1 Corintios 7

1Jɨ́me'en a'ɨ́jna ɨ́ sej seri mé tineja'uta'íti'iri'i, ayée pu temua'a tí'ixɨ'epɨ'ɨn tɨ caí ja'atɨ neɨche. 2Mɨ ajta, ayée mú jeíhua me'ɨ́jna jɨ́n tí'ixana'acɨre'e. Miché'e miyen huárɨni, a'achú mej pua'amé. Miché'e huáneɨche ɨ́ teteca, seɨj ajta seɨj. Majta a'ɨ́ɨme ɨ́ 'uuca, miché'e majta huavíɨche'en, seɨj ajta seɨj. 3Ajta a'ɨ́ɨn ɨ́ teáata'a, ché'e ayén ra'ará'astijre'en a'ij tɨ tiraavíjte'e a'ɨ́jna jemi ɨ́ ru'ɨ́j. Ajta a'ɨ́ɨn 'ɨ́ita'a, ché'e ayén che'atá na'a ra'ará'astijre'en a'ij tɨ tiraavíjte'e ɨ́ rucɨ́n jemi. 4Ayee pu'u na'a, a'iné a'ɨ́ɨn ɨ́ra'ara'an, capu ayén a'ɨ́jna jɨ́n antiújmua'aree ɨ́ rutevij jɨme'e sino a'ɨ́ɨ pu xaa ayén antiújmua'aree ɨ́ cɨ́na'ara'an. Ajta a'ɨ́ɨn cɨ́na'ara'an, capu ajta ayén a'ɨ́jna jɨ́n antiújmua'aree ɨ́ rutevij jɨme'e, sino a'ɨ́jna ɨ́ra'ara'an, a'ɨ́ɨ pu xaa a'ɨ́jna jɨ́n antiújmua'aree. 5Caxu ché'e sena'a ajtacɨ́'ɨca'an sino se'ɨ́jna jɨme'e sej seri siyen raaxɨ́'epɨ'ɨntare sej a'atzu á'ateevi'in sej huatéjniuuni ɨ́ Dios jemi. Setá'aj á'iyen ajteáxɨɨre tɨ́'ij caí a'ɨ́ɨn Satanás ayén ca'aníjra'a jamuaatá'an sej seɨ́j jamuan ti'ihuaújxana'acɨra'aten a'ɨ́jna jɨme'e sej caí á'ujcu'uvejca'a. 6Canu niyen tejá'amua'iti'i sino ayée nu ne'ɨ́jna jɨ́n ca'aníjra'a jamuaatá'aca sej siyen rɨcɨ. 7Neajta inee, ayée nu tí'ijxe'eve'e mej mi miyen 'eene'en netɨ́j inee, matɨ́j mena'a pua'amé ɨ́ teteca. Mɨ ajta a'ɨ́ɨn Dios, a'ɨ́ɨ pu ari ayén tiraatá'a seɨj ajta seɨj a'ij tɨ a'ɨ́ɨn tíhua'uxɨ́'epɨ'ɨntari'iri'i. 8Mɨ neajta inee, ayée nu tihuá'ixaate'e ne'ɨ́mej ɨ́ mej caí xɨ huanéjne'ɨcheca'a, majta a'ɨ́mej ɨ́ mej majta caí xɨ viɨ́che'ejme, majta a'ɨ́mej ɨ́ mej huaújseɨstareca'a. Jɨ́me'en a'ɨ́mej, matɨ́j mena'a pua'amé, ayée pu i'i xɨ́'epɨ'ɨn mej mi miyen 'éene'e huateáturan netɨ́j inee. 9Aru, tɨ pua'a caí rɨ'ɨrí mej á'ujcu'uvée, miché'e huanéjne'ɨche, majta huáviɨchen. Jaítze'e pu hua'atéva'ɨri mej miyen huárɨni mej caí rajpuaíjtzi muá'ara'ani ɨ́ ru tzajta'a. 10Mɨ neajta inee, canu niyen tihuá'ijcate'e a'ɨ́mej ɨ́ mej néjne'ɨche, majta ɨ́ mej viɨ́che'ejme sino a'ɨ́ɨ pu tavástara'a