1 Corintios 3

1Ayee nu tejá'amua'ixaate'e, ne'ihuaamua'a, tɨ caí huatárɨ'ɨristareca'a nej niyen tejámuaatá'ixaate'en tɨ́j a'ɨ́ɨme ɨ́ tɨ huá'a jemi huateájturaa ɨ́ xɨéjniu'ucare'ara'an ɨ́ Dios, sino tɨ́j a'ɨ́ɨme ɨ́ mej yen japuan seijre'e ɨ́ chaanaca, mɨ sej seuchén huataújtuiiri'i ɨ́ Cɨríistu'u jemi. 2Netɨ́'ɨj tejamuaamí, canu cua'ira jamuaamí sino a'ɨ́j nu'u amua'antí'ite ɨ́ léechi a'iné caxu xɨ yá'ujepɨ'ɨra'a ɨ́ cua'ira. Seajta íjii, seúche'e xu siyen 'een. Caxuu xɨ teja'ujépɨ'ɨra'a. 3Seúche'e xu siyen e'en matɨ́j a'ɨ́mej ɨ́ mej yen japuan huachéjme ɨ́ chaanaca. A'iné ayée pu seijre'e mú'ejmi tzajta'a cumu sej ruchueere'e, seajta sej rújaaxɨejvi'i. ¿Ni caí ayén huataújmua'a sej seuj huá'a jemi ajtéme'ecan a'ɨ́mej ɨ́ mej yen japuan seijre'e ɨ́ chaanaca? Jee xaa ne'u, mú'een xu siyen tí'ijrɨ'ɨre a'ij mej tí'ijrɨ'ɨre ɨ́ seica ɨ́ teteca. 4Ayee xu rɨcɨ. Seɨ́j tɨ mú'ejmi jemi ajtéme'ecan ayén ti'ixa tɨjɨ́n: “Nee nu Pablo jetze ajtéme'ecan.” Ajta ɨ́ seɨj ayén tɨjɨ́n: “Neajta inee, Apolos nu jetze ajtéme'ecan.” ¿Ni secaí siyen che'atá sena'a rɨcɨ matɨ́j a'ɨ́ɨme ɨ́ teteca ɨ́ mej caí jetzen seijre'e ɨ́ xɨéjniu'ucare'ara'an ɨ́ Dios? Jee xaa ne'u, ayée xu rɨcɨ. 5Niché'e a'atzu tejá'amua'ihua'u. ¿A'iné ti'itɨj jɨ́n tí'ivaɨre'e a'ɨ́jna ɨ́ Apolos, na'ari ti'itájni jɨ́n na'antínmua'aree inee, inee i'i Pablo? Ayee nu tejá'amua'ixaate'e. Teen tu'u ravaɨre'e ɨ́ tavástara'a jemi. Ayee xu 'een jɨ́n té'antzaahua ɨ́ tavástara'a jemi se'ɨ́jna jɨme'e tej tiyen ravaɨre'e, a'ij tɨ́j a'ɨ́ɨn titaa'íjca seɨj ajta seɨj. 6Ayee nu tí'ivaɨre'e tɨ́j ja'atɨ tɨ ayén tiú'uhuii, ajta a'ɨ́ɨn ɨ́ Apolos, a'ɨ́ɨ pu ayén tí'ivaɨre'e tɨ́j ja'atɨ tɨ tiú'ipuaa. Ajta a'ɨ́ɨn ɨ́ Dios, a'ɨ́ɨ pu raaváujsi'iri'i tɨ ij huácɨɨre. 