1 San Juan 5

1Ja'atɨ tɨ na'a tɨ ayén té'atzaahuate'e tɨ Jesús a'ɨ́ɨn pú'een a'ɨ́jna ɨ́ Cɨríistu'u tɨ Dios ra'antíhua'u, a'ɨ́jna ɨ́ ja'atɨ, a'ɨ́ɨ pu ajta Dios jetze huanéj. Ajta a'ɨ́ɨn tɨ ayén tí'ijxe'eve'e a'ɨ́jna tɨ ya'upuáara'an pú'een, a'ɨ́ɨ pu ajta ayén huá'axe'eve'e a'ɨ́mej ɨ́ tɨ ayén hua'utéya'upuajtaca'a. 2Ayee tu 'een jɨ́n tiyen tí'ijmua'aree tej jé'iyecan jɨ́n huá'axe'eve'e te'ɨ́mej ɨ́ mej yaújmua'ame'en pú'een ɨ́ Dios te'ɨ́jna jɨme'e tej tiyen tí'ijxe'eve'e ɨ́ Dios, teajta tiyen tirá'astijre'e a'ij tɨ a'ɨ́ɨn tí'ita'aijte'e. 3Ajta, ayée pu huataújmua'a a'ɨ́jna ɨ́ tej nu'u raxɨ́'eve'e ɨ́ Dios tej ti tiyen te'ɨ́jna jɨ́n ra'ará'astijre'en te'ɨ́jna ɨ́ tɨ jɨ́n tí'ita'aijte'e. Ajta, capu muárɨ'eri tej tiyen te'ɨ́jna jɨ́n ra'ará'astijre'en te'ɨ́jna tɨ jɨ́n Dios ayén tí'ita'aijte'e. 4Ayee pu a'ɨ́jna jɨ́n ayén tí'een a'iné ja'atɨ tɨ na'a tɨ ayén Dios jetze airáane, a'ɨ́ɨ pu hua'antimuá'itɨcɨ a'ɨ́mej ɨ́ mej yen seijre'e íiyen chaanaca japua. Ajta, ayée tu te'ɨ́jna jɨ́n hua'antimuá'itɨcɨ te'ɨ́jna jɨme'e tej té'atzaahuate'e. 5A'ii pu a'ɨ́ɨn pú'een tɨ hua'antimuá'itɨcɨ a'ɨ́mej ɨ́ mej yen seijre'e íiyen chaanaca japua. A'ɨ́ɨ pu a'ɨ́ɨn pú'een tɨ ayén té'atzaahuate'e tɨ Jesús a'ɨ́ɨn pɨ́rɨcɨ tɨ yaujra'an pú'een ɨ́ Dios. 6Ajta a'ɨ́jna ɨ́ Jesús tɨ Cɨríistu'u pú'een, a'ii pu a'ɨ́ɨn pú'een tɨ ayén huataseíjre itejmi jemi. Ayee tu te'ɨ́jna jɨ́n ramua'aree tɨ a'ɨ́ɨ pu jé'iyecan jɨ́n téjmi jemi huataseíjre tɨ́'ɨj ayén huámuaɨ'ɨvijhuaca'a, ajta ayén tira'iráaxɨre ɨ́ ruxuure'e tɨ́'ɨj huamɨ́'ɨ. Dios pu ayén tiraataxájtaca'a a'ɨ́jna jɨ́me'en ɨ́ Jesús tɨ́'ɨj a'ɨ́ɨn huámuaɨ'ɨvijhuaca'a. Ajta ayén che'atá na'a jɨ́me'en tiraataxájtaca'a tɨ́'ɨj Jesús huamɨ́'ɨ, majta raseíireca'a ɨ́ teɨte. 7Ajta a'ɨ́ɨn xɨéjniu'ucare'ara'an ɨ́ Dios, a'ɨ́ɨ pu ayén raataxájtave a'ɨ́jna jɨ́me'en a'iné a'ɨ́ɨ pu jé'iyecan jɨ́n tí'ixaxa'a. 8Jee xaa ne'u, mehuaíca ɨ́ mej miyen raataxájtave. A'ii pu a'ɨ́ɨn pú'een ɨ́ xɨéjniu'ucare'ara'an tɨ Dios téjmi jemi raateájtuaa. A'ii pu ajta a'ɨ́ɨn pú'een ɨ́ niuucari ɨ́ tej ráanamuajri'i tɨ́'ɨj Jesús ayén huámuaɨ'ɨvijhuaca'a. A'ii pu ajta a'ɨ́ɨn pú'een ɨ́ tej jɨ́n ra'utámua'aree tɨ Cɨríistu'u ayén tiu'umɨ́'ɨ ɨ́ cúruu jetze. Majta me'ɨ́jna ɨ́ mej huaica, naíjmi'i mú miyen che'atá mena'a tiraataxájtave. 