1 Tesalonicenses 5

1Ta'ihuaamua'a, capu a'atzu ruxe'eve'e tej te'ɨ́jna jɨ́n tejá'amuayu'use'e a'atzaj tɨ pua'a yee uvé'enen ɨ́ tavástara'a, ti'itɨ tɨ xɨcáara'an jetze ajtahua'a huataseíjre'esin. 2Xu'uri ramua'aree temua'a naa tɨ ca'anacan teja'uré'enejsin. Ayee pu huataseíjre'esin tɨ́j nahua'ari tɨ uteáruti tɨ́ca'ari tzajta'a a'u tɨ tejé'enahua'an. 3Majta me'ɨ́n ɨ́ teɨte, ayée mú ti'ixáata muá'aju'un tɨjɨ́n: “Capu ché'e ti'itɨ a'ij rɨcɨ. Pu'uri tiu'upuá'areajraa.” Tɨ pua'a meri miyen tí'ixajta, aj pu i a'ájna teja'uré'enejsin ɨ́ xɨcáara'an tɨ jetzen hua'antipuá'ajte'esin. Ayee pu seíire'e a'ame tɨ́j 'ɨ́ita'a tɨ ra'utacuí'ine. Capu huatárɨ'ɨristari mej huatá'uuna mej mi caí rajpuaíitzi muá'ara'ani. 4Mɨ seajta mú'een, ta'ihuaamua'a, caxu ché'e tɨ́ca'amiste'e seijre'e. A'ɨ́j pu jɨ́n, caí ché'e mú'ejmi japua cájveti a'ɨ́jna xɨcáara'an jetze. Capu ayén teja'uré'enejsin mú'ejmi jemi tɨ́j ɨ́ nahua'ari tɨ a'uun a'uteáruti tɨ́ca'ari tzajta'a. 5Capu a'atzu xaa ne'u, a'iné mú'een xu huá'a jetze ajtéme'ecan a'ɨ́mej jemi ɨ́ mej a'ájna é'eseijre'e a'u tɨ á'uneeri'i ɨ́ Dios jemi. Mú'een xu huá'a jetze ajtéme'ecan a'ɨ́mej jemi ɨ́ mej á'ujujhua'an tújca'ari tzajta'a. A'ɨ́j pu jɨ́n, ayén tiraavíjte'e tej tiyen huárɨni. 6A'ɨ́j tu jɨ́n caí ché'e tiyen rɨj tá'aju'un matɨ́j ɨ́ seica ɨ́ mej miyen seijre'e. Cu xɨee mej cu'utzu. Tiché'e tiyen é'ene'e tá'ara'ani tej atanéjne'ere, tej rɨ́'ɨ mé titeumuámua'aree. 7Majta me'ɨ́n ɨ́ mej cu'utzu, ayée mú tí'itecu'utzu tɨ́ca'amiste'e, majta me'ɨ́n ɨ́ mej rutá'aruaijve'e, a'ɨ́ɨ mú rutá'aruaijve'e tɨ́'ɨj auj huatɨ́ca'a. 8Mɨ teajta iteen, a'iné teen tu huá'a jetze ajtéme'ecan a'ɨ́ɨme jemi ɨ́ mej néeriste'e á'ujujhua'an ɨ́ Dios jemi, tiché'e tiyen rɨ́'ɨ titejá'ujujhua'ane'en. Tiché'e teajta rá'antzaahuate'en ɨ́ tavástara'a. Tɨ pua'a tiyen huárɨni, a'ɨ́ɨ pu tavástara'a ta japua niuuni. Tiché'e teajta huátaxe'eve'en seɨj teajta seɨj. Tɨ pua'a tiyen huárɨni, ayée pu xaa huatárɨ'ɨristari tej tiyen ti'ijchú'eve'e tɨ Dios tu'irájtuaani. 9Ayee pu een a'iné capu Dios ayén tiraaxɨ́'epɨ'ɨntare itejmi jemi tej ti tiyen tirajpuaíitzi tá'ara'ani te'ɨ́jna jɨme'e tɨ Dios ti'itɨj jɨ́n tita'uxɨ́jte'en. Capu xaa ne'u, sino ayée pu Dios ayén titaaxɨ́'epɨ'ɨntari'iri'i tɨ a'ɨ́ɨn tavástara'a tɨ ajta i'i Jesús tɨ i'i Cɨríistu'u, a'ɨ́ɨ pu tu'irátuaasin. 