7A'ɨ́j pu jɨ́n, a'ɨ́jna tɨ tiú'uhuii, capu ti'itɨj jɨ́n ruxe'eve'e. Ajta a'ɨ́ɨn tɨ tiú'ipuaa, capu ti'itɨj jɨ́n ruxe'eve'e, sino a'ɨ́ɨ pu xaa ɨ́ Dios tɨ raaváujsi'iri'i tɨ i huácɨɨre, a'ɨ́ɨ pu xaa a'ɨ́ɨn pú'een ɨ́ tɨ ruxe'eve'e. 8- 9Naíjmi'i mú tí'ivaɨre'e a'ɨ́jna tɨ tí'ihuiite'e, ajta a'ɨ́jna tɨ ti'ipuáa á'aye'i. Ruxɨ́'ej mu'u tí'ivaɨre'e, ajta Dios pu ayén hua'utá'asin a'ij tɨ tiraavíjte'e a'ɨ́jna jɨme'e ɨ́ tɨ racɨ́'ɨcɨpua ɨ́ tɨ jɨ́n tiu'umuárɨej, a'iné teen tu jamuan tí'imuarɨ'e ɨ́ Dios. Seajta mú'een, ayée xu ti'itɨj jɨ́n tí'ivaɨre'e tɨ́j a'u mej tejé'etaseehua, ajta tɨ́j chi'ij tɨ Dios rá'ajtaahua. 10Mɨ neajta inee, a'iné Dios pu jeíhua huápɨ'ɨ naa tinaatá'a nej ni niyen tiu'umuárɨ'en, ayée nu huarɨ́j tɨ́j ja'atɨ tɨ chi'ij ájtaahua. Nee nu ra'itátaahuaxɨ ne'ɨ́jna tɨ japuan ájtaavijhua ɨ́ jaxu'u tɨ́j ja'atɨ tɨ temua'a naa raayɨ́'ɨtɨ. Ajta ɨ́ seɨj, a'ɨ́ɨ pu japuan té'ajtaahua. Ajta ayén ruxe'eve'e tɨ rɨ́'ɨ naa tirá'ajtaahua tɨ ij caí a'ij pua'a éene'e ájcɨ'ɨpiihua. 11A'iné, jɨ́me'en a'ɨ́jna tɨ a'itátaavijhua, seɨj pu'u pú'een, ajta a'ii pu a'ɨ́ɨn pú'een ɨ́ Jesus tɨ ajta Cɨríistu'u pú'een. Capu máàj ja'atɨ tɨ ayén tí'ivaɨre'e tɨ́j a'ɨ́jna tɨ a'itátaavijhua. 12- 13Ajta, ayée pu seíire'e a'ame tɨ ti'itɨj tɨ jɨ́n japuan ájtaavijhuaca'a tɨ pua'a a'ɨ́jna jɨme'e ɨ́ oro nusu plata jɨme'e na'ari tetej jɨme'e tɨ huápɨ'ɨ tí'ijnajche. Ajta ayén che'atá na'a seíire'e a'ame tɨ pua'a ayén ájtaavijhuaca'a a'ɨ́jna jɨme'e ɨ́ cɨyej na'ari ɨxaj jɨme'e ca'ɨ́n huáacɨxa'a jɨme'e. Jee xaa ne'u, ayée pu seíire'e a'ame ɨ́ ti'itɨ ɨ́ mej jɨ́n tiu'umuárɨej ɨ́ teɨte, seɨj ajta seɨj, matɨ́j mena'a pua'amé mej íiyen seijre'e ɨ́ chaanaca japua. A'ɨ́jna xɨcáara'a jetze, ayée pu Dios raaxɨ́'epɨ'ɨntare'en a'ij tɨ 'een, a'iné ayée pu teja'uré'enejsin tɨ́j taij tɨ jɨ́n hua'utaseíjrate'esin. Ajta a'ɨ́jna ɨ́ taij, a'ɨ́ɨ pu raatémua'atzi tɨ pua'a xɨ́'epɨ'ɨn metiu'umuárɨej seɨj ajta seɨj nusu mecaí. 