9Ajta, tɨ pua'a tiyen tira'ancuré'an a'ij mej ti'ixa ɨ́ teɨte mej yen japuan seijre'e íiyen chaanaca japua, ayée pu jaítze'e ayén tiraavíjte'e tej tiyen tira'ancuré'an a'ij tɨ ajta ti'ixa ɨ́ Dios a'iné jaítze'e pu ruxe'eve'e a'ij tɨ a'ɨ́ɨn ti'ixa. A'ii pu a'ɨ́ɨn pú'een tɨ jɨ́me'en Dios raataxájtaca'a, tɨ raataxájtaca'a a'ɨ́jna jɨme'e ɨ́ ruyauj. 10Ja'atɨ tɨ na'a tɨ rá'atzaahuate'e a'ɨ́jna tɨ yaujra'an pú'een ɨ́ Dios, a'ɨ́jna ɨ́ ja'atɨ, a'ɨ́ɨ pu jemin seijre'e a'ɨ́jna tɨ jɨ́me'en huataújxajtaca'a. Ajta ja'atɨ tɨ na'a tɨ caí rá'atzaahuate'e ɨ́ Dios, a'ɨ́ɨ pu ayén ti'ixa tɨ nu'u tí'ihua'itaca ɨ́ Dios a'ɨ́jna jɨme'e tɨ caí rá'antzaahua a'ɨ́jna tɨ jɨ́me'en Dios raataxájtaca'a ɨ́ ruyauj jɨme'e. 11Ajta, a'ii pu a'ɨ́ɨn pú'een tɨ jɨ́me'en raataxájtaca'a, tɨ jɨ́me'en Dios ayén taatá'a tej ti tiyen ruuri huateáturan ɨ́ jemin tɨ́j na'a rusén jɨme'e. Ajta, ayée tu 'een jɨ́n ruuri tá'aju'un te'ɨ́jna jɨme'e tɨ a'ɨ́jna jetze tɨ yaujra'an pú'een, a'ɨ́j pu jetze airáninei ɨ́ tej jɨ́n ruuri tá'ara'ani. 12Ja'atɨ tɨ na'a tɨ jemin seijre'e a'ɨ́jna tɨ yaujra'an pú'een ɨ́ Dios, a'ɨ́ɨ pu ajta jemin ruuri huateáturaasin tɨ́j na'a rusén jɨme'e. Mɨ́ ajta, ja'atɨ tɨ na'a tɨ caí jemin seijre'e a'ɨ́jna tɨ yaujra'an pú'een ɨ́ Dios, capu ajta ruuri huateáturaasin ɨ́ jemin tɨ́j na'a rusén jɨme'e. 13Ayee nu 'een jɨ́n niyen tejamuaatayú'use sej si siyen tiráamua'aree sej siyen jemin ruuri huateáturaasin tɨ́j na'a rusén jɨme'e mɨ sej siyen té'atzaahuate'e se'ɨ́jna jemi tɨ yaujra'an pú'een ɨ́ Dios. 14Ajta, a'ii pu a'ɨ́ɨn pú'een tɨ ca'aníjra'a tatá'a tej ti tiyen taxɨéehua ajteáxɨɨre ɨ́ jemin. Tɨ́ pua'a tiyen ti'itɨ́j tiraatáhuavii a'ij tɨ tiraavíjte'e ɨ́ jemin, ayée tu tiráamua'aree tɨ a'ɨ́ɨn ayén tí'itanamua. 