1 Corintios 8

1Jɨ́me'en ɨ́ cua'ira ɨ́ mej tí'imuaɨ'ɨvajtaca ɨ́ rudioosi jemi, ayée tu ramua'aree. Naíjmi'i tu mé úumua'aréjme. Ajta, ayée pu tí'irɨneca tɨ ja'atɨ ayén a'ɨ́jna jɨ́n á'ujtzaahuate'e tɨ jeíhua mé úumua'aree. Mɨ ajta, ja'atɨ pu rɨ́'ɨ a'ij tí'ijrɨ'ɨre tɨ pua'a rɨ́'ɨ tí'ijxe'eve'e ɨ́ ruxɨ́'ej tevi. 2Ajta a'ɨ́jna ɨ́ ja'atɨ tɨ ayén tí'imua'atze ɨ́ ru tzajta'a tɨ jeíhua mé úumua'aree, a'ɨ́ɨ pu caí mé úumua'aree a'ij tɨ ye'í tiú'ujxe'eve'e ɨ́ Dios jemi. 3Mɨ ajta, Dios pu ramua'ate a'ɨ́jna ɨ́ ja'atɨ tɨ rɨ́'ɨ tí'ijxe'eve'e ɨ́ Dios. 4A'ɨ́j pu jɨ́n, jɨ́me'en a'ɨ́jna ɨ́ cua'ira ɨ́ mej tihuá'amuaɨ'ɨvejte'e ɨ́ rudioosi, ayée tu ramua'aree mej caí rɨ́'ɨ miyen seijre'e íiyen chaanaca japua ɨ́ mej nu'u dioosi pú'een. Teajta, teen tu ramua'aree tɨ seɨj na'a ɨ́ Dios tɨ íiyen seijre'e. 5Jee xaa ne'u, mé mu'íi ɨ́ mej jee dioosi pú'een, tɨ pua'a íiyen mej seijre'e chaanaca japua nusu a'uun mej é'eseijre'e u ta japua, a'iné ayée pu titá'amitɨejte'e mej i'imu'íi ɨ́ mej dioosi pú'een, majta i'imu'íi ɨ́ mej ti'itɨj jɨ́n títetateí. 6Mɨ teajta iteen, ayée tu tí'ijmua'aree tɨ, itejmi jemi, seɨj na'a ɨ́ Dios ɨ́ tej rájya'upua. Nain pu a'ɨ́jna jemi tiu'utaseíjre. Teajta iteen, naími'i tu te'ɨ́jna jɨ́n seijre'e tej ti rɨ́'ɨ tiraateájtuaani ɨ́ jemin. Ajta seɨ́j pu'u ɨ́ tavástara'a, a'ɨ́jna ɨ́ Jesús tɨ ajta Cɨríistu'u pú'een. Nain pu tiú'utaavijhuaca'a a'ɨ́jna jemi. Teajta iteen, naími'i tu te'ɨ́jna jetze arátaca'ane tej ti ruuri. 7Mɨ majta, camu naími'i miyen che'atá mena'a tí'ijmua'aree, sino seica, ayée mú tí'ijrɨ'ɨrejca'a mej huá'ana'amiche'en ɨ́ mej caí dioosi pɨ́rɨcɨ. A'ɨ́j pu jɨ́n, tɨ pua'a miyen ráacua'ani ɨ́ cua'ira ɨ́ mej ramuaɨ'ɨvajtaca, aúche'e pu ayén tihuá'amitɨejte'e mej majta me'ɨ́jna na'amiche ɨ́ tɨ caí Dios pú'een me'ɨ́jna jɨme'e mej ráacua me'ɨ́jna ɨ́ cua'ira mej ráamuaɨ'ɨvajtaca'a. Ayee mú a'ɨ́jna jɨ́n raacuá'an, tɨ'ɨqui a'ij pua'a hua'atá'acare'e a'ame ɨ́ huá'axɨejniu'uca jetze a'ɨ́jna jɨme'e tɨ a'ij pua'a huárɨni a'ɨ́jna ɨ́ huá'axɨejniu'uca. 8Aru, casi'i mú'een, capu ti'itɨ jɨ́n titatéva'ɨri ɨ́ cua'ira ɨ́ Dios jemi. Capu a'atzu a'uvaɨ́jtzi tɨ pua'a tecaí ráacua'ani. Capu ajta titatéva'ɨri tɨ pua'a teráacua'ani. 9Mɨ seajta mú'een, rɨ́'ɨ xu'u sej si caí siyen a'ij pua'a ráaruuren seɨj ɨ́ ja'atɨ tɨ caí jeíhua té'eviicua'i, setá'aj caí siyen ca'aníjra'a tiraatá'acare'en tɨ a'ɨ́ɨn ayén auteáturan Dios jemi se'ɨ́jna jɨme'e tɨ i'i xɨ́'epɨ'ɨn mú'ejmi jemi. 10Casi'i mú'ee, mɨ pej rɨ́'ɨ tí'ijmua'aree. Tiché'e tiyen tiraataxáj yee ja'atɨ tɨ caí jeíhua té'eviicua'i ɨ́ ru tzajta'a, ajta a'ɨ́ɨ pu muaseíj, pej pe'uun tejé'ecua'a pe'újna teyujta'a a'u mej raná'amiche'e ɨ́ hua'adioj. Tij ca'aníjra'a pepu'u raatá'asin a'ɨ́jna ɨ́ ja'atɨ tɨ́'ij a'ɨ́ɨn ajta ráacua'ani ɨ́ cua'ira ɨ́ mej raatámuaɨ'ɨvajtaca'a. 11Ayee pu a'ɨ́jna jɨ́n huarɨ́j, aj pu'i a'uvaɨ́jtzi a'ɨ́jna ɨ́ a'ihuáara'a tɨ caí jeíhua té'eviicua'i, tɨ ajta jetzen me'ecan huamɨ́'ɨ ɨ́ Cɨríistu'u. A'uvaɨ́jtzi, icu, a'ɨ́jna jɨme'e pej ca'aníjra'a raatá'a pe'ɨ́jna jɨme'e pej nú'u rɨ́'ɨ tí'ijmua'aree a'ij tɨ 'een ɨ́ Dios jemi. 12A'ɨ́j pu jɨ́n, setɨ́'ɨj siyen auteáturan a'ɨ́mej jemi se'ɨ́jna jɨme'e sej a'ij pua'a huá'uruu ɨ́ huá'amua'atziira'a jetze ɨ́ mej caí jeíhua té'eviicua'i, mú'een xu seajta se'ɨ́jna jɨ́n auteáturaave ɨ́ Cɨríistu'u jemi. 13A'ɨ́j pu jɨ́n, tɨ pua'a ne'ihuaara'a a'uvaɨ́jtzi a'ɨ́jna jɨme'e tɨ ráacua ɨ́ cua'ira ɨ́ mej ráamuaɨ'ɨvajtaca'a, canu ja'anáj racua'ani ne'ɨ́jna ɨ́ cua'ira nej ni caí ca'aníjra'a raatá'an tɨ ayén huárɨni a'ɨ́jna tɨ jɨ́n a'uvaɨ́jtzi.

will be added

X\