1 San Juan 3

1Jee xaa ne'u, setá'aj se'ɨ́jna jetze tiú'umua'ati tɨ a'ɨ́ɨn ɨ́ tej rájya'upua, ayén jeíhua huápɨ'ɨ taataxɨ́'eve a'iné a'ɨ́ɨ pu xaa taatéya'upuajtaca'a. A'ɨ́j tu jɨ́n, tu'uri yaújmua'ame'en pú'een ɨ́ Dios. A'ɨ́j mú jɨ́n caí tamuajte a'ɨ́ɨme ɨ́ mej yen huachéjme ɨ́ chaanaca japua me'ɨ́jna jɨme'e mej caí raamuá'a. 2Mɨ́ nej já'amuaxe'eve'e, tu'uri yaújmua'ame'en pú'een ɨ́ Dios. Mɨ́ ajta caí xɨ a'ij ámitɨeere'e a'ij tej éene'e tá'aju'un. Mɨ́ teajta iteen, ayée tu tí'ijmua'aree tɨ ayén tí'itacɨ'ɨti a'ájna xɨcáara'an jetze ɨ́ tɨ jetzen huataseíjre'esin. A'ɨ́ɨ pu seɨcɨé taruuren yé ta jetze tej ti tiyen che'atá tena'a éene'e tá'ara'ani tɨ́j ajta a'ɨ́ɨn éene'e seijre'e u ta japua a'iné a'ájna tu raseijran te'ɨ́jna a'ij tɨ 'een. 3Ajta, ja'atɨ tɨ na'a tɨ ayén ti'ijchú'eve'e a'ɨ́jna tɨ ayén tiráacɨ'ɨti, ayée pu a'ɨ́jna jɨ́n rɨ́'ɨ ruruuren tɨ ayén che'atá na'a rumua'atzíira'a jɨ́me'en rɨ'éene'e seíire'e á'ara'ani tɨ́j ajta a'ɨ́jna ɨ́ Jesús tɨ ajta Cɨríistu'u pú'een. 4Mɨ́ ajta, ja'atɨ tɨ na'a tɨ ti'itɨ́j jɨ́n até'ɨtzeaara ɨ́ Dios jemi, a'ɨ́ɨ pu ajta raatéxɨeehuata a'ɨ́jna ɨ́ niuucari tɨ jɨ́n Dios tí'aijta. Ajta tɨ́j na'a ɨ́ mej jɨ́n até'ɨtzeaara, ayée pu seijre'e ɨ́ Dios jemi tɨ ayén che'atá na'a 'een ɨ́ mej jɨ́n raatéxɨeehuata me'ɨ́jna ɨ́ niuucari tɨ ajta jɨ́n Dios tí'aijta. 5Ajta, xu'uri ramua'aree tɨ ayén 'een jɨ́n huataseíjre a'ɨ́jna tɨ́'ij ayén ra'uré'uuna ɨ́ tej jɨ́n auteájturaa ɨ́ Dios jemi. Ajta, capu a'atzu ti'itɨ́j jɨ́n até'ɨtzeaara ɨ́ Dios jemi a'ɨ́jna ɨ́ Jesús, tɨ ajta Cɨríistu'u pú'een. 6Ajta, ja'atɨ tɨ na'a tɨ Dios jemi seijre'e capu ajta á'atura ɨ́ jemin. Mɨ́ ajta, ja'atɨ tɨ na'a tɨ ayén ti'itɨ́j jɨ́n até'ɨtzeaara ɨ́ Dios jemi, a'ɨ́jna ɨ́ ja'atɨ capúu xɨ yaú'itɨée já'araa a'ij tɨ 'een a'ɨ́jna, capu ajta xɨ raamuá'a. 7Mɨ́ sej yaújmua'ame'en pú'een, caxu raatá'acare'en tɨ ja'atɨ ayén tejá'amuacuanamua. Ja'atɨ tɨ na'a tɨ ayén xɨ́'epɨ'ɨn ti'itiújcha'ɨɨ, a'ɨ́ɨ pu ayén che'atá na'a rɨ'éene'ecán jɨ́n seijre'e ɨ́ Dios jemi tɨ́j ajta a'ɨ́jna ɨ́ Jesús, tɨ ajta Cɨríistu'u pú'een. 8Mɨ́ ajta, ja'atɨ tɨ na'a tɨ ti'itɨ́j jɨ́n auté'ɨtzeaara ɨ́ Dios jemi, a'ɨ́ɨ pu a'ɨ́jna jetze ajtéme'ecan ɨ́ tiyaaru'u, a'iné a'ɨ́jna ɨ́ tiyaaru'u, ayée pu tɨ́j na'a jéjcua ɨmuá te'utéjche