15Ajta tɨ pua'a tiyen tiráamua'aree tɨ a'ɨ́ɨn ayén tí'itanamua tɨ́j na'a a'ij tej ti'itɨ́j tiraatáhuaviira, a'ɨ́j tu jɨ́n tiyen teajta tiráamua'aree tɨ ayén titaatá'asin a'ij tɨ tiraavíjte'e a'ɨ́jna jɨ́me'en ɨ́ tej raatáhuaviiri'i. 16Tɨ́ pua'a ja'atɨ ayén tí'ijseijra tɨ a'ɨ́ɨn ihuáare'ara'an ayén te'uté'ɨtzeaara'an ti'itɨ́j jɨme'e tɨ caí ayén tí'ijcɨ'ɨti tɨ huámɨ'ɨni, ché'e a'ɨ́ɨn ja'atɨ ayén a'ɨ́jna jɨ́n tiraatáhuavii ɨ́ Dios. Tɨ́ pua'a ayén a'ɨ́jna jɨ́n huárɨni, Dios pu ajta ayén tiraatá'asin tɨ a'ɨ́ɨn ruuri huateáturan ɨ́ jemin a'ɨ́jna ɨ́ ihuáare'ara'an tɨ ayén ti'itɨ́j jɨ́n te'uté'ɨtzeaara tɨ caí ayén a'ɨ́jna jɨ́me'en tiráacɨ'ɨti tɨ huámɨ'ɨni. Mɨ́ ajta, ayée pu ajta seijre'e ɨ́ mej jɨ́n auté'ɨtzeaara'a tɨ a'ɨ́jna jɨ́n ayén tiráacɨ'ɨti tɨ ja'atɨ huámɨ'ɨni. Canu niyen tejá'amua'íjcate'e sej si se'ɨ́jna jɨ́n siyen tiraatáhuavii. 17Matɨ́j mena'a miyen me'ɨ́jna jɨ́n a'ij pua'a tí'iterɨcɨ, a'ii pu ajta a'ɨ́ɨn pú'een ɨ́ mej jɨ́n auté'ɨtzeaara ɨ́ Dios jemi. Ajta, aúche'e pu téjmi jemi seijre'e ɨ́ mej jɨ́n auté'ɨtzeaara tɨ ajta caí ayén tiráacɨ'ɨti tɨ ja'atɨ a'ɨ́jna jɨ́me'en huámɨ'ɨni. 18Teen tu tiyen tí'ijmua'aree tɨ caí ti'itɨ́j jɨ́n auté'ɨtzeaara ɨ́ ja'atɨ tɨ ayén Dios jetze airáane, sino a'ɨ́jna ɨ́ ja'atɨ tɨ Dios jetze airáane, a'ɨ́ɨ pu ayén té'ujcu'uve, ajta caí ɨ́ xɨéjniu'ucari tɨ a'ij pua'a 'een capu ra'ajtamɨ́jhua a'ɨ́jna ɨ́ ja'atɨ. 19Teen tu teajta tiyen tí'ijmua'aree tej Dios jetze ajtéme'ecan. Majta a'ɨ́ɨme ɨ́ seica ɨ́ mej yen huachéjme íiyen chaanaca japua, naíjmi'i mú rá'astijre'e me'ɨ́jna ɨ́ xɨéjniu'ucari tɨ a'ij pua'a 'een. 20Teajta tu tiyen tí'ijmua'aree tɨ a'ɨ́ɨn tɨ yaujra'an pú'een ɨ́ Dios yen huataseíjre. A'ɨ́ɨ pu ajta ayén taatá'a tej ti tiyen tiyaú'itɨée tá'ara'ani tej ti tiyen tiráamua'ati te'ɨ́jna tɨ ayén ti'ayajna. Teen tu teajta te'ɨ́jna jemi seijre'e tɨ ayén ti'ayajna. Jee xaa ne'u, teen tu teajta jemin seijre'e te'ɨ́jna tɨ yaujra'an pú'een ɨ́ Dios, a'ɨ́jna ɨ́ Jesús tɨ ajta Cɨríistu'u pú'een. A'ii pu a'ɨ́ɨn pú'een ɨ́ Dios tɨ nain jɨ́n ajta jé'iyecan jɨ́n seijre'e, tɨ ajta ayén titatá'aca tej tiyen ruuri huateáturan ɨ́ jemin tɨ́j na'a rusén jɨme'e. 21Mɨ́ sej yaújmua'ame'en pú'een, rɨ́'ɨ xu'u se'ɨ́jna jɨme'e, sej si caí raná'amiche'en ti'itɨ́j tɨ na'a tɨ caí Dios pú'een.

will be added

X\