14Tɨ pua'a ayén té'eviicua'i ɨ́ taij tzajta'a a'ɨ́jna tɨ jɨ́n ja'atɨ tiu'umuárɨej, ayée pu tí'iracɨ'ɨti a'ɨ́jna ɨ́ ja'atɨ a'ij tɨ tiraavíjte'e. 15Na'ari caí, tɨ pua'a huateájtaani ɨ́ tɨ jɨ́n tiu'umuárɨej ɨ́ ja'atɨ, nain pu á'ujɨsin. Ajta a'ɨ́ɨn ɨ́ ja'atɨ, Dios pu xaa ru'irátuaasin aru ayée pu éene'e a'ame tɨ́j ja'atɨ tɨ xa'ichu'i a'uun ráavaɨ ɨ́ taij tzajta'a. 16Ayee nu tejá'amua'ixaate'e ne'ɨ́jna jɨme'e sej se'ɨ́ɨn pú'een ɨ́ chi'ira'an ɨ́ Dios. Ajta mú'ejmi tzajta'a pu huateájturaa ɨ́ xɨéjniu'ucare'ara'an ɨ́ Dios. 17Tɨ pua'a ja'atɨ ayén raaté'uuna a'ɨ́jna ɨ́ chi'ira'an ɨ́ Dios, Dios pu ra'antipuá'ajte'esin a'ɨ́jna ɨ́ ja'atɨ a'iné pu'uri Dios huateúra'ate a'ɨ́jna ɨ́ chi'ij, sej mú'een se'ɨ́ɨn pú'een ɨ́ chi'ira'an ɨ́ Dios. 18- 19Caxu rucuanamua rujɨ́ɨmua'a. Tɨ pua'a ayén tirá'amitɨejte'e seɨ́j ɨ́ ja'atɨ tɨ ayén rɨ́'ɨ tirú'umua'aree a'ɨ́jna jɨme'e ɨ́ huá'amua'atziira'a a'ɨ́mej ɨ́ mej íjii huáteɨte, ché'e a'ɨ́ɨn caí ché'e ayén á'ujtzaahuate'e a'ɨ́jna jɨme'e ɨ́ huá'amua'atziira'a. Ché'e a'ɨ́ɨn ayén ra'ancuré'an ɨ́ mua'atzíira'a tɨ tavástara'a jetze é'eme'ecan, a'iné a'ɨ́jna ɨ́ huá'amua'atziira'a a'ɨ́ɨme ɨ́ mej íjii huáteɨte, capu ti'itɨ a'ij huataújmua'a ɨ́ Dios jemi. Ayee pu xaa té'esiɨɨmua'i tɨjɨ́n: “Dios pu huá'avivi'ira'an a'ɨ́mej ɨ́ mej miyen á'ujtzaahuate'e me'ɨ́jna jɨme'e mej tí'ihua'itaca ɨ́ rumua'atzíira'a jɨme'e.” 20Ajta ayén té'eyu'usi'i tɨjɨ́n: “Tavastara'a pu ramua'aree tɨ caí ti'itɨj vaɨre'e ɨ́ huá'amua'atziira'a a'ɨ́ɨme ɨ́ mej nu'u jeíhua huápɨ'ɨ té'umua'aree.” 21- 22A'ɨ́j xu jɨ́n, caxu ché'e siyen á'ujtzaahuate'e se'ɨ́jna jɨme'e sej nu'u seɨ́j jetze ajtéme'ecan ɨ́ teáata'a. Naími'i pu ayén tejá'amuacɨ'ɨti, tɨ pua'a niyen tejá'amuavaɨre'e inee, i nej i'i Pablo na'ari a'ɨ́ɨn Apolos ayén tejá'amuavaɨre'e nusu a'ɨ́jna ɨ́ Pedro. Tɨ pua'a ayén a'ɨ́jna jɨ́n rɨ́'ɨ tejamuaatá'an ɨ́ Dios a'ɨ́jna jɨme'e tɨ́j na'a tɨ íiyen seijre'e chaanaca japua nusu sej siyen ruuri huateáturan na'ari sej siyen huácui'ini, ti'itɨ tɨ a'ij tɨ ayén íjii tí'iseijre'e ca'ɨ́n ti'itɨ tɨ ayén teja'uré'enejsin, naími'i pu ayén tejá'amuavaɨre'en. 23Seajta mú'een, ayée xu se'ɨ́jna jetze ajtéme'ecan ɨ́ Cɨríistu'u, ajta a'ɨ́ɨn Cɨríistu'u, a'ɨ́ɨ pu ajta Dios jetze ajtéme'ecan.

will be added

X\