1 San Juan 2

1Mɨ́ sej niyaujmua'a, mɨ nej huápɨ'ɨ já'amuaxe'eve'e, ayée nu 'een jɨ́n tejá'amuayu'use'e sej si caí ti'itɨ́j jɨ́n auteáturan ɨ́ Dios jemi. Mɨ́ ajta, tɨ pua'a ja'atɨ ayén ti'itɨ́j jɨ́n teuuteáturan ɨ́ Dios jemi, seɨj pu tayá'upua jemin seijre'e tɨ ta jetze me'ecan tí'ixɨ'epɨ'ɨntare'e. A'ii pu a'ɨ́ɨn pú'een a'ɨ́jna ɨ́ Jesús tɨ ajta Cɨríistu'u pú'een. A'ɨ́ɨ pu urarɨ́'ene'acan jɨ́n seijre'e ɨ́ Dios jemi. 2Cɨríistu'u pu ajta ta jetze me'ecan rɨ́'ɨ tiraatá'a ɨ́ Dios tɨ ij caí puaíjtzi taatá'an a'ɨ́jna jɨme'e ɨ́ tej jɨ́n auteájturaa ɨ́ jemin. Ayee pu ajta che'atá na'a huá'a japua huaniú naíjmi'ica a'achú mej pua'amé ɨ́ mej yen huachéjme ɨ́ chaanaca japua. 3Tɨ́ pua'a tiyen tirá'astijre'e a'ij tɨ a'ɨ́ɨn titaata'aíj, ayée tu a'ɨ́jna jɨ́n tiyen tí'ijmua'aree tej jé'iyecan jɨ́n tiyen tí'ijmua'ate. 4Tɨ́ pua'a seɨj ja'atɨ caí rá'astijre'e a'ij tɨ titaata'aíj, ajta tɨ pua'a a'ɨ́jna ɨ́ ja'atɨ ayén tiu'utaxáj yee tɨ nu'u ayén tí'ijmua'ate a'ɨ́jna ɨ́ Jesús, a'ɨ́jna ɨ́ ja'atɨ, ayée pu tí'ihua'itaca. Ajta, capu jé'iyecan jɨ́n ti'itiújcha'ɨɨ. 5Mɨ́ ajta, tɨ pua'a a'ɨ́jna ɨ́ ja'atɨ ayén tira'ará'asten a'íjna i niuucari ɨ́ tɨ téjmi jemi huatétuiihuaca'a, ayée tu te'ɨ́jna jɨ́n tí'ijmua'aree tɨ ayén raanaíjmire ɨ́ tzajta'an a'ɨ́jna ɨ́ ja'atɨ tɨ a'ɨ́ɨn jé'iyecan jɨ́n raxɨ́'eve'e ɨ́ Dios nain jɨme'e. Ayee tu teajta te'ɨ́jna jɨ́n tí'ijmua'aree tej tiyen te'ɨ́jna jemi seijre'e ɨ́ Dios. 6Ajta tɨ pua'a ja'atɨ ayén tiú'ujseijrata tɨ a'ɨ́ɨ pu miijmu ayén nu'u urarɨ́'ene'acan jɨ́n seijre'e jemin ɨ́ Dios, ayée pu ajta tiú'ujxe'eve'e tɨ a'ɨ́ɨn ja'atɨ ayén che'atá na'a rɨ́'ɨ ti'itiújcha'ɨɨ tɨ́j ajta a'ɨ́ɨn Cɨríistu'u rɨ́'ɨ ti'itiújcha'ɨɨca'a. 7Mɨ́ nej já'amuaxe'eve'e, canu jéjcuacan jɨ́n tejá'amuayu'use'e ɨ́ tɨ jɨ́n titaata'aíj ɨ́ Dios, sino a'ɨ́j nu jɨ́n tejá'amuayu'use'e ne'ɨ́jna ɨ́ niuucari tɨ jéjcua ɨmuá Dios ayén a'ɨ́jna jɨ́n titaata'aíj tɨ́j na'a tɨ jéjcua ɨmuá seijre'eca'a mú'ejmi jemi tɨ́j na'a tɨ yú e'iré'ene. Ajta a'ɨ́jna tɨ jéjcua ɨmuá jɨ́n titaata'aíj ɨ́ Dios, a'ii pu a'ɨ́ɨn pú'een ɨ́ niuucari ɨ́ sej ráanamuajri'i. 8Mɨ́ neajta inee, neajta nu jéjcuacan jɨ́n tejá'amuayu'use'e tɨ ayén ti'ayajna a'ɨ́jna jemi, ajta