tɨ ayén te'uté'ɨtzeaara tɨ́j na'a ɨ́ tɨ 'ɨrí yé e'iré'ene. Ayee pu 'een jɨ́n huataseíjre a'ɨ́jna tɨ yaujra'an pú'een ɨ́ Dios tɨ ij raaté'uuna nain ɨ́ muárɨ'eri'ire'ara'an ɨ́ tiyaaru'u. 9Capu até'ɨtzeaara ɨ́ Dios jemi ja'atɨ tɨ na'a tɨ Dios jetze airáane. Capu ti'itɨ́j jɨ́n até'ɨtzeaara a'ɨ́jna jɨme'e tɨ jemin seijre'e a'ɨ́jna tɨ Dios ayén raateájtuaa. Capu rɨ'ɨrí tɨ a'ɨ́ɨn ja'atɨ ayén ti'itɨ́j jɨ́n te'uté'ɨtzeaara'an a'iné a'ɨ́ɨ pu Dios jetze airáane. 10Ayee pu a'ɨ́jna jɨ́n té'emitɨeere'e ja'atén mej pú'een ɨ́ yaújmua'ame'en ɨ́ Dios, ajta ja'atén mej pú'een ɨ́ yaújmua'ame'en ɨ́ tiyaaru'u. Capu Dios jetze airáane ja'atɨ tɨ caí xɨ́'epɨ'ɨn ti'itiújcha'ɨɨ, tɨ ajta caí raxɨ́'eve'e ɨ́ ru'ihuaara'a. 11Ajta, a'ii pu a'ɨ́ɨn pú'een ɨ́ niuucari sej ráanamuajri'i tɨ́j na'a jéjcua ɨmuá tɨ́j na'a tɨ yú e'iré'ene tɨ ayén tiú'ujxe'eve'e tej tiyen titehuátaxe'eve'en seɨj teajta seɨj. 12Tej ti caí nu'u tiyen huárɨni a'ij tɨ ráaruu a'ɨ́jna ɨ́ Caín teecan tɨ a'ɨ́jna jetze airáane a'ɨ́jna tɨ a'ij pua'a 'een. Ajta ayén tiraajé'ica ɨ́ ru'ihuaara'a. ¿Ni secaí ramua'aree a'ij tɨ 'een jɨ́n raajé'ica? Ayee pu a'ɨ́jna jɨ́n tiraajé'ica a'ɨ́jna jɨme'e tɨ a'ij pua'a ti'itiújcha'ɨɨca'a a'ɨ́jna. Mɨ́ ajta, xɨ́'epɨ'ɨn pu ti'itiújcha'ɨɨca'a a'ɨ́jna ɨ́ ihuáare'ara'an. 13Ne'ihuaamua'a, caxu a'ij tité'ujmuajca tɨ pua'a miyen tejamuájcha'ɨɨre'e a'ɨ́ɨme ɨ́ mej yen huachéjme íiyen chaanaca japua. 14Ayee tu te'ɨ́jna jɨ́n tí'ijmua'aree tej caí ché'e mɨ'ɨchíjta seijre'e ɨ́ Dios jemi sino tu'uri tiyen ruurican jemin huateájturaa a'ɨ́jna jɨme'e tej huá'axe'eve'e te'ɨ́mej ɨ́ ta'ihuaamua'a. Mɨ́ ajta, ja'atɨ tɨ na'a tɨ caí raxɨ́'eve'e ɨ́ ru'ihuaara'a, a'ɨ́ɨ pu aúche'e ayén mɨ'ɨchíjta seijre'e ɨ́ Dios jemi. 15Jee xaa ne'u, a'ɨ́jna ɨ́ ja'atɨ tɨ rájcha'ɨɨre'e ɨ́ ru'ihuaara'a, a'ii pu a'ɨ́ɨn pú'een tɨ tí'itecui'ica. Seajta mú'een, xu'uri siyen tí'ijmua'aree tɨ caí rusén jɨ́n ruuri huateáturaasin ɨ́ Dios jemi ja'atɨ tɨ na'a tɨ ayén tí'itecui'ica. 16Ayee tu te'ɨ́jna jɨ́n tí'ijmua'aree a'ij tɨ 'een tɨ pua'a ja'atɨ jé'iyecan jɨ́n raxɨ́'eve'e ɨ́ ru'ihuaara'a. A'ɨ́ɨ pu Jesús tɨ Cɨríistu'u pɨ́rɨcɨ, a'ɨ́ɨ pu ta jetze me'ecan huamɨ́'ɨ. A'ɨ́j pu jɨ́n, ayén tiú'ujxe'eve'e tej tiyen che'atá tena'a huácui'ini huá'a jetze me'ecan ɨ́ ta'ihuaamua'a. 17Mɨ́ ajta, tɨ pua'a ja'atɨ tɨ ayén jeíhua huápɨ'ɨ tí'ijcha'ɨɨ ɨ́ mej jɨ́n huateújvaɨre'en íiyen chaanaca japua, tɨ pua'a ajta ayén raseijra tɨ a'ɨ́ɨn ihuáare'ara'an caí a'ij tí'ijviicua'i, ajta tɨ pua'a caí rá'ancu'uvajxɨ'ɨn tɨ ij ti'itɨ́j jɨ́n raatévaɨre'en, capu a'atzu a'ij tí'irɨ'ɨri tɨ a'ɨ́jna tɨ jeíhua tí'ijcha'ɨɨ ayén ti'ixáata a'ame tɨ nu'u raxɨ́'eve'e ɨ́ Dios. 18Mɨ́ sej yaújmua'ame'en pú'een, tiché'e caí tiyen tena'a tí'ixajta tej nu'u taxe'eve'e seɨj teajta seɨj. Tiché'e caí te'ɨ́jna jɨ́n tena'a tiyen tí'ixajta taniuuca jɨme'e sino tiché'e jé'iyecan jɨ́n huá'axe'eve'e te'ɨ́jna jɨme'e tej ti'itɨ́j jɨ́n hua'utévaɨre'en ɨ́ ta'ihuaamua'a. 19Tɨ́ pua'a tiyen te'ɨ́jna jɨ́n huárɨni, aj tu xaa tiyen tí'ijmua'areeren tej tiyen jé'iyecan jɨ́n rɨ́'ɨ ti'itítacha'ɨɨ te'ɨ́jna jemi ɨ́ niuucari tɨ ayén ti'ayajna. Tɨ́ pua'a teajta te'ɨ́jna jɨ́n tiyen huárɨni, aj tu ti caí ché'e a'ij pua'a tite'utátamuajte ɨ́ taxɨejniu'uca jetze te'ɨ́jna jemi ɨ́ Dios. 20Tɨ́ pua'a ayén tá'axɨjte'e ɨ́ taxɨejniu'uca, capu ruxe'eve'e tej tiyen tí'itziɨɨne'e a'iné jaítze'e pu ve'ecán jɨ́n ti'itéjvee ɨ́ Dios caí ɨ́ taxɨejniu'uca. Ajta, a'ɨ́ɨ pu nain té'umua'aree. 21Mɨ́ nej já'amuaxe'eve'e, tɨ pua'a caí ti'itɨ́j jɨ́n tá'axɨjte'e ɨ́ taxɨejniu'uca, ayée pu 'een jɨ́n rɨ'ɨrí tej caí ti'itɨ́j jɨ́n tí'itziɨɨne'e ɨ́ Dios jemi. 22Ayee tu teajta te'ɨ́jna jɨ́n tiyen tira'ancuré'asin te'ɨ́jna jemi ti'itɨ́j tɨ na'a tej raatáhuaviira. Ayee pu a'ɨ́jna jɨ́n tí'itacɨ'ɨti a'ɨ́jna jɨme'e tej tiyen tirá'astijre'e a'ij tɨ a'ɨ́ɨn tí'ita'aijte'e, ajta a'ɨ́jna jɨme'e tej tiyen rɨ́'ɨ ti'itítacha'ɨɨ a'ij tɨ tira'aráanajche. 23A'ii pu a'ɨ́ɨn pú'een a'ɨ́jna tɨ jɨ́n ayén tí'ita'aijte'e tej ti tiyen té'antzaahuate'en tɨ a'ɨ́ɨn Jesús yaujra'an pú'een ɨ́ Dios, ajta a'ii pu a'ɨ́ɨn pú'een ɨ́ Cɨríistu'u tɨ Dios ra'antíhua'u, tej ti teajta tiyen titehuátaxe'eve'en seɨj teajta seɨj a'ij tɨ a'ɨ́ɨn titaata'aíj. 24Ajta a'ɨ́ɨn tɨ ayén rá'astijre'e a'ij tɨ Dios tí'aijta, a'ɨ́ɨ pu ayén che'atá na'a jemin seijre'e ɨ́ Dios tɨ́j ajta Dios jemin tí'iseijre'e a'ɨ́jna ɨ́ ja'atɨ. Ayee tu te'ɨ́jna jɨ́n tí'ijmua'aree tɨ a'ɨ́ɨn Dios ta jemi seijre'e a'ɨ́jna jɨme'e tɨ a'ɨ́ɨn xɨéjniu'ucare'ara'an ɨ́ Dios ayén ta jemi huateájturaa.

will be added

X\