'acɨra'a 'úucate jemi, majta a'ɨ́mej ɨ́ mej che'atá mena'a xána'acɨra'a huá'a jamuan ɨ́ tɨ'ɨríi ca'ɨ́n huá'a jamuan seica ɨ́ teteca. Ayee mú che'atá seica me'ɨ́jna jɨ́n ɨ́ niuucari hua'utá'ijmɨijra a'ɨ́mej ɨ́ mej seica vivi'i mej mi tihua'umuáriste'en ca'anéeri jɨme'e, majta a'ɨ́mej ɨ́ mej tí'ihua'itaca, majta a'ɨ́ɨn ɨ́ mej tí'itecuanamuajca. Ti'itɨ́j tɨ na'a tɨ caí naa 'een, tɨ seɨcɨé 'een, a'ɨ́ɨ mú hua'utá'ijmɨijra me'ɨ́jna jɨme'e ɨ́ niuucari ɨ́ mej jɨ́n tí'aijta, ti'itɨ́j tɨ na'a mej caí ranamuajracu ɨ́ niuucari tɨ rɨ́'ɨ tiú'uruure ɨ́ tiú'utzajta'a. 11A'íjna i niuucari tɨ rɨ́'ɨ tiú'uruure, a'ɨ́ɨ pu a'ɨ́jna jɨ́n ayén tirá'axa a'ij tɨ tí'iraxa ɨ́ niuucari tɨ naa namuajre'e, tɨ ajta jɨ́n Dios tu'irájtuaani. Ajta a'ɨ́ɨn Dios, a'ɨ́ɨ pu a'ɨ́jna jɨ́n tinaa'íjca ineetzi nej ni tihua'utá'ixaate'en ne'ɨ́jna jɨme'e ɨ́ niuucari. A'ɨ́j nu jɨ́n rɨ́'ɨ tiraatá'asin ɨ́ Dios. 12Jé'ecan nu tí'ijteujtzi'ire'e ne'ɨ́jna ɨ́ Cɨríistu'u tɨ ajta i'i Jesús ɨ́ tavástara'a ɨ́ nej jetzen aránca'ane. Ayee nu een jɨ́n tí'ijteujtzi'ire'e a'iné ayée pu tirá'amitɨejte'eca'a nej caí ti'itɨ́j jɨ́n auté'ɨtze. A'ɨ́ɨ pu na'antíhuau ineetzi nej ni raatévaɨre'en. 13Jéjcua ɨmuá nu a'ij pua'a tí'ixaxa'ata'a ɨ́ Dios jemi, neajta a'ij pua'a huá'aruurejca'a a'ɨ́mej ɨ́ mej rá'astijre'e ɨ́ tavástara'a. Jéihua nu huá'ane'usi'ite'eca'a. Aru capu amɨ́n a'ij, Dios pu ná'ancu'uvajxɨ a'ɨ́jna jɨme'e nej caí ramua'areereca'a a'ij nej rɨjca, neajta caí té'atzaahuate'eca'a. 14Jéihua pu huápɨ'ɨ rɨ́'ɨ tinéjcha'ɨ́ɨ já'araa ɨ́ tavástara'a. A'ɨ́ɨ pu ajta ayén naatá'a nej ni rá'antzaahua ne'ɨ́jna ɨ́ Cɨríistu'u tɨ ajta ayén ántehuaa tɨjɨ́n Jesús. Ayee pu ajta naatá'a nej ni raxɨ́'eve'e ná'ara'ani. 15Ayee nu tí'imua'ixaate'e tzáahuati'ira'a jɨme'e tɨ ayén ti'ayajna tɨ a'ɨ́jna jɨ́n mú pa'uvé'emej íiyen chaanaca japua a'ɨ́jna ɨ́ Cɨríistu'u tɨ ajta i'i Jesús tɨ́'ij a'ɨ́ɨn hua'irájtuaani a'ɨ́mej ɨ́ mej a'ij pua'a titetiújcha'ɨɨ. Ché'e caí ja'atɨ́ ayén tí'ixajta yee capu ayén ti'ayajna. Nee nu ramua'aree a'iné nee nu ne'ɨ́n pú'een i nej jaítze'e a'ij pua'a ti'itíncha'ɨɨca'a caí máàj ja'atɨ́. 16A'ɨ́j pu jɨ́n Dios ná'ancu'uvajxɨ ineetzi i nej a'ɨ́ɨn pú'een ɨ́ nej jaítze'e a'ij pua'a ti'itíncha'ɨɨca'a tɨ́'ij a'ɨ́ɨn Cɨríistu'u tɨ ajta i'i Jesús tihua'utaseíjrate'en ɨ́ teɨte a'ij tɨ een jɨme'e ɨ́ Cɨríistu'u raayɨ́'ɨtɨ tɨ ja'atɨ́ tiu'utá'uuni'i nain jɨme'e tɨ́j na'a tɨ a'ij pua'a een. A'ɨ́ɨ pu ayén tí'ijxe'eve'eca'a mej mi miyen raaseíj a'ɨ́mej ɨ́ mej rá'antzaahuate'enche'e mej mi me'uun a'uteáturan jemin ruurican tɨ́j na'a rusén jɨme'e. 17A'ɨ́j pu jɨ́n, ayén tiú'ujxe'eve'e tej rɨ́'ɨ tiraatá'an tɨ́j na'a rusén jɨme'e, teajta tiraatateújtzi'ire'en te'ɨ́jna tɨ Tajtuhuan jɨ́n ti'itéjvee, tɨ caí ja'anáj rupuata'atan, tɨ ajta caí ja'anáj mɨ'ɨni, ɨ́ tej caí ja'anáj raseíj tajɨ́'ɨ jɨme'e. A'ii pu a'ɨ́ɨn pú'een ɨ́ tɨ a'ɨ́ɨ na'a caj ti'iDioj. 18Niyauj, mɨ pej i'i Timoteo, ayée nu tí'imua'ixaate'e a'ɨ́jna jɨme'e ɨ́ mej amuacaícan á jemi tiu'utaxájtaca'a a'ɨ́mej ɨ́ mej tí'ixaxa'ata'a ɨ́ Dios jetze me'ecan. Patá'aj piyen tiu'utatése'en temua'a naa pe'ɨ́jna jɨme'e ɨ́ pej jɨ́n tí'ivaɨre'e ɨ́ tavástara'a jemi. 19Patá'aj pauj té'atzaahuate'e, pajta mú'ee rɨ́'ɨ ti'iti'á'acha'ɨɨ puá'ara'ani ɨ́ a'atzajta'a tɨ́'ij caí a'uun huataseíjre'en ti'itɨ́j tɨ tiu'utévi'iraste'e. Seica mú meri mé rúuhua'axɨ mej té'atzaahuate'eca'a, majta, a'ɨ́ɨ mú raatéxɨeehuataca'a mej rɨ́'ɨ té'useijre'ecaa ɨ́ ru tzajta'a. Ayee mú jɨ́n huarɨ́n, nain pu e'ehuaújpua'arixɨ ɨ́ mej jɨ́n té'atzaahuate'eca'a. 20A'ɨ́mej jemi nu ti'ixa ɨ́ mej hua'apua, a'ɨ́jna ɨ́ Himeneo, ajta a'ɨ́jna ɨ́ Alejandro. A'ɨ́mej nu neri tiu'utátui ɨ́ Satanás jemi mej mi ráamua'ati mej caí ché'e a'ij pua'a tiraatá'an ɨ́ tavástara'a a'ɨ́jna jɨme'e a'ij mej rɨcɨ.

will be added

X\