mú'ejmi jemi, a'iné pu'uri te'entipuá'ari a'ɨ́jna tɨ a'uun é'eseijre'e a'u tɨ a'utɨ́ca'a. Ajta pu'uri a'utéjche tɨ huatatátzave'en a'ɨ́jna tɨ jé'iyecan jɨ́n tátatzavi'i. 9Tɨ́ pua'a ja'atɨ ayén tiú'ujseijrata tɨ a'ɨ́ɨn miijmu ari nu'u a'uun á'ume a'u tɨ á'uneeri'i, mɨ ajta a'ɨ́jna ɨ́ ja'atɨ, a'ɨ́ɨ pu ru'ihuaara'a tícha'ɨɨre'e, a'ɨ́ɨ pu ajta aúche'e a'uun auumé a'u tɨ a'utɨ́ca'a a'u tɨ caí á'atatzave'e. 10Ajta a'ɨ́ɨn ɨ́ ja'atɨ tɨ raxɨ́'eve'e ɨ́ ru'ihuaara'a, a'ɨ́ɨ pu xaa a'uun auumé a'u tɨ á'atatzave'e ɨ́ tavástara'a. Ajta capu ti'itɨ́j jɨ́n a'aturáa ɨ́ Dios jemi. 11Mɨ́ ajta, a'ɨ́ɨn ɨ́ tɨ rájcha'ɨɨre'e ɨ́ ru'ihuaara'a, a'ɨ́ɨ pu a'uun é'eseijre'e a'u tɨ a'utɨ́ca'a. A'ɨ́ɨ pu xaa auj auumé a'u tɨ a'utɨ́ca'a, ajta capu ramua'aree a'u tɨ á'ume a'iné tɨ́ca'ari pu ayén ráaruu tɨ ij arácun. 12Ayee nu 'een jɨ́n tejá'amuayu'use'e mú'ejmi mɨ sej niyaujmua'a a'iné Dios pu ayén tejámuaatá'uuni'iri'i ɨ́ sej jɨ́n auteájturaa ɨ́ jemin a'ɨ́jna jɨme'e a'ij tɨ huarɨ́j a'ɨ́jna ɨ́ Jesús. 13Seajta mú'een, mɨ sej huá'avaujsimua'a pú'een, ayée nu 'een jɨ́n tejá'amuayu'use'e a'iné mú'een xu ramua'ate se'ɨ́jna tɨ tɨ́j na'a jéjcua ɨmuá seijre'eca'a, ajta tɨ́j na'a tɨ yú e'iré'ene seijre'e. Seajta mú'een, mɨ sej teemua, ayée nu 'een jɨ́n tejá'amuayu'use'e a'iné mú'een xu seri ra'antimuá'itɨ se'ɨ́jna ɨ́ xɨéjniu'ucari tɨ a'ij pua'a 'een. Seajta mú'een, mɨ sej yaújmua'ame'en pú'een, ayée nu 'een jɨ́n tejá'amuayu'use'e a'iné mú'een xu ramua'ate se'ɨ́jna ɨ́ tej rájya'upua. 14Ayee nu neajta 'een jɨ́n tejá'amuayu'use'e mɨ sej huá'avaujsimua'a pú'een a'iné mú'een xu seri ramua'ate se'ɨ́jna tɨ jéjcua ɨmuá seijre'eca'a tɨ́j na'a tɨ yú e'iré'ene. Ayee nu neajta 'een jɨ́n tejá'amuayu'use'e mɨ sej teemua a'iné mú'een xu temua'a naa té'eviicua'i. Ajta a'ɨ́jna ɨ́ niuucari tɨ Dios ayén téjmi jemi raateájtuaa, a'ɨ́ɨ pu mú'ejmi jemi seijre'e a'iné mú'een xu rá'astijre'e. Mú'een xu seajta seri ra'antimuá'itɨ se'ɨ́jna ɨ́ xɨéjniu'ucari tɨ a'ij pua'a 'een. 15Ayee nu tejá'amua'íjcate'e sej caí siyen tihuá'ɨjchuej a'ɨ́mej ɨ́ mej yen japuan huachéjme ɨ́ chaanaca. Setá'aj caí seajta siyen tí'ijxe'eve'e tɨ́j na'a ɨ́ tɨ tí'iseijre'e íiyen chaanaca