ayén tihuá'aijte'e. Ché'e caí a'ɨ́ɨn ɨ́ra'ara'an ajtáye'ican a'ɨ́jna jemi ɨ́ rucɨ́n. 11Ajta, tɨ pua'a ayén ajtára'ani, ché'e ayén éene'e huateáturan tɨ ruseɨjtan. Na'ari caí, ché'e ajtahua'a ra'anténaxca a'ɨ́jna ɨ́ rucɨ́n. Ajta a'ɨ́ɨn ɨ́ cɨ́na'ara'an, ché'e ayén che'atá na'a huárɨni. Ché'e caí ajtáye'ican a'ɨ́jna jemi ɨ́ ru'ɨ́j. 12Ajta, a'ɨ́mej jɨme'e ɨ́ seica, capu ayén tihuá'ixaate'e ɨ́ tavástara'a sino inee, nee nu niyen tihuá'ixaate'e. Ché'e ayén huárɨni a'ɨ́jna ɨ́ ta'ihuaara'a tɨ a'ɨ́jna tévi'itɨn ɨ́ 'ɨ́ita'a tɨ caí té'atzaahuate'e. Tɨ pua'a a'ɨ́ɨn 'ɨ́ita'a á'ujca'ane tɨ jamuan huateáturan, ayée pu tiú'ujxe'eve'e tɨ a'ɨ́ɨn ta'ihuaara'a caí mé rúurɨeni. 13Ayen che'atá na'a 'een jɨ́me'en ɨ́ 'ɨ́ita'a tɨ ra'anténexcaca'a seɨ́j teáata'a tɨ ajta caí té'atzaahuate'e. Tɨ pua'a a'ɨ́ɨn ajta ayén á'ujca'ane tɨ jamuan huateáturan, ayée pu che'atá na'a ruxe'eve'e tɨ caí mé rúurɨeni ɨ́ rucɨ́n. 14Ayee pu a'ɨ́jna jɨ́n ruxe'eve'e, a'iné Dios pu ajta huateúra'ate a'ɨ́jna ɨ́ cɨ́na'ara'an tɨ caí té'atzaahuate'e a'ɨ́jna jɨme'e niuucajtze'en ɨ́ ɨ́ra'ara'an. Ajta a'ɨ́ɨn ɨ́ ɨ́ra'ara'an tɨ ajta caí té'atzaahuate'e, Dios pu ajta ayén huateúra'ate a'ɨ́jna ɨ́ra'ara'an niuucajtze'en ɨ́ ta'ihuaara'a. Na'ari caí, a'ɨ́ɨ mú xána'avi'ire'e muá'aju'u ɨ́ yaújmua'ame'en. Mɨ ajta ɨ́ Dios, a'ɨ́ɨ pu ari huateúra'ate a'ɨ́mej. 15Mɨ ajta a'ɨ́ɨn tɨ caí té'atzaahuate'e, tɨ pua'a ayén ajtára'ani, ché'e ayén 'eene'en. Capu ché'e ayén ruxe'eve'e mej naími'i huaté'en. Ajta a'ɨ́ɨn ɨ́ ta'ihuaara'a nusu a'ɨ́ɨn ɨ́ tajuu, ayée pu tihuá'acɨ'ɨti mej mi ruxɨéehua raaxɨ́'epɨ'ɨntare'en, a'iné Dios pu ayén taatajé tej ti temua'a naa ta'ihuaamua'a tá'ara'ani. 16Ché'e ayén 'eene'en a'iné mɨ pej ɨ́ra'ara'an pú'een, capej ramua'aree tɨ pua'a piyen ru'irájtuaani ɨ́ á'acɨn nusu pecaí. Pajta mú'ee, mɨ pej cɨ́na'ara'an pú'een, capej pajta ramua'aree tɨ pua'a piyen ru'irájtuaani ɨ́ 'á'a'ɨj nusu pecaí. 17Ayee pu xaa ne'u ti'ayajna. Ayee nu tihuá'ijcate'e a'ɨ́mej ɨ́ mej e'etiújse'ɨri nainjapua teyujta'a, a'achú mej pua'amé, mej mi miyen tiyen titeejú'un a'ij tɨ tavástara'a ayén tíhua'uxɨ́'epɨ'ɨntari'iri'i seɨj ajta seɨj, a'ij tɨ ajta Dios tihua'utajé. 