1 Corintios 6

1Tɨ pua'a siyen tiú'ujaaxɨejvi'ira, ¿a'iné tí'irɨ'ɨri tɨ ja'atɨ ayén huataúra'an tɨ a'uun á'ume'en huá'a jemi ɨ́ jueesi ɨ́ mej caí téjmi jetze ajtéme'ecan i tej té'atzaahuate'e mej mi me'ɨ́n miyen raaxɨ́'epɨ'ɨntare'en? ¿A'iné 'een jɨme'e secaí rujɨ́ɨmua'a raaxɨ́'epɨ'ɨntare'en a'ɨ́mej jemi ɨ́ mej jemin seijre'e ɨ́ Dios? 2Xu'uri ramua'aree tej tiyen hua'uxɨ́jte'en naíjmi'ica ɨ́ mej yen japuan seijre'e ɨ́ chaanaca. Tɨ pua'a ayén té'eme sej hua'uxɨ́jte'en se'ɨ́mej ɨ́ mej yen japuan seijre'e ɨ́ chaanaca, ¿ni tzaa secaí raayɨ́'ɨtɨ sej siyen raaxɨ́'epɨ'ɨntare'en se'ɨ́jna tɨ caí ti'itɨ jetzen ruxe'eve'e? 3Casi'i, teen tu teajta huá'axɨjte'e a'ɨ́mej ɨ́ mej ta japua tí'ivaɨre'e. A'ɨ́j pu jɨ́n, capu a'atzu muárɨ'eri tej tiyen raaxɨ́'epɨ'ɨntare'en a'ɨ́jna tɨ téjmi jetze ayén tí'ijninei íjii tej huáteɨte. 4Ajta tɨ pua'a ayén ruxe'eve'e sej siyen raaxɨ́'epɨ'ɨntare'en se'ɨ́jna tɨ mú'ejmi jetze tí'ijninei íjii, ¿a'iné 'een jɨme'e siyen se'ɨ́jna jɨ́n tihuá'ijcate'e mej mi jueesi jɨ́n antiújmua'areere a'ɨ́mej ɨ́ mej caí rɨ́'ɨ tihuá'axe'eve'e ɨ́ teɨte? 5Ayee nu 'een jɨ́n tejá'amua'ixaate'e nej ni amuaatatévi'iraste'en. ¿Ni tzaa caí rɨ'ɨrí tɨ mú'ejmi jemi seɨ́j seijre'e tɨ ayén raayɨ́'ɨtɨ tɨ temua'a naa ra'uxɨ́jte'en a'ɨ́jna jɨme'e ɨ́ mej rújaaxɨejvi'i ɨ́ ta'ihuaamua'a ɨ́ mej majta té'atzaahuate'e? 6Mɨ seajta mú'een, ayée xu tí'ijrɨ'ɨre. Seɨ́j pu ayén runiúuste'e ɨ́ ru'ihuaara'a, ajta ayén rɨcɨ huá'a jemi ɨ́ mej caí té'atzaahuate'e. 7Xu'uri se'ɨ́jna jɨ́n huamuá'itɨche se'ɨ́jna jɨme'e tɨ ja'atɨ ayén runiúuste'e a'ɨ́jna jemi ɨ́ ru'ihuaara'a. Ayee pu tejámuaatéva'ɨri sej siyen huataúra'an tɨ ja'atɨ ayén a'ij pua'a amuáaruuren nusu tɨ ayén ti'itɨ amuaanáhua'i. 8Mɨ seajta mú'een, ayée xu rujɨ́ɨmua'a se'ɨ́ɨn pú'een ɨ́ sej a'ij pua'a huá'aruuree xa'aye'i, seajta siyen tihuá'anahua'i. Ayee xu huá'aruure ɨ́ ru'ihuaamua'a a'iquí nu'u mejá'amua'ihuaamua'a. 9Mú'een xu ramua'aree temua'a naa tɨ caí ayén tihuá'acɨ'ɨti a'ɨ́mej ɨ́ mej a'ij pua'a ti'itiújcha'ɨɨ mej me'uun a'uteárute a'u tɨ Dios tejé'aijta. Caxu taúra'acare'en tɨ ja'atɨ á'amuacuanamua. Camu a'uun a'uteáruti a'ɨ́ɨme ɨ́ mej a'ij pua'a rɨjca na'ari a'ɨ́ɨme ɨ́ mej rana'amiche a'ɨ́jna tɨ caí Dios pú'een nusu a'ɨ́ɨme ɨ́ mej tí'ixana'acɨre'e ɨ́ ruxɨ́'ej tevi jamuan ca'ɨ́n a'ɨ́ɨme ɨ́ mej ruxɨ́'ej teteca jamuan tí'ixana'acɨre'e. 10Capu ajta tihuá'acɨ'ɨti a'ɨ́mej ɨ́ mej ti'inahua'ara nusu ɨ́ mej jeíhua huápɨ'ɨ tí'inecua'atze mej tí'ijcha'ɨɨca ca'ɨ́n ɨ́ mej rutá'aruaijve'e na'ari ɨ́ mej a'ij pua'a tiú'ujjepe'e o mej avíitzi jɨ́n tí'inahua'aj. Camu