10A'ɨ́ pu huamɨ́'ɨ ta jetze me'ecan tej ti tiyen ruuri tá'ara'ani jamuan ɨ́ tavástara'a, tetɨ́j tena'a a'achú tej pua'amé. Capu amɨ́n a'ij, tej teuj ruuri na'ari teri huácuii, naími'i tu huateáturaasin jemin tɨ́j na'a rusén jɨme'e. 11A'ɨ́j xu jɨ́n ca'aníjra'a tiu'utá'an seɨj seajta seɨj. Setá'aj seuj tiu'utévaɨre'en. Jee xaa, xu'uri siyen rɨcɨ seɨj seajta seɨj. 12Mɨ sej ta'ihuaamua'a, ayée tu tejá'amuahuavii sej si rɨ́'ɨ tihuájcha'ɨɨ se'ɨ́mej ɨ́ ruvaújsimua'a, ɨ́ mej rɨ́'ɨ tí'imɨjhuaca mú'ejmi jemi, ɨ́ mej majta me'ɨ́jna jɨ́n antiújmua'aree mej tejamuáamua'aten a'ij tɨ tí'ijxe'eve'e ɨ́ tavástara'a. A'ɨ́ mú majta ca'aníjra'a amuaatá'aca. 13Ché'e ayén tejamuá'amitɨejte'e mej jeíhua huápɨ'ɨ rɨ́'ɨ tí'iteteɨte a'ɨ́jna jɨme'e mej miyen tí'imɨjhuaca mú'ejmi jemi, sej si siyen rɨ́'ɨ tí'iteseijre'e ɨ́ ru tzajta'a. 14Ayee tu teajta tejá'amuahuavii sej si rɨ́'ɨ tihua'utá'ixaate'en a'ɨ́mej ɨ́ mej caí tí'imuarɨ'ecu mej mi majtáhua'a tiu'umuárɨ'en. Sej si ca'aníjra'a hua'utá'an a'ɨ́mej ɨ́ mej caí rucacá'ane ɨ́ ruxɨ́ejniu'uca jetze. Setá'aj seajta hua'utévaɨre'en a'ɨ́mej ɨ́ mej caí a'ij tí'ijviicua'i. Setá'aj naíjmi'ica á'acu'uvee. 15Rɨ́'ɨ xu'u mú'een tɨ ij caí ja'atɨ ayén che'atá na'a a'ij pua'a ráaruuren ɨ́ ruxɨ́'ej tevi tɨ ajta a'ij pua'a ráaruu a'ɨ́jna. Ayee xu tí'itese'e sej si ja'anáj tɨ na'a rɨ́'ɨ tihuájcha'ɨɨ seɨj seajta seɨj, seajta naíjmi'ica. 16- 17Setá'aj rutémua'ave'e ja'anáj tɨ na'a. Caxu ja'anáj ratapuá'ajtacare'en sej huatéjniuuni ɨ́ Dios jemi. 18Setá'aj nain jɨ́n tí'ijteujtzi'ire'e ɨ́ Dios a'iné ayée pu tí'ijxe'eve'e sej siyen huárɨni a'iné Jesús, ɨ́ tɨ i'i Cɨríistu'u, a'ɨ́ɨ pu a'amua japua niuuni. 19Caxu ra'antánaamuan se'ɨ́jna ɨ́ xɨéjniu'ucare'ara'an ɨ́ Dios. 20Caxu seajta a'ij pua'a tihuá'aseijra a'ɨ́mej ɨ́ mej tí'ixaxa'a ɨ́ Dios jetze me'ecan, sino rɨ́'ɨ xu tihuá'unamua temua'a naa a'ij mej ti'ixa. 21Naa xu temua'a tiu'uta'íhua'un ti'itɨ tɨ na'a i'i xɨ́'epɨ'ɨn na'ari caí. Caxu ja'anáj yá'uhua'anan ɨ́ tɨ i'i xɨ́'epɨ'ɨn. 22Tɨ pua'a ti'itɨ ayén tejamuá'amitɨejte'e tɨ a'ij pua'a een, caxu ja'anáj siyen rɨjca ti'itɨ tɨ na'a tɨ ayén a'ij pua'a é'eene'en. 23Ajta a'ɨ́ɨn Dios, a'ɨ́jna tɨ amua'anpuá'ajte'en, ché'e a'ɨ́ɨn amuaaté'avaa tɨ ij nain jɨ́n amuaanaíjmire'en. Ché'e Dios amuaaté'avaa mú'ejmi sej si caí ti'itɨ jɨ́n a'aturáa u á'amuaxɨejniu'uca tzajta'a nusu á'amuamua'atziira'a jetze na'ari ɨ́ rutevij jetze a'ájna xɨcáara'an tɨ jetzen ajtahua'a yé uvé'enejsin ɨ́ tavástara'a, a'ɨ́jna ɨ́ Jesús tɨ ajta i'i Cɨríistu'u. 24Capu a'atzu até'ɨtzea'ara a'ɨ́jna tɨ ayén tejamuaatajé. A'ɨ́ pu ajta araúrastejsin a'ɨ́jna jɨme'e ɨ́ tɨ jɨ́n te'ataújratziiri'i. 25Ta'ihuáamua'a, setá'aj rahuauca ɨ́ Dios jemi téjmi jɨme'e. 26Setá'aj seajta hua'utateújte'en temua'a naa naíjmi'ica ɨ́ ta'ihuaamua'a. 27Ayee nu tejá'amua'íjcate'e jemin ɨ́ tavástara'a sej raata'aíjta mej hua'utánamuajriste'en a'íjna i yu'uxari naíjmi'ica ɨ́ ta'ihuaamua'a. 28Ajta a'ɨ́ɨn tavástara'a, ɨ́ Jesús tɨ ajta i'i Cɨríistu'u, ché'e a'ɨ́ɨn rɨ́'ɨ tejamuáacha'ɨɨn mú'ejmi. Ché'e ayén té'ara'ani.

will be added

X\