18Tɨ pua'a ari antisíjchi'ihuaca'a ɨ́ naviira'an ɨ́ ja'atɨ tɨ́'ɨj Dios raatajé, ché'e a'ɨ́ɨn ja'atɨ caí ayén tí'itese'e tɨ ra'avá'anan ɨ́ tɨ antisíjchi'ihuaca'a. Ajta, tɨ pua'a caí xɨ antisíjchi'ihuaca'a ɨ́ naviira'an ɨ́ ja'atɨ tɨ́'ɨj Dios raatajé, ayée pu ruxe'eve'e tɨ a'ɨ́ɨn ja'atɨ caí ra'antisí'iche ɨ́ runavij. 19Ayee pu'u xaa ne'u, a'iné capu a'ij huataújmua'a ɨ́ Dios jemi tɨ pua'a ja'atɨ ra'antisíjche ɨ́ runavij nusu caí ayén ra'antisíjcheca'a. 20A'ɨ́j pu jɨ́n, ja'atɨ tɨ na'a, ché'e a'ɨ́ɨn ayén éene'e huateáturan a'ij tɨ 'eene'e tɨ́'ɨj Dios ayén raatajé. 21Tɨ pua'a pauj ca'anéeri jɨ́n tí'imuarɨ'eca'a tɨ́'ɨj Dios muaatajé, capej pe'ɨ́jna jɨ́n a'ij té'amuajca. Aru tɨ pua'a ayén tí'irɨ'ɨristan pej pi ra'antimuá'itɨn, pej pi pajta axɨéehua á'uche'ecane'en, patá'aj piyen huárɨni. 22Ayee pu'u na'a tí'een, a'iné a'ɨ́jna tɨ ca'anéeri jɨ́n tí'imuarɨ'eca'a tɨ́'ɨj tavástara'a raatajé, pu'uri ayén ruxɨ́'evi'ira'a jɨ́n tí'ivaɨre'e ɨ́ tavástara'a jemi. Ajta a'ɨ́ɨn tɨ ruxɨéehua tí'imuarɨ'eca'a tɨ́'ɨj tavástara'a raatajé, a'ɨ́ɨ pu ari ca'anéeri jɨ́n tí'ivaɨre'e ɨ́ jemin. 23Cɨríistu'u pu tiu'utanájchitaca'a ɨ́ sej jɨ́n té'echa'ɨɨca'a ɨ́ Dios jemi. A'ɨ́j pu jɨ́n, caxu ché'e taúra'acare'en sej ca'anéeri jɨ́n tí'imuarɨ'e huá'a jemi ɨ́ teteca. 24Ayee nu tejá'amua'ixaate'e, ne'ihuaamua'a, setá'aj siyen che'atá sena'a 'eene'en huateáturan ɨ́ Dios jemi seɨj seajta seɨj setɨ́j 'eene'e tɨ́'ɨj a'ɨ́ɨn amuaatajé. 25Jɨ́me'en a'ɨ́ɨme ɨ́ mej caí viɨ́che'ejme, capu ti'itɨj jɨ́n tinaa'íjca ɨ́ tavástara'a sino ayée nu tejá'amua'ixaate'e a'ij tɨ ayén tiná'amitɨejte'e ineetzi i nej caí até'ɨtzea'ara a'ɨ́jna jɨme'e tɨ a'ɨ́ɨn ná'ancu'uvajxɨ ɨ́ tavástara'a. 26A'iné pu'uri tɨ́n teja'uré'enejsin ɨ́ tej jɨ́n rajpuaíitzi tá'aju'un, ayée pu tiná'amitɨejte'e tɨ ayén tiraavíjte'e sej siyen 'eene'en huateáturan setɨ́j 'een íjii. 27Tɨ pua'a peri seɨ́j tévi'itɨne'en, capej piyen rahuauca a'ij pej ye'í huárɨni pej mé rúurɨeni. Na'ari tɨ pua'a pauj aseɨ́j á'uche'ecane'en, capej piyen rahuauca pej huaténeɨche. 