japua. Ja'atɨ tɨ na'a tɨ raxɨ́'eve'e hua'aye'ira ɨ́ mej yen huachéjme íiyen chaanaca japua, capu ajta cui'i raxɨ́'eve'e ɨ́ Dios. 16Ayee pu xaa ne'u ti'ayajna, a'iné tɨ́j na'a tɨ ayén tí'iseijre'e íiyen chaanaca japua, yen pu me'ecan. Tɨ́j na'a ɨ́ mej miyen tité'ujca'ane a'ɨ́j tɨ tzajta'an tásiseiiri, ajta tɨ́j na'a ɨ́ mej raseíj tɨ ca'aníjra'a hua'atá'aca mej mi me'ɨ́jna jɨme'e tí'inecua'atzen, ajta naíjmi'i tɨ́j na'a ɨ́ mej jɨ́me'en á'ujtzaahuate'e, nain tɨ́j na'a tɨ ayén 'een, a'ɨ́j pu jetze mé je'evé'eme ɨ́ huá'amua'atziira'a ɨ́ mej yen seijre'e íiyen chaanaca japua. Capu Dios jemi é'eme'ecan. 17Ajta tɨ́j na'a tɨ huá'a jetze ruxe'eve'e a'ɨ́mej ɨ́ mej yen seijre'e íiyen chaanaca japua, ajta a'ɨ́jna tɨ́j na'a ɨ́ mej jetzen tité'ujca'ane, a'ɨ́ɨ pu xaa te'entipuá'ajte'esin. Mɨ́ ajta a'ɨ́jna ɨ́ tɨ ayén tirá'astijre'e a'ij tɨ tí'ijxe'eve'e ɨ́ Dios, a'ɨ́ɨ pu ruuri huateáturaasin ɨ́ jemin tɨ́j na'a rusén jɨme'e. 18Mɨ́ sej yaújmua'ame'en pú'een, pu'uri tɨ́n teja'uré'enejsin a'ájna xɨcáara'an tɨ jetzen nain te'entipuá'ajte'esin. Mú'een xu seajta seri ráanamuajri'i tɨ a'ɨ́ɨn ayén huataseíjre'esin a'ɨ́jna tɨ rájcha'ɨɨre'e ɨ́ Cɨríistu'u. Jee xaa ne'u, ayée pu ti'ayajna mej meri mu'iitɨ́ huataseíjre ɨ́ mej rájcha'ɨɨre'e ɨ́ Cɨríistu'u. A'ɨ́j tu jɨ́n tiyen tí'ijmua'aree tɨ ari tɨ́mua'a teja'uré'enejsin a'ɨ́jna xɨcáara'an jetze tɨ nain te'entipuá'ajte'esin. 19A'ɨ́ɨ mú ta jemi tíhuii. Mɨ́ majta, camu ta jetze ajtéme'ecantaca'a. Tɨ́ pua'a miyen ta jetze ajtéme'ecantache'e, a'ɨ́ɨ mú ta jemi huateáturanche'e. Mɨ́ majta, ayée mú 'een jɨ́n ajtacɨ́j tɨ ij ayén huataseíjre'en mej caí naíjmi'i ta jetze ajtéme'ecan. 20Ajta a'ɨ́ɨn ɨ́ xɨéjniu'ucare'ara'an ɨ́ Dios, a'ɨ́ɨ pu ari huateájturaa mú'ejmi jemi, ajta a'ɨ́ɨ pu ayén tejamuaatá'a ɨ́ mua'atzíira'a sej si nain jé'iyecan jɨ́n tiú'umua'ati. 21Canu ne'ɨ́jna jɨ́n tejá'amuayu'use'e ne'ɨ́jna jɨme'e sej caí jé'iyecan jɨ́n ramua'aree se'ɨ́jna tɨ ayén ti'ayajna sino ne'ɨ́jna jɨme'e sej xaa siyen ramua'aree. Ajta ti'itɨ́j tɨ ayén hua'itzi pú'een, capu a'iránineica a'ɨ́jna jetze tɨ jé'iyecan jɨ́n ayén ti'ayajna. 