1 Corintios 5

1Ayee nu tiú'unamuajri'i tɨ ayén ti'ayajna tɨ nú'u seɨj tɨ mú'ejmi jemi ajtéme'ecan tí'ixana'acɨre'e a'ɨ́jna jɨme'e tɨ jamuan hui'ica a'ɨ́jna tɨ ratévi'itɨn ɨ́ ya'upuáara'an. Jé'ecan pu a'ij pua'a seijre'e a'ɨ́jna. Majta a'ɨ́ɨme ɨ́ mej seɨj chuéjra'a japua é'eme'ecan, camu miyen rɨcɨ. 2Mɨ seajta mú'een, a'ɨ́j xu jɨ́n á'ujtzaahuate'e. ¿Ni caí ayén tiraavíjte'e sej se'ɨ́jna jɨ́n huataújxɨeemɨste'en? Jee xaa ne'u. Setá'aj raatamuárite'en se'ɨ́jna ɨ́ ja'atɨ tɨ ij caí ché'e seijre'e mú'ejmi jemi. 3Ayee nu tejá'amua'ixaate'e tzáahuati'ira'a jɨme'e. Yé nu ɨmuá huaca inee. Mɨ neajta, a'úu nu á'uca mú'ejmi jemi nemua'atziira'a jɨme'e. Nu'uri niyen ra'uxɨ́jte ne'ɨ́jna ɨ́ ja'atɨ tɨ ayén rɨcɨ netɨ́j niyen ráruurénche'e tɨ pua'a ne'uun á'ucatijche'e. 4- 5Ayee xu huárɨni setɨ́'ɨj e'etiújseɨre'en niuucajtze'en ɨ́ tavástara'a, a'ɨ́jna ɨ́ Jesús, ajta netɨ́'ɨj ne'uun mú'ejmi jemi é'eseijre'e nemua'atziira'a jɨme'e. Setá'aj siyen se'ɨ́jna jetze araújca'anen ɨ́ muárɨ'eri'ire'ara'an ɨ́ tavástara'a ɨ́ Jesús sej si raatátuiire'en se'ɨ́jna ɨ́ ja'atɨ ɨ́ Satanás jemi tɨ ij a'ɨ́ɨn tiyaaru'u ra'upuá'ajte'en ɨ́ tévira'an, tɨ ij ajta Dios ru'irájtuaani ɨ́ xɨéjniu'ucare'ara'an ɨ́ ja'atɨ a'ɨ́jna xɨcáara'a tɨ jetzen tiu'ita'áijta ɨ́ tavástara'a. 6Capu xɨ́'epɨ'ɨn sej siyen se'ɨ́jna jɨ́n á'ujtzaahuate'e a'iné ayée pu tiu'uteújnaxca mú'ejmi jemi tɨ́j ajta tiu'uteújnaxca ɨ́ mej rajnájchite'esin ɨ́ cuaíjtzi. Cɨ́j mu'u caj tírajnájchite'esin. Ajta á'iyen nainjapua huaneájxɨ'ɨsin. 7A'ɨ́j xu jɨ́n, setá'aj mé rúurɨeni se'ɨ́jna tɨ mí'ime'ecan sej si siyen huaujjéjcuare'en tɨ́j a'ɨ́jna ɨ́ cuaíjtzi tɨ caí ti'itɨ ránaxcaca'a. Ayee xu huárɨni a'iné pu'uri huataújmuaɨ'ɨvejtaca'a a'ɨ́jna ɨ́ Cɨríistu'u tɨ téjmi jetze me'ecan huamɨ́'ɨ tɨ ij caí puaíjtzi táacɨ'ɨti. 8A'ɨ́j pu jɨ́n, tiché'e tiyen tiú'uyesten a'ij tɨ tiraavíjte'e ɨ́ Dios jemi, tetá'aj caí ché'e tiyen a'ij pua'a ti'itítacha'ɨɨ, teajta caí ché'e ti'itɨj jɨ́n auteáturan ɨ́ Dios jemi sino tiché'e tiyen rɨ́'ɨ ti'itítacha'ɨɨ tzáahuati'ira'a jɨme'e, tiché'e teajta tiyen tena'a tiu'utaxáj niuucari jɨme'e tɨ ayén ti'ayajna. 9Nu'uri niyen tejámuaatá'itɨiiri'i ɨ́ yu'uxari jetze sej caí huá'a jamuan tiújse'ɨrihua'an a'ɨ́mej ɨ́ mej tí'ixana'acɨre'e. 10A'ɨjna ɨ́ niuucari tɨ jɨ́me'en yee “ɨ́ mej tí'ixana'acɨre'e”, capu ayén huataújmua'a ja'atɨ tɨ na'a tɨ a'ij pua'a rɨjca ɨ́ Dios jemi, tɨ pua'a a'ij pua'a ti'itiújcha'ɨɨ nusu tɨ huápɨ'ɨ tí'inecua'atze tɨ jeíhua tí'ijcha'ɨɨ na'ari tí'inahua'aj ca'ɨ́n seɨ́j na'amiche tɨ caí Dios pú'een. Tɨ pua'a ayén huataújmua'ati, ayée pu ruxe'eve'e a'ame sej siyen ajtácɨɨne naíjmi'ica jemi ɨ́ mej yen japuan seijre'e ɨ́ chaanaca. 11Mɨ ajta, ayée pu huataújmua'a ɨ́ nej jɨ́n tejámuaatá'itɨiiri'i sej caí ché'e jamuan á'ujujhua'ane'en seɨ́j tɨ ayén tamuari tɨ́j ta'ihuaara'a tɨ pua'a a'ɨ́ɨn ja'atɨ ayén tí'ixana'acɨre'e nusu huápɨ'ɨ tí'inecua'atze tɨ jeíhua tí'ijcha'ɨɨ na'ari rana'amiche tɨ caí Dios pú'een ca'ɨ́n a'ij pua'a tiú'ujjepe'e. Caxu seajta jamuan á'ujujhua'ane'en tɨ pua'a ayén rutahuaíve'e na'ari ti'inahua'ara. Caxu seajta tí'icua'a jamuan seɨj tɨ ayén rɨcɨ. 12Canu ne'ɨ́jna jɨ́n antínmua'aree ne niyen hua'uxɨ́jte'en a'ɨ́mej ɨ́ mej caí téjmi jetze ajtéme'ecan sino a'ɨ́ɨ pu Dios huá'axɨjte'en. Mɨ seajta mú'een, mú'een xu xaa se'ɨ́jna jɨ́n antiújmua'aree sej siyen hua'uxɨ́jte'en a'ɨ́mej ɨ́ mej 'a'amua jetze ajtéme'ecan. Setá'aj raatamuárite'en se'ɨ́jna ɨ́ ja'atɨ tɨ a'ij pua'a ti'itiújcha'ɨɨ.

will be added

X\