1 Tesalonicenses 1

1Inee Pablo, ajta a'íjna i Silvano, ajta a'íjna i Timoteo, ayée tu tejá'amuayu'use'e mú'ejmi mɨ sej Tesalónica é'eche, sej seajta tiújse'ɨri ɨ́ Dios jemi, seajta jemin ɨ́ tavástara'a, a'ɨ́jna ɨ́ Jesús tɨ ajta i'i Cɨríistu'u. Ayee tu tí'ijxe'eve'e tɨ Dios rɨ́'ɨ tejamuáacha'ɨɨn, tɨ ajta rɨ́'ɨ amuáaruuren a'amua tzajta'a sej si rɨ́'ɨ ru'ihuaamua'a xá'ara'ani. 2- 3Ja'anáj tɨ na'a tu rɨ́'ɨ tiraatá'aca ɨ́ Dios jemi mú'ejmi jɨme'e. Ja'anáj tɨ na'a tej huavii ɨ́ Dios, teajta tu rá'ixaate'e mú'ejmi jɨme'e, a'iné mú'een xu jeíhua tí'imuarɨ'e se'ɨ́jna jɨme'e sej rá'astijre'e se'ɨ́jna ɨ́ tavástara'a. Seajta siyen che'atá sena'a jeíhua tí'imuarɨ'e se'ɨ́jna jɨme'e sej raxɨ́'eve'e sej hua'utévaɨre'en ɨ́ seica ɨ́ mej é'eseijre'e ɨ́ Dios jemi. Seajta mú'een, caxu ja'anáj raatéxɨeehuataca'a ɨ́ sej rachú'eve'e ɨ́ tavástara'a a'ɨ́jna ɨ́ Jesús tɨ ajta i'i Cɨríistu'u tɨ́'ij a'ɨ́ɨn amua'irájtuaani, a'u sej yé'ejpuaíjtzica'a. 4Ayee nu tejá'amua'ixaate'e mɨ sej ta'ihuaamua'a. Tu'uri ramua'aree tɨ Dios já'amuaxe'eve'e, ajta a'ɨ́ɨ pu amua'avé'ehuauxɨ. 5Ayee tu een jɨ́n ramua'aree a'iné tetɨ́'ɨj tiyen tejamuá'ixaa ɨ́ niuucari jɨme'e tɨ jɨ́me'en raxa ɨ́ Dios, caxu ché'e sena'a ráanamuajri'i sino a'ɨ́j xu jɨ́n muárɨ'eri'ire'ara'an ɨ́ xɨéjniu'ucare'ara'an ɨ́ Dios, a'ɨ́j xu jɨ́n temua'a naa yaú'itɨée xa'araa ɨ́ ru tzajta'a. A'ɨ́j xu seajta jɨ́n rú'umua'areereca'a tɨ ayén ti'ayajna a'ɨ́jna ɨ́ niuucari. Mú'een xu seajta siyen taseíjraca'a ti'itén tej teɨtejra'an pu'eene'e, teajta tiyen tí'ivaɨre'eca'a mú'ejmi jɨme'e. Ayee tu huarɨ́j mú'ejmi jemi sej si ráamua'aree a'ij tɨ tiraavíjte'e ɨ́ tavástara'a jemi. 6Seajta mú'een á'iyen xu siyen che'atá sena'a huarɨ́j tetɨ́j iteen, ajta tɨ́j a'ɨ́ɨn huarɨ́j ɨ́ tavástara'a, a'iné jeíhua xu rajpuaíjtzica'a. Capu amɨ́n a'ij. Seuche'e xu huataújtemua'ave, a'iné a'ɨ́ɨn xɨéjniu'ucare'ara'an ɨ́ Dios, a'ɨ́ɨ pu ca'aníjra'a amuaatá'a ɨ́ a'amua tzajta'a. 7A'ɨ́j mú jɨ́n, naími'i a'ɨ́ɨme ɨ́ mej e'etiújse'ɨri, a'achú mej mena'a pua'amé ɨ́ mej me'uun é'eme'ecan u Macedonia, majta ɨ́ mej me'uun é'eme'ecan u Acaya, a'ɨ́ɨ mú rɨ́'ɨ tejá'amuaseij mú'ejmi a'ij sej rɨcɨ. 8Capu a'úu na'a á'anamuajre'e mú'ejmi jemi ɨ́ niuucari tɨ jɨ́me'en raxa ɨ́ tavástara'a, sino nainjapua pu namuajre'e a'ɨ́jna jɨme'e sej seri rá'astijre'e ɨ́ Dios. A'ɨ́j pu jɨ́n caí ché'e ruxe'eve'e tej ti'itɨ huataxáj te'ɨ́jna jɨme'e. 9Jee xaa ne'u, seica mú tí'ita'ixaate'e a'ij tej tite'utéjhuii tej tiu'umuárɨ'en a'amua tzajta'a. Seajta nu'u, setɨ́'ɨj rá'antzaahua ɨ́ Dios, seajta nu'u huaja'uhuá'axɨ se'ɨ́mej ɨ́ mej caí Dioosi pú'een. Xu'uri nu'u ravaɨre'e se'ɨ́jna tɨ i'i Dios tzáahuati'ira'a jɨme'e, tɨ ajta ruuri rusén jɨme'e. 10Xu'uri nu'u íjii rachú'eve'e se'ɨ́jna tɨ yaujra'an pú'een ɨ́ Dios tɨ a'ɨ́ɨn ajtahua'a u e'icáanen u ta japua, a'ɨ́jna Dios tɨ raatarujte huá'a tzajta'a ɨ́ mɨ'ɨchite. A'ii pu a'ɨ́ɨn pú'een ɨ́ Jesús. A'ɨ́ pu tu'irátuaasin tɨ́'ij caí puaíjtzi táacɨ'ɨti tɨ Dios hua'utá'asin a'ɨ́mej ɨ́ mej yen chaanaca japua huachéjme.

will be added

X\