xaa ne'u seíire'e muá'aju'u ɨ́ Dios jemi. 11Seajta mú'een, je'icáj xu huá'a jetze ajtéme'ecantaca'a. Mɨ ajta Dios, a'ɨ́ɨ pu ari tejámuaacá'ari'iri'i ɨ́ sej jɨ́n auteájturaa ɨ́ jemin. A'ɨ́ɨ pu ajta huateúra'ate mú'ejmi. Ajta a'ɨ́jna jɨme'e ɨ́ xɨéjniu'ucare'ara'an ɨ́ Dios, mú'een xu rɨ'éene'ecán jɨ́n huateájturaa ɨ́ Dios jemi niuucajtze'en a'ɨ́jna ɨ́ tavástara'a, ɨ́ Jesús tɨ ajta Cɨríistu'u pú'een. 12Nain pu í'ixɨ'epɨ'ɨn. Ajta ayée pu tinaatá'aca nej niyen huárɨni. Mɨ ajta, capu nain ayén tí'ivaɨre'e. Naíjmi'i pu i'i xɨ́'epɨ'ɨn, ajta ayée pu xaa tinaatá'aca nej niyen huárɨni. Mɨ neajta inee, canu huatáne'a'asin tɨ ti'itɨ na'antimuá'itɨn nej ni ne'ɨ́jna jɨ́n ca'anéeri jɨ́n tiraatévaɨre'en. 13Ajta a'ɨ́jna tɨ tí'icua'iri'i, a'ɨ́ɨ pu ayén tí'ivaɨre'e ɨ́ jucáj jetze. Ajta a'ɨ́jna ɨ́ jucáj, a'ɨ́ɨ pu ajta ayén tí'ivaɨre'e tɨ cua'ira te'aráyeijxɨ'ɨn. Mɨ ajta Dios, a'ɨ́ɨ pu ra'antipuá'ajte'esin ɨ́ jucáj, ajta ɨ́ cua'ira. Ajta ɨ́ tej ratéhua'ira'a, capu ayée na'a tí'ivaɨre'e tej ti te'ɨ́jna jɨ́n tí'ixana'acɨre'e sino tej ti te'ɨ́jna jɨ́n raatévaɨre'en ɨ́ tavástara'a. Ajta ɨ́ tavástara'a, a'ɨ́ɨ pu ajta raatévaɨre'esin a'ɨ́jna ɨ́ tej ratéhua'ira'a. 14Ajta a'ɨ́ɨn Dios, a'ɨ́ɨ pu rumuárɨ'eri'ire'ara'an jɨ́n ra'ajjáj ɨ́ tavástara'a huá'a tzajta'a ɨ́ mɨ'ɨchite. A'ɨ́ɨ pu ajta ta'ajjájpua itejmi. 15Xu'uri ramua'aree tɨ Cɨríistu'u jetze ajtéme'ecan a'ɨ́jna ɨ́ sej ratéhua'ira'a. ¿A'iné huataújmua'a a'ɨ́jna? ¿Ni qui nej ra'anténajchite'e jamuan ɨ́ 'ɨ́ita'a tɨ tí'iteji'ivi ɨ́ rutevij jɨme'e ne'ɨ́jna tɨ Cɨríistu'u jetze ajtéme'ecan? Capu xaa ne'u. 16¿Ni qui siyen ramua'aree tɨ a'ɨ́ɨn tɨ ayén anteújnaxca jamuan ɨ́ 'ɨ́ita'a tɨ tí'iteji'ivi ɨ́ rutevij jɨme'e, ayée pu huaújruu mej mi seɨ́j mena'a tévira'an pú'eene'en? 17Mɨ ajta, a'ɨ́ɨn tɨ ayén huataújtuiire'en ɨ́ tavástara'a jemi, ayée pu ruruuren tɨ a'ɨ́jna jamuan seɨ́j na'a pú'een ɨ́ xɨéjniu'ucare'ara'an tzajta'a. 18Setá'aj nain jɨ́n raatapuá'ajta sej siyen tí'ixana'acɨre'e. Ajta seica jɨme'e ɨ́ mej jɨ́n ateáturaave ɨ́ Dios jemi, naími'i pu ayén caí rutevij jɨ́n a'ij tiú'uruure. Mɨ ajta, tɨ pua'a ja'atɨ ayén tí'ixana'acɨre'e, a'ɨ́ɨ pu a'ij pua'a raruure ɨ́ rutevij. 19- 20Casi'i, ayée pu tí'ivaɨre'e ɨ́ á'amuatevi tɨ́j teyuu tɨ tzajta'an huiirájca ɨ́ xɨéjniu'ucare'ara'an ɨ́ Dios. A'ɨ́ɨ pu a'amua tzajta'a seijre'e. Ajta, mú'een xu ra'ancuré'evi'itɨ ɨ́ Dios. Mú'een xu caí se'ɨ́jna jɨ́n antiújmua'aree ɨ́ rutevij a'iné a'ɨ́ɨ pu tiu'utanájchitaca'a mú'ejmi jetze me'ecan. A'ɨ́j pu jɨ́n ayén ruxe'eve'e sej siyen raná'amiche'en ɨ́ rutevij jɨme'e.

will be added

X\