1 Tesalonicenses 4

1Ajta íjii, ta'ihuaamua'a, tu'uri tiyen tejámuaatá'ixaa a'ij sej ye'í titetiújcha'ɨɨ sej si rɨ́'ɨ tiraatá'an ɨ́ Dios. Jee xaa, xu'uri siyen rɨ́'ɨ titetiújcha'ɨɨ. Mɨ teajta iteen, ayée tu tejá'amuahuavii Jesús jetze me'ecan sej si siyen jaítze'e rɨ́'ɨ titetiújcha'ɨɨ. Ten tu ca'aníjra'a amuaatá'asin sej si jaítze'e rɨ́'ɨ titetiújcha'ɨɨ tɨ́j na'a tɨ yú auca'itɨ́ a'ame. 2Xu'uri xaa ramua'aree ti'itɨ tɨ niuucarijra'a pú'een ɨ́ tej jɨ́n teri amuá'ixaa Jesús jetze me'ecan. 3Ayee pu tí'ijxe'eve'e ɨ́ Dios sej si urarɨ́'ene'en xá'ara'ani, ajta nu'u sej raatapuá'ajta sej ja'atɨ jamuan tiú'ujxana'acɨra'ate. 4Ayee pu tí'ijxe'eve'e sej siyen tí'ijmua'areere sej siyen ráaruuren ɨ́ rutevij sej si siyen huárɨni a'ij tɨ tiraavíjte'e tɨ pua'a ja'atɨ huaténe'ɨche. Ché'e a'ɨ́ɨn ayén ratévi'itɨne'en mej mi raaseíj ɨ́ seica tɨ xɨ́'epɨ'ɨn huarɨ́j nain jɨme'e. 5Ché'e a'ɨ́ɨn caí ché'e na'a ratévi'itɨne'en a'ij mej rɨcɨ a'ɨ́ɨme ɨ́ teɨtejra'a ɨ́ mej caí rá'astijre'e ɨ́ Dios, matɨ́j mena'a pua'amé yen huachéjme íiyen chaanaca japua, ɨ́ mej ché'e mena'a néjne'ɨche a'ij tɨ tihuá'amitɨejte'e rumua'atzíira'a jɨme'e tɨ a'ij pua'a een. 6Ajta nu'u ayén tiú'ujxe'eve'e tɨ ja'atɨ caí ja'anáj auteáturan a'ɨ́jna jɨme'e tɨ a'ij pua'a ráaruuren ɨ́ ruxɨ́'ej tevi a'ɨ́jna jɨme'e tɨ ruxána'acɨra'aten jamuan ɨ́ra'ara'an ɨ́ ru'ihuaara'a. Ayee pu'u, a'iné Dios pu puaíjtzi raatá'asin a'ɨ́jna tɨ ayén rɨni. Tu'uri tejmí'i tiyen tejámuaatá'ixaa. 7Capu ayén titaatajé ɨ́ Dios tej ti tiyen tiu'uxána'acɨre'en sino a'ɨ́ɨ pu ayén ta'antíhuau tej ti urarɨ́'enejme'eni ɨ́ tatzajta'a. 8A'ɨ́j pu jɨ́n, tɨ pua'a ja'atɨ caí rá'atzaahuate'e a'ij tej tejá'amua'ixaate'e te'ɨ́jna jɨme'e, a'ɨ́ɨ pu caí mé rúuhua'axɨjsin ɨ́ niuucari tɨ teteca jemi é'eme'ecan. Capu a'atzu, sino a'ɨ́ɨ pu xaa mé rúuhua'axɨjsin ɨ́ Dios tɨ ruxɨ́ejniu'uca huata'íteca'a tɨ mú'ejmi jemi huateáturan. 