1 San Juan 1

1Jɨ́me'en a'ɨ́jna ɨ́ Jesús tɨ Cɨríistu'u pú'een, a'ɨ́ɨ pu jéjcua ɨmuá seijre'eca'a tɨ́j na'a tɨ yú e'iré'ene. A'ɨ́ɨ pu ajta a'ɨ́ɨn pú'een ɨ́ tej ráanamuajri'i a'ij tɨ ye'í tiu'utaxájtaca'a. Teen tu teajta tajɨ́'ɨ jɨ́n raaseíj, teajta tiyen raamuá'a ja'atɨ tɨ pú'eene'e, teajta tiyen tamuájca'a jɨ́n ra'ajtamuárɨej te'ɨ́jna tɨ niuucari pú'een tɨ ajta ruurican e'ihuateájtuaani. 2Ajta, a'ɨ́ɨ pu huataseíjre a'ɨ́jna tɨ ruurican e'ihuateájtuaani. Teajta iteen, teen tu raaseíj. Teajta tiyen tiraataxájta, teajta tiyen tejá'amua'ixaate'e te'ɨ́jna tɨ rusén jɨ́n i'i ruuri, tɨ ajta jemin seijre'e ɨ́ rutáàta ɨ́ Dios. Ajta, a'ɨ́ɨ pu téjmi jemi huataseíjre. 3A'ɨ́j tu teajta tiyen tejá'amua'ixaate'e te'ɨ́jna ɨ́ tej raaseíj, teajta ɨ́ tej ráanamuajri'i, sej si seajta mú'een siyen che'atá sena'a tiú'umua'ati tetɨ́j iteen tí'imua'atze tej ti naíjmi'i ta'ihuaamua'a tá'ara'ani. Jee xaa ne'u, teen tu jemin seijre'e, te'ɨ́jna ɨ́ Dios jemi ɨ́ tej rájya'upua. Teen tu teajta tiyen che'atá tena'a jemin seijre'e te'ɨ́jna jemi ɨ́ tɨ yaujra'an pú'een ɨ́ Dios, a'ɨ́jna ɨ́ Jesús, ɨ́ tɨ ajta Cɨríistu'u pú'een. 4Ayee tu 'een jɨ́n tiyen tejá'amuayu'use'e tɨ ij ayén raanaíjmi'ire'en ɨ́ tɨ jamuaatá'aca sej jɨ́me'en rutémua'ave'e. 5A'ii pu a'ɨ́ɨn pú'een ɨ́ niuucari ɨ́ tɨ Cɨríistu'u ayén titaatá'ixaa tɨ nu'u a'ɨ́ɨn Dios ayén téjmi jemi seijre'e tɨ́j tatzari tɨ ayén tátatzavi'i ɨ́ ta tzajta'a, ajta nu'u capu a'atzu jemin seijre'e ti'itɨ́j tɨ a'ij pua'a 'een, tɨ ayén che'atá na'a 'een tɨ́j tɨ́ca'ari. 6Tɨ́ pua'a tiyen te'ɨ́jna jetze tiyen mé titejá'ujujhua'ane'en a'u tɨ a'utɨ́ca'a teajta rá'antixáata tiyen titeejú'un a'u yee tej Dios jemi seijre'e, catu jé'iyecan jɨ́n tiyen ti'itítacha'ɨɨ sino tetí'ihua'itaca tu'u. 7Mɨ́ teajta iteen, tɨ pua'a tiyen che'atá tena'a te'ɨ́jna jetze tiyen titeejú'un, te'ɨ́jna jetze tɨ tátatzavi'i, a'ɨ́ɨ pu rɨ́'ɨ taruure tej ti tiyen temua'a naa ta'ihuaamua'a tá'ara'ani. Ajta, a'ɨ́jna tɨ yaujra'an pú'een ɨ́ Dios, a'ɨ́jna ɨ́ Jesús, a'ɨ́ɨ pu ajta tá'ari'ira nain tɨ́j na'a ɨ́ tej jɨ́n ateáturaaveca ɨ́ Dios jemi. A'ɨ́ɨ pu ayén taruure a'ɨ́jna jɨme'e tɨ ari huamɨ́'ɨ ta jetze me'ecan. A'ɨ́j pu jɨ́n ayén tira'iráaxɨre ɨ́ ruxuure'e. 8Tɨ́ pua'a tiyen tiraataxáj yee tej nu'u caí ti'itɨ́j jɨ́n ateáturaaveca ɨ́ Dios jemi, ayée tu tajɨ́ɨmua'a tena'a tacuanamua. Ajta, a'ɨ́jna ɨ́ niuucari tɨ ayén ti'ayajna, capu téjmi jemi seijre'e. 9Mɨ́ teajta iteen, tɨ pua'a tiyen tiraataxáj ɨ́ tej jɨ́n auteájturaa ɨ́ Dios jemi, ayée tu tí'ijmua'aree tɨ Dios ra'ará'astejsin a'ɨ́jna jɨ́me'en tɨ jɨ́n te'ataújratziiri'i tɨ nu'u ayén titaatá'uuni'i nain jɨme'e ɨ́ tej jɨ́n auteájturaa ɨ́ jemin. Teen tu teajta tiyen tí'ijmua'aree tɨ ayén tiraavíjte'e tɨ Dios ayén titaatá'uuni'i. 10Tɨ́ pua'a tiyen tiraataxáj yee tej nu'u caí ja'anáj ti'itɨ́j jɨ́n auteájturaa ɨ́ Dios jemi, ayée pu huataújmua'a ɨ́ tej teri tiyen te'ɨ́jna jɨ́me'en raatamuá'a ɨ́ Dios tɨ nu'u a'ɨ́ɨn tí'ihua'itaca. Ajta a'ɨ́jna ɨ́ niuucari tɨ ayén téjmi jemi raateájtuaa, capu xaa ne'u a'atzu téjmi jemi seijre'e.

will be added

X\