28Mɨ ajta, tɨ pua'a seɨj huaténeɨche, capu a'ɨ́ɨn ti'itɨj jɨ́n auteájturaa ɨ́ Dios jemi. Ajta tɨ pua'a seɨ́j 'ɨ́ita'a ayén huatéviɨche'en, capu ajta ti'itɨj jɨ́n auteájturaa. Camu xaa ne'u a'ij pua'a rɨcɨ sino ayée pu hua'utamuárɨ'eriste'esin me'ɨ́jna jɨme'e mej meri naími'i á'ujujhua'an. Mɨ neajta inee, ayée nu 'een jɨ́n niyen tejá'amua'ixaate'e a'iné canu raxɨ́'eve'e tɨ ayén tejamuáaruuren. 29Casi'i, ne'ihuaamua'a, ayée pu huataújmua'a a'ɨ́jna ɨ́ niuucari i nej já'amua'ixaate'e. Pu'uri tɨ́n teja'uré'enejsin a'ɨ́jna xɨcáara'a tɨ ayén titaaxɨ́'epɨ'ɨntari'iri'i. Tɨ́j na'a íjii tɨ yú auca'itɨ́ a'ame, miché'e miyen ti'itiújcha'ɨɨ a'ɨ́ɨme ɨ́ mej néjne'ɨche. Miché'e miyen rɨjca matɨ́j a'ɨ́ɨme ɨ́ mej caí xɨ huanéjne'ɨcheca'a. 30Majta a'ɨ́ɨme ɨ́ mej ruxɨeemɨ́jte'e, miché'e miyen 'eene'en yee cumu mej caí ruyein. Majta a'ɨ́ɨme ɨ́ mej rutémua'ave'e, miché'e majta miyen 'eene'en yee cumu mej caí ché'e na'anaj. Ajta a'ɨ́ɨme ɨ́ mej tí'inanaave, ché'e ayén tihuá'amitɨejte'e mej caí ti'itɨ tícha'ɨɨ. 31Ajta a'ɨ́ɨme ɨ́ mej miyen me'ɨ́jna jɨ́n ruvaɨre'e tɨ íiyen tí'iseijre'e chaanaca japua, miché'e caí nain jɨ́n ruvaɨre'e, a'iné pu'uri tɨ́n te'entipuá'ajte nain tɨ́j na'a tɨ yen tí'iseijre'e íiyen chaanaca japua. 32Neajta inee, ayée nu tí'ijxe'eve'e mú'ejmi jɨme'e sej caí ti'itɨj jɨ́n a'ij té'ujmuajca a'iné a'ɨ́jna tɨ caí neɨche, ayée pu a'ɨ́jna jetze ruxe'eve'e a'ɨ́jna jɨme'e ɨ́ tɨ tiráacɨ'ɨti ɨ́ tavástara'a jemi. A'ɨ́j pu jɨ́n ayén rɨ́'ɨ ti'itiújcha'ɨɨ tɨ́'ij ayén rɨ́'ɨ tiraatá'an a'ɨ́jna ɨ́ tavástara'a. 33Mɨ ajta a'ɨ́ɨn tɨ neɨche, ayée pu a'ɨ́jna jetze ruxe'eve'e a'ɨ́jna jɨme'e tɨ yen tí'iseijre'e íiyen chaanaca japua tɨ ij ayén a'ɨ́jna jɨ́n rɨ́'ɨ tiraatá'acare'en a'ɨ́jna ɨ́ ru'ɨ́j. A'ɨ́j pu jɨ́n caí ché'e rɨ'ɨrí tɨ nain jɨ́n tiraatévaɨre'en ɨ́ tavástara'a. 34Ayee pu che'atá na'a 'een jɨ́me'en ɨ́ 'ɨ́ita'a tɨ ruseɨ́j á'uche'ecan, tɨ ajta caí viɨ́che'e. Ayee pu a'ɨ́jna jetze ruxe'eve'e a'ɨ́jna jɨme'e tɨ tí'iracɨ'ɨti ɨ́ tavástara'a jemi. Ayee pu ajta a'ɨ́jna jetze ruxe'eve'e