1 Tesalonicenses 3

1Tetɨ́'ɨj caí ché'e té'eviicua'i tej caí ramua'aree a'ij tɨ tejá'amuavaɨre'eca'a, ayée pu titá'amitɨejte'eca'a itejmi tɨ ayén jaítze'e tiraavíjte'e tej tiyen tajɨ́ɨmua'a huateáturan teyujna Atenas. 2- 3A'ɨ́j tu jɨ́n, te'ɨ́ɨn Timoteo tiu'uta'íti'iri'i tɨ u a'atanén mú'ejmi jemi. A'ɨjna ɨ́ Timoteo, a'ii pu a'ɨ́ɨn pú'een ɨ́ ta'ihuaara'a, ajta Dios pu ra'avé'ehuau tɨ ij ta jamuan á'uche'ecane'en tej tihua'utá'ixaate'en ɨ́ niuucari tɨ jɨ́me'en raxa a'ij tɨ huarɨ́j ɨ́ Cɨríistu'u. Ayee tu een jɨ́n tiraata'íti'iri'i tɨ ij a'ɨ́ɨn Timoteo ca'aníjra'a amuaatá'an sej si huateújca'anen ɨ́ ru tzajta'a, tɨ ij caí seɨj raatéxɨeehuata a'ɨ́jna jɨme'e tɨ jeíhua tirajpuaíjtzi íjii. Xu'uri temua'a ramua'aree tɨ ari tiraaxɨ́'epɨ'ɨntari'iri'i tej tiyen tirajpuaíitzi tá'ara'ani. 4Jee xaa ne'u, tetɨ́'ɨj te'uun a'uté'eca'a mú'ejmi jemi, ayée tu amuacaícan tejamuá'ixaa tej tiyen tirajpuaíitzi tá'ara'aniche'e te'ɨ́jna jɨme'e mej a'ij pua'a taruurénche'e. Ajta ayén teja'uré'ene. A'ɨ́j xu seri mua'aree. 5Neajta nu tiraatániu'uche nej ni ráamua'aree a'ij tɨ tejá'amuavaɨre'eca'a, tɨ pua'a seuj té'atzaahuate'e. Canu ché'e té'eviicua'iraca'a, a'iné nu'uri tí'itziɨɨne'eca'a ne'ɨ́jna jɨme'e tɨ a'ɨ́ɨn tiyaaru'u amuaatamuárɨ'eriste'en mú'ejmi jemi sej si caí ché'e té'antzaahuate'en, tɨ́'ij caí ché'e ti'itɨ vaɨre'e á'ara'ani naíjmi'i ɨ́ tej jɨ́n tiu'umuárɨej mú'ejmi jemi. 6Aru a'ɨ́ɨn ɨ́ Timoteo, pu'uri mú'ejmi jemi u e'erájraa. Tí'ita'ixaate'e a'ɨ́jna ɨ́ tej jɨ́me'en tátemua'ave'e sej nu'u seuj té'atzaahuate'e, seajta huaújxe'eve'e seɨj seajta seɨj. Seajta nu'u seuj rutémua'ave'e setɨ'ɨjtá ta'utámua'aree itejmi. Mú'een xu nu'u raxɨ́'eve'e sej taaseíj. Teajta iteen, ayée tu che'atá tena'a huápɨ'ɨ tí'ijxe'eve'e tej amuaaséij. 7Ayee nu tejá'amua'ixaate'e, mú'een ta'ihuaamua'a. Jé'ecan pu rɨ́'ɨ taatá'a tetɨ́'ɨj ráamua'areeri'i sej seuj siyen té'atzaahuate'e. Pu'uri xaa rɨ'ɨrí tej te'utáviicua'i nain jɨme'e ɨ́ tej jɨ́n rajpuaíjtzi, ajta ɨ́ tej jɨ́n taxɨemɨste'eca'a. 8A'iné mú'een xu seuj té'eviicua'i sej seuj rá'atzaahuate'e ɨ́ tavástara'a, pu'uri ajtahua'a í'irɨ'ɨri nej rɨ́'ɨ mé tiu'utéveeca. 9A'ɨ́j tu jɨ́n jé'ecan huápɨ'ɨ tí'ijteujtzi'ire'e ɨ́ Dios mú'ejmi jɨme'e te'ɨ́jna jɨme'e tej jeíhua huápɨ'ɨ tátemua'ave'e ɨ́ mú'ejmi jemi a'iné mú'een xu rɨ́'ɨ titatá'aca. 10Nain tújca'ari tzajta'a, ajta nain tɨ́ca'ari tzajta'a, ca'anín tu jɨ́n rahuavii tɨ Dios ayén tatá'acare'en tej ti teajtáhua'a amuaaséij, teajta tejámuaatévaɨre'en tej raanaíjmire'en ti'itɨ tɨ na'a tɨ tejamuá'aturaate'e a'ɨ́jna jɨme'e sej rá'atzaahuate'e ɨ́ tavástara'a. 11Ajta a'ɨ́ɨn ɨ́ Dios ɨ́ tej rájya'upua, ajta a'ɨ́ɨn ɨ́ tavástara'a tɨ ajta i'i Jesús, miché'e me'ɨ́n taatá'acare'en tej ti te'uun a'atenén mú'ejmi jemi. 12Ché'e a'ɨ́ɨn tavástara'a ruxɨ́'evi'ira'a jɨ́n amuaatá'an sej si jeíhua huápɨ'ɨ huaújxe'eve'en seɨj seajta seɨj, sej si seajta siyen che'atá sena'a tihuá'uxe'eve'en naíjmi'ica ɨ́ teɨte a'achú mej mena'a pua'amé ɨ́ á'amuaxɨ'ej teɨte tetɨ́j iteen tejá'amuaxe'eve'e. 13Ché'e ajta a'ɨ́ɨn amuaatá'an ɨ́ ca'aníjra'a ɨ́ á'amuatzajta'a sej si caí ti'itɨj jɨ́n auteáturan ɨ́ Dios jemi ɨ́ tej rájya'upua, sej si seajta siyen urarɨ́'enejme'eni ɨ́ a'amua tzajta'a a'ɨ́jna xɨcáara'an jetze tɨ ajtahua'a huataseíjre'en a'ɨ́jna ɨ́ tavástara'a tɨ ajta i'i Jesús, jamuan naíjmi'i ɨ́ mej tí'ivaɨre'e u ta japua.

will be added

X\