9Capu a'atzu ruxe'eve'e nej niyen tejá'amuayu'use'e a'ɨ́jna jɨme'e sej huaújxe'eve'en sej si temua'a naa tiú'urihuaamua'atan. Dios pu ari ramua'aree sej siyen huaújxe'eve'en. 10Jee xaa, ayej ti'ayajna sej huá'axe'eve'e ɨ́ ru'ihuaamua'a naíjmi'ica a'achú mej pua'amé a'u mej a'uchéjme tɨ́j na'a a'utɨ́ huatacá'a u Macedonia. Mɨ teajta iteen, ayée tu'u ca'aníjra'a amuaatá'asin sej si seuj jaítze'e huaújxe'eve'en. 11- 12Ten tu teajta tiyen tejá'amua'íjcate'e sej si rɨ́'ɨ titetiújcha'ɨɨ tɨ ij caí ti'itɨ á'amuajaaxɨejte'e, sej si antiújmua'areere se'ɨ́jna jɨme'e a'ij tɨ tiraacɨ́'ɨ seɨj ajta seɨj. Ajta i'i, ché'e ja'atɨ tiu'umuárɨ'en ɨ́ rumuárɨ'eri'ire'ara'an jɨme'e seɨj ajta seɨj a'ij tɨ tirú'umua'aree. Ayee tu amuacaícan tejámuaa'íjca mej mi rɨ́'ɨ tejamuaaséij a'ɨ́ɨme ɨ́ mej té'astijre'e ɨ́ tavástara'a jemi, ajta tɨ ij caí ti'itɨ tejamuá'aturaate'e. 13Jɨ́me'en a'ɨ́mej ɨ́ mej meri huácuii, ayée mú seijre'e: cu xɨee mej cu'utzu. Ayee tu tí'ijxe'eve'e sej ráamua'aree tzáahuati'ira'a jɨme'e sej si caí ché'e ruxɨéemɨste'e matɨ́j a'ɨ́ɨme ɨ́ seica ɨ́ mej caí rachú'eve'e ɨ́ tavástara'a. 14Ayee tu té'atzaahuate'e iteen: tɨ́'ɨjtá Jesús huamɨ́'ɨ, a'ɨ́ɨ pu ajtahua'a huatarúj. A'ɨ́j tu jɨ́n tiyen teajta té'atzaahuate'e tɨ a'ɨ́ɨn Dios ajtahua'a hua'arávi'itɨn jamuan ɨ́ Cɨríistu'u a'ɨ́mej ɨ́ mej meri huácuii a'ɨ́jna jɨme'e ɨ́ mej majta meri ra'ará'astijre me'ɨ́jna ɨ́ Jesús. 15Ayee tu tejá'amua'ixaate'e ɨ́ tavástara'a jetze me'ecan tɨ ayén éene'e á'ara'ani. Catu anáaté'ee tá'aju'un iteen i tej tiyen ruuri seijre'e yen chaanaca japua tɨ́'ɨj amɨ́n ajtahua'a huataseíjre'en ɨ́ tavástara'a sino a'ɨ́ɨme ɨ́ mej meri huácuii, a'ɨ́ɨ mú xaa anáaté'ee muá'aju'un. 16Tɨ́'ɨj Dios raataxájta ɨ́ niuucari tɨ jɨ́n tíhua'uta'aíjte'en, a'úu pu e'icánamuáare'e a'ame tɨ ja'atɨ ucáajijhua ɨ́ trompeeta jetze a'ujna Dios tɨ é'eseijre'e. Ajta u e'icájijhua a'ɨ́jna tɨ jemin tí'ivaɨre'e. Aj pu xaa i tavástara'a u e'icánejsin u júte'e. Majta me'ɨ́n ɨ́ mej huácuii, ɨ́ mej anáaté'ee ra'ará'astijre, a'ɨ́ɨ mú a'itajú'un a'u mej e'eve'enámi'ihuajme'ecaa. 17Teajta á'iyen iteen, i tej teuj ruuri, i tej yen seijre'e ɨ́ chaanaca japua, a'ɨ́ɨ pu ajta tá'avi'itɨn ɨ́ jaitɨri jetze huá'a jamuan ɨ́ mej mauchén huatarúj. Ayee tu seíire'e tá'aju'un jamuan ɨ́ tavástara'a tɨ́j na'a rusén jɨme'e. 18A'ɨ́j xu jɨ́n, rɨ́'ɨ xu tiu'utaúra'an mú'een rujɨ́ɨmua'a se'ɨ́jna jɨme'e i niuucari i nej já'amua'ixaate'e.

will be added

X\