22¿Ni secaí ramua'aree ja'atɨ tɨ a'ɨ́ɨn pú'een tɨ tí'ihua'itaca? Jee xaa, a'ii pu a'ɨ́ɨn pú'een ɨ́ tɨ ayén ti'ixa yee tɨ caí Jesús a'ɨ́ɨn pú'een ɨ́ Cɨríistu'u. A'ii pu a'ɨ́ɨn pú'een tɨ rájcha'ɨɨre'e a'ɨ́jna ɨ́ Cɨríistu'u, a'ɨ́jna ɨ́ ja'atɨ tɨ ayén che'atá na'a mé rúujɨpua a'ɨ́jna ɨ́ tej rájya'upua, tɨ ajta mé rúujɨpua a'ɨ́ɨn tɨ yaujra'an pú'een ɨ́ Dios. 23Ja'atɨ tɨ na'a tɨ mé rúurɨeni a'ɨ́jna tɨ yaujra'an pú'een, capu ajta rɨ́'ɨ tí'iseijre'e a'ɨ́jna jemi ɨ́ tej rájya'upua. Mɨ́ ajta, a'ɨ́ɨn tɨ ayén tiraataxáj yee Jesús pu a'ɨ́ɨn pú'een a'ɨ́jna tɨ yaujra'an pú'een ɨ́ Dios, tɨ pua'a ayén huárɨni, a'ɨ́ɨ pu ajta rɨ́'ɨ ti'iseíire'e a'ame ɨ́ Dios jemi. 24Seajta mú'een, ayée xu huárɨni. Ché'e a'ɨ́ɨn niuucari ɨ́ sej jéjcua ɨmuá ráanamuajri'i, ché'e ayén mú'ejmi jemi huateáturan. Ajta a'ɨ́jna ɨ́ niuucari ɨ́ sej jéjcua ɨmuá ráanamuajri'i, tɨ pua'a ayén mú'ejmi jemi huateáturan, ayée xu seajta mú'een naími'i rɨ́'ɨ ti'iteseíire'e xá'aju'un se'ɨ́jna jemi tɨ yaujra'an pú'een ɨ́ Dios, seajta se'ɨ́jna jemi ɨ́ tej rájya'upua. 25Ajta a'ii pu a'ɨ́ɨn pú'een ɨ́ tɨ jɨ́n te'ataújratziiri'i itejmi jemi tɨ ayén titáacɨ'ɨti tej tiyen rusén jɨ́n ruuri tá'ara'ani ɨ́ jemin. 26Ayee nu tejá'amuayu'use'e ne'ɨ́mej jɨ́me'en ɨ́ mej miyen tejá'amuahua'itze'e. 27Mɨ́ seajta mú'een, aúche'e pu mú'ejmi jemi seijre'e a'ɨ́jna ɨ́ mua'atzíira'a tɨ a'ɨ́ɨn xɨéjniu'ucare'ara'an ɨ́ Dios ayén tejamuaatá'a. A'ɨ́j pu jɨ́n caí ayén tiú'ujxe'eve'e tɨ ja'atɨ ayén tejamuá'itɨii, a'iné a'ɨ́jna ɨ́ mua'atzíira'a, ayée pu tejá'amua'itɨii nain jɨme'e. A'ɨ́ɨ pu ajta jé'iyecan jɨ́n tejá'amua'itɨii, ajta caí tejá'amuahua'itze'e. Setá'aj siyen che'atá sena'a huárɨni a'ij tɨ ari tejámuaatá'itɨiiri'i, setá'aj naíjmi'i huateáturan ɨ́ jemin. 28Ajta i'i, mɨ sej yaújmua'ame'en pú'een, setá'aj siyen naími'i huateáturan ɨ́ jemin tej ti tiyen a'ataca'anéecan jɨ́n ra'ancuré'evi'itɨn a'ájna xɨcáara'an tɨ jetzen huataseíjre'esin. Setá'aj seajta siyen huárɨni tɨ ij caí ta'atatévi'iraste'en ɨ́ jemin. 29Tɨ́ pua'a seri mú'een ramua'aree tɨ a'ɨ́ɨ pu ara'axcáacan jɨ́n seijre'e ɨ́ Dios, xu'uri seajta ramua'aree tɨ ayén ti'ayajna tɨ ja'atɨ tɨ na'a tɨ ayén xɨ́'epɨ'ɨn ti'itiújcha'ɨɨ, a'ɨ́jna ɨ́ ja'atɨ, a'ɨ́ɨ pu xaa a'ɨ́ɨn Dios jetze airáane.

will be added

X\