tɨ rɨ'éene'ecán jɨ́n huateáturan ɨ́ Dios jemi, nain jɨme'e ɨ́ rutevij jetze, ajta ɨ́ ruxɨ́ejniu'uca jɨme'e. Mɨ ajta, a'ɨ́ɨn ɨ́ 'ɨ́ita'a tɨ ari viɨ́che'e, ayée pu a'ɨ́jna jetze ruxe'eve'e a'ɨ́jna tɨ yen tí'iseijre'e íiyen chaanaca japua tɨ ij ayén rɨ́'ɨ tiraatá'acare'en ɨ́ rucɨ́n. 35Canu ne'ɨ́jna jɨ́n niyen tejá'amua'ixaate'e nej ni ti'itɨj jɨ́n amuaatá'ijmɨi sino nej ni ti'itɨj jɨ́n amuaatévaɨre'en sej si siyen rɨ́'ɨ ti'itiújcha'ɨɨ a'ij tɨ tiraavíjte'e, sej si nain jɨ́n raná'amiche'en ɨ́ tavástara'a. 36Ajta a'ɨ́jna ɨ́ ja'atɨ tɨ ayén tiyaúj tɨ caí xɨ viɨ́che'e, tɨ pua'a ayén rá'amitɨejte'e tɨ caí xɨ́'epɨ'ɨn rɨcɨ tɨ raatá'ijmɨi, ajta tɨ pua'a ari mú á'ume'en ɨ́ tɨ jɨ́n temuaístaca a'ɨ́jna ɨ́ 'ɨ́ita'a, ché'e a'ɨ́ɨn ya'upuáara'an ayén huárɨni a'ij tɨ tirá'amitɨejte'eca'a. Capu ti'itɨj jɨ́n tiú'ujxana'acɨra'aten ɨ́ Dios jemi, ché'e a'ɨ́ɨn 'ɨ́ita'a huatéviɨche'en. 37Mɨ ajta a'ɨ́jna ɨ́ ja'atɨ, tɨ pua'a ayén temua'a naa tiraaxɨ́'epɨ'ɨntare ɨ́ ru tzajta'a tiracha'ɨ́ɨ á'aye'i ɨ́ ruyauj a'ij tɨ 'een, ajta tɨ pua'a caí ja'atɨ ayén ca'aníjra'a ratá'aca tɨ huatéviɨche'en a'ɨ́jna ɨ́ yaujra'an, a'ɨ́jna ɨ́ ja'atɨ, a'ɨ́ɨ pu xaa xɨ́'epɨ'ɨn rɨcɨ. 38A'ɨ́j pu jɨ́n, xɨ́'epɨ'ɨn rɨcɨ a'ɨ́jna ɨ́ ja'atɨ tɨ ayén ratá'acare'en ɨ́ ruyauj tɨ huatéviɨche'en. Ajta a'ɨ́ɨn ɨ́ ja'atɨ tɨ ayén racha'ɨɨ á'aye'i ɨ́ ruyauj a'ij tɨ 'een, tɨ ij caí huatéviɨche'en, a'ɨ́ɨ pu jaítze'e xɨ́'epɨ'ɨn rɨcɨ. 39Ajta, a'ɨ́jna ɨ́ 'ɨ́ita'a tɨ ari viɨ́che'e, a'ɨ́ɨ pu ca'anéeri jɨ́n naími'i seijre'e jamuan ɨ́ rucɨ́n tɨ́j na'a tɨ auj ruuri a'ɨ́jna ɨ́ cɨ́na'ara'an. Ajta, tɨ pua'a huámɨ'ɨni a'ɨ́jna ɨ́ cɨ́na'ara'an, pu'uri rɨ'ɨrí tɨ ajtahua'a ruxɨ́'evi'ira'a jɨ́n huatéviɨche'en a'ɨ́jna jamuan ja'atɨ tɨ ra'aráanajche. Seɨj pu'u ruxe'eve'e, tɨ ayén huatéviɨche'en a'ij tɨ tiraavíjte'e ɨ́ tavástara'a jemi. 40Mɨ ajta a'ɨ́jna ɨ́ 'ɨ́ita'a, jaítze'e pu ɨ́ Dios rɨ́'ɨ tiratá'aca tɨ pua'a ayén 'éeni'icɨ'e huateáturan a'ij tɨ 'een. Ayee pu tiná'amitɨejte'e ineetzi. Ajta ayej ne'ase tɨ ajta ayén che'atá na'a tirá'amitɨejte'e ɨ́ xɨéjniu'ucare'ara'an ɨ́ Dios.

will be added

X\